Romã 7

Jirekoa rè tè poroã'ã remẽwarà

1Kee a'e pejẽ, eretãrãgwerà kõ. Pekuwapa ayvu pojy rewarà. Ajawyi kee jaa rè tapeja'a peiko. Jakuve jẽ remẽ kõrijõ tè ayvu pojy ikasi janeupe ipi. Jakãjã maire nikasi janeupe ky'y. 2Kee itõkõ ojikusiwapa wãivĩgwerà rewarà:

Ojireko paire, awyje omẽnà pewarà rõmõ tè ekoi. Ojeeve ekoi ãmẽ kupa ky'y. Ãwĩvo ojiwyi nopoi'ãi iko kupa, uve jẽ kupa remẽ. Ajamã'ẽ imẽnà sõ okãjã sikaepo ky'y remẽ, ãmẽ si omẽnà revewarà rõmõ rõwã ekoità ãmẽ ky'y. Terekwarerà rõmõ tè ekoità ky'y. Ajawyi ãwĩ ayvu pojy nikasi'ãi ijupe ky'y. 3Nimanyvoi ojireko mijẽ remẽ ãmẽ. Uve jẽ sõ imẽnà remẽ, nikatu'ãi ãmõ kwaima'e reve ojireko. Ayvu pojy ikasi jẽtà ijupe ãmẽ. Ajawyi kee eu kuwa ijupe: “Nojimoavai omẽnà pè mã'ẽ”, eu kuwa ijupe ãmẽ. Ajamã'ẽ okãjã maire, nimanyvoi ojireko mijẽ remẽ.

4Aepo vo ve teve peneko, eretãrãgwerà kõ. Jypy remẽ kee pejẽ: “Janejare'e ayvu ivo tekoua rewarà rupi katu jaiko remẽ tè katu Janejare'e janerereko katutà”, pejẽ ipi mijã. Ayvu ivo tekoua rè tè penako'i ipi mijã. Ajamã'ẽ age'e remẽ Jesu katuaya rè tè penako'i ky'y. Eevejẽ peiko. Ajawyi a'e omãnõ remẽ, eevejẽ pemãnõ, koiwerà pewarà mõ. Ayvu ivo tekoua rewarà pewarà mõ pemãnõ mã'ẽ vo 'ejẽ peiko. A'e rerovijaa rè rõwã teako'i ky'y. Kiristu opoera maekwerà koty rewarà tè pejẽ ky'y. Janejare'e reruparà mõ tè kuwa peiko ãmẽ ky'y. 5Ayvu ivo tekoua rewarà rè janerako'i remẽ, japosiko ywete jẽ janeaiwererà rè jaiko mijã. Ayvu ivo tekoua rupi nivoia sikuwa mijã. Ajaate nivoia ywesõ sipota mijã. Ajawyi Janejare'e pyri rõwã jaikotà jakãjã maire mijã. 6Ajamã'ẽ age'e remẽ ayvu ivo tekoua rewarà rè nijanerako'i jaiko ky'y. Jesu katuaya rè tè janerako'i jaiko ky'y. Ajawyi Janejare'e “ivo katu mã'ẽ tè ene” e'i janeupe. Jesu omãnõ janeupewarà mõ remẽ, eevejẽ jamãnõ mã'ẽ vo tè jane ky'y. Ajawyi age'e remẽ Janejare'e remimota rupi tè jaikotà, ipy'a rupi katuwarà rõmõ. O'Ãg pè janemotekokuwaoka janemokasi ta'evo jaiko ipi. Janereko pyaukwerà tè oinõ jane ky'y.

Moisesi oporegeta jẽ janeaiwererà rè maekwerà rewarà

7Manyvo ja'età põ ãmẽ? Imanyvo põ ayvu ivo tekoua rewarà? Ãnĩ! Nimanyvoi. Ikatu tè. A'e rupi rõwã sikõ akuwa nivoi tekoua rewarà? Ãmõ, ivo tekoua rewarà akuwa teve. Nivoi aiko remẽ, a'e eaiwererà omojikuwaoka teve eupe ipi. Ma'e. Kõitokõ kee jaa ojikusiwapa: “Kee tapejẽ: ‘Emoma'e rõmõ kuwasi ãwĩ mijã’, tapejẽ e'ã peiko jomoma'e kõ pè”, e'ipa ojikusiwa.#Jisyry. 20.17; T.M. 5.21 Aepo jaa nojikusiwai sõ remẽ, eaiwererà nakuwa'ãi kuwa mijã, a'evo aiko tite remẽ. Ajawyi ikatuay aepo Janejare'e okusiwaoka. 8Ajamã'ẽ ijayvu ivo tekoua rewarà rè ajipy'amogeta remẽ, ãmẽ si epy'a aiwerà emo'eai a'e rupi rõwã taiko ky'y, ãwisõ apota katu ipe ivo aiko mijã. [Epy'a aiwerà tè emojitupioka koivo kõ moma'e rè ipi.] Ajawyi nivoi aiko ipi. Joma'e pyya rè ajimo'eai aiko ãmẽ ipi. Ivo tekoua rewarà jikusiwarerà naikoi sõ remẽ, epy'a aiwerà nojimokasioka'ãi kuwa eupe mijã.

9Ije ayvu ivo tekoua rewarà nakuwaive mijã. Ajawyi, “Ekatu teipõ aiko Janejare'e rovake”, a'e tite eupewarà mõ ipi mijã. Ajamã'ẽ ajaire akuwapa ky'y remẽ tè tite, kee a'e ky'y: “Ha! Nivoi aiko Janejare'e rovake!” a'e ky'y. Ajare ikuwa paire ywesõ epy'a aiwerà ikasiay eupe ky'y. Nemokasiokari erereko ky'y. 10Ajawyi kee a'e ywe'e tite ajimotekokuwa: “Ajimokasi ywetetà ayvu ivo tekoua rewarà rupi katu tè aiko ky'y. Ãmẽ tè Janejare'e pyri aikotà akãjã remẽ”, a'e ywe'e tite. Ajamã'ẽ a'e rupi naiko'ãi sire'e. Ajavy jẽ tesõ aiko ipi. Ajawyi, “Aje, Janejare'e emomorijauokatà ky'y, akãjã remẽ, nivoi aiko rewarà mõ”, a'e tite mijã.

11A'evo natekokuwai aiko mijã. Nivoi tekoua, ivo tekoua rewarà jikusiwarerà omo'y ere emoripeoka mõ. Ajawyi a'e kõ rè ajipy'amogeta remẽ, kee a'e: “Eeee! Amãnõ remẽ, manyvo na'e'ãi aẽ aa Janejare'e pyri, nivoi aiko rewarà mõ”, a'e tite.#Jinõ. 3.13 12Aja jare kee a'e jẽ. Janejare'e ayvu ivo tekoua rewarà ikatuay. “Kee tapeiko” e'i mã'ẽ ikatuay. I'ete e'i mã'ẽ. A'e rupi jakuwa manyvo Janejare'e opota tijaiko ipi. Ivo tekoua rè jajimotekokuwa teve jaiko ipi. Aje ikatuay ijayvukwerà.

13Ajawyi kee taoty e'ã: “'Aha! Temirovija rõwã põkõ Janejare'e ayvu!” taoty e'ã. Ikatuay ijayvu ivo tekoua rewarà. A'e rewarà mõ rõwã ajimomorijauokatà! Nivoi mã'ẽ tè ivo mã'ẽ rupi emoaioka nivoi mã'ẽ rupi taiko. Ajawyi evote eaiwererà rewarà mõ tè, ajimomorijautà aiko. Janejare'e okusiwaoka maekwerà rupi a'evoa sikuwa.

Janepy'a aiwerà kasia rewarà

14Sikuwa Janejare'e 'Ãg tè omojikuwaoka wayvu Moisesi pè, tokusiwa janeupewarà mõ maekwerà. Ajamã'ẽ nivoi mã'ẽ ikasi ere ipi. Eremimota aiwerà rupi tè aiko ipi. Nivoi mã'ẽ remijarà rõmõ tè ije aiko maevo sõ tite. Najimomoioka kuwa'ãi ikasia pe wyi aiko ipi. 15Nakuwai ereko. Apota ipe ivo eikoa mijã. Napotai 'eteay ivo e'ãa rupi aiko mijã. Ajamã'ẽ a'evo ipe aiko remẽ, ivo e'ãa rupi ywesõ aiko jẽ ãmẽ ipi! Napotai upi aiko mã'ẽ rupi ywesõ aiko mijã! Ajamã'ẽ manyvo nareko'ãi apoi iwyi. Eremimota aiwerà ywesõ ikasiay eupe. Ajare kee a'e ipe: “Moma'e rã sõpõ nivoi aiko! Apota ipe ivo aiko mã'ẽ mijã!” a'e ipe aporegeta eupe ipi.#Kar. 5.17 16Ajawyi kee a'e tite eupe mijã: “Aje ywete Janejare'e ayvu ivo tekoua rewarà ikatuay wete janeupewarà mõ ipi. Ajamã'ẽ naiko kuwa'ãi upi mijã”, a'e tite eupe mijã. 17Ije ywe'e rõwã nivoi aiko. Epy'a aiwerà tè nivoi ererekooka, nivoi taiko ipi. A'e ywesõ ikasiay eupe ipi. Ajawyi a'evo aiko ipi. 18Kee jaa akuwa ipe erewarà. Nekatui aiko. Nuvei ikatu mã'ẽ epy'a pupe ipi. Eremimota aiwerà kõrijõ tè uve epy'a pupe. Ajawyi apota ipe ivoa rupi aiko ipi mijã. Ajamã'ẽ naiko kuwa'ãi sire'e upi. 19Ãwisõ apota katu ipe ivoa remẽ, naikoi sire'e upi ipi. A'evo ve, ãwisõ napotai epe nivoi eikoa remẽ, nivoi jẽ tè aiko ãmẽ ipi. 20Ajawyi kee a'e. Evote rõwã ãwĩvo aiko eremimotare'ãma rè aposiko aiko ipi. Epy'a aiwerà ojinõma teãmã epy'a pupe rewarà mõ tè ãwĩvo aiko ipi. 21Ãmẽ, “Ivo katu mã'ẽ rupi taiko”, a'e remẽ upi upi, nivoi mã'ẽ ojikuwa epy'a pupe ãmẽ ipi. Emõtã maevo sõ tite, nivoi eikoa ipi. “Ejo ekoty”, e'i maevo sõ tite ije ipi. 22Epy'a pupe apota ywete ipe Janejare'e remimota rupi taiko ipi mijã. 23-25Ajamã'ẽ nivoi aiko mã'ẽ ywesõ oẽ e'arà kyty ipi. Nivoi mã'ẽ ojiapisi 'ejẽ ivo katuay epy'a pupe mã'ẽ reve iko ipi. Nivoi mã'ẽ emõtã maevo sõ tite eaiwererà kyty taiko, ãwisõ amãnõ 'atà tè aiko remẽ. Epy'a aiwerà areko epy'a pupe rewarà mõ a'evo erereko ipi. Ajawyi ajimonyijay ere aiko ipi. Kee a'e ãmẽ: “Haa! Erereko katuarà mõ rè kuwasi erako'i mijã! Uve kuwa põkõ eaiwererà wyi emomoioka kuwa mã'ẽ mõ?” a'e eupe. Uve! Janerõvijã Jesu Kiristu tè a'evo kuwa erereko. A'e tè janemomoioka kuwa a'evoa wyi ipi. [A'e rè tè jajimokasi ãmẽ ky'y. Ikatuay!] Ajawyi sitõ Janejare'e simoe'e Jesu rewarà mõ ipi.

Currently Selected:

Romã 7: oymNT

Highlight

Copy