Romã 2

“I'ete Janejare'e nivoi mãe kõ omomorijau ijaiwererà kõ rewarà mõ”, e'i mã'ẽ

1“Haa mokoi”, pejẽ aepo kõ renu. Ajamã'ẽ kee a'e pejẽ, pejãvijõ jẽ. “Haa, nivoi rõwã pãkãwĩ ekoi!” ere ãmõ kõ reko pè remẽ, neupe ve aepo eretà ãmẽ! Ivo kõ jẽ teve neiko ipi. Ajawyi manyvo nere'ãi 'ete nejipija rõmõ neiko.#Mat. 7.1; Ruk. 6.37 2Kee jaa sikuwa. Janejare'e tè ivo kuwaparà rõmõ ekoi. Ajawyi “nivoi mã'ẽ tè ãwĩ” e'i ava mõ pè remẽ, aje ywete e'i ãmẽ. [A'e jõ tè aepo e'i kuwa mã'ẽ.] 3Nivoi teãmã mã'ẽ tè mirà kõ. Ene pa'e! Manyvo ere kuwa põ nejipija rõmõ Janejare'e rovake neiko? Manyvo nere'ãi nejipija rõmõ neiko. Ãwĩ pè itõ “nivoi mã'ẽ” ere te'ĩte sõ mirà kõ pè neiko ipi, a'e ipe pejẽ ipi. 4Emã'ẽ Janejare'e reko rè. Okatuaya rupi tẽ tesõ nerereko katu nerereko ipi. Ãmõ, neporijauesa puku wyi nanemomorijaui amãtejẽ neaiwererà rè ipi. Ãwisõ ikatuay nerereko remẽ, nejirovatà sipõ iwyi neiko rõmõ ãmẽ? Kee jẽsi ere kuwa: “Emã'ẽ. Ikatuay erereko ãwĩ. Apoità eaiwererà wyi ky'y”, ere jẽsi.

5Ajamã'ẽ nivoi neikoa nereity tari tite neiko, ãwisõ Janejare'e ayvu nereenu tari remẽ. Ãmẽ, moko'e remẽ nejimomorijauokatà Janejare'e pè ãmẽ. Kãramõ poromoe'yia 'arà mẽ, neaiwererà rupi katu tè nemomorijautà ãmẽ ky'y. 6Manyvo nyvo jaiko mã'ẽ rupi ve, a'evotà janerereko. Janejãvijõ vijõ jẽ a'evotà janerereko ãmẽ.#Jĩg. 62.12 7Kee ekoi mã'ẽ Janejare'e omoigooka karuarutà opyri ãmẽ. Ovoarà kõ ikatuay wereko tè jẽ iko mãe kõ. Ãmõ, tekou teitetea wyi omago ipi mãe kõ. Ãmõ, kee e'i mãe kõ: “Janejare'e tè emoe'earà rã rõmõ ekoità”, e'i mãe kõ. “Kãramõ kuwa aẽ mõ aa Papa pyri aiko karuaru”, e'i tè jẽ oupe iko mãe kõ. Apijarà kõ pè Janejare'e kee e'ità: “Ekoty rewarà tè ãwĩ”, e'ità. “Mãerã amoigooka karuarutà epyri”, e'ità ãmẽ a'evo ekoi mãe kõ pè. 8Na'evoi ãmẽ weegà oja'a iko mã'ẽ wereko. A'e aje ywete mã'ẽ wyi ojirova mãe kõ. Nivoi tekoua rupi ekoi mãe kõ. Apijarà pè Janejare'e kee e'i: “Nivoi mã'ẽ tè ãwĩ”, e'i. “Ivo katu kuwasi ãwĩ ekoi mijã”, e'i ee kõ omãjã wãgyo rõmõ. Ajawyi omomorijau kõtà ereko ky'y. 9A'evo Janejare'e pirujẽ nivoi tekoua rè ywesõ oja'a mãe kõ omomorijaupa kõtà, ijaiwererà kõ repykarà mõ. Omomorijau karuarutà ereko apijarà kõ, mãerã tè. Juteu kõ ypy a'evotà wereko kõ. Ãmõ, Juteu rõwã mãe kõ teve a'evo tary ve wereko. 10Ivo tekoua rè ywesõ oja'a mãe kõ ãmẽ wereko katuaytà opyri ereko. Omoe'e kõtà ãmẽ ky'y. Opy'amopiryvypy katu kõtà ereko kõ ãmẽ. Juteu kõ oja'a ee mãe kõ a'evotà wereko. Ãmõ, ãmõ kõ oja'a ee mãe kõ ve a'evo tary ve wereko. 11Ojevojẽa rupi tè Janejare'e omã'ẽ pirujẽ janere janemosã'ãga ipi.#T.M. 10.17

12Juteu rõwã mãe kõ, Janejare'e ayvu ivo tekoua rewarà nokuwai epe. Ajamã'ẽ kee ne'i Janejare'e ijupe kõ: “Ikuwa rè rõwã ojavy remẽ nimanyvoi”, ne'i ijupe kõ. Wemavo kõ jẽtà, ijãvijõ kõ jẽ. Juteu kõ ãmẽ okuwa ipe ijayvu ivo tekoua rewarà. Ajamã'ẽ upi noikoi sire'e kupa. Ajawyi a'e kõ ve Janejare'e wemavotà ãmẽ. 13Janejare'e ayvu ivo tekoua rewarà okusiwaoka maekwerà okuwa katu ipe Juteu kõ. Ajamã'ẽ noikoi ijayvu rupi erovija rõmõ kupa ajamã'ẽ. Apijarà pè Janejare'e “ivo mã'ẽ tè ãwĩ” ne'i'ãi ãmẽ. Ijayvu rupi ekoi mã'ẽ kõ pè tè “ivo mã'ẽ tè ãwĩ” e'i kuwa. 14Ãmõ remẽ Juteu rõwã mãe kõ pè nojenuive Janejare'e ayvu, ivo tekoua rewarà. Ajamã'ẽ mape remẽ opy'a mãrãkuwaa rupi katu tè ekoi jẽ kupa. Ajawyi wemikuwa rupi tè ivo maevo sõ tite ekoi kupa. 15A'evo okuwa ivo katu mã'ẽ kupa. Ãmõ, nivoi mã'ẽ okuwa teve kupa. Ajawyi wemikuwa rupi ojireko katu iko kupa remẽ, ipy'a katu iko kupa ipi. Na'evoi upi katu noikoi tite kupa remẽ. Ipy'a piraità tè ãmẽ iko kupa. Aytà tesõ ipy'a pè kõ ãmẽ. [“Haa! Nivoi si aiko”, e'ità oupe ãmẽ kupa.] 16A'evoa kõ ojikuwa katutà kãramõ Janejare'e poromoe'yi remẽ. Jopy'a pewarà kõ ve tesõ okuwa. Nijajimome'ui epe ijupe remẽ tesõ okuwa. Ivo jaiko mã'ẽ okuwavĩ. Ãmõ, janeaiwererà kõ ve okuwavĩ. Janekuwa teãmã. Ava jẽ rõwã ojinõsĩtà iwyi. Ajaa rupi ivo katu janemoe'yità. Jesu Kiristu pè tè janemoe'yiokatà, janemoe'yia 'arà mẽ. A'e a'evoa kõ rè poromotekokuwa ajupa ekareta rupi, tapekuwa. Janejare'e ayvu rupi katu tè poromotekokuwa aiko.

Ayvu Juteu kõ pewarà

17Juteu kõ pè kee a'età ky'y, pejãvijõ jẽ. Nejimoe'e ywe'e tite neiko ne. Kee ere tite neupe: “Juteu e'e rõmõ tè ije”, ere tite. “Akuwa teãmã Janejare'e ayvu ivo tekoua rewarà. [Kõitokõ tãmõ Moisesi pè omojikuwaoka tokusiwa imojikuwa.] Ajawyi Janejare'e koty rewarà rõmõ aiko teãmã”, ere tite nepy'a pè neiko ipi. 18Ajare kee a'età ene. Aje ipe Janejare'e remimota nekuwa. Ivo katuay mã'ẽ pè “aje ywete” ere teve ipe. Nejimo'epa ee rewarà mõ tè aepo ere ipe ipi mijã. 19-20Ajawyi kee ere jẽ: “Poromo'earà rõmõ aiko. Ivo tekoua rè poromo'e aiko ipi. Ãwitõ naeapyoi mãe kõ japopy eraa, ãmõ pãtõnusu wyry pè ekoi mã'ẽ jayape katu ipi, ãwĩvo tè aiko ãmõ kõ pè ipi”, ere tite neiko ipi. Ãmõ, “Aje ywete mã'ẽ rè ajimo'e ikuwa katu ipi rewarà mõ ja'yrerà kõ amo'e aiko ipi. Ãmõ, notekokuwai mãe kõ amo'e aiko ipi”, ere tite neiko ipi. Aepo ere tite nejimoe'e rõmõ neiko ipi. 21-22Kõi neremikuwawerà rupi sõ nereikoi ipi! Õ'õ si? Ayvu kuwaa règà jaja'a remẽ, “ikatu” naoty we'ei janeupe. Mano põ ãmõ kõ nijamotekokuwa'ãi kuwa jane ywete janeayvukwerà rupi nijaikoi sõ remẽ? Kee jaa pè aepo eu. Ãmõ 'ary pè moma'e rè nemona tite. Aja paire, mano põ, “Nemona ne!” eretà ãmõ kõ pè neiko? I'ete põ? Ãnĩ! Ni'ei. Ãmõ, nemy'arà mõ remeve, “Mano põ koivo revewarà rè neiko?” ere jẽ ãmõ kõ pè neiko? [Õ'õ si? “Poromo'e aiweray si pene?” e'ità ãmẽ neupe kupa.] Ãmõ, jojarà jimoãtãgwerà rè neremã'ẽ tari epe ipi. I'ete. Ajamã'ẽ mape remẽ ava mõ wemime'ẽa rã weraa inõ ojarà rã'ãga pè ji'i. Ajaire, apykyre kyty, emime'ẽgwerà rè nemona vija eraa. Ivo põ ãmẽ neiko? Ãnĩ! Nivoi! 23Ãwĩ pè itõ kee a'e neupe. Janejare'e wayvukwerà jikusiwarerà nekuwa katu ipe. Ajawyi nejimoe'e ywe'e tite neiko ipi. Ajamã'ẽ upi nereikoi neiko. Ajawyi Janejare'e moko'e remẽ neremoe'ei ereko. [Ajawyi nerewarà mõ Juteu rõwã mãe kõ omojaiwe Janejare'e.] 24Aje ywete Janejare'e ayvu mojenuarà Isajasi kee e'i ikusiwa maekwerà rupi katu neiko: “Aepo Juteu kõ! Nivoi peiko! Penewarà mõ Juteu rõwã mãe kõ omovyvyrai ywe'e tite Janejare'e iko kupa ipi!” e'i maekwerà rupi katu neiko.#Isa. 52.5

“Jemosĩpire'oa pè ‘ikatu’ eu põ?” e'i mã'ẽ

25Juteu kõ pè kee eutà. Pejiemosĩpire'o ipe Janejare'e upewarà kõ rõmõ pejimosã'ãga ipi. Ajamã'ẽ ijayvu rupi napeikoi ipi. Ajawyi nojiemosĩpire'oi mã'ẽ vo 'ejẽ pejẽ peiko ipi. Manyvo jaa rõmõ rõwã a'evotà peiko. Janejare'e ayvu ivo tekoua rewarà rupi peiko remẽ tè katu kuwa jiemosĩpire'oa “aje ywete” eu kuwa peupewarà mõ ãmẽ. 26Ajamã'ẽ kee ipe Juteu rõwã mãe kõ mõ ekoi. Nojiemosĩpire'oi epe iko kupa. Ajamã'ẽ Janejare'e ayvu ivo tekoua rewarà rupi ekoi jẽ kupa. Ajawyi ojiemosĩpire'o mã'ẽ vo 'ejẽ ekoi Janejare'e pè kupa. A'evo tè ekoi kupa. 27Mokoi Juteu kõ! Nivoi mã'ẽ omo'y kuwa ãmõ kõ pene mijã. Nojiemosĩpire'oi epe kupa ipi. Ajamã'ẽ ivo tekoua rewarà rupi ekoi kupa ipi. A'e kõ tè nivoi mã'ẽ omo'y kuwa pene mijã. Ma'e rewarà mõ. Ãwisõ pejimosã'ãgapa ipe Janejare'e koty rewarà kõ rõmõ peiko. Ãmõ, i'aryvo peupewarà mõ teve ipe Janejare'e wayvu ivo tekoua rewarà omojikuwa tãmõ Moisesi pè tokusiwa imojikuwa karamoe remeve. Ajamã'ẽ a'evo ipe peiko remẽ, ijayvu rupi napeikoi ipi. Ajawyi ãmõ kõ pè pejimokupeioka peiko ipi.

28-29Oiko ãmõ wemosĩ opire'ooka kõrijõ tè mãe kõ. Janejare'e nomomojyi rupi iko kupa ajamã'ẽ. Juteu e'e rõwã apijarà. Juteu rã'ãga tè. Ajare kee a'e ijupe. Ava upe põ, “Juteu e'e rõmõ ãwĩ”, e'i Janejare'e ipi? Ojiemosĩpire'ooka mã'ẽ pè põ? Ãnĩ! A'e pè rõwã. Aje ywete Janejare'e remimota rupi ekoi mã'ẽ pè tè aepo e'i. Opy'a pupe tẽ tesõ omoe'e imojõvijã wee ipi mã'ẽ pè tè aepo e'i. Janejare'e 'Ãg tè poropy'amotee ipi. Moisesi remikusiwarerà rupi jaiko mã'ẽ ãmẽ nijanepy'amotee'ãi kuwa. Janejare'e 'Ãg tè katu poropy'amotee kuwa poroereko. Ojipy'amotee mã'ẽ pè tè “Juteu e'eay ãwĩ” e'ità Janejare'e imoe'e ãmẽ, ãwisõ mirà remimoe'ekwerà rõwã ipe remẽ.#T.M. 30.6

Currently Selected:

Romã 2: oymNT

Highlight

Copy