Juan 14

Jesupa jarada ichi Tachi Akꞌõre okꞌa bɨ

1—Kꞌĩsia paraa pꞌananáatɨ. Ma kꞌãyaara ijãapatáatɨ Tachi Akꞌõrede mãikꞌaapa mɨde. 2Mɨ Akꞌõre eujãde te chokꞌara paraada aji, ichideerã–itꞌee. Mãga–e pada paara, mɨa jarakꞌaji. Parã naa wãitꞌee te pi–ia oode parã–itꞌee. 3Ma tꞌẽepai mɨ waya cheitꞌee parã atade, mɨ ome pꞌananadamerã mɨ baparimaa. Mãgá parã ichita pꞌanapataadaitꞌee mɨ ome. 4Mɨ wãrumaa parãpa kꞌawa pꞌanɨda aji, chi o kꞌawa pꞌanadairã.

5Mãpai Tomapa mãgaji Jesumaa:

—Tachi Waibɨa, kꞌawada–e pꞌanɨda aji, pɨ sãmaa wãru. ¿Sãga chi o kꞌawadayama? aji.

6Jesupa pꞌanauji:

—Mɨta Tachi Akꞌõre truadee wãpari okꞌa bɨ. Mɨata Tachi Akꞌõre wãarata jarapari. Mɨata eperãarã chokꞌai pꞌanapipari ichita pꞌanapataadamerã Tachi Akꞌõre ome. Mɨ awara apidaapa eperãarã wãpida–e pai Tachi Akꞌõremaa. Mapa mɨdepai ijãadakꞌãri, mɨ Akꞌõremaa wãdaitꞌee. 7Parãpa wãara mɨ kꞌawada paara, ichiaba mɨ Akꞌõre kꞌawakꞌajida. Wãara, ɨ̃raweda iru kꞌawadaitꞌee, iru unupata perã.

8Mãpai Felipepa mãgaji:

—Tachi Waibɨa, Akꞌõre Waibɨa kꞌĩra taimaa akꞌɨpipáde aji. Mãgapaita kꞌinia pꞌanɨda aji.

9Jesupa pꞌanauji:

—Felipe, mɨ taarã nipapari parã ome. Mãga bɨta, ¿waide mɨ kꞌawa–e bɨkꞌã? aji. Chi mɨ unuparipa ichiaba Akꞌõre Waibɨa unupari. ¿Sãga pɨa “Akꞌõre Waibɨa kꞌĩra akꞌɨpipáde” ayama? aji. 10¿Ijãa–e bɨkꞌã aji mɨ, Akꞌõre Waibɨa ome araa bapari? Mɨ araa bapari iru Jaure ome; jõdee iru araa bapari mɨ kꞌapꞌɨa ome. Mɨa jaramaa bɨ mɨchi kꞌĩsiadoopa jara–e bɨda aji. Mɨ Akꞌõrépata mãga jarapi bɨ. Ma awara mɨa ne–inaa oo bɨ ookꞌaa mɨchi juadoopa. Mɨ Akꞌõrépata mãga oopi bɨ, mɨ ome bapari perã. 11Ijã́atɨ mɨa jarakꞌãri mɨ, Akꞌõre Waibɨa ome araa bapari. Maa–e pɨrã ijã́atɨ mɨa ne–inaa ooda kꞌaurepapai, oopari perã ne–inaa eperãarãpa pꞌoyaa oodakꞌaa ãchi juadoopa. 12Mɨa wãarata jararu. Chi mɨde wãara ijãa bɨpa aukꞌa ooyada aji, mɨa ne–inaa oo bɨkꞌa. Ma awara ne–inaa pi–iara ooyada aji, mɨ wãitꞌee perã mɨ Akꞌõre bɨmaa. 13Mɨa oopariitꞌee jõmaweda parãpa ɨtꞌaa iidiruta mɨ tꞌɨ̃de mɨchideerã perã. Mãgá iru Warra kꞌaurepa jõmaarãpa unudai Tachi Akꞌõre jõmaarã kꞌãyaara waibɨara bɨ. 14Parã mɨchideerã perã, mɨ tꞌɨ̃de ɨtꞌaa iididakꞌãri, mɨa nejõmaata oopariitꞌeeda aji, parãpa iidi pꞌanɨkꞌa.

Jesupa jarada ichia Tachi Akꞌõre Jaure pëiitꞌee ichideerãmaa

15—Parãpa mɨ kꞌinia iru pꞌanɨ pɨrã, oopataadaitꞌeeda aji, mɨ ũraade jara bɨkꞌa. 16Mãpai mɨa chupɨria iidiitꞌee mɨ Akꞌõremaa, irua awaraa Kꞌaripapari pëimerã mɨ pari, mãgɨ́ ichita parã ome bapariimerã. 17Mãgɨ́ Tachi Akꞌõre Jaure. Ichia wãara aupaita jarateepari. Ijãadakꞌaa beerã ome iru ba che–e, iru unuda–e pꞌanadairã mãikꞌaapa kꞌawada–e pꞌanadairã. Mamĩda parã́pata iru kꞌawa pꞌanɨ, parã ome bapari perã mãikꞌaapa parã tꞌãride bapariitꞌee perã.

18ʼMɨa parã chupɨria atabëi–eda aji. Waya cheitꞌee. 19Taarã–e na pꞌekꞌau eujãdepemaarãpa mɨ waa unuda–e paitꞌee. Mamĩda parã́pata mɨ unudaitꞌee. Mɨ ichita chokꞌai bapari perã, parã jida aukꞌa ichita chokꞌai pꞌanapataadaitꞌee. 20Maapai parãpa wãara kꞌawaadaitꞌee mɨ, Tachi Akꞌõre Waibɨa ome araa bapari mãikꞌaapa parã mɨ ome ichiaba araa pꞌanapataadaitꞌee, tꞌãri a–ba. 21Chi mɨ ũraa ũri bɨpa mãikꞌaapa oo bɨpa ma ũraade jara bɨkꞌa wãara mɨ kꞌinia iru bɨ. Mɨ Akꞌõrepa mãgɨ́ eperã ichiaba kꞌinia iru bapariitꞌee. Ma awara mɨa pida iru kꞌinia iru bapariitꞌee mãikꞌaapa irumaa unupiitꞌee.

22Mãpai Judas, chi Simón Iscariote warra–ee badapa iidiji:

—Tachi Waibɨa, ¿sãapꞌeda pɨa taimaa unupiitꞌeema aji, mamĩda ijãadakꞌaa beerãmaa unupi–e paitꞌee?

23Jesupa pꞌanauji:

—Eperãpa mɨ kꞌinia iru bɨ pɨrã, mɨ ũraade jara bɨkꞌa oopariitꞌeeda aji. Mɨ Akꞌõrepa mãgɨ́ eperã kꞌinia iru bapariitꞌee mãikꞌaapa mɨ Akꞌõre mɨ ome chedaitꞌee iru ome pꞌanapataade. 24Jõdee chi mɨ kꞌinia–e bɨpa oo kꞌinia–e bɨ mɨ ũraade jara bɨkꞌa. Na pedee parãpa ũri pꞌanɨ mëre–eda aji; mɨ Akꞌõrede. Iruata mɨ pëiji.

25ʼMɨa na ũraa jara bɨda aji, parã ome bɨ misa. 26Mamĩda mɨ uchiada tꞌẽepai, Akꞌõre Waibɨapa pëiitꞌee awaraa Kꞌaripapari mɨ pari; mãgɨ́ iru Jaure. Mãgɨpa ne–inaa jõmaata jarateeitꞌee parãpa oodamerã mɨa oopi bɨkꞌa. Ma awara irua kꞌaripaitꞌee mɨa jarada jõmaweda kꞌirãpadamerã.

27ʼMɨ wãi naaweda, parã tꞌãri kꞌãiweepi kꞌinia bɨ. Tꞌãri kꞌãiwee pꞌanapatáatɨ. Mɨa arakꞌatɨapai kꞌãiwee pꞌanapi–e, na pꞌekꞌau eujãdepemaarãpa oopatakꞌa. Mapa tꞌãri pꞌua pꞌananáatɨ mãikꞌaapa pꞌeranáatɨ. 28Parãpa ũrijida mɨa jarakꞌãri: “Mɨ wãitꞌee, maapꞌeda waya cheitꞌee.” Parãpa wãara mɨ kꞌinia iru pꞌanadapꞌedaa paara, tꞌãri o–ĩa pꞌanakꞌajida mɨa nãga jarakꞌãri. O–ĩa pꞌanadaipia bɨ mɨ wãru perã Akꞌõre Waibɨamaa; mɨ kꞌãyaara waibɨara bɨmaa. 29Ma jõma pꞌasai naaweda, mɨa mãga jaraji, pꞌasakꞌãri, parãpa mɨ pedee ijãadamerã.

30ʼWaa makꞌɨara pedee–e paitꞌee parã ome, Satanás, na pꞌekꞌau eujãdepemaarã poro waibɨa, cheru perã. Ichia mɨ pꞌoyaa chokꞌakꞌaa. 31Mamĩda na pꞌekꞌau eujãdepemaarãpa kꞌawaadamerã mɨa Akꞌõre Waibɨa kꞌinia iru bapari, ooitꞌee irua jara bɨkꞌa.

ʼPꞌirabaidapáde aji. Ãyaa wãdáma namãikꞌaapa.

Currently Selected:

Juan 14: sjaB

Highlight

Copy