Romã 3

1Ajare manyvo eu? Juteu rõmõ isaky mã'ẽ pè ywesõ põ ikatu? Ojiemosĩpire'o ojimosã'ãga mã'ẽ pè ywesõ põ ikatu? 2Õ'õ. Ikatu Juteu rõmõ isaky remẽ. Ma'e rewarà mõ. Juteu kõ pè ypy Janejare'e omojikuwaoka wayvu ivo tekoua rewarà mõ. A'e rewarà mõ ywesõ ikatu ijupe kõ. 3Kee a'e. Mape reme ãmõgwerà wenu ipe remẽ, noerovijari kupa. Okuwapa ipe kupa. Ajamã'ẽ opoi tè weminuwerà wyi kupa. Ajare manyvo e'ità põ Janejare'e ãmẽ? Opoi tary ve põ wayvukwerà wyi imotee ãmẽ? 4Ãnĩ! Nopoi'ãi. Aje ywete e'i teãmã mã'ẽ tè Janejare'e ekoi. Mirà kõ ãmẽ iwari py'a iko ipi. Janeayvu jamotee ipe remẽ, Janejare'e nomotee'ãi wayvukwerà ãmẽ ipi. Aekwe ekwery ve jẽ ekoità. Ajare kee e'i eewarà Janejare'e kareta rè:

“Neayvukasi ipi mã'ẽ tè ene.

Ene ywesõ nejikuwatà aje ywete ere mã'ẽ rõmõ neporegeta remẽ ipi.

Ajawyi ãmõ kõ rovake nemojaiwe ipe kupa remẽ,

ene ywesõ nejikuwatà ivo katu mã'ẽ rõmõ”, e'i Janejare'e pè maekwerà.#Jĩg. 51.4

5Jane ãmẽ temirovija rõmõ rõwã jaiko mã'ẽ ojikuwa ãmõ kõ pè ipi. Ãmẽ kee e'i janere omãjã kupa: “Haa, a'evo tè ipi kupa remẽ, Janejare'e jẽsi ivo katuay wete ekoi mã'ẽ tè!” e'i kupa. A'evo nivoi jaiko remẽ ywesõ Janejare'e ojikuwa ivo katuay wete mã'ẽ rõmõ. Ajawyi kee eu kuwa põ: “Ni'ei rõwã põkõ Janejare'e janemomorijau remẽ?” eu kuwa põ? 6Niĩ. Naoty'ãi! Janejare'e janemoane'e sõ janeaiwea rupi tijaiko remẽ tè katu kuwa “nivoi” eu kuwa ijupe ipi mijã. Ajamã'ẽ nijanemoane'ei. Jane tè jajimoane'e jẽ a'evo rõmõ jaiko. Nivoi sõ Janejare'e ekoi remẽ, manyvo ne'i'ãi kuwa poromosã'ãga poromoe'yi, ivo mãe kõ nivoi mãe kõ wyi mijã ãmẽ! Nijayvukasi'ãi kuwa a'evoa rè mijã.

7-8Ajamã'ẽ mape remẽ ãmõ kõ eayvunõ ipi. Kee e'i tite eupewarà mõ kupa: “‘Nivoi jaiko remẽ, ikatuay mã'ẽ ojinõtà janeupe ãmẽ ipi,’ e'i Pauru”, e'i rã'ãga kupa. Aepo 'aryvo kee e'i tite opy'a pupe iko kupa: “Emã'ẽ. Ajimowari remẽ ywesõ Janejare'e ojikuwatà aje ywete e'i mã'ẽ rõmõ. Ajawyi ãmõ kõ omoe'età Janejare'e eaiwererà rewarà mõ”, e'i tite kupa. “Ãmẽ, mano rewarà mõ põ eaiwererà rè emomorijauoka jẽtà, ãwisõ a'e rupi ikatuaya ojikuwatà remẽ? Nemomorijau'ãi kuwasi ãmẽ mijã”, e'i tite kupa. Ajamã'ẽ aepo pupegà ojimoane'e tarepe iko kupa ipi. Jevo'e katu si ijaiwea rè omomorijauokatà apijarà ãmẽ ky'y.

“Nivoi jaiko ipi mãe kõ teãmã jane”, e'i mã'ẽ

9Pirujẽ Juteu kõ rõmõ, nivoi mãe kõ teãmã ekoi kupa ipi. Ãmõ, Juteu rõwã mãe kõ ve nivoi mãe kõ teãmã teve ekoi kupa ipi. Ajawyi nivoi tekoua kasia pupewarà tepa jẽ jane jaiko. Pirujẽ! Kõitokõ poromo'epa: “Jane ywesõ janekatu ãmõ kõ wyi”, nija'e'ãi ojiupe jaiko ipi. Ojevo jẽ jajimojaiwepa jaiko ipi. 10Aepo rè kee e'i Janejare'e kareta jikusiwarerà:

“Mirà kõ põ'õ mè, nuvei 'ete ivo teãmã mã'ẽ mõ.

Nipe'ĩ'ãi Janejare'e rovake.

11Mã jẽ rõwã ipy'a mãrãkuwa katu mã'ẽ Janejare'e koty rewarà.

Nuvei 'ete ojiporijauesaoka ijupe mã'ẽ mõ.

12Ivoa wyi pirujẽ ojirovapa 'ejẽ kupa.

Ikãnĩ kãnĩ oopa kupa.

Pirujẽ opasasakai ywete iko kupa.

Mã jẽ rõwã ikatuay teãmã ekoi mã'ẽ.

Nipe'ĩ'ãi ivo katu ekoi mã'ẽ mõ.#Jĩg. 14.1-3; Jĩg. 53.1-3

13Iwari wari pirujẽ kupa ipi.

Oporegeta teitete tè poromoripea mõ iko kupa ipi.

Ayay mã'ẽ vo 'ejẽ ijayvu kõ ipi.

Poromojaiwe tè ipi. Porojuka kuwa.#Jĩg. 5.9; 140.3

14Ijayvu ai tesõ iko kupa ipi.

Ãmõ kõ pè ojimõarõ teve iko kupa ipi.

‘Timarama!’ e'i e'i koivo kõ pè iko kupa ipi.#Jĩg. 10.7

15Ojikõtevẽ jẽ tesõ porojukaa rè iko kupa ipi.

16Maipe okwa mã'ẽ rupi mãrãnai oinõ erokwa kupa ipi.

Poromomorijauokaa rè ywesõ oja'a iko kupa ipi.

17Nokuwai joe jimory katua kupa ipi.

Ojipy'amopirai tè iko kupa ipi.#Isa. 59.7-8

18‘Manyvoa rã rõmõ rõwã jamomojy kuwa Janejare'e’, e'i tite kupa ipi”,#Jĩg. 36.1

e'i ojikusiwa Janejare'e kareta rè maekwerà.

19-20Kee jaa itõkõ sikuwa. Janejare'e wayvu ivo tekoua rewarà rupiwarà kõ pè omojikuwaoka, upi katu toiko kupa. Ãmõ, jane kõ pirujẽ pè omojikuwaoka, janeupe teve. Ajamã'ẽ ijayvu rè tè jajimosã'ãga remẽ, janeaiwererà tè ojikuwa janeupe ãmẽ ipi. Nivoi teãmã jane jaiko ipi. Ajawyi ava jẽ rõwã kuwa Janejare'e ayvu ivo tekoua rupi katu ekoi, ãwisõ Janejare'e “ivo mã'ẽ tè ãwĩ” te'i ijupewarà mõ. Ajawyi manyvo nija'e'ãi kuwa ovake, ãwisõ jakuwa paire nivoi jaiko jẽ remẽ. “Nivoi mã'ẽ tè ãwĩ” e'i janeupe remẽ, nijajipija ena'ãi ãmẽ ky'y.#Jĩg. 143.2; Kar. 2.16

“Aje ywete Janejare'e poromoigooka jajirovija ee remẽ tè ipi”, e'i mã'ẽ

21Sikuwa manyvo nisireko'ãi Janejare'e ayvu ivo tekoua rewarà rupi jaiko ipi. Ajawyi ivo jaikoa rè nijanerako'i'ãi kuwa jaiko. Karamoeve Janejare'e omojikuwaoka aepo jaa. A'e rewarà tãmõ Moisesi okusiwapa amãtejẽ imojikuwaoka janeupe. Ãmõ, Janejare'e ayvu mojenuarà kõ okusiwapa amãtejẽ imojikuwaoka. 22Kee jaa tè eu. Aje ywete Janejare'e “ivo mã'ẽ tè ãwĩ” e'i janeupe ky'y, Jesu Kiristu rè jajirovija janerako'i rõmõ remẽ. Iteetejẽ mirà kõ pè aepo e'i. Ojevo jẽ a'evo janerereko, janejãvijõ vijõ jẽ, Jesu rè jajirovija remẽ.#Kar. 2.16

23Kee rewarà mõ a'evo janerereko. Jajimojaiwepa pirujẽ jaiko ipi. Nivoi 'ete jaiko ipi. Ajawyi kuipe'e tè Janejare'e katuaya wyi jaiko. 24Ajamã'ẽ Janejare'e nopotari janemomorijau, ãwisõ “Nivoi mãe kõ tojimomorijau”, e'ipa ipe remẽ. Janeporijauesa jẽ janerereko. Ajawyi okatuaya rupi nivoi tekoua pewarà wyi janerekyipa ky'y, Kiristu Jesu mãnõa rupi, a'e rupi janereru okotyre rewarà mõ ipi. Tepy e'ãte mã'ẽ vo 'ejẽ janerereko katua janeupe ãmẽ.

25-26Janejare'e nojikõtevẽi poromomorijaua rè. Jypy remẽ poroãrõ puku esa mijã. Ajaate Wa'yry omuu tomãnõ janeaiwererà repykarà mõ ky'y. A'e omãnõ remẽ kee e'ipa: “Oyte nivoi tekoua repykarà mõ ky'y. Awyjepa ky'y”, e'ipa janeaiwererà kõ pè ky'y. A'evoa rupi Janejare'e okatuaya omojikuwaoka katuay ky'y. Emã'ẽ. Aje ywete janemomorijau kuwa janeaiwererà rewarà mõ janerereko mijã. Ajamã'ẽ okatuaya rupi ivo mã'ẽ rõmõ janerereko ky'y, Jesu rè janerako'i jaiko ipi remẽ.

27-28Kee oro'e mijẽ. Ivo tekoua rupi jaiko rewarà mõ rõwã ivo mã'ẽ rõmõ janerereko kuwa. Jesu rè jajirovija janerako'i rõmõ rewarà mõ tè katu Janejare'e “ivo mã'ẽ tè ãwĩ” e'i kuwa janeupe. Ajawyi nijajimoe'e'ãi kuwa. Janejare'e tè jamoe'età ereko. 29-30Pe'ĩte Janejare'e ekoi. Ajawyi pirujẽ ojirovija ee mãe kõ pè “ivo mã'ẽ tè ãwĩ” e'i ky'y, ojevo jevo jẽ. Ãwitõ Juteu kõ pè aepo e'i, ojirovija ee kupa remẽ, ãwĩvo teve Juteu rõwã mãe kõ pè aepo e'i. Juteu kõ jare'e rõmõ'ĩte rõwã Janejare'e ekoi. Ãnĩ. Pirujẽ jane kõ jare'e rõmõ ekoi.#T.M. 6.4; Kar. 3.20 31Jesu rè jajirovija janerereko katuarà rõmõ ky'y. Aja rewarà mõ manyvo ja'età sipõ Janejare'e ayvu ivo tekoua rewarà pè? “Nikatui” ja'età sipõ? Ãnĩ. Nija'e'ãi. “Ikatuay” ja'età. [A'e rupi tè jakuwa janeaiwererà. Ivo tekoua jakuwa teve ikusiwarerà rupi. Ajawyi ikatuay janeupe ipi.]

Currently Selected:

Romã 3: oymNT

Highlight

Copy