Rukasi 3

Juwão poromojãmorĩ mã'ẽ rewarà

(Mateusi 3.1-12; Maku 1.1-8; Juwão 1.19-28)

1Juwão akatuarà kõ jõvijãgwerà rerà kõ amovyvytà rã'ĩ.

Ãmẽ oiko jõvijã wasu mõ, Tiperiaji Sesa eu ijupe mã'ẽ. Pe'ĩrõwã emĩgwai kõ. [Ma'e. Karireja yvy pewarà kõ iwyry kytywarà rõmõ. Ãmõ kõ ve, Itureija yvy pewarà kõ. Ãmõ, Apireni yvy pewarà kõ. Ãmõ, Juteja yvy pewarà kõ. Wãisõ emĩgwai kõ.] Ãmẽ Juteja yvy pewarà kõ rõvijã pè Põsiu Piratu eu. Ãmõ, Karireja yvy pewarà kõ rõvijã pè Eroti eu. A'e reke'yry Piripi, Itureija yvy rõvijã rõmõ ekoi. Tarakoniti yvy rõvijã rõmõ teve a'e ekoi. Ãmõ, Risãnijasi Apireni yvy rõvijã rõmõ ekoi. A'e a'e kõ jõvijã Tiperiaji Sesa remĩgwai tepa jẽ kupa.

2Ãmẽ a'e jõvijã Tiperiaji Sesa 15 rõmõ kwaray ekoi jõvijã wasu rõmõ remẽ, ãmẽ jakatu Janejare'e ayvu ojenu Juwão pè, tekoe'ãma pè ojekoanõ remẽ. Sakarija ra'yry tè itõkõ Juwão, Janejare'e pè oporegeta mã'ẽ ra'yry tè. A'evo remẽ oiko mõrijõ Janejare'e pè oporegeta mãe kõ rõvijã kõ. Ãmõ pè Anasi eu. Ãmõ pè Kaipasi eu.

3[A'e a'e kõ jõvijã kõ rõmõ oo remẽ] Juwão oo taa taa kõ rupi yy Jotão pyryvo iko, poromo'ea rõmõ. Janejare'e ayvu omojenu erokwa. Kee e'i imojenu:

– [Pejipy'amogeta ikõ peneko rè age'e nẽ.] Pejimosĩoka ikõ peaiwererà rè nẽ. Pejimome'u ikõ Janejare'e pè peaiwererà reitypypyipaoka nẽ. Peporijauesatà ãmẽ penereko ky'y. “Awyjepa” e'ità peaiwererà kõ pè. Ajare pejo ekoty toporomojãmorĩ ãmẽ ky'y, e'i Juwão jane kõ pè.

4-5Mape remẽ tekoe'ãma pè Juwão poromo'e ipi. Ajare Janejare'e ayvu mojenuarà mõ oporegeta amãtejẽ karamoe remeve, Isajasi eu ijupe mã'ẽ. A'e kee e'i ikusiwa amãtejẽ:

“Aepo! Tekoe'ãma pè ava mõ kee e'i upa:

‘Pee pemokatu ikõ Janerõvijã ywete renoneve nẽ’, e'i.

‘A'e rape pemoterẽ gatu ikõ enone nẽ’, e'i.

Ãwitõ pee nikatui remẽ, jamokatu imoterẽ gatu ipi.

Aja paire ikatu tè nou upi ipi.

Ãwĩvo ve janereko nikatui Janejare'e rovake remẽ jareko.

Jamokatuoka Janejare'e pè Janerõvijã ywete renoneve, e'i.

6Ãmẽ pirujẽ jane kõ pè ojenutà Janejare'e poroereko katu mã'ẽ rewarà okwa”, e'i amãtejẽ Isajasi ikusiwa karamoe remẽ.#Isa. 40.3-5

Aekwerà rupi katu Juwão ekoi ãmẽ.

7Ãmẽ ijaty jane kõ uu ojimojãmorĩoka ijupe. A'e kõ mõ pè kee e'i Juwão:

– Kõi sõ napekatui pejẽ! Moma'e aiwerà jeapyrerà vo tè pejẽ, e'i. Ma'e remẽ kee e'i tite ava mõ pejẽ: “A'evo 'evo pejimojãmorĩoka remẽ, pemagotà jimomorijau wasua wyi”, e'i. Aepo e'i tite põ ava mõ pejẽ? Niĩ, na'evo'ãi peiko ajamã'ẽ, e'i.#Mat. 12.34; 23.33 8Ajawyi peaiwererà rè pejipy'amogeta rã'ĩ esa, a'e pejẽ. Tapejimosĩoka peaiwererà rè. Tapejimome'u Janejare'e pè peaiwererà reitypypyipaoka. Awyje Janejare'e koty rewarà kõ rõmõ tapeiko ky'y. Ãmẽ tè pejikuwatà aje ywete Janejare'e kytyre pejirova mãe kõ rõmõ peiko, e'i.

E'i jẽ Juwão:

– Kee tapejẽ e'ã: “Janejare'e nijanemomorijau'ãi, tãmõ Aparão jeapyrerà tè jane rewarà mõ. Ory teãmã janere,” tapejẽ ywe'e tite e'ã. Wayvu rupi ekoi mãe kõ rè tè Janejare'e ory ipi. Ajawyi tapejimoe'e tite e'ã tãmõ Aparão jeapyrerà kõ rõmõ, a'e pejẽ. Emã'ẽ aã takuru kõ rè. Janejare'e opota sõ tãmõ Aparão jeapyry rã kõ reinõ remẽ, aã takuru wyive kuwa oinõ mijã. Nomowasu'ãi kuwa. Aja rewarà mõ tapejimoe'e ywe'e tite e'ã peiko, a'e pejẽ. #Juw. 8.33

9E'i jẽ:

– Ayvu tamosã'ãga jai rè, ãmõ, temitã rè. Amojiropemĩ kõtà janereko rè. Ãwitõ jai kõ japypo'o tosinĩ opa. Waiteve ãmẽ temitã kõ jaeja taory katu ti'a. Ãwĩvo ve Janejare'e janererekotà ajaire kãramõ. Janemowaite itetà ojiwyi ipi. Ãmõgwerà opyri wejatà toiko karuaru. Ãmõ kõ ãmẽ jimomorijaua kyty tè omonotà tojimomorijau karuaru iko, e'i Juwão jane kõ pè.#Mat. 7.19

10Ãmẽ omoãgyo kõ tesõ, aepo wenu kupa remẽ. Kee e'i ãmẽ ijupe kupa:

– Manotà põkõ oroiko ajawyi? e'i kupa.

11Aepo rè e'i Juwão:

– Kee tapeiko. Ava mõ niporijaui kamisa rè mã'ẽ, tomosãi ãmẽ iporijau ee mã'ẽ pè, e'i. Ãmõ, emi'õ ywete mã'ẽ, tomosãi ijamyay mãe kõ pè ipi, e'i.

12Ãmẽ, tekoua repy moatyarà kõ#3.12 Karakuri opyy jane kõ wyi imoaty Romã pewarà jõvijã wasu pè mãe kõ. ve uu ojimojãmorĩokatà Juwão pè. A'e kõ kee e'i oporanu ijupe:

– Poromo'earà, ore pãmẽ? Manotà põkõ oroiko? e'i ijupe kupa.

13A'e rè kee e'i Juwão ijupe kõ:

– Ayvukwerà rupi katu tekoua repykwerà tapepyy ipi. Tapemojiupi e'ã ikõ epykwerà jane kõ pè nẽ, e'i Juwão.

14Ajaire sota kõ ve uu oporanu ijupe ky'y. Kee e'i ijupe kupa:

– Ore pa'e? Manotà oroiko ãmẽ? e'i kupa.

Ãmẽ Juwão kee e'i ijupe kõ:

– Pereko ai mirà kõ ipi ne, e'i. Nivoi tekoua pemo'y teywete tite pewari rõmõ ava mõ rè ne, e'i. Ãmõ, peposikoa repykwerà pepyy remẽ, “I'ete, ikatu tè”, tapejẽ ee, e'i Juwão sota kõ pè.

Ãmẽ “hoõ” e'i kupa.

15Ãmẽ jane kõ wenu takatu Juwão poromo'e remẽwarà ipi. Ojipy'amogeta tesõ kupa upa. Juwão rè ojimopirai kupa upa. Kee e'i kupa:

– Janejare'e Remimuurerà tè maevo Juwão, e'i kupa.

16Ajawyi kee e'i Juwão ijupe kõ:

– Janejare'e Remimuurerà rõwã ije. A'e ywe'e uutà erakypy rupi iko. A'e ywesõ si e'arà kytywarà rõmõ ekoità ky'y. Ije ãmẽ emĩgwai rõmõgà tè aiko. Ije ãmẽ, yy pupe kõrijõ tè poromojãmorĩ poroereko. Janejare'e Remimuurerà rè sõ penako'i peiko remẽ, Janejare'e 'Ãg tẽ tesõ omoigeokatà pepy'a pupe. Ajamã'ẽ naeako'i ee mãe kõ omonotà owyi tojimomorijau kõrijõ tata pupe kupa, e'i. 17Ãwitõ avasi jarà mõ omowaite ã'ãigwerà ipirerà wyi ipi. Ipirerà kõ jamowaite ijapy ipi. Ã'ãigwerà ãmẽ jamoaty imokatu ipi. A'evotà Janejare'e poromowaite. Jane kõ ãmõgwerà wejatà opyri toiko karuaru. Ãmõgwerà omokuipe'età owyi, awyje tojimomorijau kõrijõ tata wasu noei mã'ẽ pè tokai puku upa, e'i Juwão.

18Aepo e'i Juwão poromotekokuwa iko. A'evo Janejare'e ayvu e'eay omovyvy poromo'ea mõ iko ipi.

Kovenatu Eroti ojimoãtãre'ãoka Juwão pè remẽwarà

19Ãmẽ jakatu kovenatu Eroti nivoi ekoi ipi. Weke'yry Piripi rerekwarà wekyi ereko, Erotiasi eu erà pè mã'ẽ. Ãmõ, nivoi tesõ ekoi Eroti ipi. Ajawyi Juwão omoãtãre'ã ipe eko aiwerà rè ereko. Eroti ãmẽ ojimõarõ kõrijõ tè ijupe, Juwão pè. 20Ojimoane'e jẽ nivoi oikoa rõmõ iko. A'evoa 'aryvo Juwão omopã'ãoka jimopã'ãga pupe ky'y.#Mat. 14.3-4; Mak. 6.17-18

Jesu ojimojãmorĩoka Juwão pè remẽwarà

(Mateusi 3.13-17; Maku 1.9-11)

21Juwão nojimopã'ãive remẽ, jane kõ uu uu ojimojãmorĩoka ijupe ipi. Ãwĩvo ve ãmõ 'ary pè Jesu ve uu ojimojãmorĩoka ijupe. Ãmẽ Uu pè oporegeta upa. Ameve yvag ojiovapyjavo i'aryvo katu. 22Ãmõ, Janejare'e 'Ãg pykau vo sõ tite ojisaoka owyjy Jesu 'aryvo. Ameve Janejare'e oporegeta yvag pe wyi. Kee e'i imuu:

– Era'yry tè ene. Eremiauvay tè ene, e'i. Eroryvay nere aiko, e'i yva pe wyi imuu ijupe.#Jinõ. 22.2; Jĩg. 2.7; Isa. 42.1; Ruk. 9.35

Jesu rãmõi kõ jeapyry kõ rewarà

(Mateusi 1.1-17)

23Ajaire Jesu poromo'e ypy iko ky'y, Janejare'e ayvu rè. 30 kwaray rõmõ wesapa poromo'e ypy remẽ. [Janejare'e Ra'yry tè Jesu.] Ajamã'ẽ Juse ra'yry maevo sõ tite.

[Jesu rãmõi kõ rerà amovytà terekuwa.] Juse ruu pè Eri eu.

24Ãmõ, Eri ruu pè Matati eu. Ãmõ, Matati ruu pè Revi eu. Ãmõ, Revi ruu pè Meuki eu. Ãmõ, Meuki ruu pè Janai eu. Ãmõ, Janai ruu pè Juse eu.

25Ãmõ, Juse ruu pè Matatija eu. Ãmõ, Matatija ruu pè Amosi eu. Ãmõ, Amosi ruu pè Nawõ eu. Ãmõ, Nawõ ruu pè Esiri eu. Ãmõ, Esiri ruu pè Nagai eu.

26Ãmõ, Nagai ruu pè Maati eu. Ãmõ, Maati ruu pè Matatija eu. Ãmõ, Matatija ruu pè Semei eu. Ãmõ, Semei ruu pè Joseki eu. Ãmõ, Joseki ruu pè Jota eu.

27Ãmõ, Jota ruu pè Joanã eu. Ãmõ, Joanã ruu pè Resa eu. Ãmõ, Resa ruu pè Soropapeu eu. Ãmõ, Soropapeu ruu pè Saratiu eu.#Ne. 7.7; 12.1,47 A'e Saratiu ruu pè Neri eu.

28Ãmõ, Neri ruu pè Meuki eu. Ãmõ, Meuki ruu pè Aiti eu. Ãmõ, Aiti ruu pè Kosã eu. Ãmõ, Kosã ruu pè Eumatã eu. Ãmõ, Eumatã ruu pè Era eu.

29Ãmõ, Era ruu pè Josue eu. Ãmõ, Josue ruu pè Erieserà eu. Ãmõ, Erieserà ruu pè Jorina eu. Ãmõ, Jorina ruu pè Matati eu. Ãmõ, Matati ruu pè Revi eu.

30Ãmõ, Revi ruu pè Simeão eu. Ãmõ, Simeão ruu pè Jutaa eu. Ãmõ, Jutaa ruu pè Juse eu. Ãmõ, Juse ruu pè Jonã eu. Ãmõ, Jonã ruu pè Eriakĩ eu.

31Ãmõ, Eriakĩ ruu pè Merea eu. Ãmõ, Merea ruu pè Menaa eu. Ãmõ, Menaa ruu pè Matata eu. Ãmõ, Matata ruu pè Natã eu. A'e Natã ruu pè Tavi eu.#2Sa. 5.14

32Ãmõ, Tavi ruu pè Jese eu. Ãmõ, Jese ruu pè Opeti eu. Ãmõ, Opeti ruu pè Poasi eu. Ãmõ, Poasi ruu pè Saumõ eu. Ãmõ, Saumõ ruu pè Naasõ eu.#Ruti 4.20-22

33Ãmõ, Naasõ ruu pè Aminatapi eu. Ãmõ, Aminatapi ruu pè Atemi eu. Ãmõ, Atemi ruu pè Arini eu. Ãmõ, Arini ruu pè Esirõ eu. Ãmõ, Esirõ ruu pè Peresi eu. Ãmõ, Peresi ruu pè Jutaa eu.#Ruti 4.18-19; Jinõ. 46.12

34Ãmõ, Jutaa ruu pè Jako eu. Ãmõ, Jako ruu pè Isaki eu. Ãmõ, Isaki ruu pè Aparão eu. A'e ruu pè Tera eu. Ãmõ, Tera ruu pè Nakora eu.#Jinõ. 11.24-28; 21.6; 28.13; 35.23

35Ãmõ, Nakora ruu pè Seruki eu. Ãmõ, Seruki ruu pè Rakau eu. Ãmõ, Rakau ruu pè Pareki eu. Ãmõ, Pareki ruu pè Eperi eu. Ãmõ, Eperi ruu pè Seraa eu.#Jinõ. 11.14-22

36Ãmõ, Seraa ruu pè Kainã eu. Ãmõ, Kainã ruu pè Apasati eu. Ãmõ, Apasati ruu pè Sẽi eu. Ãmõ, Sẽi ruu pè Noe eu. Ãmõ, Noe ruu pè Rameki eu.#Jinõ. 5.28-32; 11.10-12

37Ãmõ, Rameki ruu pè Metusarẽi eu. Ãmõ, Metusarẽi ruu pè Enoki eu. Ãmõ, Enoki ruu pè Jareti eu. Ãmõ, Jareti ruu pè Marereu eu. Ãmõ, Marereu ruu pè Kainã eu.#Jinõ. 5.12-21

38Ãmõ, Kainã ruu pè Enosi eu. Ãmõ, Enosi ruu pè Seti eu. A'e ruu pè Atão eu.#Jinõ. 5.3-6 A'e Atão Janejare'e ra'yry rõmõ ekoi [eminõgwerà rõmõ]. Awyjepa Jesu rãmõi kõ rerà kõ momewa ky'y.

Currently Selected:

Rukasi 3: oymNT

Highlight

Copy