Daniel 10

Danielpa Tigris to ide unuda

1Persiadepema rey Ciro año õpee rey bɨde Tachi Akꞌõrepa ne–inaa kꞌawapiji Daniel, ichiaba tꞌɨ̃jarapatapꞌedaa Beltsasarmaa. Irumaa kꞌawapiji taarãpai jura paraaitꞌee. Danielpa mãga kꞌawaakꞌãri, kꞌawaji ma pedee wãara paji. Tꞌẽepai ma kꞌawapida jara kꞌinia bɨ pipɨara kꞌawaji kꞌãimokꞌaraa pɨkꞌa bɨde. 2Maapai tomia õpee wãyaaru misa mɨ, Daniel, kꞌĩsia paraa nɨ̃bapachi. 3Ma tomia õpee wãyaarude chikꞌo warraa kꞌo–e paji. Nechiara jida kꞌo–e paji mãikꞌaapa vino jida to–e paji. Ma awara kꞌera jida pꞌuru–e paji. 4Naapema atanede ewari veinticuatrode, mɨ Tigris to waibɨa bɨ ide bainɨ̃ baji. 5Mama bɨde pi–ia akꞌɨkꞌãri, unuji eperã pꞌaru linodee kꞌada jɨ̃ bɨ. Chi kꞌɨrrɨde jɨ̃pari nẽedee aupai ooda paji. 6Chi kꞌapꞌɨa mãu pi–ia topacio ɨ̃daaparikꞌa ɨ̃daa baji. Chi kꞌĩra pa tau ɨ̃daaparikꞌa ɨ̃daa baji. Chi tau tꞌɨpɨtau urua nɨ̃bɨkꞌa baji. Chi jua, chi bɨɨrɨ ome bronce ɨrradakꞌa urua pꞌanajida. Pedeekꞌãri, ũriji eperãarã cho–kꞌara pedee pꞌanɨkꞌa.

7Mɨ, Danielpapai ma kꞌãimokꞌaraa pɨkꞌa bɨ unuji. Mɨ kꞌõpꞌãyoorãpa maarepida unuda–e paji mĩda, audú pꞌeradachida mãikꞌaapa pꞌirakꞌoodachida mirukꞌoodaridaitꞌee. 8Mɨa mãgá ma kꞌãimokꞌaraa pɨkꞌa bɨ unukꞌãri, apida mɨ ome bee–e paji. Pꞌera nɨ̃bɨpa mɨ juatau wẽe beeji mãikꞌaapa kꞌĩra pꞌãwatɨdachi. 9Mãpai mɨa ma eperã mɨmaa pedee bɨ ũrikꞌãri, mɨ kꞌĩra kꞌĩ eujãde barrobai baainaji. Mama mɨ pia kꞌãidachi.

10Mãga bɨde ma eperãpa mɨ juade jita ataji sinapotepa beemerã. 11Mãpai mɨmaa mãgaji:

—Daniel, Tachi Akꞌõrepa pɨ audú kꞌinia iru bapari. Mapa mɨ pëiji pɨ akꞌɨde chemerã. Pꞌirabáiji mãikꞌaapa pia ũríji mɨa pɨmaa jararu.

Irua mãga jarakꞌãri, mɨ bɨɨrɨ wëree bainɨ̃ beeji.

12Mãpai mɨmaa mãgaji:

—Daniel, pꞌeranáaji. Pɨa kꞌawa kꞌinia beedakꞌãriipa kꞌãata jara kꞌinia bɨ Tachi Akꞌõrepa pɨmaa kꞌawapida, pɨ audua–ee beeji. Mapa pɨa naapɨara ɨtꞌaa iididakꞌãriipa, Tachi Akꞌõrepa ũriji mãikꞌaapa mɨ namaa pëiji. 13Mamĩda kꞌãima veintiuno paru misa, netuara poro waibɨa eerepema ángel waibɨapa mɨ chepiamaa beeji. Mãgɨpa Persiadepema rey ichi jua ekꞌari beerã ome akꞌɨpari. Mama mɨ iru ome chõomaa beeji. Mamĩda Tachi Akꞌõre eerepema angeleerã poro waibɨa Miguelpa mɨ kꞌaripa cheji. 14Mãgá mɨ pɨmaa jarateede cheji ewari cherude pɨchi aukꞌaarã ome kꞌãata pꞌasaitꞌee. Ma kꞌawapida nãga jara kꞌinia bɨ.

15Ma eperã pedeemaa bɨde, mɨ kꞌĩra edaa akꞌɨ baji; maarepida pedee–ee. 16Mãga bɨde awaraa eperãkꞌa bɨpa mɨ itꞌai tꞌõbaitꞌaaji.

Mãpai mɨ kꞌĩrapite bainɨ̃ badamaa mɨa mãgaji:

—Mɨchi Waibɨa, na kꞌãimokꞌaraa pɨkꞌa bɨ kꞌaurepa mɨ audú kꞌĩsia paraa mãikꞌaapa juatau wẽe nɨ̃bɨda aji. 17¿Sãgá mɨ, pɨ mimiapari pɨ ome pedeeima, nãgá juatau wẽe nɨ̃bɨde mãikꞌaapa ĩyapaa paara wẽe nɨ̃bɨde?

18Mãpai ma eperãkꞌa bɨpa waya mɨ tꞌõbaitꞌaaji. Mãgá mɨ juatau paraa beeji.

19Mãga bɨde irua mɨmaa mãgaji:

—¡Pꞌeranáaji! ¡Kꞌãiwee baparíiji! Tachi Akꞌõrepa pɨ kꞌinia iru bapari. ¡Mapa sõcharra béeji!

Mɨmaa mãga jara bɨde, mɨ tꞌãri o–ĩa beeji mãikꞌaapa mãgaji:

—Mɨchi Waibɨa, pedéeji ɨ̃rapɨ pɨa mɨ waya juataura papida perã.

20Mãpai irua mɨmaa mãgaji:

—¿Pɨa kꞌawa bɨkꞌã aji, sãapꞌeda mɨ pɨ akꞌɨde cheji? Tachi Akꞌõrepa pɨmaa kꞌawapida jara kꞌinia bɨ jarapꞌeda, mɨ waya chõonaitꞌee ma Persiadepema netuara eerepema ángel waibɨa ome. Ma ome chõo aupakꞌãri, Greciadepema netuara eerepema ángel waibɨa cheitꞌee. 21Mamĩda mãga pꞌasai naaweda, mɨa pɨmaa jaraitꞌee librode pedee wãarata pꞌã bɨdepema. Mɨ mãgá ma netuara eerepema angeleerã ome chõomaa bakꞌãri, jĩpꞌa ɨtꞌaripema angeleerã poro waibɨa Miguélpata mɨ kꞌaripaitꞌee. Irua parã israelitaarã rey, ichi jua ekꞌari beerã ome akꞌɨpari.

Currently Selected:

Daniel 10: sjaB

Highlight

Copy