Jesu koty rewarà kõ 5
5
Anania nokãte'ãi mã'ẽ rã'ãga rõmõ ekoi remẽwarà
1-2Na'evoi ãmõ kwaima'e mõ, Anania eu erà pè mã'ẽ. A'e rerekwarà pè Sapira eu. A'e kõ okãte'ã oma'e kõ rè. Nokãte'ãi maevo sõ tite kupa ajamã'ẽ. Kee e'i kupa. Wereko yvy tetã rena rã kupa mijã. A'e ome'ẽ karakuri repy rõmõ kupa. Ajaire weraatà karakuri ime'ẽ Jesu remimonokwerà kõ pè. Aje ipe sõ kee e'i kupa mijã:
– Pirujẽ ame'ẽmatà ekarakurikwerà peupe, ema'e repykwerà kõ, e'i titetà Jesu remimonokwerà kõ pè tomoe'e kupa.
Ajamã'ẽ iwari tè. Opota ipe omoripe kõ mijã. Ope'o imomyta ajamã'ẽ oupewarà kupa. Nome'ẽma 'ejẽ'ãi. A'evo remẽ erekwarà Sapira okuwa a'evotà omẽnà remẽ. Ajamã'ẽ Janejare'e okuwapa ipy'a pewarà kõ.
Ãmẽ Anania weraa karakuri pẽ ime'ẽ. Peturu pè weraa, Jesu koty rewarà kõ rõvijã pè. Ovãe ipyri karakuri me'ẽma rã'ãga ãmẽ. Ajamã'ẽ Janejare'e 'Ãg omojikuwaoka sikaepo a'evoa Peturu pè. 3-4Ajawyi Peturu ijayvukasi ijupe:
– Aã kõrijõ tè rõwã nekarakuri! e'i. “Amoripe kõtà ipõ!” ere ywe'e tite ore! Janejare'e 'Ãg nijamoripe kuwa'ãi ipi! Nivoi neiko ãwĩvo remẽ, e'i. Nejimokasioka ywe'e tite Satanasi pè neiko! e'i. Ene tè nema'e jarà rõmõ neiko mijã. Ajawyi nepota sõ ime'ẽma remẽ, neme'ẽma kuwa! e'i. Nerepotai sõ remẽ, nereme'ẽ'ãi kuwasi ãmẽ mijã. Nimanyvo'ãi kuwa ãmẽ mijã! e'i. Ajamã'ẽ, “Ame'ẽmatà ekarakuri”, ere paire, neme'ẽma kuwa mijã! e'i. Nejimoane'e jẽ ãjãgai rõvijã toike nepy'a pupe, e'i. Ajamã'ẽ Janejare'e nijamoripe'ãi kuwa, janepy'a pewarà okuwapa rewarà mõ, e'i. Ajamã'ẽ nepota tite emoripe rejupa mijã! e'i Peturu Anania pè.
5-6Ãmẽ aepo wenu remeve, Anania omãnõ o'a. Ãmẽ oiko kõnomĩokyry kõ mõ a'e pè. A'e kõ eãgwerà ojõvã jõvã eraa. Ajaire wenõe eraa ijaty kupa. A'evoa Jesu koty rewarà kõ wenu remẽ, ojimonyijay enu kupa.
7Ajaire sa'u ovãe erekwarerà Sapira iko. [Uu oporegeta Peturu pè.] Ajamã'ẽ nokuwaive omẽnà mãnõa. 8Ãmẽ ovãe Peturu pyri remẽ, Peturu e'i ijupe:
– Aje põ aã rõmõ'ĩte nemẽnà karakuri moma'e repykwerà? e'i ijupe.
Ãmẽ erekwarerà e'i:
– Õ'õ, a'e rõmõ'ĩte, e'i teywete teve owari rõmõ.
9Ajawyi Peturu e'i ijupe:
– Pemoripe ywe'e titetà Janejare'e 'Ãg! e'i. Ajawyi nemẽnà omãnõ ji'ite. A'evo tary ve ene ky'y, e'i. Nemãnõtà newari rewarà mõ, nemẽnà vove, e'i amãtejẽ ijupe. “Tamoripe!” ere ywe'e tite oreupe mijã! e'i. Ajamã'ẽ nijamoripe kuwa'ãi Janejare'e, e'i. Wãitõ kõnomĩokyrerà kõ nerãrõ upa. Ãwitõ nemẽnà reãgwerà ji'ite weraapa ijaty kupa. Ãwĩvotà nereraa tary ve neraty kupa, e'i.
10Ameve Sapira omãnõ mijẽ o'a. Peturu rovake omãnõ o'a. Kõnomĩokyrerà kõ oike remẽ, eãgwerà rè omã'ẽ kupa. Weraa mijẽ eãgwerà ijaty kupa.
11A'evoa ojenu jenu pirujẽ Jesu koty rewarà kõ pè. Ojimonyijay enu ãmẽ kupa. Ãmẽ ywesõ omomojy wete Janejare'e kupa. Ajawyi nopotai 'eteay Janejare'e ayvu ojavy kupa.
Janejare'e kasia rupi ekoi kupa remẽwarà
12Ãmẽ Janejare'e omokasi Jesu remimonokwerà kõ, jane kõ pyterà rupi toposiko kupa. Iteetejẽ mãrãnà jikuwa e'ã kõ oinõ Janejare'e kasia rupi kupa ipi. Poromokatu kupa. Ãwĩ rapijarà. A'evoa rè jane kõ omã'ẽ remẽ, okuwa Janejare'e tè omokasi kõ a'evo toiko kupa. Kõ'ẽ jawe jawe Jesu koty rewarà kõ ojimoaty ipi, emimonokwerà kõ reve. Janejare'e moe'ea retã ypy pè a'evo ekoi kupa, Saromão rena eu erà pè mã'ẽ ypy pè. 13Temimoe'e rõmõ ipe Jesu koty rewarà kõ ekoi. Ajamã'ẽ ãmõ kõ Jesu koty rewarà rõwã mãe kõ nojimokasi oo ojimoaty ipyri kõ ipi, okyje kupa rewarà mõ. 14Ajamã'ẽ ãmẽ ywesõ mõa'ãrõwã tesõ jane kõ “aje” e'i Janerõvijã ywete pè wemireko katuarà rõmõ ky'y. Kwaima'e kõ. Wãivĩ kõ wyive. Ijatyray tesõ kupa ky'y. 15Mãrãnà jikuwa e'ã Jesu remimonokwerà kõ oinõ Janejare'e kasia rupi ipi. Ajawyi jane kõ weraa itekorã mãe kõ ikoty kõ tomokatu kõ kupa ipi. Ikea kõ pupe weraa kõ kupa ipi, pee reme pè tatui. Ãmẽ tè Peturu okwa ipi remẽ, i'ãgwerà jẽgà omõ'ã remẽ, tomokatu itekorã mãe kõ erokwa ipi. 16Ãmõ taa taa nikuipei mãe kõ pe wyi weru eru itekorã mãe kõ kupa ipi, Jerusarẽ taa kyty. Ãmõ, ãjãgaiwerà ojimoemija ee mãe kõ ve weru eru kupa ipi. Aty wasu tè ky'y. A'e kõ Jesu remimonokwerà kõ omokatupa ipi, pirujẽ.
Juteu rõvijãgwerà kõ Jesu remimonokwerà kõ omojaiwe remẽwarà
17A'evo ekoi kupa rewarà mõ, Juteu kõ rõvijãgwerà kõ ojikõ'õ tesõ Jesu remimonokwerà kõ rè. Janejare'e pè oporegeta mãe kõ rõvijã wasu a'evo ekoi, ovoarà kõ reve. Satuseu kõ mõ a'e kõ. A'e kõ ojimõarõ.
18Ajawyi opyy ipe Jesu remimonokwerà kõ imopã'ã jimopã'ãga pè kupa. 19Ajamã'ẽ Janerõvijã ywete oovapyjavooka jẽ sikaepo wemĩgwai yvapewarà pè toenõe kõ jimopã'ãga pupe wyi eraa ikatu pè. Pya sikaepo a'evo wereko. 20Ãmẽ kee e'i yvapewarà weminoẽgwerà kõ pè:
– Pekwa Janejare'e moe'ea retã ypy pè. Jesu rekoa rupi tekoua tapemome'u jẽ jane kõ pè, tokuwa katu kupa, e'i ijupe kõ ity oo.
21A'evo ãmẽ ijayvu rupi ekoi kupa. Ji'iveay oo Janejare'e moe'ea retã ypy pè jane kõ motekokuwa kupa. A'evo remẽ, jõvijãgwerà kõ: “Jimopã'ãga pè tui kupa”, e'i jẽ tite. Janejare'e pè oporegeta mãe kõ rõvijã wasu aepo e'i, wemĩgwai kõ reve. A'e kõ ajaire ovãe ojimoaty, jimoatya rena pè. Ãmõ, Juteu rõvijã kõ ve ovãe. Pirujẽ. A'e kõ ojimoaty remẽ, omono ipe Janejare'e moe'ea retã rãrõarà kõ too wemimopã'ãgwerà kõ pijarà mõ. 22Ajamã'ẽ a'e emimonokwerà kõ ovãe jimopã'ãga pè remẽ, soõ, naikoi jimopã'ãga pupe upa! Ajawyi ojivy oo omuuarerà kõ gyty kupa, jõvijã kõ gyty. 23Kee e'i ijupe kupa:
– Naikoi kupa ky'y! Oroo ipe jimopã'ãga kyty esa. Ojiovapykãtã jẽ upa. Ãrõarà kõ teve wãrõ jẽ upa, okenapa pè. Ajamã'ẽ oroovapyjavo remẽ, soõ, naikoi! e'i kupa.
24Aepo Janejare'e pè oporegeta mãe kõ rõvijã kõ wenu remẽ, manyvo ne'i tesõ ojipy'amogeta rõmõ kupa ãmẽ. Ojimonyi kõrijõ kupa. Janejare'e moe'ea retã rãrõarà kõ rõvijã ve a'evo ekoi.
– Haa! Ava põ omoẽ imono kõ? e'i kupa. Maty põ oo kupa? e'i tite kupa.
25Ameve ava mõ ovãe a'e pè, kee javo:
– Pejapyaka rã'ĩ si eayvu rè! Koiwerà kwaima'ekwerà kõ, penemimopã'ãgwerà kõ, ike tui, Janejare'e moe'ea retã ypy pè! Poromotekokuwa mijẽ kupa upa! e'i ijupe kõ.
26Ameve ãrõarà kõ rõvijã weraa wemĩgwai kõ, Jesu remimonokwerà kõ pijarà mõ mijẽ. Weru mijẽ kupa. Ajamã'ẽ nojimorarai ee kõ, atyry wyi okyje kupa rewarà mõ. Kee e'i kupa: “Atyry kõ takuru pè janejapi japità janejuka, opota katu Jesu remimonokwerà kõ kupa rewarà mõ”, e'i kupa. 27Weraa kõ jõvijãgwerà kõ rovake mijẽ ãmẽ, Jesu remimonokwerà kõ. Pirujẽ weraa kupa ky'y. A'e kõ Janejare'e pè oporegeta mãe kõ rõvijã wasu waka ipe.
28– Kee oro'epa itõkõ pejẽ: “Jesu rekoa tapemojenu e'ã jane kõ pè imo'e kõ ky'y!” oro'epa itõkõ pejẽ! Emã'ẽ. Aepo oro'e ipe remẽ, pemojenu jenu jẽ erokwa Jerusarẽ taa rupi! Ãwisõ pirujẽ jane kõ tojikõ'õ orere ky'y, “Peayvu rupi tè Jesu ojuka kupa!” te'i oreupe kupa, e'i epe ijupe kõ.#Mat. 27.25
29Ajamã'ẽ Peturu wayvuapi kõ, ãmõ Jesu remimonokwerà kõ reve. Kee e'i ijupe kõ:
– Janejare'e tè oromomojytà erovija ipi! Mirà kõ rõwã oromomojytà ipi! e'i kupa. 30Janerãmõi kõ rõvijã tè Janejare'e. A'e tè omomoera Jesu, yvyra jipokana rè pejukaoka remẽ. 31Aekwerà Janejare'e omojõvijã wasu weeve ereko ky'y, tomosĩoka Isaeu kõ ijaiwererà kõ rè toitypypyipaoka. Ojiporijauesaoka ijupe mãe kõ aiwererà pè “awyjepa” e'i. Janerereko katuarà rõmõ tè aepo e'i! Ajawyi Janejare'e noja'a'ãi ijaiwererà kõ rè ãmẽ ky'y. 32Ore ywete oromã'ẽ Jesu jukaa rè! Opoera paire oromã'ẽ mijẽ ee! Ajawyi oromã'ẽ ee maekwerà tè oromojenu ipi. Janejare'e 'Ãg remikuwa rupi tè a'evo oroiko ipi! A'e o'Ãg omoige werovija mãe kõ py'a pupe ipi, e'i Peturu kõ.
33Aepo jõvijãgwerà kõ wenu remeve, ojikõ'õ wete kupa ky'y.
– Ejo sijukaoka kõ! e'i Peturu kõ pewarà mõ kupa ky'y.
34Ajamã'ẽ aepo e'i kupa remẽ, jõvijã mõ opõ'ã javo ipyterà kõ pe wyi. Pariseu mõ a'e, tãmõ Moisesi remikusiwarerà rè poromo'e mã'ẽ mõ. A'e pè Kamarieu eu. Temimoe'e tè a'e. Otekokuwavay mã'ẽ tè. A'e omoisyryoka rã'ĩ Peturu kõ ikatu pè. 35Ajaire ovo mãe kõ pè kee e'i:
– Isaeu kõ. Tapejiapy'a e'ã ikenẽ! Tapetekokuwa rã'ĩ manyvotà pereko ãwĩ kõ! e'i. 36Kee rewarà mõ. Oiko jane mõ karamoe remẽ, a'e Teuta eu erà pè mã'ẽ. A'e erãkwẽ ywete jõvijã rõmõ mijã. Ajawyi omoaty wete jane kõ opyri. 400 rõmõ tesõ oo emĩgwai kõ rõmõ kupa mijã. Ajaire omãnõ a'e Teuta ky'y. Ajaire emĩgwaiwerà kõ ojimosãsãima oo oo pirujẽ ky'y. A'e werovija maekwerà kõ. “Jõvijã wasu tè”, ne'i ijupewarà mõ kupa ky'y, omãnõ rewarà mõ.
37– Ajaire ãmõ tè a'evo ve ekoi, Juta eu erà pè mã'ẽ. Karireja yvy wãnà tè Juta. Romã pewarà jõvijã wasu omoirõ irõoka wemĩgwai kõ remẽ jakatu, Juta ojikuwa. A'e ve omoaty wete jane kõ opyri mijã. Ajaire a'e omãnõ teve. Ajaire emĩgwaiwerà kõ ojimosãsãima teve oo oo kupa wena kõ gyty ky'y. Noja'ai oõvijãgwerà rè kupa ky'y. 38Ajawyi kee a'e pejẽ. Aã kõ ve maevo ojimosãsãità ajaire, a'e. Ajawyi tijaposiko e'ã ee kõ, a'e. Tijajimopirai e'ã teve ee kõ jaiko. Simono kõ kõrijõ tè too kupa. Maevo kãramõ nomovyvy'ãi Jesu rewarà kupa ky'y. Ovote a'evotà ekoi kupa. Opità ijayvu kõ. Jane kõ ayvu rupi tè sõ remẽ, ke'ĩatutà tè. 39Ajamã'ẽ Janejare'e ayvu rupi tè sõ oporegeta kupa remẽ, awyje a'evotà ãmẽ. Nijamoma kõ kuwa'ãi ãmẽ. Ãmẽ moko sõ sireko ãwĩ kõ remẽ, Janejare'e tè a'evotà ãmẽ sireko ywe'e titetà ãmẽ! e'i Kamarieu oporegeta.
Aepo e'i remeve tite jõvijã kõ:
– Õ'õ aje, e'i ky'y. A'evo sireko ãmẽ, e'i kupa.
40Omuroka mijẽ Jesu remimonokwerà kõ kupa. Onõpã nõpãoka kõ rã'ĩ kupa. Ajaire ijayvukasi epe kõrijõ tè ijupe kõ:
– Jesu rekoa rè ikõ tapeporegeta e'ã ky'y! e'i epe ijupe kõ.
[Aepo e'i paire omoẽ too kupa ky'y. Nojuka kõi kupa ajamã'ẽ, Kamarieu ayvu rupi.]
41Ãmẽ jõvijãgwerà kõ jimoatya pe wyi oẽ oo kupa remẽ, oryvay tè oo kupa.
– Jesu remimonokwerà tè jane rewarà mõ tè, janenõpã nõpã kupa! e'i kupa. Ajawyi janeroryvay jẽtà jaiko ky'y, Jesu rewarà mõ ãwĩvo janerereko kupa rewarà mõ, e'i kõrijõ tè kupa. Janejare'e okuwa amãtejẽ nijapi'ãi ijayvu mojenua wyi mã'ẽ janemomorijau ipe kupa remẽ, e'i e'i kupa.
Ajawyi ory jẽ kupa. 42A'evo paire poromotekokuwa jẽ Jesu rè kupa. Kõ'ẽ jawe jawe a'evo ekoi kupa. Omojenu jẽ Jesu rekoa jane kõ pè erokwa kupa ipi.
– Aje ywete, Janejare'e Remimuurerà tè Jesu, Janerõvijã ywete rõmõ! e'i jẽ.
Ãwitõ Janejare'e moe'ea retã ypy pè a'evo ekoi kupa, ãwĩvo ve joetã wyry rupi ekoi kupa.
Currently Selected:
Jesu koty rewarà kõ 5: oymNT
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
