Rukasi 18

Tekoua kuwaparà rè tè Jesu poromosã'ãga remẽwarà

1Ajaire Jesu ayvu mõ omosã'ãga mijẽ. “Tijaporegeta py'yi Janejare'e pè jajipãtavõoka”, jaa rè wemimo'ekwerà kõ omo'età. 2Kee e'i ijupe kõ:

– Taa mõ pè oiko tekoua kuwaparà mõ kwaima'e.#18.2 Juiz A'e Janejare'e nomomojyi ipi. Ãmõ, koivo kõ nivoi wereko teve ipi. 3Ãmõ, oiko teve a'e taa pè terekwarerà mõ. A'e kõ'ẽ jawe jawe uu ipe tekoua kuwaparà pè oporanu topãtavõ ipi. Kee e'i ijupe ipi: “Nere erako'i tepãtavõ rejupa. Eãpã nikatui erereko ipi”, e'i. “Neayvukasi awi ijupe, ivo terereko ãmẽ ky'y”, e'i ywe'e ipe ijupe. 4Noenu tari ajamã'ẽ tekoua kuwaparà. Ajamã'ẽ wãivĩ oo jẽ ojipãtavõoka. Oo oo jẽ. Ajaate awyje rõmõ tekoua kuwaparà kee e'i oupe ky'y: “Janejare'e namomojyi ipi. Ãmõ, mirà kõ namoe'ei teve ipi. 5Ajamã'ẽ aã terekwarerà emosuru tesõ. Ajawyi ekoa amosã'ãgatà ijupe ky'y. Tekoua amojikuwaokatà ijupe temo'eai e'ã ky'y”, e'i oupe, e'i Jesu.

6E'i jẽ Jesu:

– Ajaa maekwerà rè kee a'e. Tekoua kuwaparà nivoi mã'ẽ ayvukwerà rè pejipy'amogeta rã'ĩ. [Nivoi epe tekoua kuwaparà remẽ, opãtavõ jẽ terekwarerà. Oporijauesa jẽ, nopi ojiporijauesaokaa rã rè remẽ.] 7Tysi tõ Janejare'e. Ivo katuay werekotà okoty rewarà kõ ipi, eako'i ee kupa remẽ. Ma'e. Ava mõ sõ, “Janejare'e, eporijauesa rejupa. Epãtavõ rejupa”, e'i sõ kõ'ẽ jawe jawe ijupe mã'ẽ, noenu'ãi põkõ a'e ipi? Õ'õ, wenutà tè. Ãmõ remẽ, ipuku maevo sõ tite Janejare'e poropãtavõtà. 8Aje ywete a'e pejẽ. Wenutà tè okoty rewarà kõ poregetaa, eako'i ee kupa remẽ. Kuise'ẽ jẽ omojikuwaokatà mano toiko ijupe kõ. Ajamã'ẽ kãramõ yva pe wyi ajimojane mã'ẽ rõmõ ajivy ajo mijẽ remẽ, aesatà põ mirà kõ mõ “aje” e'i eupe weako'i rõmõ mãe kõ mõ? e'i. [Õ'õ, ãmõ ãmõgwerà aesatà, e'i.]

Pariseu ojimoe'e tite Janejare'e rovake remẽwarà

9Ãmẽ ãmõ remẽ Jesu ayvu omosã'ãga mijẽ poromo'e remẽ. Jane kõ mõ kee e'i tite: “Mira katu tè ije. Ãmõ kõ ãmẽ nikatui”, e'i tite oupe kupa ipi. Weko katua rè tè eako'i tite mãe kõ tè aepo e'i iko. Apijarà kõ pè kee e'i Jesu:

10– Ãmõ 'ary pè kwaima'e kõ oo Janejare'e moe'ea retã gyty. Mõrijõ rõmõ oo kupa. Janejare'e pè oporegetatà oo kupa. Pe'ĩ Pariseu mõ tè oo. Ãmõ, tekoua repy moatyarà mõ oo.#18.10 Karakuri opyy jane kõ wyi imoaty Romã pewarà jõvijã wasu Sesa pè mã'ẽ. 11Ãmẽ Pariseu kee e'i oupe: “Janejare'e amogetatà”, e'i oupe. Ãmẽ opõ'ã oporegeta. Oupe tè ajamã'ẽ oporegeta. Kee e'i tite: “Ajo nemogeta, Janejare'e. Ãmõ kõ vo rõwã ije. A'evoa rè oromoe'e age'e ajupa”, e'i tite. “Emã'ẽ ãmõ kõ rekoa rè. Imona ãmõgwerà iko. Ije ãmẽ na'evoi aiko ipi. Ãmõgwerà ojimomy'a iko ipi. Na'evoi ije ipi. Emã'ẽ ãwĩ tekoua repy moatyarà rè. Ãwĩvo rõwã ije aiko. Mira katu tè ije”, e'i tite. 12“Jimi'u e'ãa rè jikoakua rè aja'a katu ije ipi. Mõrijõ 'arà tesõ semana upi upi najimi'ui rã'ĩ aiko nemoe'ea rõmõ”, e'i tite. “Ãmõ, pirujẽ ije ema'e kõ pẽgwerà apyteporo neayvukwerà rupi ime'ẽ ene ipi. Ajawyi mire'eay rõmõ aiko”, e'i tite oupewarà mõ.

13– Tekoua repy moatyarà ãmẽ kuipe'e sa'u opõ'ã upa. Noyvatesai ojimosĩoka rõmõ upa. Ajawyi ojiposi'apete pete kõrijõ tè wãgyoa mojikuwaparà rõmõ. Kee e'i: “Janejare'e! Nivoi aiko ipi. Eporijauesa rejupa, a'e neupe”, e'i kõrijõ tè.

14E'i jẽ Jesu:

– Aepo rè kee a'e pejẽ. Janejare'e pè ojiporijauesaoka mã'ẽ tè Janejare'e wenu. A'e tè ipy'a piryvypy katu ojivy oo wetã gyty. Na'evoi ojimoe'eoka tite mã'ẽ. Ajaa rupi kee tapekuwa. Ojimoe'e tite mã'ẽ ajaire jowyry kytywarà rõmõ ekoità. Ajamã'ẽ nojimoe'ei mã'ẽ ãmẽ temimoe'e rõmõ ekoità. A'evo tè ipi, e'i Jesu.#Mat. 23.12; Ruk. 14.11

“Totuu nẽ ja'yrerà kõ ekoty”, e'i Jesu mã'ẽ

(Mateusi 19.13-15; Maku 10.13-16)

15Ãmẽ ajaire jane kõ mõ wãkarãgwerà kõ weru Jesu pè, toapytepyy kõ [ikatuay Janejare'e toereko kõ]. Ãmẽ a'e kõ rè Jesu remimo'ekwerà kõ omã'ẽ remẽ, kee e'i epe kupa:

– Moko pejẽ sõ! Ja'yrerà peeru sõ. Jesu tapemo'eai e'ã, e'i tite ijupe kõ kupa.

16Ajamã'ẽ Jesu aepo wenu remẽ, ja'yrerà kõ pè “pejo jẽ ekoty” e'i. Ãmẽ kee e'i wemimo'ekwerà kõ pè:

– Nemo'eai'ãi ja'yrerà kõ. Totuu nẽ ekoty kupa. Ãwĩ kõ tè omoẽoka Janejare'e o'arà kyty ipi.#Mak. 10.14 17Kee aje ywete mã'ẽ rè tapeja'a. Ja'yrerà kõ opota katu Janejare'e omoẽoka o'arà kytywarà rõmõ ipi. “Aje” e'i teãmã ijayvukasia pè kupa ipi. A'evo ve tapeiko. Na'evoi sõ peiko remẽ, napeo'ãi kuwa ipyri ena pè, e'i.

Kwaima'e imoma'e ywete mã'ẽ uu Jesu pè oporanu remẽwarà

(Mateusi 19.16-30; Maku 10.17-31)

18Ãmẽ kwaima'e temimoe'e mõ uu Jesu pè oporanu. Kee e'i ijupe:

– Poromo'earà, ivo katuay neiko mã'ẽ tè ene. Mano aiko kuwa põ ivo tekoua rupi aiko, Janejare'e pyri akãjã remẽ taiko karuaru? e'i oporanu Jesu pè.

19Ãmẽ kee e'i Jesu ijupe:

– Manyvore põ “ivo katuay mã'ẽ” ere sõ ije? Nuvei 'ete mirà mõ ivo katuay teãmã mã'ẽ. Janejare'e rõmõ'ĩte a'evo ekoi, e'i. 20Nekuwapa Janejare'e ayvukwerà tãmõ Moisesi pè ome'ẽ maekwerà, upi tijaiko mã'ẽ. Kee e'i itõkõ: “Nerejimomy'a'ãi. Nererekwapa remẽ, a'e reve kõrijõ tè neikotà ipi mãerã tè”, e'i maekwerà. Ãmõ, “Mirà nerejuka'ãi teve”, e'i maekwerà, e'i. Ãmõ, “Nanemona'ãi teve”, e'i maekwerà, e'i. Ãmõ, “Nivoi mã'ẽ neremo'y teywete'ãi newari rõmõ koivo kõ rè”, e'i maekwerà, e'i. Ãmõ, “Nerõvijãgwerà kõ teremomojy ipi. Neruu. Ãmõ, ney. Ijayvukwerà rupi katu tereiko ipi”, e'i Janejare'e ayvukwerà.#Jisyry. 20.12-16; T.M. 5.16-20 Nekuwapa itõkõ aepo jaa, e'i Jesu ijupe.

21– Õ'õ, eja'yrĩ remeve aepo rupi katu aiko teãmã ipi. Ivo teãmã aiko, e'i Jesu pè.

22Ãmẽ Jesu e'i ijupe:

– Oiko jẽ pe'ĩ gã kõrijõ tè upi tereiko mã'ẽ timanyvo e'ã ene. Ekwa, nema'e kõ tereme'ẽma epy rõmõ, e'i. Ajaire karakuri epykwerà kõ emosãsãima nimoma'ei mãe kõ pè erokwa. Pirujẽ neremimota katu kõ oikotà neupe Janejare'e rena pè, e'i. Ajaire neme'ẽ maire, ejo erupi eremimo'ekwerà rõmõ ajawyi, e'i ijupe.

23Ãmẽ aepo wenu remẽ, soõ, ijãgyoay tesõ enu iko, imoma'e ywete rewarà mõ. Nome'ẽ tari oma'e kõ. Ajawyi ijãgyo tè iko. 24Ãmẽ Jesu omã'ẽ ee remẽ, kee e'i:

– Waypete imoma'e ywete mãe kõ pè Janejare'e omoẽoka o'arà kyty ipi. [Moma'e ma'e rè ywesõ oja'a kupa ipi.] 25Waypeay tesõ ijupe kõ ãmẽ. Ãwitõ teima rõvijã mõ, kameru#18.25 Camelo eu ijupe mã'ẽ, waypete wasa ikwa'igà pari rokenaa rupi remẽ.#18.25 Ãwitõ mirà mõ o'arà kyty rejẽ epãnakõ iko mã'ẽ mõ. Noike'ãi yvyra wyry rupi oo wepãnakõ revejẽ. Oity remẽ tè kuwa yvyra wyry rupi wasa oo. Ãwĩvo. Ãwĩvo ve waypete imoma'e ywete mãe kõ pè Janejare'e omoẽoka o'arà kyty ipi, e'i.

26Ãmẽ ãmõ kõ aepo wenu remẽ, kee e'i Jesu pè kupa:

– Haa! Ãwĩvo remẽ ava noiko karuaru kuwa'ãi Janejare'e pyri ãmẽ! Ava nojireko katuoka'ãi ijupe! e'i kupa.

27Ãmẽ kee e'i Jesu:

– Aje, ava jẽ rõwã oo kuwa ipyri oiko karuaru rõmõ. Janejare'e rõmõ'ĩte poroereko katu kuwa opyri toiko karuaru, e'i.

28Ãmẽ kee e'i Peturu:

– Jõvijã, pirujẽ oroitypypyipa orojo nerupi, e'i. [Manyvotà põ awi oreupe ajaire? e'i.]

29Aepo rè kee e'i Jesu:

– Õ'õ aje, pirujẽ peitypypyipa erupi pejo. Uvetà ãmõ kõ ve pevo mãe kõ. Oo ootà kee jaa mojenu: “Janejare'e ikõ pemoẽoka pe'arà kyty nẽ”, ejaa omojenutà erokwa. Aepo mojenua rõmõ oma'e kõ nomowasu'ãi ity ipi. Ma'e, wetã oitytà oo. Ãmõ, wetãrã kõ oitytà oo. Uu kõ. Ãmõ, werekwarà oitytà rã'ĩ oo Janejare'e ayvu mojenu erokwa kupa. Ãmõ, wãkarãgwerà. Wãisõ ekoità kupa, oo Janejare'e ayvu e'eay mojenu erokwa kupa remẽ. 30Ajawyi aje ywete kee a'e pirujẽ a'evo ekoi mãe kõ pè. Penemitykwerà kõ wyi wete si Janejare'e ome'ẽtà pejẽ, ike yvy pè. Ãmõ, kãramõ, opyri penereko karuaru remẽ, e'i Jesu ijupe kõ.

“Ejukatà kupa”, e'i mijẽ Jesu mã'ẽ

(Mateusi 20.17-19; Maku 10.32-34)

31Ãmẽ wemimo'ekwerà kõ 12 rõmõ Jesu omowaite eraa maipe kyty. Kee e'i ijupe kõ:

– Age'e Jerusarẽ taa kyty jaatà jaiko, e'i. A'e pè javãe remẽ Janejare'e ayvu mojenuarà amyry kõ ayvukwerà rupi katu erereko aità tè erereko kupa, Janejare'e Remimuurerà ajimojane mã'ẽ tè ije rewarà mõ. 32Ma'e, eme'ẽtà Juteu rõwã mãe kõ po pè ãmẽ kupa. [Romã wãnà kõ rõvijã kõ po pè.] A'e kõ emojaiwetà ererõarõ. Otõmõ tõmõtà ere kupa. Ãmõ, enõpã nõpãtà kupa. Ajaate ejukatà kupa ky'y, e'i. 33Ajaire moapy 'arà mẽ apoeratà apõ'ã tarà mijẽ, e'i.

34Ãmẽ emimo'ekwerà kõ aepo wenu ve ipe. Manyvo jaa ne'ive ikuwa ajamã'ẽ. Noikeive ipy'a kõ pupe ikuwapa, Janejare'e nomojikuwaokarive ijupe kõ rewarà mõ.

Naeapyoi mã'ẽ Jesu omokatu remẽwarà

(Mateusi 20.29-34; Maku 10.46-52)

35Ajaire Jeriko taa pè Jesu kõ ovãerĩ remẽ. Ãmẽ pee ypy pè okwa kupa remẽ, naeapyoi mã'ẽ mõ rè omã'ẽ kupa. Pee reme pè wapy upa.

– Eme'ẽ karakuri mõ ije, e'i upa a'e rupi oẽ okwa mãe kõ pè.

36Ãmẽ aty wasu okwa a'e rupi remẽ, naeapyoi mã'ẽ aepo wenu. Ajawyi oporanu ava mõ pè:

– Moma'e rè põ aty wasu okwa iko? e'i.

37Ãmẽ kee e'i ijupe kupa:

– Jesu Nasare wãnà tè okwa iko, e'i kupa.

38Ãmẽ naeapyoi mã'ẽ wapukai:

– Jesu, tãmõ Tavi Jeapyry e'eay tè ene! Eporijauesa rejupa, e'i.

39Ãmẽ joãkãmorà oo okwa mãe kõ kee e'i epe ijupe:

– Aepo ere sõ! Nepu sõ, e'i epe kupa.

Ãmẽ ywesõ wapukai ywete ajamã'ẽ.

– Tavi Jeapyry e'eay! Eporijauesa rejupa! e'i wapukai rõmõ Jesu pè.

40Ãmẽ Jesu opyta rã'ĩ kee javo ãmõ kõ pè:

– Pekwa ipopyy eru epyri, e'i.

Oo ãmẽ kupa, eru. Ãmẽ Jesu pè ovãe remẽ, kee e'i Jesu ijupe:

41– Manyvo põ nepota orerereko? e'i.

– Apota ereapyo mijẽ, e'i. Ereamokatu rejupa, a'e ene, e'i Jesu pè.

42Ãmẽ Jesu e'i:

– Hoõ, tanereapyo katu ky'y, e'i. “Aje” ere eayvukasia pè rewarà mõ nekatutà, e'i Jesu ijupe.

43Ameve eapyo katuay ky'y. Oryvay iko. Oo ãmẽ Jesu rupi. Janejare'e omoe'e tesõ iko. Ãmẽ ãmõ kõ a'evoa rè omã'ẽ remẽ, Janejare'e omoe'e teve kupa upa.

Currently Selected:

Rukasi 18: oymNT

Highlight

Copy