Hechos 10

Pedruha rigixxi'enna Cornelio‑ni ge Jesús‑ni

1Udo ttu nubiyú lhe'esi Cesarea tee láni Cornelio. Nuha ankana nu baninna ttu gayua (100) ka soldadu ka nu tee lákani Italiano. 2Nubiyúha lhe iyába ka benne se'e lhe'e lisiniha ankake ka benne rudoruna leke ria leke Tata Do Yebáha lhe rudo tsitsibake tisa gebie lhe. Anágaba Cornelio‑ni yalhá redá leni rutena nu teeba geni len ka benne Israel‑ni, ka benne abittu geke tee lhe anágaba satíaba rilhapina tisa len Tata Do Yebáha lhe.

3Ttu sá do Cornelio‑ni ttiba ttu retin tsunna, nianna tti bele'enna ttu anjeli ge Tata Do Yebáha, bilá saabinna benneha ute'e lhe'e yo'o ata donaha, nianna tti rabie na:

―¡Cornelio!

4Cornelio‑ni nna rulanni tsittabana lo anjeliha nna itú rasibinna, rana benneha:

―¿Bí raka lelu xa tata?

Anjeliha nna rabie na:

―Tata Do Yebáha chiba biyieninie ge ka tisa rilhapilu lenbie lhe anágaba nna gwa rapabe kwenta ge nu tse ruinlu de redá lelu rutelu nu teeba gelu len ka benne abittu geke tee. 5Nnanna nna udhelha ttu chupa ka nubiyú kini tsiakana lhe'esi Jope taxxíkana Simón nu tegaba láni Pedro. 6Lana dona lhe'e lisi benne tegaba lábie Simón, delába benne rukusie ka yieti. Benneha doe gaxxaba ro'o indatooha. Labie innábie bixa anka nu uinlu.

7Iki de chi deyya anjeli unne len Cornelio‑ni, lana nna uxi ttebana chupa ka nu riben sina geniha lhe attu soldadu nu satíaba rixuinna lhe'e lisiniha, nu gwa rudo tsitsiruna tisa ge Tata Do Yebáha. 8Uxina ka nuha nna iki de chi utixxi'enna ka nuha iyá nu gwatenaha, nianna tti udhelhana ka nuha diakana lhe'esi Jope.

9Beyeki sáha laka yu'u ka nu udhelha Cornelio‑ni neda diakana nna chiba isinkana lhe'esi Jope‑ni. Pedruha nna ttiba tu retin tsi'inu (12) ugwapina gwetsá iki yo'o ata donaha, kini rilhapina tisa len Tata Do Yebáha. 10Nianna tti bituinna nna raka leni gona, ttaka laka raka elho gonaha, lana nna bele'enna 11biyali yebáha, nianna ugwadi ttiba ttu lari xeni xiga itapaba ka ro'oni, dana radina lo yu. 12Lhe'e lariha yu'u iyá looba ka nimala: yu'u ka nu ra'aya lhe'ekani lo yu lhe ka nu ridá len ni'a nákani lhe ka nu sia xxilakani lhe. 13Nianna tti biyieninna tsi'i ttu benne unnebie, rabie na:

―Pedro, udú lii, betti ka nuná nna uto kana.

14Ttaka Pedruha nna bekabina, rana:

―Labí xa tata. Neti ni tsa labí chi uto neti nu abittu ga'anna gotu lhe nigaba labí chi utoa ttu bixa nu anka tsiga arlo Tata Do Yebáha.

15Benne rinneha nna bedennebie attu libe, rabie na:

―Nu chi bochari Tata Do Yebáha bittu kixxalu lá nuha nu tsiga.

16Tsunna libeba unne benneha, nianna tti beyapi lariha, deyyana yebáha.

17Pedruha nna si dolana rulaba leni ge bí diani nu bele'ennaha, nianna tti chi bisin ka nubiyú udhelha Cornelio‑ni ro'o lisi Simón benne rukusie ka yietiha, kumu chiba gwaxxakana ata do yo'o ge benneha. 18Nianna tti unnaba tisakana, rákana: “¿Si níunni do Simón, benne tegaba lábie Pedro?”

19Pedruha nna sa dolana rulaba leni ge nu bele'ennaha, nianna tti ra Espíritu ge Tata Do Yebáha na:

―Ne tsunna ka nubiyú se'e ro'o yo'o‑ni regilakana lu. 20Bedú lii nna beyadi ugía lenkana. Abittu udúna lu kumu netiba udhelhaa ka nuní.

21Pedruha nna beyadi ttebana ata se'e ka nubiyúha nna rana kana:

―Neti nuní benne regilale. ¿Bí ge dale nii?

22Ka nuha nna bekabikana geni rákana na:

―Ri'itu datu kumu Cornelio benne bananie ttu gayua (100) ka soldaduha, benneha udhelhe ri'itu. Labie anke ttu benne runi attiba ankaba geni lhe rudo tsitsibe tisa ge Tata Do Yebáha lhe. Iyába ka benne Israel‑ni ráke deki tseba runie, nna ttu anjeli ge Tata Do Yebáha ree bie deki gaxie kwinalu lhe'e lisieha, kini udo nage ge nu kixxi'enlue.

23Niala nna tti bega'a Pedruha ka nuha lhe'e yo'o ata donaha. Niha‑ba beya'ankana loolhaha. Attu dilaha‑liba nna dia lenna ka nuha. Diagaba lenna attu chupa ka betsi to geri'i se'e lhe'esi Jope‑ni. 24Beyeki sáha nna bisinkana lhe'esi Cesarea. Niha‑ba chi du Cornelio‑ni ribedana kana itupa lenna ka nu chi uxinaha, delába ka benne raka luesiniha lhe ka benne se'e tse lennaha lhe. 25Tti chi bisin Pedruha ro'o yo'o ge Cornelio‑ni, lana nna biria ttebana gwatsána Pedruha nna bedú tteba xibini arloni kini utsá loni na. 26Ttaka Pedruha bodhú lii ttebana Cornelio‑ni, nianna tti rana na:

―¡Bedú lii! Yuu neti lanú nu ankaa, kumu ttigabalu ankalu benne, anágaba neti bennegaba ankaa.

27Laka rinne lenna Cornelio‑ni nna uta'ana lhe'e yo'oha, niha bilenna ixeru ka benne chi tupake. 28Nianna tti rana ka benneha:

―Lebi'i gwa yu xeabale, bia bennabi getu‑ni labí rugwelhana ri'itu, ka benne Israel, utsátu ka benne abittu ankake benne Israel, nigaba ga'atu lhe'e lisike lhe. Ttaka Tata Do Yebáha chi bela'anie neti deki labí dika upeya ttu benne: “Lu tsigaba ankalu arlo Tata Do Yebáha o satsaba ankalu lhe.” 29Laxkala tti bisia ka benne‑ni nna ráke neti: “Dhalu len ri'itu”, neti nna labí bedúa tisa nna daa tteba lania ke. Nnanna nna raka lasia kixxi'ale, ¿bí lo ni'a ge nna uxile neti?

30Cornelio‑ni nna bekabina ge Pedruha, rana na:

―Chi ute ttapa ubisa, ttiba ura‑ni rea lhe'e yo'o kia‑ni [rutte ubina lhe'a], ttiba tu retin tsunna doa rilhapia tisa len Tata Do Yebáha. Nianna ttiruba chi uka xxe ttu benne biyú udúe arloa nukue ttu xo raka ragalhaba loni, 31nianna tti rabie neti: “Cornelio, Tata Do Yebáha chiba biyieninie ge ka tisa rinnelu lenbie lhe chigaba upe kwenta ge nu tse ruinlu de rutelu nu tee gelu len ka benne abittu geke tee. 32Nnanna nna udhelha ttu chupa ka benne kini tsiake lhe'esi Jope‑ni taxxíke Simón nu tegaba láni Pedro. Nuha dona lhe'e yo'o ge ttu benne tegaba labie Simón benne rukusie ka yieti. Benneha dobie gaxxaba ro'o indatooha. [Tti isia Pedruha nna kixxi'enna lu bixa anka nu uinlu.]” 33Aníha uka nna udhelha ttebaa ka benne‑ni kini betetilake kwinalu. Lu nna tseba benlu dalu. Nnanna nna niiba chi se'e iyábatu arlo Tata Do Yebáha, kini udo nagatu ge iyá nu chi rabie lu kixxi'enlu ri'itu.

34Nianna tti unne Pedruha, rana:

―Nnannaligaba lhixxa rába chi rite dati deki Tata Do Yebáha ttúba rulanni benneha ri'i, labí rugwerue lidhaka ttu benne tti attu benne, 35sinuki gwa rulabibe ka benne rudoke tisa gebie lhe ruinke nu dika ixú lhe, meskiba se'eke lhe'e gaxaba yiesi. 36Tata Do Yebáha unnebie len ri'itu ka benne Israel, utixxi'anie ri'itu ka tisa tse, delába ka tisa rigixxi'akana gasina ese'e tse ka benne lenie de tsia leke Jesucristuha. Jesucristuha nuha anke Xxana iyá tteri'i. 37Lebi'i gwa yúbale nu uka itúba Judea‑ni, udulona daka Galilea‑ni iki de tti chi ugweki Juan‑ni rana ka benne deki raka doelha gadike inda 38lhe anágaba gwa yúbale gasina bete Tata Do Yebáha Espíritu geeha len Jesús ge Nazaret‑ni, lhe bengabe kini ra tsitsi le benneha lhe anágaba gwa yúgabale gasina ugweki Jesús‑ni benie nu tse lhe beyonie iyába ka benne rugwe nu xxegwiha ke elha disa. Benie iyá nuní kumu Tata Do Yebáha gwa udúba lenie bie. 39Ri'itu biyú lotu iyá nu benie tti ugwekie daka Jerusalén‑ni lhe itúba daka Judea‑ni lhe. Iki de nuha nna tti bettikane betákane lo ttu ya kurusi. 40Ttaka Tata Do Yebáha belhidha benbe benneha tti chi uka tsunna ubisaha, nianna benie kini benneha bele'e lobie. 41Labí len iyá ka benne bele'e lo benneha, suna len ri'ituruba ka benne chi bekwe Tata Do Yebáha, suna len ri'ituruba bele'e lobie kini bilentu, delába ri'itu ka nu utotu lhe u'uyatu lenie tti chi beyadhe lagwi ge ka benne chi uttiha. 42Nianna tti udhelhe ri'itu kini tsekitu kixxi'entu ka benne lhe innátu deki gwalí labie chi bedú Tata Do Yebáha kini ake xueda unie elhuxtisi ge ka benne anka bani lhe ka benne chi utti lhe. 43Ge Jesús‑ni nuha utixxi'a iyába ka benne ukake profetaha, ráke deki iyába ka benne tsia leke gebie, de tsiaba leke gebie nna gwadíba Tata Do Yebáha elha xen lasi ge ka tulha ruinke.

44Sa dula Pedruha rigixxi'ana nuha, ttiruba chi bisia Espíritu ge Tata Do Yebáha uyu'e lati iyába ka benne se'e gwedo nagaha. 45Ka benne Israel‑ni, ka benne chi ria leke ge Jesús‑ni, delába ka benne daa lenke Pedruha, rugía ya'abake tti bilákanie deki gwa rutegaba Tata Do Yebáha Espíritu geeha len ka benne abittu ankake nu Israel, 46kumu de riyienkanie rinne ka benne tupa niha ka tisa subi lhe ráke: “¡Xxeniba ra le Tata Do Yebáha!” 47Nianna tti ra Pedruha ka benne daa lennaha:

―¿Katte ra nuxa ttúri'i usunari'i a gadi ka benne‑ni inda, kumu ka benne‑ni chigaba uxíke Espíritu ge Tata Do Yebáha ttiba ri'i?

48Nianna tti ben Pedruha mandadu kini ugadikana ka benneha inda nna udettikana lá Jesús benne anke Xxanari'iha tti gadike indaha. Iki de nuha nna tti unnaba ka benneha len Pedruha kini eya'anruna lenke attu chupa ubisa.

Currently Selected:

Hechos 10: zae

Highlight

Copy