Rukasi 2

Jesu isaky remẽwarà

(Mateusi 1.18-25)

1Ãmẽ a'e remẽ uve jõvijã wasu mõ, Sesa Aukutu eu ijupe. Romã pewarà jõvijã wasu rõmõ ekoi. Iteetejẽ mirà atyry emĩgwai kõ rõmõ ekoi.#2.1 Waite ite yvy wãnà kõ atyry kõ emĩgwai kõ rõmõ ekoi. Juteu kõ. Ãmõgwerà Romã wãnà kõ. Keresia yvy wãnà kõ. Wãi wãisõ emĩgwai kõ rõmõ ekoi. Ajawyi jõvijã wasu ijayvukasiay mã'ẽ tè a'e. Karai kõ imperador e'i jõvijã wasu pè. Ãmẽ ãmõ 'ary pè a'e kee e'i:

– Amoirõ irõokatà eremĩgwai kõ, takuwa mapejõ põ uve pirujẽ, e'i.

Ajawyi wayvu mojenuarà kõ omonooka pirujẽ taa taa kõ rupi too too ijayvukwerà tomojenu erokwa. Oo imojenu jenu ãmẽ kupa. Kee e'i imojenu kupa:

– Pekwa penãmõi kõ rekoawerà kyty tapejeenõ kareta rè, e'i kupa. Ãwĩvo jõvijã wasu poromoirõ irõmatà tapejikuwa, e'i kupa.

2A'evo remẽ, jõvijã Sirenu tè Sirija yvy wãnà kovenatu rõmõ ekoi. 3Ãmẽ pirujẽ jane kõ oo oo ojeenõ kareta rè kupa. Pirujẽ wãmõi rekoawerà kyty ojivy rã'ĩ oo a'evoa rè ãmẽ kupa. Jõvijã wasu ayvu rupi oo kupa.

4Ãmẽ Juse ve ootà ojeenõ kareta rè. Tãmõ Tavi jeapyrerà tè Juse. Ajawyi tãmõ Tavi sakyawerà kyty ojivytà rã'ĩ oo. Perẽ eu a'e taa pè. Ãmẽ ojisyry rã'ĩ wena pe wyi. Nasare taa pe wyi oo. [A'e yy Jotão yy apyry kyty tui.] Karireja yvy eu a'e yvy pè. [Ãmẽ mya kyty oo Juteja yvy kyty.] A'e pè Perẽ taa tui. A'e kyty tè ootà Juse.

5Werekwarà rã revejẽ oo. Ãmẽ jakatu Maria ipuru'au iko. Ãmẽ ajaire ovãema Perẽ taa pè kupa ky'y. 6Ãmẽ a'e pè ekoi kupa remẽ, ovãe Maria pè imemya 'arà. 7Imemy saky a'e pè. Kwaima'e rõmõ imemy. Imemyry ypykwerà tè a'e. Ajaire ojõvã omemyry kamisa pupe. Ãmẽ teima kõ remi'õ rena pupe oinõ, kurata vo mã'ẽ pupe. A'e pupe Maria oinõ omemyry, mape natui'ãi kupa rewarà mõ. Naikoi gea'ypa rewarà mõ. Ji'i tè ãmõ kõ oporakapa, ajawyi.

8Ãmẽ a'e taa kupei rupi oiko kaneiru jarà kõ. Pya werokwa weima kõ rè oja'a kupa ipi. Ka'api'ity rupi weima kõ weroata tojimi'u kupa ipi. A'e pè ekoi ãmẽ kupa. 9Ãmẽ jakatu Janejare'e remĩgwai yvapewarà mõ ojisa ijupe kõ. Pya ojisa ijupe kõ. Ãmẽ Janejare'e omojisaoka kwaray vo sõ tite mã'ẽ taeny ovake kõ. A'e kaneiru jarà kõ pè ojisa. Ojimonyi tesõ ee omãjã ãmẽ kupa.

10Ãmẽ Janejare'e remĩgwai e'i ijupe kõ:

– Pekyje sõ, e'i. Ayvu katu mojenu tè awyjy ike pepyri. Jane kõ morya rõmõ tè a'e, e'i. 11Kee a'e: Age'e isakypa Penõvijã rã rõmõ. Penereko katu mã'ẽ rã, e'i. Janejare'e Remimuurerà Penõvijã ywete rõmõ eu. Tãmõ Tavi rekoawerà pè tui, e'i. Pekwa esa ãmẽ. 12Teima kõ remi'õ rena pè o'au upa. Ojijõvã kamisa pupe upa, e'i. Pemã'ẽ ee remẽ, pekuwatà Penõvijã rã tè a'e peesatà ky'y, e'i Janejare'e remĩgwai kaneiru jarà kõ pè.

13Ãmẽ oporegeta paire, apy'awarà mõ Janejare'e remĩgwai ijatyray ojimoikatu ojisa kaneiru jarà kõ pè. Yvate ojatykapa kupa upa. Oporegeta mã'ẽ pyri tui kupa. Kee e'i ojĩga rõmõ kupa:

14– Õ'õ, Janejare'e ikatuay wete.

A'e ywesõ ikatuay wete.

Pirujẽ jane kõ tomoe'e ãmẽ.

Tipiryvypy katu jome kupa ky'y.

Tojipy'amopirai e'ã jane kõ ky'y, yvy rupiwarà kõ,

Janejare'e rauparà kõ, e'i ojĩga rõmõ kupa.

15Ãmẽ ojĩga kupa paire, Janejare'e remĩgwai kõ ojivy oo. Yva kyty ojivy oo ky'y. Ãmẽ kaneiru jarà kõ oporegeta ojiupe:

– Haa! Ja'e esa ajawyi, e'i kupa. Ja'e Perẽ taa kyty aepo rè jamã'ẽ, e'i kupa.

16Oo kuise'ẽ ãmẽ kupa. A'e pè ovãema kupa remẽ, ja'y sakyrerà weka rã'ĩ kupa. Ajaire wesa kupa. Ãmẽ omã'ẽ ee kupa. Ja'yry rè omã'ẽ kupa. Teima kõ remi'õ rena pupe tui, Janejare'e remĩgwai ayvu rupi katu tè. Ãmẽ ijy ipyri tui, Maria. Ãmõ, Juse ve ipyri tui.

17A'e kõ pè kaneiru jarà kõ omome'u pirujẽ Janejare'e remĩgwai ayvukwerà. Oporegeta ee kupa, isakyrerà rè. 18Ãmẽ aepo wenu kupa remẽ, omoãgyopa kõ. Pirujẽ jane kõ omoãgyo tesõ. 19-20Ãmẽ aja paire kaneiru jarà kõ ojivy oo ky'y. Ojĩga ojivy oo kupa. Janejare'e omoe'e iko kupa, a'evoa rè omã'ẽ kupa rewarà mõ. Ajamã'ẽ Maria ojipy'amogetaay upa, Janejare'e remĩgwai ayvukwerà rè. Ãmõ, kaneiru jarà kõ omome'u ijupe maekwerà rè ojipy'amogeta jẽ upa. Ajaate oja'a karuaru ee upa.

Jesu weenõ kupa remẽwarà

21Ajaire, 7 oke remẽ wemosĩpire'ooka ja'y sakyrerà kupa, tãmõ Moisesi remikusiwarerà rupi. Ãmẽ tè weenõ kupa. Jesu e'i erà pè kupa, Janejare'e remĩgwai yvapewarà ayvukwerà rupi katu. Kõi e'i amãtejẽ jypy remẽ Maria pè, nipuru'aive remeve. A'e rupi katu weenõ kupa.#Ruk. 1.31

22-23Ajaire ãmõ jay remẽ, werojikoaku kupa paire, Jesu weraa kupa, Jerusarẽ taa kyty. Janejare'e moe'ea retã pè weraa eroike Janejare'e rovake kupa. Tãmõ Moisesi remikusiwarerà rupi tè a'evo wereko kupa. Kee e'i ayvukwerà: “Janeãkarã ypykwerà ja'y kwani rõmõ isaky remẽ, jaeru Janerõvijã ywete rovake topyteporo imosã'ãga oupewarà mõ ipi”, e'i maekwerà.#Jisyry. 13.2,12 24Oo kupa remẽ, weraa wemime'ẽ rõmõ kupa, oõvijãgwerà kõ rekoa rupi. “Kee jareko janeãkarã ypykwerà jaraa Janejare'e pè remẽ. Janeremime'ẽ rã ve jaraa Janejare'e pè. Mõrijõ jirusi ika mã'ẽ jaraa ime'ẽ. A'e reko e'ã mẽ ãmẽ pykau ra'yry kõ mõrijõ rõmõ jaraa”, e'i maekwerà.#Tek. 12.8 A'evo wereko ãmẽ kupa.

Tãmõ Simeão omã'ẽ Jesu sakyrerà rè remẽwarà

25Ãmẽ jakatu kwaima'e mõ Jerusarẽ taa pè ekoi, tãmõ Simeão eu ijupe mã'ẽ. Ojireko katu iko ipi mã'ẽ a'e. Janejare'e rè oja'a ipi mã'ẽ. A'e kee e'i oupe ipi: “Janejare'e Wemimuurà rã omuutà janerereko katuarà rõmõ, Isaeu kõ rereko katuarà rõmõ. Ikatuaytà uu remẽ”, e'i oupe ipi. Ãmẽ Janejare'e 'Ãg eeve ekoi ipi. Wereko katu imomãrãkuwaoka ipi.

26Ãmẽ Janejare'e 'Ãg omojikuwaoka Simeão pè Janejare'e Remimuurà vãea rã. Kee e'ipa amãtejẽ ijupe:

– Neruve remeve neremiãrõgwerà uutà, e'i maekwerà. Neiko jẽtà neiko, ajaate nemã'ẽ ee, e'ipa amãtejẽ imojikuwaoka Janejare'e 'Ãg ijupe.

27Ãmẽ ãmõ 'ary pè kee e'i Janejare'e 'Ãg ijupe:

– Ekwa Janejare'e moe'ea retã gyty, e'i.

Oo ãmẽ. A'e pè tuipa ãmẽ, Jesu sakyrerà weru sikaepo eroike Janejare'e rovake kupa remẽ, tãmõ Moisesi remikusiwarerà rupi wereko kupa remẽ. 28Ãmẽ Simeão omã'ẽ ee remẽ, okuwa Janejare'e Remimuurerà tè ãwĩ. Oryvay ee omãjã ãmẽ. Ajawyi opoapari ve Jesu oupi ereko. Janejare'e omoe'e ywete ee. Ojĩga imoe'e. 29Kee e'i imoe'e:

– Neayvukwerà rupi katu erereko rejupa, Erõvijã ywete, e'i.

Nerearai 'ete neayvukwerà wyi ipi.

Age'e jẽ sõsi amãnõtà remẽ, epiryvypy katutà akãjã ky'y.

30-32Eroryvay wete aiko, Erõvijã ywete, orerereko katutà mã'ẽ rè amã'ẽma ky'y rewarà mõ.

Erea pupe amã'ẽ ywete ee ky'y, e'i.

Aã jẽ sõsi jimomorijau wasua wyi orerereko katutà.

Erõvijã, age'e Neremimuurerà nemurokapa oreupe, e'i.

Amã'ẽma ije orerereko katuarà rã rè.

A'e nemojikuwaokatà oreupe, Juteu kõ rõmõ. Juteu rõwã mãe kõ pè ve tesõ nemojikuwaokatà.

Ajawyi, “Janerõvijã ywete poroereko katu kuwa”, e'ità ajaire kupa.

Ajawyi, a'e nemuroka nekoty rewarà kõ pè rewarà mõ, “Teko e'eay ãwĩ kõ”, e'ità ãmõ kõ.

Ajawyi Isaeu rõwã mãe kõ, “Haa, ikatuay Isaeu kõ”, e'ità oremoe'e kupa ky'y, e'i.

33Ãmẽ si Simeão ayvu rè ojipy'amopirai tuu kõ, aepo e'i isakyrerà pewarà mõ mã'ẽ omovyvy remẽ. 34-35Ãmẽ Simeão Janejare'e pè oporegeta Maria kõ pewarà mõ, owaray toiko kupa. Kee e'i Simeão Maria pè:

– Ajaire aã nememy sakyrerà ojimovijapa remẽ, ãmõgwerà “ikatuay” e'ità ijupewarà mõ. Ajamã'ẽ ãmõ kõ “nikatui” e'ità ijupewarà mõ, e'i. Ajaa jaa rupi ojikuwatà jane kõ py'a pewarà kõ. Ãwijã wyi neãgyoaytà neiko, e'i. Aytà neãgyo, a'evo ve marija poko pupe jajiso remẽ, e'i. Nememyry rupi jane kõ rekoa omosã'ãgatà Janejare'e, e'i. Ãmõgwerà ijayvu noerovijata'ãi, e'i. A'e kõ opa karuarutà jimomorijau wasua pè, e'i. Waiteve ãmẽ ãmõ kõ ojirovija ee mãe kõ. A'e kõ Janejare'e werojivy tarà mijẽ oupe ereko katu kõ, e'i jẽ Simeão Maria pè.

Sa'i Ana omã'ẽ Jesu sakyrerà rè remẽwarà

36Ãmẽ jakatu wãivĩ sa'imãnà mõ ve Janejare'e moe'ea retã pè tui upa. Sa'i Ana eu ijupe. Janejare'e ayvu mojenuarà mõ teve a'e. Panueu eu tuu amyry pè. Tãmõ Asee jeapyrerà rõmõ ekoi. A'e ikõjãmuku remẽ kwaima'e mõ wereko mijã. Ajaire 7 kwaray rõmõ werokwapa omẽnà reve iko. Aja paire imẽnà okãjã iwyi ky'y. 37Ajawyi terekwarerà mõ ekoi. 84 kwaray rõmõ tesõ wesa esapa osa'imã rõmõ. A'e Janejare'e moe'ea retã ypy pè tè tui ipi. Werokwapa a'e pè tè upa ipi. Pya rupi, aryvo rupi a'e pè tui. Oporegeta jẽ Janejare'e pè iko ipi. Ãmõ, nojimi'ui rã'ĩ Janejare'e pè oporegeta remẽ ipi. Janejare'e omoe'e karu iko ipi a'e pè. A'evo ekoi teãmã.

38Ajawyi Jesu kõ mokope tui upa remẽ, Ana uu ipyri kõ. Jesu sakyrerà rè omã'ẽ remẽ, Janejare'e omoe'e upa. Ory ee omãjã. Ãmẽ ãmõ kõ pè Jesu rewarà omovyvy amãtejẽ. Wereko katuarà rã omoa'u katu mãe kõ pè omovyvy, Jesu rewarà rã.

39Aja paire ojivy oo wena kyty kupa ky'y, Janejare'e ayvukwerà rupi katu wereko paire. Tãmõ Moisesi pè e'i maekwerà rupi katu wereko kupa paire. Nasare taa kyty ojivy oo kupa, Karireja yvy kyty. Awyje a'e pè ekoi kupa ky'y.#Mat. 2.23 40A'e pè Jesu ojimovijapa ky'y. Owaray ojimovija. Ojimokasi ojimotekokuwa. Omãrãkuwa katu iko. Ãmõ, Janejare'e rè ojirovija oja'a iko ipi.

Jesu 12 kwaray rõmõ ekoi remẽwarà

41Ãmẽ kwaray upi upi Juse kõ oo Jerusarẽ taa kyty ipi. Juteu kõ wãmõi kõ jisyryawerà moetea 'arà rè oo kupa ipi. [Kõitokõ karamoe remẽ Janejare'e Juteu kõ wekyi Ejitu kõ po pe wyi.] A'e moetea 'arà oinõ kwaray upi upi ipi. Watyry pè oo kupa ipi.#Jisyry. 12.1-27

42Ajaire Jesu 12 kwaray rõmõ werokwapa. Ãmẽ oo mijẽ kupa, wekokwerà rupi. A'evo tè jisyryawerà moetea 'arà mõ ipi. Nasare taa pe wyi oẽ oo kupa, Jerusarẽ taa kyty. 43Ajaire awyjepa omoete kupa remẽ, ojivyrĩ kupa wena kyty. Jesu ãmẽ opyta sikaepo Jerusarẽ taa pè. Tõvijãgwerà kõ nokuwai a'e pè opyta sikaepo mã'ẽ. 44“Ojivy mãe kõ pyterà rupi teipõ uu iko”, e'i tite tõvijãgwerà. Ajaire karupa remẽ Jesu weka tite kupa. Soõ, naikoi! “Maty põ?” e'i tite kupa. 45Noesai kupa wyi ojivyrĩ mijẽ Jerusarẽ taa kyty oo eka kupa.

46Oo oo tite maipe rupi eka kupa. Ajaire moapy rõmõ oke remẽ tè wesa kupa ky'y. Keve tui, Janejare'e moe'ea retã ypy pè. Tãmõ Moisesi remikusiwarerà rè poromo'e mãe kõ reve ojimogeta upa. Oporanu ojiupe kupa. 47Ãmẽ a'e kõ ojimopirai kupa Jesu remimovyvykwerà renu. Okuwa katu ayvu. Otekokuwavay iko.

48A'evo remeve Juse, ãmõ, Maria wesa Jesu ky'y. Omã'ẽ ywete ee kupa. Ory ojimopirai rõmõ ee iko kupa. Ãmẽ kee e'i ijupe:

– Manyvore põ ãwĩvo tesõ orerereko, mimi? e'i. Emã'ẽ! Orojimopirai nereka orokupa mijã, e'i ijy.

49Ãmẽ kee e'i Jesu:

– Manyvore põ kuipe'e rupi tè ereka tite pekupa? Napekuwai sipõ Papa retã wyry pè apyta ajupa? e'i ijupe kõ.

50Ãmẽ aepo jaa kõ wenu kupa remẽ, nokuwa tuvei manyvo jaa pè põ aepo e'i upa.

51[– Jajivy ja'e Nasare taa kyty, e'i ijupe kupa. “Hoõ,” e'i Jesu oo upi kõ ãmẽ.]

Wenu katu Jesu oy kõ ayvu ipi. Ijy ãmẽ ojipy'amogeta ywete a'evoa rè iko.

52Aja paire ojimovija iko Jesu ky'y. Ãmõ, kekejẽ otekokuwa iko ky'y. Janejare'e py'a rupi katuwarà rõmõ ekoi. Ãmõ, jane kõ rova rupi katu ve ekoi.#1Sa. 2.26; P.Teko. 3.4

Currently Selected:

Rukasi 2: oymNT

Highlight

Copy