San Lucas 1
1
Teofxilo's neewe'wena fxi'jni
1-4Adx namiku Teófxilo, idxa's khiyu'jna fxi'jaçthu kwe'sx ensu na'wẽ yuuk txã'sna. Txã'sa' txã'wẽ yũuya' takheçíyna, Kristo yakh u'jusawe'sxa' ma'wẽçxahne'ta ew uy txã'wẽytxi txãawe'sxa' kwe'sxtxi pta'sx, aça' txã'sa' maawa txã'wẽyta ew pta'sxna fxi'jçxa nvxiit wẽe. Txãa pa'ga adxwa ma'wẽçxahne' yũu txã'sa' wala ew jxpa'yakx paapẽjxçxa idxna pta'sxna fxi'jaçthu, kxah isa yuh pta'sxi'ne'ta sũjũne'ga.
Juan Bautista upxwa'ja's pta'sxni
5Judea kiwete ne'jwe'sx Herodes ensu', teeçx sacerdote Zakarias yaasesak u'pu'. Txãa yu', sacerdote ne'jwe'sx Abias ji'kh yu'. Aça' txajx nyu Elisabet yu', Aarón ji'kh yu'. 6Ptamíi Dxus jxkaahnitxi' nwẽesẽ'jsatx yu', txãa pa'ga Dxus dxi'pte ew fxi'zesatx yu'. 7Nawa txãawe'sxa' luuçx ji'phmeetx yu', Elisabetha' luuçx ji'phuwa'jsameene' yu' naa pa'ga. Khĩçxawa wala thẽ'khwe yã'j yu'tx.
8Zakarias yakh ũssawe'sxtxi dxuus yatte selpiwa'j en ãhte', na'wẽk yuu: 9Dxuus yat altalte wẽt putasá incienso's kabxa' u'kawa'jsa kimtewa jiyuya', sacerdotewe'sxa' swerte na'wẽsa kutxi'jtx. Aça' kxteea' Zakariasku kaseh. 10Txajũ' Zakariasa' Dxus altalte wẽt putasa's kabuçte', nasa pa'jsa' jxukaysa ekajuçxáatx Dxus yakh puutx we'wena ũsu'. 11Naapkaçxha' Zakariasa's vxyaak Dxus jxkaahni teeçx angel altal pukate paçu ju'gte. 12Aça' Zakariasa' txã's uyçxa', kuh yajkxna wala ũukhku. 13Nawa txãa angel yu' na'jĩk:
—Zakarias, ũukhnu. Iidx pxthaa we'weni's Dxus pasçxa kxtey yuuça', aça' iidx nyu Elisabetha' luuçx ji'phuna. Txãa luuçxa's Juan yasene'ga. 14Txã'wẽ yuute', idxa' wala weçxana neeyũune'ga, aça' maawa txã'wẽçxaçxáa weçxaatxna txajx upxni's jiyuçxa', 15txãa pa'gatey txãa luuçxa' Dxus dxi'pte walasa yuuwa'jsa'. Txãasa kĩhwa ktũ'ju'jwa'jsa yu'sa' tudxmeena, naasáa Dxus Espiritu yuuçxáana ũuste jxuka ji'phuna njĩ'j tutxhu yuu kasehmey. 16Sa' Israel kiwesuwe'sxtxi maazkuẽesatxwa taki'sa Dxus tasxtey ki' kuutxa'jana. 17Txãa Juana' Dxus Nçxi'k yaçte pekũjuna, sa' Dxus yuwe pta'sxsa Elias Espiritu kĩhtewa ãjawa'jsa's ji'phu'k txã'sna íiçxáa ji'phuna. Txãasa neywe'sxtxi luuçx yakh kaapui'jmée kaafxi'ze'jena, sa' nwẽesẽ'jsameetxwa nwẽesẽ'jya' kaapiya'jana. Txã'wẽ yũuna nasatx pheu'juna Dxus Nçxi'ka's jxpa'gakahn jĩte', 18Zakariasa' na'jĩnak pẽjx:
—Kwe'sxa' ptamíi wala thẽ'jyã'tha'w, aça' ¿ma'wẽ yũuçxa iidx txã'jĩni' kxtey yuune'thewa ew jii neeyũuki'th? jĩk. 19Aça' Dxus angela' pta'sxku:
—Adxa' Dxusna selpiina fxi'zesa Gabrielthu. Txãa pa'gak adxa's jxkaah, idxa's naa yuwe ewsa's pta'sxkahn. 20Nawa adx pta'sxni's txã'wẽ dxih yuuna sũhmeeg naa pa'ga ãçxhíi we'weya' ewumée neeyũune'ga iidx nçxi'k upxpkaçx jĩk.
21Dxuus yat dxiite txã'wẽ jxthẽeyũute', ekaju nasa yu' Zakariasa's ũythasnatx ũsu', ¿kĩh yuuçxaki'k txakwe jxthẽeyũu? sũhna. 22Txajũ' Zakariasa' kasehçxa', we'weya' ãjãmeeçxa', kuseju vxijxaçxaçxáak khiyu'ju'. Aça' txã'wẽ yũute', dxuus yat dxiite kĩja' uyyuhne' sũjũ'tx nasa yu'. Sa' Zakariasa' txã'wẽesa neeyũuk.
23Dxuus yatte selpiina jxã'jçxa', Zakariasa' txajx yatna u'kh. 24Txãa ensu' Zakarias nyu Elisabetha' nasa ji'ph neeyũuçxa', txajx yatu kasehmeek u'pu' tahç a'tepkaçx, naa sũhna: 25Ãçxha' ũ'kwe Dxusa' na'wẽk yũu, aça' nasa' ũ'kwe's peena yu' açewe'wemeetxna sũhna.
Jesus upxwa'ja's pta'sxni
26Elisabetha' nasa ji'ph neeyũuni seis a'teju', Dxusa' angel Gabriela's Galileasu teeçx çxhab Nasaret yaasesatek kaah, 27teeçx kna'sa Maria yaasesa yatte pa'jçxa' yuwe pta'sxkahn. Txãa kna'sa yu', teeçx piçthẽ'j Jose yaasesa yakh iimi'ya' puutx we'weçxak u'p yu'. Txãa Jose' jxkaahsa Davxid ji'kh yu'. 28Aça' Dxus angela' Maria u'pnite pa'jçxa' na'jĩk:
—Dxusa' ijçxa yakh ũsa', naa pa'ga Dxus bediciona's maa maa u'ytewa jxthaakwe jxpa'gaçxa u'pi'çxa. Txãasa weçxana me'pçxi ewçxáa jĩte', 29Maria' Dxus angel we'weni's wẽsẽ'jçxa thegçxa', kujk yajkx ¿ma'wẽteki'k txã'jĩ'? sũhna. 30Aça' Dxus angela' na'jĩk:
—Maria, ũukhnuçx, Dxus peeygãanisa i'çxa. 31Txãa pa'ga ãçxhíi teeçx luuçx pihç ji'ph neeyũuçxa txã'sa' Jesus yasene'çxka. 32Txãa luuçxa' jxtuhthe walasa yuuwa'jsa'. Txãasa cielute Dxus Nçxi'k ya'kxsusuna. Aça' txã'sa' Dxusa' jxkaahwa'jsa vxituna, yaçgathẽ'j Davxid na'wẽysa. 33Kxah Israelwe'sxtxi kiiwey jxkaajana, nawa txajx jxkaahni' bagaçxte yuhwa pçumeena jĩk.
34Txajũ' Maria' txãa angela's pẽjxku:
—¿Ma'wẽ txã'wẽ yuja' yũukx? Ũ'kwe' kna'sa nmi' ji'phmeeth açyuja' jĩte', 35angela' na'wẽk pta'sx:
—Dxus Espiritu' içxa kakwe's txãaçxaçxáa jxuka iiyamuna. Txã'wẽ yuuniteçxáa nasa vxyaana. Txãa pa'ga luuçx upxsa' Dxus jĩi yuuna, sa' Dxus Nçxi'k ya'kxsusuna. 36Txã'wẽy içxa pukakhẽ nyakh Elisabethwa luuçx pihç ji'phuya'wa', thẽ'khuẽ yã'jçxawa. Bagaçx yuhwa nasa ji'phusameeçxawa, ãçxha' seis a'te yã'j yuuça' nasa ji'phuni. 37Dxus yakha' kĩh yuhwa thẽysa yu' meea' jĩna pta'sxte', 38Maria pasçxa':
—Txã'wẽ', ũ'kwe' Dxusna selpisáa ne'tka, aça' ũ'kwe's Dxusa' kxtey yuuna na'wẽg pta'sx txã'sa' jĩk.
Txajũ' Dxus angela' Maria tasxu txuteena u'kh.
Elisabet tasxna Maria u'jni
39Txãa ensuy Maria' jxthẽeyũumée u'kh Judea thã'jsu teeçx çxhab ũsu'k kxtee pa'jya'. 40Sa' Zakarias yatte pa'jçxa', Maria' Elisabetha's weçxak. 41Maria weçxana we'weni's wẽsẽ'jeçpkaçxha', Elisabet nasa tutxhtewe'sxa' ẽsẽk. Naapkaçxha' Dxus Espiritu' Elisabet ũuste jxuka kaajiyu'kh. 42Aça' Elisabetha' Maria's na'jĩnak sus we'we:
—Dxusa' ijçxa's maa maa u'ytewa jxthaakwek bedekĩy, sa' txã'wẽyku içxa nçxi'ka'swa bedekĩy. 43Aça' ũ'kwe' ¿kĩhte seelpitka açga ũ'kwe's Nwe'wesa njĩ'ja' thegya' pa'já'? 44Içxa weçxana we'weni's wẽsẽ'jeçpkaçxha', ũ'kwe luuçx tutxhtewe'sxa' ẽsẽk weçxana. 45Dxus we'weni' kxtey yuuna sũhpa'ga, kxtey yuuya'wa' aça' weçxana mfxi'zeçx jĩk. 46Aça' Maria we'weçxa':
Ũ'kwe' ũusuh jxukath Dxusa's weçxá'.
47Sa' ũ'kwe Dxus nwe'wesa's ũuste peçxkanameeth weçxana fxi'ze'.
48Txã'wẽ makwe pxthaa ãhmeekuẽtewa, Dxusa' peeygãhçxa txã'sna selpiwa'jsa vxitku.
Aça' ãçxhũyã'ja' ũ'kwe's Dxus txhitxhnisak yu' jĩna nes yuutxna maa nasawa jxuka.
49Txã'wẽ yaakxkahníiçxáak Dxus txakwe walasa ũ'kwe's txakwe ew yũu.
Txã' wala peeygãasa'.
50Txãasa maawa txã'sna nwẽesẽ'jsatxi' bagaçxtewa peeygãhna nes yuuna.
51Dxusa' kĩjkĩhnawa jxukak vxit, sa' ũuste iiwejçx yaakxsatxwa kpaasu'jme'.
52Jxkaahsatxwa txãawe'sx jxkaahnijũ kutxi'kh,
Sa' kĩhtewa ãhmée pxthaakuẽsatxi' walasak vxit.
53Kĩhwa ji'phmée peejiina fxi'zesatxi' txãawe'sx peejini's jxukak ũs.
Sa' wala ji'phsa yuutxi'sa' kĩhwa ji'phmeek nvxiht.
54Txã's selpisáa Israel nasatxi' pu'çxku,
Sa' peeygãhna fxi'zewa'ja's peçxkaname'.
55Ma'wẽne' kwe'sx yaçgawe'sx Abrahanwe'sxtxi bagaçxtewa ew yũuya' neeyũu, txã'sa' kxteyku yuu jĩk.
56Txajũ' Maria' Elisabet yakh tekh a'te u'pçxak txajx yatnay ki' sxawedna u'j.
Juan Bautista upxni
57Txãa ensu' Elisabet ãçã'wa'j ãhte', luuçx pihç ji'phuk. 58Aça' Elisabet nwe'sx vxite' namikuwe'sxwa jiyuçxa', weçxaya' u'jtx Dxusa' Elisabetha's txã'wẽ ew yũupa'ga.
59Txajũ' teeçx ki'sute', luuçxa's cirkuncidãyya' u'jtx. Sa' ney yase Zakariastxi ki'p wẽe. 60Nawa njĩ'j we'weçxa':
—Txã'wẽmée wejxwa Juan yasewa'ja' jĩte', pi'kxna u'jsawe'sx pasçxa':
61—I'kwe nwe'sxa' maa yuhwa Juan yaasesa meetx yu' aça' ¿ma'wẽtekwe Juan yase ki'p wẽjẽ'? jĩ'tx.
62Txajũ' neya's pẽjxtxi ma'wẽ yasewa'thewa. 63Aça' neya' Juan yasewa'ja' jĩnak fxi'jçxa ũs. Txã'wẽ yũute', jxukaysa kuhtx yajkxna neeyũu. 64Txãa dudtey Zakarias ki' we'weya' ewuuçxa', Dxusa's seena' wala weçxak. 65Txã'wẽ yũute', kxsũ utxasũ u'psa' wala ũukh we'wena neeyũutx. Aça' Judea thã'jsuwe'sxwa txã'wẽ yũuni's jxuka jiyutx puutx ya'pta'sxna. 66Txã'wẽ jiyuçxa', na'wẽtx yajkxna puutx paapẽyĩ':
—Isa, txãa luuçxa' Dxus bedekĩynisane' yu' sa' ¿ma'wẽ yũuwa'jsakx? jĩ'tx.
Zakariasa's Dxus Espiritu kwe'we'jni
67Txajũ' Juan ney Zakariasa's Dxus Espiritu txajx ũuste kwe'we'the', na'jĩnak ãate pta'sx:
68Israelwe'sxtxi jxpe'jsa Dxusa' kĩhtewa jxuka ewsa'.
Kwe'sxa' txajx nasatha'w, aça' nwe'weya' kĩhçxa', ewte nvxihtku.
69Dxusna selpisáa Davxid ji'thewe'sx teeçx kaakh kĩhtewa jxuka nwe'weya' ãjãwa'jsa.
70Nyafxiitey Dxus yuwe pta'sxsawe'sx yakhwa na'wẽk puutx we'we nwe'weya' kaahwa'ja's:
71Kwe'sxtxi açesawe'sx kuseju nwe'weçxa ewte nvxiitu'nja,
72Sa' kwe'sx yaçgawe'sxtxiwa peeygãhna, txã'wẽ adx puutx we'weni yuutxi' le'çxkuẽçxáa yuhwa peçxkaname'nja jĩ'k.
73Sa' kwe'sx yaçgawe'sx Abrahan yakhwa txã'wẽyku na'wẽ puutx we'wena jurãy:
74Kwe'sxtxi açesawe'sx kuseju nwe'weçxa ewte nvxiitu'nja, aça' ũukhmée mselpiiwe,
75Adx yuuçxáana nwẽesẽ'jna uu entepkaçx jĩ'k.
76Aça' adx nçxi'kkuẽ idxa' Dxus ĩtxĩsa yuwee pta'sxsa yuuçxa, kwe'sxtxi Nwe'wesa pa'jwa'ja's pheu'jna pekũjune'ga yaçte.
77Kxah nasa' pkalpa'ga peltunãywa'ja's maawa jiyuçxa, ewte neeyũuwa'ja's ji'phutxna.
78Kwe'sx Dxusa' peeygãhçxa, cielujuy sek na'wẽ kaakweethe'kh,
79Çxhi'dxte uu ente na'wẽ yã'j ũstewa, wẽt eena'te nvxiht-ya'.
Sa' kwe'sxtxiwa jxpubamée ewte kaafxi'ze'jya'k txã'wẽ yũu jĩnak we'we Zakariasa'.
80Txajũ' Juana' walaana u'kh Dxus yuwe's jiyuna, sa' nasa u'pnimée kiwesuk u'p-ya' u'j, Israelwe'sxtxi pta'sxya' kasehwa'j en ãhpkaçx.
Currently Selected:
San Lucas 1: pbbNNT
Highlight
Share
Copy
Want to have your highlights saved across all your devices? Sign up or sign in
© 1984, Wycliffe Bible Translators, Inc. All rights reserved.
