Génesis 45

Josepa ichi kꞌawapida chi ɨ̃pemaarãmaa

1Josepa mãga ũrikꞌãri, waa pꞌoyaa choo–e paji. Ichia Egipto pidaarã akꞌɨpataarã taawaa uchiapiji ununaadamerã ichi kꞌawapikꞌãri chi ɨ̃pemaarãmaa.

2Mãpai jẽedachi. Egipto pidaarãpa ichi biapi ũridapꞌedaa perã, jaranajida Faraonmaa.

3Mãga nɨde Josepa chi ɨ̃pemaarãmaa mãgaji:

—Mɨ Joseda aji. ¿Mɨ akꞌõre atꞌãri chokꞌai bɨkꞌã? aji.

Mãga ũridakꞌãri, chi ɨ̃pemaarã pꞌeradachida José kꞌĩrapite pꞌanadapꞌedaa perã. Pꞌoyaa pedeeda–e paji pꞌera jõnɨpa.

4Mamĩda Josepa mãgaji:

—Kꞌaitꞌa chedapáde aji. Mɨ parã ɨ̃pema José, parãpa netotꞌaadapꞌedaa Egiptodee chedapꞌedaarãmaa. 5Mamĩda ma kꞌaurepa pãchi pitapai kꞌĩraunaadapáde aji, mãikꞌaapa waaweenaadapáde aji. Parã naa Tachi Akꞌõrepa mɨ nama pëiji parã jarrapa piupiamaapa. 6Año omé paru jarrajara na eujãde paraa. Mamĩda atꞌãri año joisomaa jarra paraaitꞌee. Eperãarãpa ne–uuruta pɨjida, maarepida ewada–e paitꞌee. 7Tachi Akꞌõrepa ne–inaa pi–ia ooji tachi kꞌaripaitꞌee. Mɨ nama pëiji parã, pãchi warrarã ome chokꞌai uchiadamerã. 8Parãpa mɨ pëida–e paji. Tachi Akꞌõrépata mɨ nama pëiji Faraón ũraamerã mãikꞌaapa iru jua ekꞌari mimiamerã. Mãgá Egipto pidaarã jõmaweda mɨ jua ekꞌari pꞌaneejida. 9Wã́tɨ mɨ akꞌõremaa mãikꞌaapa jarátɨ: “Pɨ warra Josepa nãga jara pëiru: ‘Tachi Akꞌõrepa mɨ bɨji Egipto pidaarã poro waibɨa pamerã. Isapai chéji mɨ akꞌɨde. 10Gosén eujãde pɨ bapariitꞌee pɨchi ëreerã jõmaarã ome, pɨchi netꞌaa, ne–animalaarã paara. Mãgá mɨ kꞌaitꞌa bapariitꞌee. 11Mɨa teeitꞌee chikꞌo parã–itꞌee kꞌodamerã, na jarrajara año joisomaa atꞌãri taarãitꞌee perã. Mɨmaa cheda–e pɨrã, jarrapa piudayada’ ” aji. 12Mɨ ɨ̃pema Benjaminpa parã jõmaarã ome mɨa etꞌewa jarada ũriji. 13Mɨ akꞌõremaa nepɨrɨnátɨ mɨ Egipto pidaarã poro waibɨa mãikꞌaapa parãpa idi unudapꞌedaa. Mɨ akꞌõre isapai atanadapáde aji.

14Mãpai José ichi ɨ̃pema Benjamín ome wëredachida mãikꞌaapa o–ĩapa jẽedachida. 15Maapꞌeda Josepa chi apema ɨ̃pemaarã kꞌĩra ɨ̃ji mãikꞌaapa wëre ataji jẽe nɨ̃bɨde. Ma tꞌẽepai chi ɨ̃pemaarã ichi ome pedee pꞌaneejida.

16Faraón palaciode Egipto pidaarãpa nepɨrɨjida José ɨ̃pemaarã pꞌanɨ. Mãga ũrikꞌãri, Faraón o–ĩa beeji, ichi akꞌɨpataarã paara.

17Faraonpa Josemaa mãgaji:

—Pɨ ɨ̃pemaarãmaa jarapáde aji, ãchi burro ɨ̃rɨ trigo bɨdapꞌeda, wãdamerã Canaán eujãdee 18ãchi ëreerã pɨ akꞌõre ome atade. Nama chedakꞌãri, mɨa teeitꞌee ne–inaa pipɨara Egiptode nɨ̃bɨ. Ichiaba chikꞌo pipɨara teeitꞌee kꞌodamerã. 19Mɨa tee pëiitꞌee carreta ãchi wẽraarã, warrarã, pɨ akꞌõre ome aɨde chedamerã. 20Jarapáde aji, ãchi netꞌaade kꞌĩsianaadamerã, mɨa Egiptodepema ne–inaa pipɨara bɨ ãchimaa teeitꞌee perã.

21Mãpai José ɨ̃pemaarã Canaandee wãjida. Ateejida chikꞌo ode kꞌo wãdaitꞌee mãikꞌaapa carreta Faraonpa tee pëida. 22Ichiaba Josepa pꞌaru chiwidi teeji ãchi jõmaarãmaa jɨ̃damerã ãchi pꞌaru jaikꞌoodaidakꞌãri. Mamĩda Benjaminmaa pꞌaru joisomaa teeji pꞌaratꞌa tau trescientos ome. 23Chi akꞌõremaa Josepa pëiji burro diez Egiptodepema netꞌaa pipɨara ome. Ma awara burro diez pëiji trigo ome, chikꞌo awaraa ome, pan ome kꞌodamerã ode chewãdade.

24Josepa despediikꞌãri, chi ɨ̃pemaarãmaa ũraaji:

—Ode wãdade pãchi pitapai nepɨra jɨrɨnaadapáde aji.

25Mãpai wãjida. Canaande ãchi akꞌõre Jacobmãi panadakꞌãri, irumaa mãgajida:

26—¡José chokꞌai bɨpɨ! ¡Iruta Egipto pidaarã poro waibɨada! ajida.

Mãga ũrikꞌãri, Jacobpa kꞌawa–e paji kꞌãata kꞌĩsiai; ijãai wa ijãa–e pai. 27Mamĩda jõma ãchi pꞌasada nepɨrɨdakꞌãri mãikꞌaapa akꞌɨpidakꞌãri ma carreta Faraonpa pëida ãchi ome, Jacob o–ĩadachi. 28Mãpai mãgaji:

—O–ĩa bɨda aji, mɨ warra José chokꞌai bairã. Mɨ jai–idaai naaweda, iru akꞌɨde wãitꞌeeda aji.

Currently Selected:

Génesis 45: sjaB

Highlight

Copy