Génesis 21

Abraham warra Isaac tꞌoda

1Tachi Akꞌõrepa Sara pia ooji. Ichia jaradakꞌa ooji Sara ome. 2Mãgá Sara biakꞌoo beeji mãikꞌaapa Tachi Akꞌõrepa jaradakꞌa añomaa Abraham warra paraaji, iru chonaa baji mĩda. 3Abrahampa iru tꞌɨ̃ bɨji Isaac. 4Tachi Akꞌõrepa jaradakꞌa tauchaa bɨjida Isaac kꞌapꞌɨade tꞌodadeepa kꞌãima ocho pakꞌãri. 5Abraham cien años iru bakꞌãri, Isaac tꞌoji. 6Chi warra tꞌokꞌãri, Sarapa kꞌĩsiaji: “Tachi Akꞌõrepa mɨ o–ĩapa ëipiji warra tꞌopida perã. Jõmaweda nãga ũrirutaarã aukꞌa o–ĩa pꞌanadaitꞌee. 7¿Kꞌaipa ijãakꞌaji mɨa warra tꞌoi chõtrãa bɨta mãikꞌaapa Abraham chonaa bɨta? Mamĩda wãara mɨa iru warra tꞌoji.”

Abrahampa Agar Ismael ome jëretꞌaada

8Isaac tawara pakꞌãri, chi nawepa ju amaaji. Ma ewate Abrahampa fiesta waibɨa ooji.

9Mamĩda Sarapa unuji ma Egiptodepema wẽra warra Ismaelpa Isaac oo iru bɨ. 10Maperã Sarapa Abrahammaa jaranaji:

—Jã esclava ichi warra ome ãyaa pëipáde aji. Mɨ warra Isaacpa pɨ netꞌaa aukꞌa jɨ̃a–e paitꞌeeda aji, jã esclava warra ome.

11Mãga ũrikꞌãri, Abraham tꞌãri pꞌua beeji, Ismael ichiaba chi warra pada perã.

12Mamĩda Tachi Akꞌõrepa irumaa mãgaji:

—Kꞌĩsianaapáde aji, Ismael pari wa pɨ esclava pari. Sarapa jara bɨkꞌa jõmaweda oopáde aji, mɨa pɨmaa jaradakꞌa ooitꞌee perã Isaacdeepa uchiadaitꞌeerã ome. 13Ichiaba Ismael pɨ warra perã, irudeepa mɨa pꞌuuru chokꞌara uchiapiitꞌee.

14Aɨ norema tapꞌedapodopa Abrahampa ne–e paniapa ipuru bɨ chikꞌo ome bɨji Agar ekꞌarrade mãikꞌaapa Agar chi warra ome awara ãyaa pëiji. Mãgá ãra pariatua wãjida eujã pania wẽe bɨmaa Berseba pꞌuurudee wãpata ode. 15Ma pania jõdaikꞌãri, Agarpa Ismael bɨji pakꞌuru jepꞌedaa bɨ ekꞌari kꞌũrasaa bɨde. 16Mãpai ãyaa wãji chi warramãiipa unu kꞌinia–e bada perã chi warra mãgá piu wã. Tꞌɨmɨ́ su–akꞌɨ beekꞌãri, chi warra jẽe nɨ̃beeji.

17Tachi Akꞌõrepa Agar warra jẽepi ũrikꞌãri, ichi angelpa mãgaji:

—¿Agar, sãga nɨ̃bɨma? aji. Waaweenaapáde aji, Tachi Akꞌõrepa ũrida perã pɨchi warra jãma jẽe nɨ̃bɨ. 18Wã́ji pɨ warra atade mãikꞌaapa béeji iru ome. Tachi Akꞌõrepa Ismael chupɨria kꞌawaaitꞌee. Irudeepa pꞌuuru waibɨa uchiapiitꞌeeda aji.

19Mãpai Tachi Akꞌõrepa pania poátrɨ uchia bɨmãi Agarmaa akꞌɨpiji. Mãgá irua chi ne–e iru bada paniapa ipurupꞌeda, Ismaelmaa topiji. 20-21Mãgá Tachi Akꞌõrepa Ismael kꞌaripaji. Tꞌẽepai pꞌananajida Parán eujãde pania wẽe bɨmãi. Mama pꞌanɨde Ismael ematrɨma trɨ kꞌawaa beeji. Taarã pakꞌãri, chi nawepa Egiptodepema wẽra jɨrɨteeji.

Abrahampa pacto ooda rey Abimélec ome

22Maapai rey Abimélec wãji Abraham badamaa pedeede. Ichi soldaorã poro waibɨa Ficol aukꞌa wãji. Mama pꞌanɨde Abimelecpa Abrahammaa mãgaji:

—Unu pꞌanɨda ajida, Tachi Akꞌõre Waibɨapa pɨ kꞌaripapari ne–inaa jõmaade. 23Maperã mɨa kꞌinia bɨ Tachi Akꞌõre Waibɨa kꞌĩrapite pɨa nama jaramerã chõo–e paitꞌee mɨchi eere pꞌanɨɨrã ome, mɨdeepa uchiadaitꞌeerã ome. Kꞌinia bɨ pɨa juraamerã tꞌãri pia bapariitꞌee mɨ ome mãikꞌaapa nãgɨ́ eujãdepemaarã ome, mɨ pɨ ome tꞌãri pia baparikꞌa.

24Abrahampa pꞌanauji:

—Tachi Akꞌõre kꞌĩrapite mɨa juraa bɨ: Mãga ooitꞌeeda aji.

25Mamĩda Abrahampa nepɨrɨji Abimelecmaa iru mimiapataarãpa pozo jãri atadapꞌedaa Abraham mimiapataarã juadeepa.

26Mãga ũrikꞌãri, Abimelecpa pꞌanauji:

—Mɨa ɨ̃rapai pɨ ideepa mãga kꞌawaa cheruda aji. Kꞌawa–e bɨda aji, kꞌairã́pata mãga oodapꞌedaa.

27Mãpai Abrahampa ovejaarã, pꞌakꞌaarã ome atapꞌeda, teeji Abimelecmaa. Ma ewateweda ãra pacto oojida chõoda–ee pꞌanapataadaitꞌee. 28Maapꞌeda Abrahampa ichi ovejaarã pꞌe iru bɨdepema oveja wẽra kꞌaipee siete awara ataji.

29Mãga unukꞌãri, Abimelecpa iidiji:

—¿Kꞌãare–itꞌee ma ovejaarã ãyaa atajima? aji.

30Abrahampa pꞌanauji:

—Na oveja siete pɨmaa teeitꞌeeda aji, pɨa kꞌawaamerã mɨa wãarata jaraji taipa ma pozo kꞌoro atada akꞌãri.

31Maperã ma pozo tꞌɨ̃ bɨjida “Berseba”, mama Tachi Akꞌõre kꞌĩrapite juraadapꞌedaa perã chõoda–ee pꞌanapataadaitꞌee.

32Mãgá pedeedapꞌeda, Abimélec chi kꞌõpꞌãyo Ficol ome ãpɨtee wãjida filisteorã eujãdee.

33Ma tꞌẽepai Bersebade Abrahampa tamarisco pakꞌuru uuji. Mama ɨtꞌaa tꞌɨ̃pachi Tachi Akꞌõre, chi ichita chokꞌai baparimaa. 34Abraham taarã bapachi filisteorã eujãde.

Currently Selected:

Génesis 21: sjaB

Highlight

Copy