Juwão 2

Jesu yy oinõ uvary aisiriri mã'ẽ rõmõ tojinõ remẽwarà

1-2Ajaire Karireja yvy pè Jesu ovãema orereve, wemimo'ekwerà kõ reve. Ãmẽ mõrijõ ke paire, ava mõ omenatà Kana taa pè. A'e kyty Jesu oo, orereve. Ijy ve oo.

3Ojimoaty ojimiwa kupa remẽ, uvary aisiriri mã'ẽ opa sikaepo ky'y. Noyi mõropãrà kõ rè. Jesu y okuwapa a'evo remẽ. Ajawyi e'i Jesu pè:

– Opa uvary aisiriri mã'ẽ ky'y, e'i tite ijupe.

4Ãmẽ Jesu e'i ijupe:

– Namojikuwa'ãive ekasia. Neayvu rupi rõwã a'evotà aiko, e'i ijupe.

5Aepo e'i epe Jesu remẽ, ijy e'i jẽ ja'umã'ẽ jarà remĩgwai kõ pè:

– Peenu katu ikõ ememyry ayvu nẽ rõnõ, e'i.

“Hoõ” e'i ãmẽ kupa.

6-7Ãmẽ Jesu e'i a'e kõ pè:

– Pemoãnẽ ãnẽ warypy kõ yy pupe erokwa, e'i.

– Hoõ. A'evotà oroereko, e'i kupa.

Uve 6 rõmõ warypy wasu kõ a'e tetã wyry pè. Takuru jinõgwerà tè warypy kõ ajamã'ẽ. Yy rena kõ tè a'e kõ. A'e yy rena mõ pe'ĩ remẽ 80 rituru rõmõ. Ma'e remẽ 100 rituru rõmõ tesõ. A'e yy ojauka rõmõ oporu kupa ipi. Ãmõ, wekoa rupi a'e yy ve oporu kupa ipi, Juteu kõ rõmõ.#2.6 Ojimi'utà kupa remẽ, yy wavoi kupa ipi ojipokusua rõmõ. Ojimi'u kupa ire ve ojipokusu mijẽ kupa ipi. Oparapi kõ ve okusu katu jome ipupe kupa ipi. Ajawyi warypy wasu kõ pupe omoãnẽ ãnẽ imovy yy kupa ipi. Wetã wyry pè a'evo wereko kupa ipi. Awyje pewarà teãmã a'evo ekoi kupa. A'e warypy kõ pupe ja'umã'ẽ jarà remĩgwai kõ omoãnẽ ãnẽ yy ãmẽ, Jesu ayvu rupi.

8– Awyjepa, e'i ajaire Jesu pè kupa.

– Hoõ. Eavoi yy pẽ eraa ja'umã'ẽ jarà pè ime'ẽ, toã'ã rã'ĩ esa, e'i Jesu ijupe kõ.

“Hoõ” e'i kupa. Weraa ãmẽ kupa.#2.8 Ekoa kõ teãmã a'evo ekoi kupa ipi. Ãmõ enaporà omosãità remẽ, ja'umã'ẽ jarà ypy wã'ã rã'ĩ esa ipi. Ãmẽ “nikatui” e'i remẽ, nomosãi kupa ipi. “Ikatu” e'i remẽ tè omosãi kupa ipi. 9Weraa kupa remẽ, soõ, uvary aisiriri mã'ẽ rõmõ sikaepo ojinõma yy warypy pupe, Jesu kasia rupi. A'e ja'umã'ẽ jarà wã'ã esa remẽ, kee e'i:

– Haa! Aã ywesõ ikatuay wete ji'iwarà wyi! e'i.

Nokuwai Jesu tè oinõ uvary aisiriri mã'ẽ rõmõ. Yy omoãnẽ ãnẽ warypy kõ pupe mãe kõ kõrijõ tè okuwa. Ajawyi ja'umã'ẽ jarà wã'ã esa remẽ, omuu rã'ĩ imẽtarà okoty.#2.9 A'e tè uvary aisiriri mã'ẽ wenõe amãtejẽ omenaa renone. 10E'i ja'umã'ẽ jarà ijupe:

– Manyvore põ ji'i aã ypy neremosãi? Ikatuay aã ky'y, e'i ijupe.

11A'evo Jesu omojisaoka ypy okasia, Kana taa pè ekoi remẽ, Karireja yvy pè ekoi remẽ. A'evo ojikuwa ypy Janejare'e Ra'yry rõmõ. “Aje” oro'e ijupe emimo'ekwerà kõ rõmõ, a'evoa rè oromã'ẽ remẽ.

12Aja paire Jesu ojivy oo Kapanão taa kyty, oy reve. Imõmirĩ kõ ve oo. Ore ve oroo Jesu rupi, emimo'earà kõ rõmõ. Oroo rã'ĩ oropyta a'e pè.

Jesu Janejare'e moe'ea retã rè okãte'ã remẽwarà

(Mateusi 21.12-17; Maku 11.15-19; Rukasi 19.45-48)

13Ãmẽ ke'ĩ tãmõ kõ jisyryawerà moetea 'arà okwatà.#2.13 Karamoe remẽ Janejare'e wekyioka Juteu kõ rãmõi kõ Ejitu yvy pe wyi imoisyry kõ. Karai kõ Páscoa dos Judeus e'i a'evoa pè. Ajamã'ẽ Jesu poeraawerà pè ywesõ Páscoa e'i kupa. Emogeta Jisyry. 12.1-27; Epr. 11.27-29; J.K.R. 7.30-36 Jerusarẽ taa pè okwatà. Ãmẽ Jesu ve oo Jerusarẽ taa kyty. 14A'e pè ovãe remẽ, Janejare'e moe'ea retã gyty oo. Tetã ypy rupi omã'ẽ erokwa.#2.14 Jane kõ oo Janejare'e moe'ea retã mè imoe'e remẽ, teima mõ ojuka ijapy ime'ẽtà ijupe kupa ipi. Ajawyi teima me'ẽarà kõ ojimoaty amãtejẽ a'e ypy rupi moma'e me'ẽ ipi, karakuri repy rõmõ. Oporakapa tesõ Janejare'e moe'ea retã ypy ãmẽ kupa ipi. Janejare'e pè temime'ẽ ãrã kõ rè omã'ẽ. Teima kõ iteetejẽ a'e pè tui, temime'ẽ ãrã kõ. Kejõ. Pui ra'yry kõ, kaneiru kõ, jirusi kõ. Wãisõ a'e pè tui. A'e kõ rè Jesu omã'ẽ. Ãmõ, karakuri omojituruka mãe kõ rè omã'ẽ teve, namesa 'aryvo oposiko karakuri rè kupa upa remẽ.#2.14 Ime'earà kõ moma'e me'ẽa rè kõrijõ tè ojipy'amogeta kupa upa ajamã'ẽ. Janejare'e rè nojipy'amogetai kupa. Ja'ave rõwã ekoi kupa. 15Ãmẽ Jesu a'evoa rè omã'ẽ erokwa remẽ, nopotai. Ajawyi tõpasã omõjã teima mopua rõmõ. A'e pupe pirujẽ kaneiru kõ pui kõ omopu imoẽ moẽ imono mono, Janejare'e moe'ea retã ypy pe wyi. Pirujẽ karakuri kõ ve omopepeipa imono. Namesa kõ ve tesõ werova ity. 16Ãmẽ jirusi jarà kõ pè e'i:

– Taperojisyry ikõ ãwĩ rapijarà eraa ike wyi nẽ! e'i. Moma'e japyytà mã'ẽ rena rõwã aã Papa retã, e'i. Papa napemoe'eigà wyi moko pejẽ Papa moe'ea retã ypy pè peiko, e'i Jesu ijupe kõ.

17A'evoa rè oromã'ẽ remẽ, tãmõ Tavi jĩgarerà rè oroja'a katu, kee e'i maekwerà rè: “Papa, apota katuay neretã. Ajawyi epy'a pupe ayay tesõ neretã wereko ai kupa remẽ”, e'i ojĩga maekwerà.#Jĩg. 69.9 [A'e jĩgarerà rupi katu tè Jesu ekoi. Ajawyi tè aepo jaa rè oroja'a, emimo'earà kõ rõmõ.]

18Ãmẽ Juteu rõvijã kõ omã'ẽ Jesu rè, a'evo wereko Janejare'e moe'ea retã rè remẽ. Naoryi 'ete ãmẽ kupa. Ajawyi e'i Jesu pè kupa:

– Ava ayvu rupi põ moko neiko? e'i kupa. Janejare'e ayvu rupi tè põ? e'i kupa. A'e ayvu rupi remẽ, ikasia emojisaoka orerovake ajawyi, terejikuwa! “Aje ywete” oro'età ãmẽ neupe, e'i teywete Jesu pè kupa.

19Aepo e'i Jesu pè kupa remẽ,

– Hoõ, e'i Jesu. Amojikuwatà. Aã tetã pemotararaipa esa ajawyi, Janejare'e moe'ea retã, e'i. Ekovijarerà tè ainõtà ãmẽ. Moapy ke remeve ainõmatà, e'i Jesu.#Mat. 26.61; 27.40; Mak. 14.58; 15.29

20Ãmẽ e'i ijupe kupa:

– Aã tetã 46 kwaray rõmõ tesõ werokwapa inõga rè kupa! e'i kupa. Ajawyi manyvo nerereko'ãi moapy ke remeve inõma! e'i Jesu pè kupa.

[Jesu e'i aai tègà toenu kupa. Ajawyi noenu katui ijayvu kupa.] 21Tetã pè rõwã aepo e'i. Oupewarà mõ tè aepo e'i. [“Ãwitõ tetã jamotararaipa remẽ ekovijarerà tè jainõ mijẽ. A'evotà ejuka paire apoeratà moapy ke remeve”, jaa tè aepo e'i Jesu ijupe kõ. Ore ve noroenuive.] 22Kãramõ opoera remẽ tè oroja'a ijayvukwerà rè ky'y. “Aje ywete Janejare'e ayvukwerà”, oro'e ãmẽ ky'y. “Aje ywete sikaepo Jesu ayvukwerà”, oro'e teve.

Jesu okuwa jane kõ py'a pewarà remẽwarà

23Jesu Jerusarẽ taa pè ekoi remẽ, Janejare'e kasia omojisaoka. Jane kõ mõa'ãrõwã omã'ẽ ee a'evo ekoi remẽ, tãmõ kõ jisyryawerà moetea 'arà rè ojimoaty mãe kõ. A'e kõ Jesu rè “aje” e'i. 24Ajamã'ẽ Jesu “aje” ne'i ijupe kõ, ipy'a pewarà kõ okuwapa rewarà mõ. 25Nopotai jamome'u ijupe ipy'a kõ rewarà, okuwapa teãmã rewarà mõ.

Currently Selected:

Juwão 2: oymNT

Highlight

Copy