Mateo 6

Jesupa jarateeda ne–inaa pia oo kꞌawaadamerã

1—Kꞌĩrakꞌaupai awaraarã taide ne–inaa pia oodai Tachi Akꞌõre–itꞌee, ãchia tꞌo pꞌanadamerã. Mãga ooruta pɨrã, parã ɨtꞌaripema Akꞌõre Waibɨapa parãmaa tee–e paitꞌee ne–inaa pia ichia kꞌĩsia iru bɨ teeitꞌee ichideerãmaa.

2ʼMaperã parãdepemapa ne–inaa chupɨria beerãmaa teekꞌãri, jõmaarãmaa pɨa ooda jaranáaji. Seewata Tachi Akꞌõrede ijãapatada apataarãpa mãga oopata Tachi Akꞌõre Ũraa jarateepata tede mãikꞌaapa calle jãde, eperãarãpa ãchi tꞌo pꞌanadamerã. Mɨa wãarata jararu. Ma tꞌo pꞌanɨɨrã pedee pia aupai iru pꞌanadaitꞌee, Tachi Akꞌõrepa ãchimaa tee–e paitꞌee perã ne–inaa pia irua kꞌĩsia iru bɨdepema. 3Ãchia oopata kꞌãyaara pɨa netꞌaa teekꞌãri chupɨria beerãmaa, jaranáaji, pɨchi kꞌõpꞌãyo piara bɨmaa paara. 4Kꞌĩupꞌee óoji pɨ ɨtꞌaripema Akꞌõre Waibɨapa unu bairã. Ichiata ne–inaa pia teeitꞌee pɨmaa ichia kꞌĩsia iru bɨdepema.

Jesupa jarateeda ɨtꞌaa tꞌɨ̃ kꞌawaadamerã

(Lucas 11.2-4)

5—Parãpa ɨtꞌaa tꞌɨ̃dakꞌãri, oonáatɨ Tachi Akꞌõrede ijãapatada apataarãpa oopatakꞌa. Tachi Akꞌõre Ũraa jarateepata tede jõmaarã taide ãchi akꞌɨnɨ̃ pꞌaneepata ɨtꞌaa tꞌɨ̃daitꞌee. Ichiaba pꞌuuru jãde plaza bee kꞌidaa mãga oopata eperãarãpa unudamerã. Mɨa wãarata jararu. Eperãarã pia pedeepata aupai iru pꞌanadaitꞌee. 6Maperã pɨ ɨtꞌaa tꞌɨ̃kꞌãri, pɨchi cuartode tꞌĩ́uji mãikꞌaapa chi puerta pia jɨ̃́aji. Mãpai ɨtꞌaa tꞌɨ̃́ji pɨchi Akꞌõre Waibɨamaa, iru mama bairã pɨ ome. Irua pɨa oomaa bɨ unukꞌãri, ne–inaa pia teeitꞌee pɨmaa, ichia kꞌĩsia iru bɨdepema ma ne–inaa ichideerãmaa teeitꞌee.

7ʼƗtꞌaa tꞌɨ̃kꞌãri, pia–e bɨ ipꞌii ichi aɨ pedeeta jara nɨ̃baitꞌee. Ijãadakꞌaa beerãpa mãga oopata, kꞌĩsiapata perã audú pedee jõnɨpa Tachi Akꞌõrepa audupɨara ũriitꞌee. 8Mãɨrãkꞌa pꞌananáatɨ, Tachi Akꞌõrepa kꞌawa bapari perã parãpa falta pꞌanɨ, iididai naaweda. 9Nãga ɨtꞌaa tꞌɨ̃daipia bɨ:

‘Tachi Akꞌõre ɨtꞌari bɨ,

pɨ tꞌɨ̃ awaraa tꞌɨ̃ kꞌãyaara pipɨara bɨ.

10Eperãarã bɨ́ji pɨchi jua ekꞌari pɨchideerã pꞌaneedamerã.

Óoji pɨchia kꞌinia bɨkꞌa na pꞌekꞌau eujãde, ɨtꞌari ooparikꞌa.

11Tai–itꞌee chikꞌo téeji ewari chaa kꞌodaitꞌee.

12Taipa pꞌekꞌau kꞌachia oopata chupɨria kꞌawáaji mãikꞌaapa perdonáaji

taipa perdonaapatakꞌa, awaraarãpa taimaa ne–inaa kꞌachia oodakꞌãri.

13Tai kꞌachiade baaipináaji.

Tai kꞌaripa atáji Netuara Poro Waibɨa juadeepa.’

14ʼParãpa perdonaaruta pɨrã awaraarãpa ne–inaa kꞌachia oopata parãmaa, Tachi Akꞌõre ɨtꞌari bɨpa ichiaba perdonaaitꞌee parãpa ne–inaa kꞌachia oopata. 15Mamĩda parãpa perdonaada–e pꞌanɨ pɨrã awaraarãpa ne–inaa kꞌachia oopata parãmaa, mãgara Tachi Akꞌõrepa ichiaba perdonaa–e parãpa ne–inaa kꞌachia oopata.

Jesupa jarateeda nekꞌoda–ee ɨtꞌaa tꞌɨ̃ kꞌawaadamerã

16—Parã nekꞌoda–ee pꞌanadakꞌãri jĩpꞌa kꞌĩsiaitꞌee Akꞌõre netꞌaade, kꞌĩra pia–ee pꞌananáatɨ Akꞌõrede ijãapatada apataarãpa oopatakꞌa. Mãga nipapata awaraarãpa kꞌawaadamerã nekꞌoda–ee pꞌanɨ, mãikꞌaapa ãchi tꞌo pꞌanadamerã. Mɨa wãarata jararu. Mãgapai iru pꞌanadaitꞌee. 17Pɨ ɨtꞌaa tꞌɨ̃ bakꞌãri nekꞌo–ee, kꞌĩra sɨ́ɨji mãikꞌaapa tꞌɨ̃–irúji 18apidaapa kꞌawanaadamerã pɨ nekꞌo–ee bɨ. Eperãarãpa pɨ ɨtꞌaripema Akꞌõre Waibɨa pꞌoyaa unuda–e pꞌanɨ mĩda, irua kꞌawa bɨ pɨa ne–inaa mera oo bɨ, pɨ ome bairã. Ma pari iruata ne–inaa pia teeitꞌee pɨmaa ichia kꞌĩsia iru bɨdepema.

Jesupa ɨtꞌaripema ne–inaa piade jarateeda

(Lucas 12.33-34)

19—Pꞌaratꞌa, netꞌaa pia pꞌenáatɨ na pꞌekꞌau eujãde pꞌanɨ misa iru pꞌanadaitꞌee, polillapa ma netꞌaa ãritꞌaai perã, maa–e pɨrã mogosiadarii perã taarã ɨa iru bɨpa, maa–e pɨrã nechɨapataarãpa chɨa atadaridai perã. 20Ma kꞌãyaara jɨrɨ́tɨ ɨtꞌaripema ne–inaa iru pꞌanadaitꞌee, mãpema ne–inaa polillapa ãrikꞌaa perã, mogosiakꞌaa perã mãikꞌaapa nechɨapataarã mama tꞌĩudakꞌaa perã. 21Na pꞌekꞌau eujãdepema ne–inaa pia audú ata kꞌinia bakꞌãri, pɨ tꞌãri araa baitꞌee ma ne–inaa ome. Jõdee ɨtꞌaripema ne–inaa pia audú ata kꞌinia bakꞌãri, pɨ tꞌãri araa baitꞌee mãgɨ́ ne–inaa ome.

Jesupa tachi taude jarateeda

(Lucas 11.34-36)

22—Tachi tau lamparakꞌa ɨ̃daa pɨkꞌa bɨ tachi kꞌapꞌɨa–itꞌee. Pɨchi tau pia bakꞌãri, kꞌapꞌɨa jõmaweda ɨ̃daa pɨkꞌa bɨde baitꞌee. 23Mamĩda pɨchi tau kꞌachia bɨ pɨrã, kꞌapꞌɨa jõmaweda pꞌãriu pɨkꞌa bɨde baitꞌee. Mãgá pɨ kꞌapꞌɨade ɨ̃daa pɨkꞌa bɨ wãara pꞌãriu pɨkꞌa bɨ pɨrã, audupɨara pꞌãriu pɨkꞌa bɨde baitꞌee.

Kꞌaita tachi chipari

(Lucas 16.13)

24—Eperã chipariirã omé jua ekꞌari mimia baikꞌaraa bɨ. Mãga bɨ pɨrã, chipari aba kꞌĩra unuamaa iru bai mãikꞌaapa chi apema kꞌinia iru bai, maa–e pɨrã abaapa jara bɨkꞌa ooi mãikꞌaapa chi apemapa jara bɨkꞌa ooamaa bai. Mãga pɨkꞌa apidaapa ooda–e pai Tachi Akꞌõrepa jara bɨkꞌa, pꞌaratꞌa, netꞌaa pia pꞌe bɨ misa.

Tachi Akꞌõrepa ichi warrarã pia akꞌɨ bapari

(Lucas 12.22-31)

25—Maperã mɨa jara bɨ: Kꞌĩsia jõnanáatɨ kꞌãata kꞌodaitꞌee maa–e pɨrã todaitꞌee, mãgá chokꞌai pꞌanadaitꞌee. Ichiaba kꞌĩsianáatɨ sãga pꞌaru atadaitꞌee. Tachi Akꞌõrepa parã kꞌapꞌɨa ooji mãikꞌaapa parã chokꞌai pꞌanapiji. Mãga bɨta, ¿pꞌaru tee–e paikꞌã mãikꞌaapa chikꞌo, ne–inaa toparii tee–e paikꞌã parãmaa? 26Akꞌɨ́tɨ, ipanaarã ɨtꞌɨ́ wãabai pꞌanɨ. Ãchia netꞌatau uudakꞌaa, ewadakꞌaa mãikꞌaapa ɨa bɨdakꞌaa chi netꞌatau ɨapatamãi. Mamĩda parã ɨtꞌaripema Akꞌõre Waibɨapa ne–inaa teepari kꞌodamerã. ¡Iru–itꞌee parã pipɨara pꞌanɨ ipanaarã kꞌãyaara! 27Eperã audú kꞌĩsia nɨ̃bɨpa hora aba pida waa chokꞌai ba–e pai.

28ʼMa awara ¿kꞌãare–itꞌee parã audú kꞌĩsiapata pꞌaru–itꞌee? Akꞌɨ́tɨ, sãga nepꞌono pꞌũajara tꞌãide nɨ̃bɨ waripata. Mimiadakꞌaa mãikꞌaapa pꞌaru kꞌadakꞌaa mãgá pi–ia pꞌanadaitꞌee. 29Mamĩda mɨa jara bɨ: Rey Salomonpa pꞌaratꞌara, netꞌaa pia iru bapachi mĩda, iru pꞌaru piara jɨ̃ bakꞌãri, eperãarãpa iru pi–iara unuda–e paji nãgɨ́ nepꞌono kꞌãyaara. 30Idi na pꞌũajara wari wã. Mamĩda nu uratɨdaikꞌãri, tꞌɨpɨtaude paa jõdariitꞌee. Tachi Akꞌõrepa mãgá pia akꞌɨ bɨ pɨrã nepꞌono pꞌũajara tꞌãide nɨ̃bɨ, audupɨara parã akꞌɨ bapariitꞌee, atꞌãri irude makꞌɨara ijãada–e pꞌanɨ mĩda. 31Tachi Akꞌõrepa mãgá ichia ooda pia akꞌɨ bapari perã, kꞌĩsia jõnanáatɨ: “¿Kꞌãata kꞌodaitꞌee?” maa–e pɨrã “¿Kꞌãata todaitꞌee?” maa–e pɨrã “¿Kꞌãata jɨ̃daitꞌee?” 32Mãgá kꞌĩsiapata ijãadakꞌaa beerãpa. Mamĩda parã́pata ɨtꞌaripema Akꞌõre Waibɨa iru pꞌanɨ. Irua kꞌawa bɨ ne–inaa parãpa falta pꞌanɨ. 33Maperãpɨ naapɨara jɨrɨ́tɨ iru jua ekꞌari pꞌanapataadaitꞌee mãikꞌaapa oopatáatɨ irua jara bɨkꞌa. Mãga ooruta pɨrã, ma ne–inaa jõma iru pꞌanadaitꞌee. 34Audú kꞌĩsianáatɨ nupema ne–inaade, nu ne–inaa paraaitꞌee perã aɨde kꞌĩsiadamerã. Ewari chaa ne–inaa audupai paraa aɨde kꞌĩsiadamerã.

Currently Selected:

Mateo 6: sjaB

Highlight

Copy