Mateo 12

Ɨ̃ipata ewate trigo kꞌɨmɨ chakꞌeerã pꞌedapꞌedaa

(Marcos 2.23-28; Lucas 6.1-5)

1Maapai judiorã ɨ̃ipata ewate Jesús nipaji trigo kꞌãide. Chi kꞌõpꞌãyoorã jarrapisia pꞌanadapꞌedaa perã, trigo kꞌɨmɨ chakꞌeerã oro atadapꞌeda, chi tau jonamaa pꞌaneejida kꞌodaitꞌee. 2Arii pꞌanadapꞌedaa fariseorãpa mãga unudakꞌãri, Jesumaa mãgajida:

—¡Pɨchá akꞌɨ́ji! Pɨchi kꞌõpꞌãyoorãpa ne–inaa oomaa pꞌanɨda ajida, ɨ̃ipata ewate oodaikꞌaraa bɨta.

3Jesupa pꞌanauji:

—¿Parãpa Akꞌõre Ũraa pꞌãdade leeda–e pꞌanɨkꞌã aji, Rey Davidpa ooda chonaarãweda jarrapisiadaidakꞌãri chi kꞌõpꞌãyoorã ome? 4Iru tꞌĩuji Tachi Akꞌõre te ne–edee oodade mãikꞌaapa ma tedepema pan awara bɨdapꞌedaa Tachi Akꞌõre–itꞌee atapꞌeda, kꞌoji chi kꞌõpꞌãyoorã ome. Mãga oojida pꞌaareerãpapai mãgɨ́ pan kꞌodaipia baji mĩda. 5Ichiaba Moisepa pꞌãdade parãpa leedooda pꞌaareerãpa ne–inaa kꞌachia ooda–e paji ɨ̃ipata ewate, Tachi Akꞌõre te waibɨade ɨ̃ida–ee mimiadakꞌãri. 6Mɨa jara bɨ: Nama ne–inaa pipɨara paraa Tachi Akꞌõre te waibɨa kꞌãyaara. 7Wãara parãpa kꞌawada–e na pꞌãdade jara kꞌinia bɨ:

‘Mɨa kꞌinia bɨ awaraarã chupɨria kꞌawaadamerã, mɨ–itꞌee ne–animalaarã peedapꞌeda, paadai kꞌãyaara.’ (Oseas 6.6)

Parãpa kꞌawadapꞌedaa paara ma pedee jara kꞌinia bɨ, ne–inaa kꞌachia ooda–e pꞌanɨɨrã peepida–e pakꞌaji. 8Ɨ̃ipata ewate mɨ, chi Eperã Akꞌõre Truadepema jua ekꞌari bɨda aji.

Eperã jua chiwa bada

(Marcos 3.1-6; Lucas 6.6-11)

9Mamãikꞌaapa Jesús wãji Tachi Akꞌõre Ũraa jarateepata tedee. 10Mama baji eperã jua chiwa bɨ. Jesús ɨmɨatee kꞌinia pꞌanadapꞌedaarãpa iidijida irumaa:

—¿Eperã kꞌayaa bɨ pɨrã, ɨ̃ipata ewate jɨpaipia bɨkꞌã? ajida.

11Jesupa pꞌanauji:

—Ɨ̃ipata ewate pɨchi oveja toidú padarida paara, ¿taawaa uchia ata–e pakꞌajikꞌã? 12¿Eperã pipɨara bɨ–ekꞌã oveja kꞌãyaara? Mapa ɨ̃ipata ewate ne–inaa pia ooipia bɨda aji.

13Mãpai Jesupa ma jua chiwa bɨmaa mãgaji:

—Pɨchi jua jĩrupáde aji.

Mãpai jua jĩruji. Aramata jɨpa beeji chi apema juakꞌa. 14Mãpai fariseorã taawaa uchiadakꞌãri, pedeeteemaa pꞌaneejida Jesús peepitꞌaadaitꞌee.

Jesupa ooda Akꞌõre Ũraa pꞌãdade jara bɨkꞌa

15Jesupa mãɨrã kꞌĩsia kꞌawaakꞌãri, mamãikꞌaapa wãji. Eperãarã chokꞌara iru tꞌẽe wãjida. Jesupa madepema kꞌayaa beerã jõmaweda jɨpaji. 16Mamĩda jarapachi ichia ooda jõmaarãmaa nepɨrɨnaadamerã. 17Mãga jaraji Tachi Akꞌõre pedee jarapari, Isaíapa pꞌãdade jara bɨkꞌa uchiamerã:

18‘Nama bɨ mɨ mimiapari, mɨa jɨrɨtꞌerada. Mɨa iru kꞌinia iru bɨ; mɨ tꞌãri o–ĩapipari. Mɨ Jaure iru ome bapariitꞌee. Mɨ kꞌapꞌɨa pari irua eperãarã jõmaarãpa oopata akꞌɨitꞌee mãikꞌaapa jaraitꞌee pia wa kꞌachia. 19Aupedee–e paitꞌee; ichiaba bia–e paitꞌee. Apidaapa iru biapi ũrida–e paitꞌee calle jãde. 20Irua yiaraa iru ba–e paitꞌee chupɨria chitoonɨɨrã wa kꞌĩra pia–ee jõnɨɨrã. Mãga baitꞌee Tachi Akꞌõrepa jõmaarãmaa wãarata jara pëida kꞌawaapirumaa. 21Mãga pakꞌãri, jõmaarãpa irude ijãadaitꞌee.’ (Isaías 42.1-4)

Jesús Netuara Poro Waibɨa jua ekꞌari bɨda apatapꞌedaa

(Marcos 3.20-30; Lucas 11.14-23; 12.10)

22Jesumaa aneejida eperã tau pꞌãriu bɨ mãikꞌaapa pedee atua bɨ, netuara iru kꞌapꞌɨade merãtɨa bada perã. Jesupa iru tau pia unupiji mãikꞌaapa pedeepiji. 23Mãga unudakꞌãri, arii pꞌanadapꞌedaarãpa akꞌɨtrua para beeji mãikꞌaapa ãchi pitapai iidi para beeji:

—¿Nãgɨ́ chonaarãwedapema Rey David Warra–ekꞌã? ajida.

24Mamĩda mãga ũridakꞌãri, fariseorãpa mãgajida:

—Beelzebú, Netuara Poro Waibɨa juapata jãgá netuaraarã uchiapiparida ajida.

25Jesupa kꞌawaji ãchia kꞌĩsia pꞌanɨ. Mapa mãgaji:

—Pꞌuuru pidaarãpa maa–e pɨrã ëreerãpa maa–e pɨrã te pidaarãpa ãchi aukꞌaarã jëreruta pɨrã, waa araa pꞌanapataada–e pai mãikꞌaapa ãchi pꞌuuru jõdaridai. 26Mãga pɨkꞌa Netuara Poro Waibɨapa ichi aukꞌaarã jëreru pɨrã, waa araa pꞌanada–e pai mãikꞌaapa ãchi itu jõdaridai. 27Parãpa jara pꞌanɨ mɨa netuaraarã uchiapipari Beelzebú juapa. Mãgara, ¿kꞌai juapa uchiapipatama parã eere pꞌanɨɨrãpa? Ãchia akꞌɨpipata parã pia kꞌĩsiada–e pꞌanɨ. 28Mɨa netuaraarã uchiapipari pɨrã Tachi Akꞌõre Jaurepa, jara kꞌinia bɨ ɨ̃rá Tachi Akꞌõredeerã poro waibɨa nama bɨ.

29ʼ¿Kꞌaita tꞌĩuyama aji, eperã juataura bɨ tede iru netꞌaa chɨade? Naapɨara jɨ̃ nɨ̃bɨ–e pɨrã, iru netꞌaa jãri pꞌe ata–e pai.

30ʼEperã mɨ eere bɨ–e pɨrã, mɨ kꞌĩra unuamaa iru bɨ. Ichiaba mɨ kꞌaripa–e bɨ pɨrã awaraarã Tachi Akꞌõre jua ekꞌari pꞌanapataadamerã, eperãarã ãyaa pëipari mɨ ikꞌaawaapa.

31ʼMaperã mɨa jara bɨ: Tachi Akꞌõrepa wẽpapii eperãarãpa pꞌekꞌau kꞌachia oopata jõmaata mãikꞌaapa iru ãpɨte ikꞌachia jarapata paara. Mamĩda iru Jaure ãpɨte ikꞌachia jarapata wẽpapi–e paitꞌee. 32Ichiaba wẽpapii ikꞌachia jarapata mɨ, chi Eperã Akꞌõre Truadepema ãpɨte. Mamĩda wẽpapi–e paitꞌee ikꞌachia jararuta pɨrã iru Jaure ãpɨte. Mãgee pꞌekꞌau kꞌachia oopata wẽpapi–e paitꞌee chi ma pedee jarapataarã na pꞌekꞌau eujãde pꞌanɨde maa–e pɨrã ɨtꞌari iru kꞌĩrapite pꞌanɨde paara, iru ewari waibɨa ewate.

Jesupa jarateeda pakꞌuru kꞌawapata chi nejõdeepa

(Lucas 6.43-45)

33—Nejõ bɨɨrɨ pia iru bɨ pɨrã, chaukꞌãri, nejõ pia iru baitꞌee. Jõdee nejõ bɨɨrɨ kꞌachia iru bɨ pɨrã, chaukꞌãri, nejõ kꞌachia iru pꞌanadaitꞌee. Nejõ bɨɨrɨ kꞌawapata chi nejõdeepa. 34¡Parã kꞌachia–idaa beerãdeepa uchiadapꞌedaarã! ¡Taamákꞌapɨ pꞌanɨ! ¿Sãga pedee pia jaradai, parã tꞌãri kꞌachia pꞌanɨta? Pãchi tꞌãride kꞌĩsia pꞌanɨta jarapata pãchi itꞌaideepa. 35Eperã tꞌãri pia bɨpa pedee pia jarapari kꞌĩsia pia iru bairã ichi tꞌãride. Jõdee eperã tꞌãri kꞌachia bɨpa pedee kꞌachia jarapari kꞌĩsia kꞌachia iru bairã ichi tꞌãride. 36Mɨa jara bɨ: Tachi Akꞌõre ewari waibɨa ewate ichia eperã chaachaa kꞌawapiitꞌee ãchia pedee kꞌachia pariatua jaradapꞌedaa. 37Ma ewate Tachi Akꞌõrepa akꞌɨitꞌee eperãarãpa pedee jaradapꞌedaa mãikꞌaapa ichiata jaraitꞌeeda aji, kꞌachia–idaa bɨ, maa–e pɨrã tꞌãri pia bɨ.

Ne–inaa eperãarãpa pꞌoyaa oodakꞌaa unu kꞌinia pꞌanadapꞌedaarã

(Marcos 8.11-12; Lucas 11.29-32)

38Mãpai ũkꞌuru fariseorãpa mãikꞌaapa Moisepa pꞌãda jarateepataarãpa Jesumaa mãgajida:

—Tachi Jarateepari, taipa unu kꞌinia pꞌanɨda ajida, pɨa oo bɨ ne–inaa Tachi Akꞌõrepapai oopari.

39Jesupa pꞌanauji:

—Ɨ̃rapemaarã tꞌãri kꞌachia–idaa pꞌanɨ, Tachi Akꞌõrede ijãadakꞌaa perã. Unu kꞌinia pꞌanɨda a pꞌanɨ ne–inaa eperãarãpa pꞌoyaa oodakꞌaa ãchi juadoopa. Mamĩda mɨa mãga oo–e paitꞌee. Jĩpꞌa Tachi Akꞌõrepa ooitꞌee ichi pedee jarapari Jonás ome oodakꞌa. 40Jonás kꞌãima õpee baji chikꞌo choma bɨ bide.#12.40 Jon 1.17. Mãga pɨkꞌa mɨ, chi Eperã Akꞌõre Truadepema kꞌãima õpee eujã ekꞌari baitꞌee. 41Tachi Akꞌõre ewari waibɨa ewate Nínive pꞌuuru pidaarãpa ɨ̃rapemaarã ɨmɨateedaitꞌee, Tachi Akꞌõrepa parã kꞌachiadee pëimerã. Chonaarãweda Tachi Akꞌõrepa Jonás pëikꞌãri ma Nínive pidaarãmaa, ãrapa pꞌekꞌau kꞌachia oopatapꞌedaa oo amaajida. Mamĩda ɨ̃rapemaarãpa pꞌekꞌau kꞌachia oopata oo amaada–e pꞌanɨ, aba Jonás kꞌãyaara waibɨara bɨpa jara cheji mĩda mãga oodamerã. 42Ichiaba ma ewate Reina Sur Eerepemapa aukꞌa ɨ̃rapemaarã ɨmɨateeitꞌee Tachi Akꞌõrepa parã kꞌachiadee pëimerã. Chonaarãweda ma reina tꞌɨmɨɨpa cheji Rey Salomón kꞌĩsia kꞌawaa bɨ pedee ũride. Mamĩda ɨ̃rapemaarãpa ũridaamaa pꞌanɨ, aba Salomón kꞌãyaara kꞌĩsia kꞌawaara bɨ pedee bɨ mĩda parã tꞌãide.

Jesupa jarateeda netuara waya eperã kꞌapꞌɨade merãtɨa badade

(Lucas 11.24-26)

43—Eperã kꞌapꞌɨadeepa netuara uchiapidakꞌãri, mãgɨpa jɨrɨ nipapari eujã pꞌũasaa sãma ɨ̃iitꞌee. Mamĩda unu–e pakꞌãri, kꞌĩsiapari: 44“Waya merãtɨanaitꞌee ma eperã kꞌapꞌɨade; mɨ naaweda badamãi.” Chekꞌãri, unu chepari ma eperã kꞌapꞌɨa pi–ia bɨ; te barrepꞌeda, sɨɨpꞌeda, pi–ia bɨkꞌa. 45Mãga unukꞌãri, jɨrɨnapari awaraa netuara siete kꞌachiara ichi kꞌãyaara mãikꞌaapa ma eperã kꞌapꞌɨade merãtɨa chepata. Mãgá ma eperã audupɨara kꞌachiade beeitꞌee naaweda bada kꞌãyaara. Mãga pꞌasaitꞌeeda aji, ɨ̃rapemaarã tꞌãri kꞌachia–idaa beerã ome; audupɨara kꞌachiade pꞌaneedaitꞌee.

María Jesús ɨ̃pemaarã ome pachedapꞌedaa

(Marcos 3.31-35; Lucas 8.19-21)

46Jesús atꞌãri pedeemaa bɨde pachejida chi nawe chi ɨ̃pemaarã ome. Pedee kꞌinia pꞌanajida iru ome. Mamĩda taawa pꞌaneedapꞌedaa perã, 47eperãpa Jesumaa jaranaji:

—Pɨ nawe, pɨ ɨ̃pemaarã ome taawa nɨmaa pꞌanɨ. Pedee kꞌinia pꞌanɨda aji, pɨ ome.

48Mãpai Jesupa pꞌanauji:

—¿Kꞌaima mɨ nawe? ¿Kꞌáirãma, mɨ ɨ̃pemaarã?

49Mãpai juapa ɨaji chi kꞌõpꞌãyoorãmaa mãikꞌaapa mãgaji:

—Nãgɨɨrãta mɨ nawekꞌa mãikꞌaapa mɨ ɨ̃pemaarãkꞌa. 50Chi mɨ ɨtꞌaripema Akꞌõre Waibɨapa jara bɨkꞌa oo bɨ, mata mɨ ɨ̃pemakꞌa, mɨ ɨ̃pewẽrakꞌa mãikꞌaapa mɨ nawekꞌa.

Currently Selected:

Mateo 12: sjaB

Highlight

Copy