Génesis 38

Judá chi ãigu Tamar ome

1Maapai Judá chi ɨ̃pemaarã ikꞌaawaapa ãyaa wãji. Banaji Adulán pꞌuurude, eperã tꞌɨ̃jarapatapꞌedaa Hirá tede. 2Mama bɨde wẽra ataji; Canaán eujãdepema Súa kꞌau. 3Ma wẽra ome araa pakꞌãri, biakꞌoo beeji mãikꞌaapa warra tꞌoji. Judapa tꞌɨ̃ bɨji Er. 4Maapꞌeda waya biakꞌoo beeji mãikꞌaapa warra awaraa tꞌoji. Tꞌɨ̃ bɨji Onán. 5Maapꞌeda warra awaraa tꞌoji. Tꞌɨ̃ bɨji Selá. Mãgɨ́ tꞌoji Judá Quezibde bakꞌãri.

6Taarã pakꞌãri, Judapa wẽra jɨrɨteeji chi warra naapema Er–itꞌee. Mãgɨ́ wẽra tꞌɨ̃jarapachida Tamar. 7Mamĩda Tachi Akꞌõrepa Er pia akꞌɨkꞌaa paji, ichia kꞌinia bɨkꞌa ooamaa bada perã. Mapa iru piupiji.

8Maapꞌeda Judapa chi warra Onanmaa mãgaji:

—Araa papáde aji, pɨ ɨ̃pema pꞌẽtrãa ome, tachi aukꞌaarãpa oopatakꞌa. Mãgá pɨ ɨ̃pemadeepa warrarã uchiadayada aji.

9Mamĩda Onanpa kꞌawaji ichia Tamar ome warrarã ooda paara ãchi aukꞌaarãpa oopatapꞌedaakꞌa, ma warrarã chi ɨ̃pemadé pakꞌaji. Mapa ma pꞌẽtrãa ome kꞌãikꞌãri, chi kꞌayoo taawa batꞌatꞌaapachi, biakꞌoonaamerã. 10Tachi Akꞌõrepa mãga unukꞌãri, kꞌĩraudachi Onán ome mãikꞌaapa iru ichiaba piupiji.

11Maapꞌeda Judapa chi ãigu Tamarmaa mãgaji:

—Pɨ akꞌõre tede pꞌẽtrãa beepáde aji, mɨ warra Selá kꞌũtrãa paru misa. Mãpai irua pɨ atayada aji, chi wẽra papiitꞌee.

Mamĩda ichi tꞌãridepai Judapa kꞌĩsiaji ma pꞌẽtrãa kꞌaurepa chi warra aukꞌa piudariitꞌee chi ɨ̃pemaarãkꞌa. Mapa Tamar pëiji chi akꞌõre temaa.

12Taarã pakꞌãri, Judá wẽra, Súa kꞌau pada, piuji. Judá chi–ɨa bapꞌeda, ewari aba wãji Timnat pꞌuurudee chi kꞌõpꞌãyo Hirá ome. Mãgɨ́ Adulán pꞌuurudepema paji. Wãjida ãchi ovejaarã kꞌara tꞌɨɨpide. 13Ma pꞌẽtrãa Tamarpa kꞌawa atakꞌãri chi chãure Timnatdee wã bɨ ovejaarã kꞌara tꞌɨɨpide, 14chi pꞌaru pꞌẽtrãarãpa jɨ̃pata ẽratꞌaaji mãikꞌaapa prostituta pꞌaru jɨ̃ beeji. Mãpai kꞌĩra wãkꞌapari jɨ̃pꞌeda, wãji Timnat ode Enayin pꞌuuru kꞌaitꞌa. Ma pꞌuuru tꞌĩupata kꞌaitꞌa su–akꞌɨ banaji Judá nɨmaa. Kꞌawaji Judapa chi warra Selá ichimaa teeamaa baji, ma warra taarã kꞌũtrãa baji mĩda, ichi waide ata–e pada perã chi wẽra papiitꞌee.

15Judá ma pꞌuuru kꞌaitꞌa panakꞌãri, ma wẽra unuji. Prostitutakꞌa unuda perã mãikꞌaapa kꞌawa–e pada perã mãgɨ́ chi ãigu, 16Judá iru kꞌaitꞌa wãji mãikꞌaapa mãgaji:

—Mɨ pɨ ome kꞌãipipáde aji.

Tamarpa pꞌanauji:

—¿Kꞌãata teeyama aji, pɨ ome kꞌãiru pɨrã?

17Judapa pꞌanauji:

—Tꞌẽepai mɨa chivo chakꞌe tee pëiitꞌeeda aji.

Ma wẽrapa mãgaji:

—Pia bɨda aji. Mamĩda mɨa kꞌinia bɨ pɨ netꞌaa mɨ ome atabëimerã. Mãgá mɨa pɨ pedee wãara ijãai. Ma chivo chakꞌe tee pëikꞌãri, pɨ netꞌaa aukꞌa tee pëiitꞌeeda aji.

18Mãpai Judapa iidiji:

—¿Kꞌãata kꞌinia bɨma? aji.

Wẽrapa pꞌanauji:

—Teepáde aji, pɨchi sello otaude jɨ̃ bɨ mãikꞌaapa jã pakꞌuru pɨa anipapari.

Judapa mãga ooji. Ma wẽra ome kꞌãipꞌeda, biakꞌoo beeji. 19Tꞌẽepai Tamar wãji ichi temaa mãikꞌaapa waya jɨ̃ beeji pꞌẽtrãarãpa pꞌaru jɨ̃pata.

20Maapꞌeda Judapa ma prostitutamaa chivo chakꞌe tee pëiji chi Adulán pꞌuurudepema kꞌõpꞌãyo Hirá ome. Jaraji ichi netꞌaa atabëida ma wẽra ome aneemerã.

Mamĩda Hirapa ma wẽra jɨrɨnakꞌãri, unu–e paji. 21Mapa mãpema ɨmɨkꞌĩraarãmaa iidiji:

—¿Sãma bɨma aji, ma prostituta, o bide su–akꞌɨ bada Enayin pꞌuuru tꞌĩupata kꞌaitꞌa?

Ãrapa pꞌanaujida:

—Nama mãgee wẽra wẽ–eda ajida.

22Judá kꞌõpꞌãyo ãpɨtee chekꞌãri, mãgaji:

—Ma wẽra unu–e pajida aji. Ma awara mãpema ɨmɨkꞌĩraarãpa jarajida ma ode mãgee wẽra wẽ–e.

23Judapa pꞌanauji:

—Mãgara iru beeyada aji, mɨchi netꞌaa ome, maa–e pɨrã jõmaarãpa mɨ oo iru pꞌanadai, mɨchi netꞌaa mãgee wẽramaa teeda perã. Pɨa kꞌawa bɨ ma chivo chakꞌe pëida ma wẽramaa. Iru wẽ–e paji pɨrã, tachi kꞌaurepa–eda aji.

24Atane õpee parumaa nãga nepɨrɨ chejida Judamaa:

—Pɨ ãigu Tamar biakꞌoo bɨda ajida. ¿Ɨmɨkꞌĩraarã ome kꞌãi baji–ekꞌã? ajida.

Judapa pꞌanauji:

—Mãgara atanadapáde aji, mãikꞌaapa paa peetꞌaadapáde aji.

25Mamĩda atanadakꞌãri, Tamarpa chi chãuremaa nãga jara pëiji: “Nãgɨ́ netꞌaa chiparipa mɨ biakꞌoopitꞌaajida aji. Pia akꞌɨpáde aji, na sello otaude jɨ̃ nipapari na ovejaarã akꞌɨpari pakꞌuru ome kꞌawaaitꞌee kꞌai paji.”

26Judapa ma netꞌaa unukꞌãri mãikꞌaapa ichidé kꞌawaakꞌãri, mãgaji:

—Irua kꞌachia oo–e pajida aji. Mɨata kꞌachia ooji, mɨ warra Selá irumaa tee–e pada perã.

Maapꞌeda Judá waa kꞌãi–e paji chi ãigu ome.

27Tamarpa warra tꞌokꞌãri, ɨmɨkꞌĩra warra omé tꞌoji. 28Tꞌokꞌãri, naapɨara jua aba uchiaji. Mãga bɨde arii bada parterapa jɨ̃kꞌara pꞌoree ma juade jɨ̃ bɨji kꞌawadaitꞌee kꞌaita chi naapema. 29Mamĩda tꞌẽepai ma jua waya tꞌĩudachi mãikꞌaapa chi apema warra naapɨara uchiaji. Mapa ma parterapa jaraji:

—Irua o ewajida aji, naapɨara uchiaitꞌee.

Mãgɨ́ tꞌɨ̃ bɨjida Fares.#38.29 Hebreo pedeede Fares jara kꞌinia bɨ “ewapari”. 30Chi apema warra jɨ̃kꞌara pꞌoree jɨ̃ bada uchiakꞌãri, tꞌɨ̃ bɨjida Zera; jara kꞌinia bɨ “pꞌoree”.

Currently Selected:

Génesis 38: sjaB

Highlight

Copy