Génesis 11

Tachi Akꞌõrepa eperãarã pedee awara–awaraa bɨkꞌooda

1Eperãarã na pꞌekꞌau eujã jõmaade wãdai naaweda, na pꞌekꞌau eujãde pꞌanapatapꞌedaarã atꞌãri pedee apai pedeepachida. 2Oriente eereepa chewãdade Sinar eujã jewedaa unu chedakꞌãri, mama pꞌaneejida.

3Mãga nɨde eperãarã ãchi pitapai pedeeteejida:

—Ladrillo oodáma ajida, mãikꞌaapa tꞌɨpɨtaude paadáma. Te oodaitꞌeeda ajida.

Ma te oo kꞌinia pꞌanajida ladrillodee jɨrrɨkꞌa bɨ ome, mãudee oodai kꞌãyaara cementokꞌa bɨ ome.

4Maapꞌeda mãgajida:

—Pꞌuuru oodáma ajida, mãikꞌaapa aɨde torre oodáma Tachi Akꞌõre eujãde panadaitꞌee. Mãgá jõmaarãpa tachi tꞌo pꞌanadayada ajida, mãikꞌaapa waa ãyaa wãda–e paitꞌee.

5Mamĩda Tachi Akꞌõre edaa cheji ma pꞌuuru mãikꞌaapa torre oomaa pꞌanɨ akꞌɨde. Mãga unukꞌãri, 6kꞌĩsiaji: “Ãchi pꞌuuru apai pꞌanadairã mãikꞌaapa pedee apai pedee pꞌanadairã, na mimia oomaa pꞌanɨ. Nãgɨta ãrapa oo atajidara, ¿kꞌãare netꞌaata ooda–e payama? aji. 7Wãdáma ãchi pedee awara–awaraa pedeepide. Mãgá chipꞌedaidakꞌãri mimiadaitꞌee, ũrida–e paitꞌee.”

8Mãga ooji Tachi Akꞌõrepa. Ãchi pedee awara–awaraa bɨkꞌooji mãgɨ́ mimia oonaadamerã mãikꞌaapa wãdamerã eujã bee chaa. 9Ma mimia pꞌanadapꞌedaamãi pedee awara–awaraadaidapꞌedaa perã, tꞌɨ̃jarapata ‘torre Babel’.#11.9 Hebreo pedeede Babel jara kꞌinia bɨ “kꞌĩra kꞌawa–ee pɨkꞌadarida”.

Noé warra Semdeepa uchiadapꞌedaarã

(1 Crónicas 1.24-27)

10Nãgɨɨrã paji Semdeepa uchiadapꞌedaarã.

Tachi Akꞌõrepa na pꞌekꞌau eujã ũutꞌaada tꞌẽepai, año omeede Sem warra Arfaxad tꞌoji. Ma warra tꞌokꞌãri, Sem cien años iru baji. 11Maapꞌeda Sem quinientos años waa baji na pꞌekꞌau eujãde. Mãga nɨde awaraa warrarã, kꞌaurã ome tꞌojida.

12Arfaxad treinta y cinco años iru baji chi warra Selaj tꞌokꞌãri. 13Maapꞌeda Arfaxad cuatrocientos tres años waa baji na pꞌekꞌau eujãde. Mãga nɨde awaraa warrarã, kꞌaurã ome tꞌojida.

14Selaj treinta años iru baji chi warra Éber tꞌokꞌãri. 15Maapꞌeda Selaj cuatrocientos tres años waa baji na pꞌekꞌau eujãde. Mãga nɨde awaraa warrarã, kꞌaurã ome tꞌojida.

16Éber treinta y cuatro años iru baji chi warra Péleg tꞌokꞌãri. 17Ma tꞌẽepai Éber cuatrocientos treinta años waa baji na pꞌekꞌau eujãde. Mãga nɨde awaraa warrarã, kꞌaurã ome tꞌojida.

18Péleg treinta años iru baji chi warra Reú tꞌokꞌãri. 19Maapꞌeda Péleg doscientos nueve años waa baji na pꞌekꞌau eujãde. Mãga nɨde awaraa warrarã, kꞌaurã ome tꞌojida.

20Reú treinta y dos años iru baji chi warra Serug tꞌokꞌãri. 21Maapꞌeda Reú doscientos siete años waa baji na pꞌekꞌau eujãde. Mãga nɨde awaraa warrarã, kꞌaurã ome tꞌojida.

22Serug treinta años iru baji chi warra Najor tꞌokꞌãri. 23Maapꞌeda Serug doscientos años waa baji na pꞌekꞌau eujãde. Mãga nɨde awaraa warrarã, kꞌaurã ome tꞌojida.

24Najor veintinueve años iru baji chi warra Téraj tꞌokꞌãri. 25Maapꞌeda Najor ciento diecinueve años waa baji na pꞌekꞌau eujãde. Mãga nɨde awaraa warrarã, kꞌaurã ome tꞌojida.

26Téraj setenta años iru bakꞌãri, chi warrarã Abram, Najor mãikꞌaapa Jarán tꞌojida.

Terajdeepa uchiadapꞌedaarã

27Terajdeepa uchiadapꞌedaarã nãgɨɨrã paji: Abram, Najor mãikꞌaapa Jarán.

Jarandeepa warra uchiaji. Tꞌɨ̃jarapachida Lot. 28Jarán chi akꞌõre Téraj kꞌãyaara naapɨara jai–idaaji Ur pꞌuurude, Caldea eujãde. Ichi tꞌodamãi piuji. 29Téraj warra Abram miakꞌãiji Saray ome. Jõdee chi ɨ̃pema Najor miakꞌãiji Milca ome. Mãgɨ́ wẽra Jarán kꞌau mãikꞌaapa Iscá ɨ̃pewẽra paji. 30Saray warra tꞌokꞌaa paji.

31Téraj Caldea eujãdeepa uchiaji, Ur pꞌuurudeepa, wã kꞌinia bada perã Canaán eujãdee. Ateeji chi warra Abram, chi wẽra Saray mãikꞌaapa chi ãichakꞌe Lot. Mamĩda Canaán eujãde panada–e paji. Jarán pꞌuuru apatapꞌedaade panadakꞌãri, pꞌaneejida. 32Mama Téraj jai–idaaji doscientos cinco años iru bakꞌãri.

Currently Selected:

Génesis 11: sjaB

Highlight

Copy