Rukasi 21

Terekwarerà nokãte'ãi Janejare'e pè remẽwarà

(Maku 12.41-44)

1Ajaire Jesu Janejare'e moe'ea retã ypy pè tui upa remẽ, jane kõ rè omã'ẽ upa, karakuri kõ weru inõ temime'ẽa rena pupe kupa remẽ. Imoma'e ywete mãe kõ rè omã'ẽ, karakuri ome'ẽ kupa remẽ. 2Ajaire terekwarerà nimoma'ei 'ete mã'ẽ mõ uu. Mõrijõgà karakuri nikasi mã'ẽ tè weru ime'ẽ. 3Ãmẽ Jesu e'i ee omãjã:

– Aã wãivĩ ywesõ nokãte'ãi 'ete Janejare'e pè karakuri me'ẽa rè, ãmõ kõ wyi, e'i. Aje aepo a'e age'e, e'i. 4Ãmõ kõ karakuri pẽgà tè weru ime'ẽ ipi. Oyte mã'ẽ tè weru ime'ẽ kupa. Mõa'ãrõwã opyta jẽ ijupe kõ ome'ẽ maire. Aã wãivĩ ãmẽ ome'ẽma 'ejẽ okarakuri. Ma'e emi'õ repy rã tè kuwasi karakuri mijã. A'e tè weru ime'ẽ Janejare'e pè. Ajawyi aã ywesõ nokãte'ãi 'ete okarakuri me'ẽa rè, Janejare'e pè ome'ẽ remẽ, a'e pejẽ, e'i Jesu.

Jesu omome'u amãtejẽ Janejare'e moe'ea retã momaa rã rewarà

(Mateusi 24.1-2; Maku 13.1-2)

5Ajaire Jesu remimo'ekwerà kõ mõ omã'ẽ Janejare'e moe'ea retã rè upa. A'e vo remẽ kee e'i Jesu pè kupa:

– Orerõvijã, emã'ẽ. Ikatuay Janejare'e moe'ea retã ojinõ upa. Ãwisõ takuru kõ ikatuay wete mã'ẽ oinõma pari rè tetã mokatua rõmõ kupa. Ãmõ, weru ime'ẽ mãe kõ ve oinõma pari rè kupa. Ajawyi katuay ve rõnõ, e'i kupa.

Ãmẽ aepo renu kee e'i ajamã'ẽ Jesu ijupe kõ:

6– Ãwĩ pemã'ẽ ee mã'ẽ naiko'ãi kãramõ. Opa katutà. Kãramõ ãpã kõ ovãetà ee. Omotororopatà ity kupa, e'i. Ajawyi takuru ijãpiso'ã mã'ẽ ojapakuipatà. Mã jẽ rõwã ojejatà ãmẽ ky'y, e'i.

“Pemomorijautà kupa”, e'i Jesu mã'ẽ

(Mateusi 24.3-14; Maku 13.3-13)

7Ãmẽ kee e'i emimo'ekwerà kõ:

– Õ'õ põ? A'evotà sipõ? oremo'earà. Manyvo remẽ põ a'evotà? Manyvotà põ orokuwa amãtejẽ a'evo tarà mẽ? Emome'u awi oreupe torokuwa, e'i kupa.

8A'e rè kee e'i Jesu:

– Mokoi pemoripea mõ! Tapejimoripeoka e'ã peiko kee e'i mãe kõ pè: “Janejare'e Remimuu rõmõ tè ije ajo”, e'i mãe kõ pè. Ijatyray mirà kõ aepo e'ità owari rõmõ pejẽ. Ãmõ, kee e'ità pejẽ kupa: “Ke'ĩ a'evoa rã okwatà”, e'ità rã'ãga pemoripe kupa. Mokoi! “Aje” tapejẽ ywe'e tite e'ã aepo jaa renu.

9– Kee tevetà kãramõ. Jiapisa rã ojenutà teve pejẽ. Ãmõ ve ojenu tary ve. Ãmõ, ojimõarõtà ojikoty iko kupa. Ojimoe'yità ojiwyi kupa. Opõ'ãtà ijiapisi ojeeve kupa. Pekyje tite a'evoa wyi ne. A'evoa ypy rã'ĩ okwatà. Ãmẽ tè pekuwatà yvy opaerĩ mã'ẽ. Ãmõ, avãerĩ mã'ẽ teve, a'e pejẽ, e'i Jesu. 10Ãmõ yvy pewarà kõ opõ'ãtà ãmõ ate'y kõ rè. Ojiapisità ojeeve kupa, e'i. Ojimomojy tètà ãmẽ kupa, e'i. 11Ãmõ, yvy otyty tesõtà upa. Ãmõ, tyavorusu okwatà teve taa taa kõ rupi. Ãmõ, tekorãnaiwerà okwa tary ve. Ãmõ, yva itee tary ve. Moma'e iteetejẽ ojisaokatà yva pè ãmẽ ky'y. Temisage'ã kõ ve ojisaokatà. Ipojy aità tè ãmẽ. Poroapy'a jẽtà ãmẽ ojisaoka. A'evotà tè, e'i.

12– Ajamã'ẽ na'evo'ãive remeve, pepyytà pemomorijauokatà teywete kupa. Ãmõ, peneraatà ajaire Janejare'e ayvu rè jimo'ea retã gyty. Nivoi mã'ẽ tomo'y teywete pene kupa. Ãmõ, pemopã'ãoka teywete tary ve kupa. Ekoty rewarà rõmõ pejẽ rewarà mõ ojimoãpãtà pene kupa. Ajawyi peneraatà jõvijã wasu kõ gyty tapemomorijauoka kupa. 13Ãmẽ a'evo remẽ, eayvu pemojenutà jõvijã kõ pè ãmẽ. 14Tapejimo'eai e'ã a'evo remẽ. Kee tapejẽ e'ã pejimopirai rõmõ: “Manyvo a'età põkõ aporegeta emogeta kupa remẽ?” tapejẽ e'ã peiko. 15Ije tè poromotekokuwatà peayvu rã imojikuwa pejẽ tapemojenu. Ajawyi peãpã jẽ rõwã peayvu omogwetà. Nokuwa'ãi peayvuvaja kupa.#Ruk. 12.11-12 16Waype ywetetà peupe ajamã'ẽ. Penetãrã kõ tẽ tesõ peãpã kõ rõmõ ekoità ãmẽ. Penuu kõ tẽ tesõ ojimoãpãtà pene iko. Pemõmirĩ kõ teve tesõ. Wãisõ. Pejimorypa kõ ve peãpã kõ rõmõtà ekoi. Ãmõgwerà pepõ'õmorà kõ mõ ojukaokatà kupa. 17Ekoty rewarà kõ pejẽ wyi ojikõ'õtà pene kupa ãmẽ. Pirujẽ ojikõ'õtà pene kupa. 18Ajamã'ẽ Janejare'e tè oja'a jẽtà pene penereko katu rõmõ oupe. 19Ãmẽ waypekwerà mẽ pejimokasi jẽ ere pejipykãtã remẽ, epyri peiko karuarutà kãramõ peiko ãmẽ, e'i Jesu.

“Jerusarẽ taa wãrimãtà ipãsarõ kupa”, e'i Jesu mã'ẽ

(Mateusi 24.15-28; Maku 13.14-23)

20E'i jẽ Jesu:

– Ajaire Jerusarẽ taa rè sota atyry kõ ojatykapatà kupa. Taa wãrimã 'etetà kupa. Ãmẽ a'evoa rè pemã'ẽ remẽ, “Ipuku rõwãtà Jerusarẽ omomatà kupa ky'y”, pejẽtà ãmẽ ikuwa. 21Ãmẽ Juteja yvy pè ekoi mãe kõ kuise'ẽ jẽ tojavapa oo. Yvytyry kõ gyty too ojemĩ ãpã kõ wyi kupa. Ãmõ, tekoa pè ekoi mãe kõ tojisyry ojava oo. Ãmõ, koo rè oposiko mãe kõ a'e pe wyi ve tojava oo. Toike e'ã rã'ĩ tekoa pè ãmẽ kupa, e'i. 22A'e 'arà remẽwarà “pejipy 'arà ovãema ky'y” eutà. Janejare'e ayvukwerà rupi katu a'evotà, e'i.#Ose. 9.7

23E'i jẽ Jesu:

– Ipojytà ãmẽ wãivĩgwerà ipuru'a mãe kõ pè. Ãmõ, omemy sakyre oupi imokamy'u jẽ mãe kõ pè ve ipojytà. Mokoi! A'evo remẽ pirujẽ jane ijãgyoay tesõtà ojimopirai tesõ rõmõ Juteja yvy rupi kupa. Juteu kõ rè ojikõ'õ ywetetà iko kupa, e'i.#Ruk. 23.29 24Ãmõgwerà wapisità marija poko pupe kupa. Ãmõgwerà opokwatà eraa raa imono ãmõ mirà kõ põ'õ gyty kupa. Ajawyi ojeja mãe kõ omosãsãità imono mono yvy popy kõ gyty, ãmõ mirà kõ põ'õ mè. Ãmẽ ãmõ ate'y wãnà kõ tè Jerusarẽ taa opãsarõtà imoenawepa ky'y, e'i Jesu ijupe kõ.

Jesu ovãe tarà mijẽ mã'ẽ rewarà

(Mateusi 24.29-31; Maku 13.24-27)

25E'i jẽ Jesu:

– Kee tevetà. Janejare'e kwaray omoteetà kãramõ. Moma'e iteetejẽ ojikuwatà kwaray rè. Ãmõ, jay rè. Ãmõ, jaytata kõ rè, e'i. Yvy pè jane kõ ipy'a pirai tesõtà omãjã a'evoa rè. Ãmõ, pãranã wasu ve iteetà. Ãmẽ onururu tesõtà. Opipo pipo tesõtà pãranã. Yvate kytyve tesõtà a'evo. Jane kõ ojimonyijay tesõtà ee omãjã. Okyje aità iwyi kupa.#Isa. 13.10; J.Jim. 6.12-13 26Ãmẽ a'evoa remẽ, jane ãmõgwerà kõ omãnõ mãnõ tesõtà okyje rõmõ iko. Kee e'ità ãmẽ kupa: “Nopa'ãi ywete rõwã põkõ ãwĩvoa mijã?” e'i e'ità ojimopirai rõmõ iko kupa. “Emã'ẽ. Yva onãrãtà ky'y, ipupewarà kõ revejẽ”, e'ità omãnõ mãnõtà kupa. 27Ãmẽ sõsi eny wasu mã'ẽ rõmõ ajinõtà yva rè. Yva rãtasĩ rupi tẽ tesõ ajotà. Ekasia reny revejẽ ajotà, Janejare'e Remimuurerà ajimojane mã'ẽ rõmõ. Ãmẽ si yvy kytywarà kõ pirujẽ omã'ẽtà ere ajo remẽ, e'i.#Tan. 7.13; J.Jim. 1.7 28Ãmẽ a'evoa ojiãparõ remẽ pepõ'ã peyvatesa pejimo'ãgatu ãmẽ ere. Kuise'ẽ jẽ Janejare'e penereko katutà jimomorijau wasua wyi peneraatà opyri ãmẽ ky'y. A'e 'arà nipuku'ãi aja paire ky'y, e'i.

Jesu vãea rã mojikuwapa kõ rewarà

(Mateusi 24.32-35; Maku 13.28-31)

29Ajaire Jesu omosã'ãga wayvu poromo'earà rõmõ. Kee e'i:

– Wakapu rè pemã'ẽ rã'ĩ esa. Ãmõ yvyra kõ rè pemã'ẽ esa teve. 30Ãwitõ wakapu okui ypy remẽ, “Kuise'ẽ jẽ kwaraytà ky'y”, ja'e ipi. 31Ãwĩvo tevetà kãramõ. Manyvo teko'arà temisage'ã ojiãparõ remẽ, kee pejẽtà ãmẽ: “Kuise'ẽ jẽ Janejare'e jimojõvijãa 'arà okwatà”, pejẽtà ãmẽ ikuwa ky'y, e'i. 32Aje ywete aepo a'e aporegeta age'e pejẽ. Ke'ĩ pirujẽ a'evoa okwatà, age'e remẽwarà kõ mõ uve jẽ remeve, e'i.

33E'i jẽ Jesu:

– Kee jaa rè tapeja'a. Yva opatà. Yvy opa tary ve. Eayvukwerà ãmẽ nopa'ãi, e'i.

“Tapemoa'u jẽ peiko”, e'i mã'ẽ

34– Ajawyi mokoi. Pemoa'u jẽ ikõ evãea pekupa ipi nẽ, a'e pejẽ. Tekou teitetea kõ règà peja'a peiko ne. Ka'ua règà teve. Jimi'u wasua règà teve ne. Moma'e age'e remẽwarà kõ règà. A'e a'e règà peja'a tite remẽ, nikatu'ãi peupe ãmẽ. Kãramõ evãea 'arà pepokou tite ne, a'e pejẽ. Ãmẽ a'e 'arà ovãe peupe remẽ, nikatu'ãi peupe ja'aarà mõ rõwã peiko remẽ. 35Pirujẽ yvy wãnà kõ pè evãea ojikuwatà. Ajawyi ava jẽ rõwã nomã'ẽ'ãi evãe remẽ ere. 36Ajawyi ja'ave rõwã peiko ne, a'e pejẽ. Emoa'u jẽ ikõ pekupa nẽ. A'evo peiko remẽ kee pejẽ ikõ Janejare'e pè nẽ: “Epãtavõ emokasi rejupa”, tapejẽ. “Tajirokyje e'ã aja maekwerà wyi”, tapejẽ ijupe. Ãmẽ sõsi ãpẽiwarerà paire erovakeve peikotà ãmẽ. Kee a'età pejẽ: “Ejo jajimory karuaru ojee jaiko ky'y”, a'età pejẽ, ajimojane mã'ẽ rõmõ, e'i Jesu ijupe. Awyjepa Jesu aepo e'i ãmẽ ky'y.

37A'evo remẽ Jesu Janejare'e moe'ea retã ypy pè ekoi. Kõ'ẽ jawe jawe poromo'e iko. Pya remẽ ojisyry oo yvytyry kyty ipi, Oriveiraty eu mã'ẽ kyty. A'e pè ikõ'ẽ ipi.#Ruk. 19.47 38Ji'ive oo mijẽ Janejare'e moe'ea retã gyty ipi. A'e kyty jane kõ oo ji'ive, ijayvu renu. Ojatykapa a'e pè ipyri kupa ipi.

Currently Selected:

Rukasi 21: oymNT

Highlight

Copy