Jesu koty rewarà kõ 19

Pauru Epesu taa pè ekoi remẽwarà

1Ajaire Korĩtu taa pè Aporu tui remeve, ãmẽ Pauru oo pee rupi Asia yvy rupi, ajaate ovãe Epesu taa pè. Aporu rakypyrerà pè ovãe. A'e pè Jesu koty rewarà kõ mõ wesa. 2A'e kõ pè e'i:

– Janejare'e omuroka põ o'Ãg peupe, Jesu rè peja'a ypy remẽ? e'i.

– Ãnĩ! e'i kupa. Norokuwai Janejare'e 'Ãg oiko, e'i kupa.

Ãmẽ Pauru e'i:

3– Ava ayvu rupi põ pejimojãmorĩ ajawyi? e'i.

– Juwão poromojãmorĩ maekwerà ayvu rupi, e'i kupa.

4Ajawyi Pauru e'i:

– Juwão poromojãmorĩ remẽ, jane kõ aiwererà reitypypyia mojikuwaparà rõmõ tè a'evo poroereko. Kee e'i teve Juwão atyry kõ pè, Isaeu kõ pè: “Ajaire erakypyrerà rupi, ãmõ tè uutà. [A'e tè Janejare'e Ra'yry tè.] A'e rè si tapenako'i penereko katuarà rõmõ”, e'i maekwerà. Jesu pewarà mõ aepo e'i, e'i Pauru ijupe kõ.#Mat. 3.11; Mak. 1.4,7-8; Ruk. 3.3,16; Juw. 1.26-27

5Ãmẽ aepo jaa wenu kupa remẽ, Jõvijã Jesu ayvu rupi tè ojimojãmorĩoka kupa ky'y. 6A'evo remẽ Pauru wapytepyy kõ. Ameve Janejare'e 'Ãg oike ipy'a kõ pupe ky'y. Ãmẽ ãmõ yvy yvy wãnà kõ ayvu rupi oporegeta Janejare'e moe'e kupa, Janejare'e 'Ãg kasia rupi. Wemikuwa e'ã rupi oporegeta kupa. Janejare'e ayvu omojenu teve jane kõ pè kupa ky'y, Janejare'e 'Ãg omojenuoka ijupe kõ maekwerà. 7Kwaima'e kõ 12 rõmõ a'evo ekoi mãe kõ.

8Ãmẽ moapy jay rõmõ tesõ Pauru werokwapa a'e pè, jane kõ motekokuwa iko. Oo oo jane kõ motekokuwa Janejare'e ayvu rè jimo'ea retã wyry pè ipi. Manyvo Janejare'e janerereko Janerõvijã ywete rõmõ mã'ẽ rè omotekokuwa kõ ipi. Ojimokasi tesõ oporegeta jane kõ pè ipi, “aje ywete” te'i kupa.

9Ajamã'ẽ ãmõgwerà “aje ipõ” ne'i Pauru ayvu pè. Noerovija tari kupa. Oporegeta ai kõrijõ tè atyry kõ rovake kupa ipi.

– Nikatui Jesu ayvu rupi tekoua, e'i e'i kupa.

Juteu kõ tè aepo e'i. Ajawyi Pauru ojisyry a'e tetã pe wyi, noenu tari kupa rewarà mõ. Jesu koty rewarà kõ ve weraa oupi. Nooi Juteu kõ jimoatya retã pè ky'y. Juteu rõwã mãe kõ tè omo'e ky'y. Tiranu eu poromo'earà mõ pè. A'e retã pè Pauru oo poromo'e ky'y. Kõ'ẽ jawe jawe a'e pè oo Jesu rekoa rè oporegeta jane kõ reve ipi ky'y.

10Mõrijõ kwaray tesõ Pauru a'evo ekoi, ajaate Janerõvijã ywete ayvu ojenu katupa pirujẽ a'e yvy rupi ky'y. Asia yvy rupi. Ke'ĩrõwã ojenu. Ãwitõ Juteu kõ pè ojenu, ãwĩvo ve Juteu rõwã mãe kõ pè ojenu ve.

Seva ra'yry kõ omoẽ tarepe ãjãg kõ remẽwarà

11Ãmẽ Pauru Epesu taa pè ekoi remẽ, marama tè ekoi, Janejare'e 'Ãg kasia rupi ipi. [Poromokatu ipi. Ãmõ, ãjãg kõ omoisyry ojimoemija ee mãe kõ wyi ipi. Wãisõ ekoi.] 12Ajawyi jane kõ oo Pauru resa remẽ, kamisa rovajarerà#19.12 Lenços e aventais Pauru remimõtãgwerà werojivy itekorã mãe kõ tojipy ee okatua rõmõ ipi. Ãjãg kõ ve oẽ oo oo iwyi kõ ipi. Janejare'e 'Ãg kasia rupi tè a'evo.

13-14Ãmẽ oiko Juteu kõ mõ, a'e taa taa rupi oo oo iko ipi mãe kõ. A'e kõ ãjãg kõ moisyrya kuwaparà kõ tè. Pe'ĩte tuu kõ. Seva eu tuu kõ pè. Janejare'e pè oporegeta mãe kõ rõvijã tè a'e Seva. A'e ra'yry kõ 7 rõmõ ãjãg moisyrya kuwaparà kõ rõmõ ekoi. A'e kõ pè Pauru rewarà ojenu, Janerõvijã Jesu ayvu rupi ãjãg kõ moisyrya maekwerà. Ajawyi kee e'i epe kupa:

– A'evo tè kuwasi jane jaiko! Jesu ayvu rupi simoisyrytà ãjãg, e'i kupa.

A'evo tarepe Seva ra'yry kõ ãmẽ. Jõvijã Jesu ayvu rupi omoẽ tarepe ãmẽ kupa. Ikoty rewarà kõ rõwã ajamã'ẽ. Wã'ã tarepe tè Pauru kupa ajamã'ẽ. 15Ajamã'ẽ ãjãgai kõ noerovija kõi. Okuwa Jesu koty rewarà kõ rõwã kupa. Ajawyi noerovijai ãjãg kõ. Wayvuvaja kõ kõrijõ tè.

– Akuwa Jesu ije! e'i ãjãgai. Ãmõ, Pauru teve eremikuwa! e'i. Ava kõ pejẽ ãmẽ? Napeayvukasi oreupe! e'i kõrijõ ãjãgai ijupe kõ.

16Ameve ãjãgai ojimoemija ee mã'ẽ ojimokasi oo te'ĩte ijapijuka kõ ojukasĩsĩ kõ tesõ iko. Ajawyi ojavapa a'e tetã wyry pe wyi oo kupa. Ijyru kekeipa teve tesõ oo kupa. A'evo Seva ra'yry kõ ojimoe'e tarepe Jesu ayvu rupi remẽ. 17A'evoa ojenupa pirujẽ Epesu wãnà kõ pè remẽ, okyje ai tè kupa. Juteu kõ. Juteu rõwã mãe kõ teve. Ajawyi kee e'i kupa:

– Haa! Aje ywete Jõvijã Jesu sirovija ajawyi! Nivoi sirovija rã'ãga kõrijõ tè remẽ! e'i kupa.

Ãmẽ ywesõ Jesu omomojy wete ãmẽ kupa. 18Oiko a'e pè ijatyray Jesu werovija ipe mãe kõ mijã. Ajamã'ẽ tyvija rupi nivoi jẽ tè ekoi kupa mijã. A'e kõ uu uu ojimomewa waiwererà reityoka ky'y,

– Aje ywete si Jesu rekoa rupi taiko ky'y! e'i kupa.

19Oiko teve mõa'ãrõwã ãjãgai kasia rupi oposiko vija mãe kõ mijã. Kareta rupi ãjãgai rewarà kõ ojimo'e mãe kõ. A'e kõ okareta kõ omoatypa eru eru ijapypa jane kõ rovake ky'y, awyje a'evo toiko e'ã kupa ky'y. A'e remiapykwerà epy wete maekwerà kõ tè mijã, ijatyray rewarà mõ. Epykwerà jamoirõ irõ remẽ, 50.000 rõmõ tesõ kuwa karakuri sĩ moeta#19.19 Moeda de prata: Pe'ĩ moeta ikasi pe'ĩ 'arà mosikoa repykwerà rõmõ ipi. repykwerà.

20A'evo Janejare'e kasia rupi Janerõvijã ywete ayvu erãkwẽ ywete ky'y. Ãmẽ ywesõ omojenu jenu tesõ erokwa kupa.

Epesu wãnà kõ ojimoaty tesõ ojikõ'õ remẽwarà

21Aja paire kee e'i Pauru:

– Apota aa Jerusarẽ taa kyty, e'i. Aa remẽ, Masetonia yvy rupi rã'ĩ akwatà, e'i. Ajaire Akaja yvy rupi ve, ajaate Jerusarẽ taa pè aatà avãe, e'i. Ajaire Romã yvy kyty aatà, e'i.

22Ãmẽ opãtavõarà kõ mõ omono wenone rupi Masetonia yvy kyty. Mõrijõ. Timoteu. Ãmõ, Erasitu eu mã'ẽ. Mokopejõ omono wenone rupi. Pauru ãmẽ opyta jẽ rã'ĩ Asia yvy pè, Epesu taa pè.

23A'evo remẽ Epesu taa wãnà kõ ojimopirai tè Janerõvijã Jesu rupi tekoua rewarà mõ. 24Kee wereko Epesu taa pè ojarà rã'ãga kõ moe'ea retã wasu. Atemi eu ijarà rã'ãga kõ pè. Wãivĩ rã'ãga tè a'e Atemi. A'e moe'ea rè uu uu jane kõ Epesu taa pè ipi. Ajawyi kwaima'e kõ mõ ojarà rã'ãga moe'ea retã rã'ãga kõ oinõ. Yvy karakuri sĩ jimoãtãgwerà tetã miti kõ oinõ kupa, ãwĩvo uu Atemi moe'e mãe kõ topyy erojivy wena kyty. A'e tetã miti repykwerà rè inõgarerà kõ kejavu karakuri opyy ipi. Temetiriu eu a'evo ekoi mã'ẽ mõ pè. 25A'e omoaty pirujẽ ovo oposiko mãe kõ. Kee e'i ijupe kõ:

– Ejimorypa kõ, pekuwa aã janeposikoa rè tè janekarakuri ywete ipi. 26Ajamã'ẽ pejẽ ywete Pauru ayvu peenu, kee e'i janereminõgwerà kõ pè remẽ: “Aje mã'ẽ rõwã ãwĩ kõ”, e'i remẽ. “Mirà kõ opo pè tè oinõ maekwerà kõ tè ãwĩ”, e'i remẽ. Aepo e'i tesõ remẽ, jane kõ omomoioka tesõ janewyi. Janereminõgwerà kõ nopyy ywe'ei kupa ky'y. Pauru rewarà mõ tè a'evo ekoi kupa. Ijatyray ike wãnà kõ a'evo ekoi, ijayvu rupi. Ike wãnà kõ rõmõ'ĩte rõwã omomoioka. Werywete pirujẽ Asia yvy rupiwarà kõ ve, e'i. Pemã'ẽ a'evoa rè. 27A'evo ekoi jẽ remẽ, keetà maevo. Ijayvukwerà kõ rupi jane kõ “nikatui” e'ità janereminõgwerà kõ pè ãmẽ kupa ky'y. Opatà janeposikoa a'evo ekoi kupa remẽ. Keetà teve maevo ekoi kupa. Janejarà Atemi retã ikatuay wete mã'ẽ wyi opoità kupa ky'y. Nonu'ãi imoe'e kupa ky'y, a'e Atemi ywesõ ipe ikatuay remẽ. Pirujẽ Asia yvy wãnà kõ omoe'e ywete ipe mã'ẽ. Asia kupei kytywarà kõ ve omoe'e ywete ipe mã'ẽ a'e. A'evo rõwãtà ky'y! e'i Temetiriu ijupe kõ.

28A'evo Temetiriu omogeta katu atyry kõ. Ãmẽ aepo jaa wenu kupa remeve, py'awarà mõ ojikõ'õ ywete Pauru rè kupa ky'y. Ajawyi wapukai kupa, kee javo:

– Atemi Epesu pewarà ywesõ temimoe'e rõmõ! e'i wapukai rõmõ kupa.

29Aepo e'i mã'ẽ ojenu jenu pirujẽ a'e taa rupi. Py'awarà mõ a'e taa wãnà kõ ojimoaty ãmẽ. A'e kõ ve ojimõarõ ky'y. Ajawyi Pauru jimorypa kõ mõ opyy eraa kupa. Kaiju. Ãmõ, Aritaku. Omotyryry kõ tesõ eraa kupa, jane kõ jimoatya rena pè. Masetonia yvy wãnà kõ tè Kaiju kõ. Pauru reve oo kupa ipi mãe kõ tè.

30A'evo remẽ Pauru ywete opota atyry kõ pè oporegeta mijã. Jimoatya rena kõ pè ootà mijã. Ajamã'ẽ eeve ekoi mãe kõ nomonookari, Jesu koty rewarà kõ. 31Ãmẽ a'e yvy pewarà jõvijã kõ mõ, Pauru jimorypa kõ tè. A'e kõ omono wayvu Pauru pè.

– Tereo e'ã ikõ jimoatya kõ rena pè nẽ! e'i imono ijupe kupa.

32Ãmẽ jakatu a'e jimoatya rena pè tui mãe kõ, pirujẽ ojimokasi kasi tesõ wapuka pukai kupa upa. Ãmõgwerà, ãmõ ãmõ rupi tè wapuka pukai oporegeta kupa. Ãmõgwerà, ivo ve. Mõa'ãrõwã jane kõ nokuwai moma'e rõmõ tè sikaepo ojimoaty. Ojimoaty tepe'yte kupa.

33A'evo remẽ Juteu kõ omoãjã tesõ Aresãtiri eu erà pè mã'ẽ eraa atyry kõ rovake. [Ajawyi omã'ẽ ee mãe kõ mõ kee e'i:

– Ãwĩ teipõ omoaioka kõ, e'i tite ikuwa e'ã.

Ãmẽ Aresãtiri oporegetatà ojireko katu.] Ojipomomojai epe atyry kõ gyty, “Topi rã'ĩ ekojẽ kupa, taporegeta ijupe kõ”, e'i tite mijã.

34Ajamã'ẽ Epesu taa wãnà kõ omã'ẽ ee remẽ,

– Juteu mõ tè ãwĩ! e'i kõrijõ ãmẽ ijupe kupa. Janeretãrã rõwã! e'i kupa.

Ajawyi nojapyaka'ãi kupa. Wapuka pukai tesõ kõrijõ tè kupa, pirujẽ. Wapuka pukai puku tesõ kupa upa, mõrijõ ora#19.34 2 horas tesõ. Kee e'i wapuka pukai kupa:

– Atemi ywesõ ikasiay Epesu taa pewarà rõmõ! e'i e'i kupa. Janejarà tè Atemi! e'i e'i ywe'e tite kupa.

35Ãmẽ tena wasu pewarà jõvijã mõ wayvumomioka kõ jẽ sire'e ky'y. Ãmẽ tè tite opi kupa ky'y. Kareta rè oposiko mã'ẽ tè a'e jõvijã. Kee e'i imomi kõ:

– Jane kõ! Epesu taa wãnà kõ! Pejapyaka eayvu rè! Kee sikuwa. Atemi ywesõ ikasiay mã'ẽ. Imoe'ea retã rè jakãte'ã ipi, ike Epesu taa wãnà kõ tè jane rewarà mõ. Ãmõ, takuru jimoãtãgwerà yva pupe wyi o'a mã'ẽ rè ve jakãte'ã. A'evoa sikuwa, e'i. 36Ajawyi ava “warite” ne'i'ãi. Ajawyi tãwĩvo e'ã ky'y. Moko tapejẽ e'ã ky'y. Tapetekokuwa katu ky'y, e'i. 37Pejẽ ãwĩ kwaima'ekwerà kõ peeru kyvo kyty, e'i. Ajamã'ẽ nojimorarai Atemi moe'ea retã rè kupa. Nimonai teve ipupewarà kõ rè kupa. Noerõarõi ipupewarà kõ kupa, e'i. Atemi ve noerõarõi kupa, e'i. [Ãwĩ rupi rõwã sikuwa tekoua ipi, e'i.]

38– Ajawyi kee a'e pejẽ. Temetiriu kõ nivoi mã'ẽ omo'ytà ee kõ remẽ, a'e kõ tè too jõvijã kõ rovake. A'evoa kuwaparà rõmõtà, tekoua kuwaparà kõ tè ãwĩ kõ rewarà mõ. 39Ajamã'ẽ pejẽ, pepota peporegeta remẽ, jõvijã kõ rena kyty tapeo. A'e pè kõrijõ tè sikuwa ãwĩ rapijarerà ipi. [Ikatu pè rõwã. Jimoaty teitetea rupi rõwã tesõ.] 40Ma'e remẽ peapuka pukai puku jẽ remẽ, jõvijã wasu Romã pewarà tè pemojikõ'õokatà janere! A'evo remẽ ni'e'ãi janeupe. Manyvo nija'e'ãi jõvijã wasu ayvuvaja ãmẽ? e'i ijupe kõ.

41Aepo e'i paire, awyjepa aepo e'i. Ojisyrypa ijayvu rupi ãmẽ kupa.

Currently Selected:

Jesu koty rewarà kõ 19: oymNT

Highlight

Copy