Hechos 9

Sauloha bedaxxuna neda ge Jesús‑ni

(Hch. 22:6-16; 26:12-18)

1Sauloha nna birula rudú siina rudhaka disana ka benne chi ria leke ge Jesús benne anke Xxanari'iha, rana ke deki uttibana ke. De nuha nna ugíana lo bixxudi xeniha 2gwannabana kini ute nuha yetsi dhenna ki tsiana daka Damasco‑ni kini aníha nna gapana lo neda satta'ana lhe'e ka yo'o ata rudheti ka nu Israel‑ni ka tisa ge Tata Do Yebáha kini sadaxxuna ka benne chi bedaxxuke neda ge Jesús‑ni, nuxaba ankake, si ankake nuila lhe si ankake nubiyú lhe. Udaxxuna ke nna uxxigana ke, nianna echena ke lhe'esi Jerusalén‑ni. 3Ttaka tti chi diana isinna lhe'esi Damasco‑ni, ttiruba ttu nnelaba biria ttu xiani dana yebáha uyu'una abi'iba kwe'eni. 4Lana nna ubixxi lo ttebana lo yu, nianna tti biyieninna tsi'i ttu benne rabie na:

―¡Saulo! ¡Saulo! ¿Beaka neti danalhalu rudhaka disalu?

5Sauloha nna unnaba tisana, rana:

―¿Núle nuná xa tata?

Benneha nna bekabie rabie na:

―Netiba nuní Jesús benne danalhalu rudhaka disalu. [Tsitsiba anka kini dhaalu edúlu lo nu ruttisinna lu‑na.]

6Lana nna itú rixidibana de rasi xxattinna, nianna tti unnena rana:

―Tata Xisi to, ¿bí raka lelu unia?

Labie nna ree na:

―Beyadha nna uta'a lhe'e yiesi‑na. Lhe'e yiesi‑na kixxi'akinna lu bixa anka nu uinlu.

7Ka nubiyú dia len Sauloha nna paba use'ekana, uka télakinna tti biyienkinna tsi'i benne unneeha, ttaka nna lanúbie bilákinna. 8Sauloha nna beyadha ttebana lo yu, ttaka tti chi bedhalina ka iyya loniha nna birua uka ilenna. Laxkala itú nalhibakana náni chibuka bisin lenkana na lhe'esi Damasco‑ni. 9Niha‑ba udona tsunna ubisa, labí uka ilenna, lhe labí utona yetta lhe nigaba a u'uyana inda lhe.

10Lhe'esi Damasco‑ni, niha do ttu nubiyú ria leni ge Jesús‑ni. Nuha tee láni Ananías. Nubiyúha bele'enna Jesús benne anke Xxanari'iha. Tti bele'enna benneha nna rabie na:

―¡Ananías!

Lana nna bekabina, rana:

―Nii doa xa tata.

11Jesús benne anke Xxanari'iha nna rabie Ananías‑ni:

―Udú lii nna ugía ata tee neda nu tee láni Neda Lhixxa. Lhe'e lisi Judas‑ni, niha innaba tisalu ge ttu nubiyú tee láni Saulo. Nuha ankana ge lhe'esi Tarso nna dona rinnena len Tata Do Yebáha lhe'e lisi Judas‑ni. 12Nianna chi bele'enna ttu nubiyú tee láni Ananías, nuha uta'ana uxxua náni ikini kini beyali ka iyya loniha.

13Ananías‑ni nna bekabina gebie rana:

―Tata Xisi to, ixe ka benne chi utixxi'akanie neti ge nu ruin nubiyú ralu‑na. Yalhá nu chi bedhakana ka benne gelu se'e Jerusalén‑ni. 14Nnanna nna chi dana nii kumu de chi begwe ka bixxudi xeniha na lo neda kini udaxxuna ka benne chi ria leke gelu.

15Ttaka Jesús benne anke Xxanari'iha nna rabie na:

―Ugía, kumu neti chi bekwea nubiyúha kini idhelhaa na tsiana kixxi'ana kia len ka nu dittu lhe len ka nu rinnabia gekani lhe, anágaba kixxi'agabinna ka nu Israel‑ni lhe, 16kumu neti ule'enia na xxeniba anka elha disa uyúna delo ni'a kia.

17Nianna dia tteba Ananías‑ni. Tti bisinnaha nna uta'ana lhe'e yo'o ata do Saulo‑ni. Nianna tti uxxua náni ikini nna rana na:

―Betsi to, Jesús benne anke Xxanari'iha, labe nuha bele'e loe len lu tti yu'ulu neda dalu nii. Lagabe udhelhe neti kini eyali ka iyya lolu‑na lhe kini isia Espíritu ge Tata Do Yebáha tsu'e itúba latilu lhe.

18Looraha tteba nna ttiba ttu nu betúa bea loni nna belá ttebinna. Nianna tti udú liina nna udi ttebana inda. 19Iki de nuha nna utona yetta nna bedú tsitsi ttebana.

Sauloha rigixxi'ana ge Jesús‑ni lhe'esi Damasco

Sauloha ttu chupa ubisaruba udona len ka benne chi ria leke ge Jesús‑ni se'e lhe'esi Damasco‑ni. 20Nianna udulo ttebana riana lhe'e ka yo'o ata rudheti ka nu Israel‑ni ka tisa ge Tata Do Yebáha, niha rigixxi'ana ge Jesús‑ni. Rana kana deki benneha anke Xi'in Tata Do Yebáha.

21Iyába ka nu riyienkinna nu rigixxi'anaha, rugía ya'abakana rákana:

―¿Laaba nuníba nuha rekina ruinna utse'e loona ka nu chi ria lekani ge Jesús‑ni lhe'esi Jerusalén‑ni lhe dágabana nii kini udaxxuna ka nu se'e nii nna taga'ana kana lo ná ka bixxudi xeniha?

22Ttaka Sauloha nna adíla itú iki itú leni rigixxi'ana axtaba ruchixxina iki ka nu Israel se'e lhe'esi Damasco‑ni kumu rigixxi'ana deki Jesús‑ni nuha anke Cristu.

23Isába gwadána, nianna tti unne len luesi ka nu loni ge ka nu Israel‑ni, rákana deki uttikana Sauloha. 24Ttaka Sauloha nna ute dábinna nu re lekani udhakakana naha, lhe binana deki rela resába se'ekana ruyú tsitsibakana ro'o yiesiha kini ganna chi eriana niha nna uttikana na. 25Ttaka ka benne chi rudhetinna ka tisa ge Jesús‑ni nna begu'uke na lhe'e ttu sumi nna bechidake na lati de'e rilhi abi'iba kwe'e yiesiha ttu lo rela. Aníoka nna ulána, abittu bettikana na.

Sauloha besinna lhe'esi Jerusalén‑ni

26Tti besin Sauloha lhe'esi Jerusalén‑ni, nianna benna tatsána ka benne chi ria leke ge Jesús‑ni se'e niha. Ttaka iyába ka benneha rasibakanie na kumu labí ria leke deki lana chigaba ria leni ge Jesús‑ni. 27Nianna tti che Bernabé‑ni na gwatso duna na arlo ka apóstol ge Jesús‑ni nna utixxi'enna ke gasina bilen Sauloha Jesús benne anke Xxanari'iha tti yu'una neda diana lhe'esi Damasco‑ni lhe utixxi'agabin Bernabé‑ni ke gasina unne len Jesús‑ni Sauloha. Anágaba nna utixxi'agabinna ke gasina unne Sauloha itú iki itú leni tti utixxi'ana ge Jesús‑ni lhe'esi Damasco‑ni. 28Lhe'esi Jerusalén‑niba beya'an Sauloha udona ttu satti. Niha ugweki lenna ka apóstoal nna lanú nu besuna, beria beta'abana lhe'esiha, 29labí usinna rigixxi'ana ge Jesús benne anke Xxanari'iha lhe anágaba nna ridakagaba lenna ka nu Israel‑ni, ka nu rinnekana tisa griegu. Ttaka ka nuha nna rulha lekani uttikana na. 30Tti chi bina adí ka benne chi ria leke ge Jesús‑ni ge nu rulha le ka nuha uinkana, nianna bebeake Sauloha nna decheke na lhe'esi Cesarea. Debá niha nna bedhelhake na lhe'esi Tarso.

31Ka benne chi ria leke ge Jesús‑ni se'e itúba daka Judea lhe daka Galilea lhe daka Samaria lhe, ka benneha xen su lasiba se'eke lhe gwa diabake rise'e tsitsiruke lo neda ge Tata Do Yebáha lhe rudo tsitsibake tisa gebie lhe, anágaba Espíritu geeha gwa rakagaba lanie ke kini raniruke.

Pedruha beyonie benne rani tee lábie Eneas

32Tti reki Pedruha itúba ka daka niha, la'ania ugíagabana gwalannina ka benne chi ankake ge Tata Xisiha se'e lhe'esi Lida. 33Niha gwaxxakana ttu benne tee lábie Eneas. Benneha chi uka ttu xxunu ida yu'e lo ta'a daa yatti latie. 34Pedruha nna rana benneha:

―¡Eneas, beyadha! Jesucristuha chiba beyonie lu. ¡Beyadha nna bodapa ta'a gelu‑na!

Eneas‑ni nna beyadha ttebe. 35Nianna iyába ka nu se'e lhe'esi Lida lhe ka nu se'e daka Sarón, tti bilákinna chiba beyaka benneha, la'ania nna bedaxxukana neda ge Jesús benne anke Xxanari'iha.

Pedruha benna kini Dorcas‑ni beyaka benna

36Lhe'esi Jope do ttu benne nuila ria lebie ge Jesús‑ni. Benneha tee lábie Tabita. Len tisa griegu nna tee lábie Dorcas. Benne nuilaha yalhá rudo lebie runie iyába nu anka tse lhe rute nábie len ka benne abittu geke tee lhe. 37La'ania uni Tabita‑ni nna uttibe. Iki de chi bogadikaneha nna tti belhapikane lhe'e attu yo'o do gwetsá. 38Kumu de gaxxa galá re lhe'esi Jope len Lida, de nuha nna ka benne chi ria leke ge Jesús‑ni, tti binake deki lhe'esi Lida‑niba re Pedruha, nianna udhelhake chupa ka benne biyú kini ugíake gwannabake lenna, ráke na:

―Bediuba lelu utá lhe'esi Jope‑ni.

39Pedruha nna dia tteba lenna ka benneha. Tti chi bisinna lhe'esiha nna ulhapi ttebake na lhe'e yo'o do gwetsá ata tee benne yattiha. Nianna bitupa tteba ka benne nuila bidabiha abi'iba kwe'e Pedruha, ribesike nna rula'akanie na ka xalho lhe ka tulhá utiyya Tabita‑ni tti sa doe anka banieha. 40Pedruha nna bebea ttebana iyába ka benne se'e lhe'e yo'o ata tee benne yattiha, nianna tti bedú xibini nna unnabana len Tata Do Yebáha nna tti bodetta loni ata tee benne yattiha nna rane:

―¡Tabita, beyadha!

Benne nuilaha nna begiti tteba lobie. Tti bilánie Pedruha nna beyadha ttebe bedoe. 41Pedruha nna bodaxxu ttebana nábie nna bodhú liine. Nianna tti beyaxina ka benne nuila bidabiha lhe adíru ka benne chi ankake ge Jesús‑ni lhe, nianna tti bodúna Tabita‑ni arloke. 42Ka nu se'e lhe'esi Jope‑ni tti chi binakana nu chi ukaha, la'ania nna ixebakana ugía lekani ge Jesús benne anke Xxanari'iha. 43Pedruha nna isáruba udona lhe'esi Jope‑ni, udona lhe'e lisi ttu benne rukusie ka yieti, tee lábie Simón.

Currently Selected:

Hechos 9: zae

Highlight

Copy