San Mateo 13
13
Et‑leerota ejemplo
(Mr. 4:1-9; Lc. 8:4-8)
1Huäri taahuarit Jesús jóapo yeu siika. Huanäi bahue mayoat yejtek. 2Huanäi juebena gente áu náu yájjak. Áapo éntok barcopo kibakeka, áma yejtek. Jü gente éntok sïmetaka bahue mayoa see päriapo aaney. 3Huanäi juebenak am majtiak, ejemplommeyi ínel jíaka:
—Jü et‑leero echíseka yeu siika. 4Huanäi ä echay, huate báchia böo mayoat huáttek. Të huikichim áma yájaka ä buäka. 5Huate éntok tétam násuk huáttek, kaa yún buíata ayukaïpo. Huanäi läuti síuhuek, kaa yún ä buíakaï béchïbo. 6Të täata yeu sik tájjak, entok kaa ä nahuakaï béchïbo huaakek. 7Huate éntok huícham násuk huáttek. Huanäi jü júya huíchära yötuka, ä jíabi mëak. 8Të huate buía türikuu huáttek. Huanäi taakak; huépul báchia síhueka cien báchiam ámuek; jü senu éntok sesentam; senu éntok treintam. 9¡Jü jíkkaij béchïbo nákakame jikkaijnake!
Jume ejemplom jita béchïbotukähui
(Mr. 4:10-12; Lc. 8:9-10)
10Huanäi jume discíipulom áu rúkteka, ínel áu jiaahuak:
—¿Jatchiakasë ejemplommey ámeu nooka?
11Huanäi Áapo am yómmiaka ínel ámeu jiaahua:
—Bueïtuk eme akem ä mák‑ri, juka enchim át jüneenakëhui, juka téhuekapo réy nésauta obiachisi maachik. Të bempörim éntok, ëe. 12Bueïtuk jábe junne jita jípureme, chë júne huatek mákna; huanäi chë yún ä jípunake. Të jü kaita jípureme, juka ä jípurëu junne ä úuhuaana. 13Huäri béchïbone ejemplommey ámeu nooka; bueïtukim bíchaka kaa bitcha, entokim jíkkajaka kaa jíkkaja, entokim kaa át jüneiya. 14Júnëli ámet áu chúppa, jü profeeta Isaíasta nokakähui, ínel jíaka:
Nákakem jíkkaijnake, të katem át jüneenake;
éntokem bíchaka bínnake, të katem huitti át jüneenake.
15Bueïtuk ï pueblota jíapsi námakaka tahuala;
entokim náka páttilataka kaa jíkkaja;
entokim bem pusim páttiala,
pusimmey kaa bít béchïbo,
entok nákammey kaa jíkkaij béchïbo,
entok bem jíapsiy kaa am jüneenakë béchïbo.
Të ínëline kaibu ára am anianake.
16’Të yúmalasi al‑leeri enchimmet ayka; bueïtukem puseka bitcha, éntokem nákaka jíkkaja. 17Bueïtuk tua lútüriapone ínel enchimmeu jiaahua, juebena profeetam entok juebena lútula Dios huáateme, akim ä bít péaka taahuak, juka én enchim bíchähui; të katim ä bitchak. Entokim ä jíkkaij péiyay, juka én enchim jíkkajähui, të katim ä jíkkajak.
Jesús juka et‑leerota ejemplo am téjhuak
(Mr. 4:13-20; Lc. 8:11-15)
18’Akem ä jíkkaja eme, juka ejemplo et‑leerota bétana. 19Bueïtuk jábe junne, juka réy nok nésauta jíkkajame, të kaa at jüniätek, íri báchiat böo mayoat ethuakamta bénna; bueïtuk jü diablo áu yepsaka, úttiapo ä úuhuanake, juka ä jiápsipo ethuakamta. 20Entok kétchi jü tétam násuk ethuakame, ïri júnen juka nokta jíkkajaka, sep läuti al‑leaka ä mabetnake. 21Të kaa tüisi naahuak; íäri béchïbo kaa bíbinhuatu; bueïtuk Diosta noki béchïbo obiachisi áu huée táytek entok kaa tüisi bít táytihuak, tëitinake. 22Jü huícham násuk ethuakame, ïri júnen juka Diosta noki jíkkajakame; të jü ániat kaa yúmasi huéeme, entok jü yún bem tómi péäu, Diosta noki bem mabetakäu nánayote. Huanäi kaa tataka. 23Të jü türi buíapo ethuakame, ïri júnen nokta jíkkajaka át jünéakame. Huanäi takanake. Huépul báchia síhueka cien báchiam ámuenake; jü senu éntok sesentam; senu éntok treintam.
Júya tirijkom násuk ayukame ejemplo
24Júchi täbui ejemplota ámeu nookak, ínel jíaka:
—Jü téhuekapo réy nésahui, juka yoremta ä huajpo tü báchiata ä echakä bénna. 25Të seenu, tirijkom áttiakamta ée béj‑reme, tukaapo jume yoremem kócheyo, júya kaa türi báchiata tirijkom násuk echaka siika. 26Huanäi juka etta yötuka ä taka táytek, jü júya kaa türi két áma síhueka yötuk. 27Huanäi jume huajta áttiakamtau tekipanuame ínëlim áu jiaahuak: “Señor, ¿jache kaa báchiata türik áma eechak, em huajpo? ¿Játchiaka júntuk ket júya kaa türika áma síuhuek?” 28Huanäi áapo ínel ámeu jiaahuak: “Jábe nee béj éame íkäi yáuhuak.” Huanäi jume áu tekipanuame ínel áu jiaahua: “¿Jachë áman sájaka itom ä popón ïaa?” 29Áapo ínel ámeu jiaahuak: “Ëe, bueïtuk jáchin aykem juka júya kaa türik pónätek, két jume tirijkom áamak popónnake. 30Akem ä tójja; éläposu nánabeu yötunake, juka etta jójonaka ä tóboktiahuäu tájti. Huanäi jume tirijkom chúktia naatehuayo, ínapone am téjhuaanake, jume tirijkom chúktíame, báchem juka júyata kaa türik náu tójaka, lólopola ä súmma, ä táanä béchïbo; të jume tirijkomem náu tójaka am ëeria, jum íäri béchïbo kárita ín yáaläpo.”
Mojtaasa báchiata ejemplo
(Mr. 4:30-32; Lc. 13:18-19)
31Júchi täbuik ejemplota ámeu nookak, ínel jíaka:
—Jü téhuekapo réy nésahui, mojtaasa báchiata senu yoremta ä huajpo ä echakä bénna. 32Të ïri báchia lútüriapo sïme báchiam béppa chë ilitchi; të yötukätek sïme júya jíurim béppa chë yoyötu. Huanäi júya buëuruka tatahua. Ínëli jume huikichim téhueka bétana áu yájaka áma totosate.
Levaduurata ejemplo
(Lc. 13:20-21)
33Júchi täbuik ejemplota ámeu nokaka, ínel jiaahuak:
—Téhuekapo réy nésahui, levaduura jámutta nükäu bénna, báisi jünakteri ariinampo ä töak. Huanäi sïme náu küteka huécheka taahuak.
Jáchin Jesústa ejemplommea am majtiähui
(Mr. 4:33-34)
34Jesús íkäi sïmeta ejemplommey ámeu nookak, jü gentetahui. Am majtiätek, ejemplommey jíba ä jojoay, 35bueïtuk íkäi profeetata nokakäu áhuä chúpanakë béchïbo, ínel ä jíakähui:
Ejemplommeyne ín teni étaponake,
huaka ániata kësampo naateka ésotane étapoka ä jüneriatebonake.
Jesús ä jüneriatebo, juka júya kaa türi ejemplota
36Jume gentem sákatuasuka, Jesús jóapo kibakek. Huanäi jume discíipulom áu rúkteka, ínel áu jiaahua:
—Itomë téjhua jáchin ä jiau bárëhui, juka júya kaa türi huajpo ayukamta ejemplo.
37Am yómmiaka Áapo ínel ámeu jiaahua:
—Ínapo jü Yoremta Üusi jü tü báchiata echame. 38Huaj päria ínel jü ánia; jü báchia türi éntok, jume réy nésaupo usiarim; jü júya kaa türi éntok jü kaa tü yóreme diablo usiari. 39Jü kaa türik echákame ínel jü diablo yore béj‑reka huéeme; jü tirijko chúpila tóboktiahuame éntok ánia lüteme; jume etta tóboktéame éntok ángelesimme. 40Jáchin juka júya kaa türik popónhuaka ä táahuakahui, ilë bénanake, jü ánia lüteme. 41Jü Yoremta Üusi ä ángelesim áman bíttuanake, jum réytaka ä nésahuëhui, jume kaa tühuata huatem jotuame entok jume kaa türik joame náu am tóijnakë béchïbo. 42Huanärim ornota béetëu am guötianake. Ímïrim emo tam kumeka buannake. 43Huanäi jume yúmalasi Diosta nésahui joame, bem Áchay réytaka nésahuepom täa machiriata bénasim bélojkosi bíttunake. ¡Jü jíkkaij béchïbo nákakame jíkkaijnake!
Tesooro ésori
44’Entok kétchi jü téhuekapo Diosta réy nésauri tómi béjhuata júya päriapo ésota bénna. Huanäi senu yoreme ä tíaka, júchi ä éssok. Íäri béchïbo tüisi al‑leaka sïmeta ä jípurëu nénkaka, huanäi huákäi buíata jínnuk.
Jü téta perla yún béj‑reme
45’Entok kétchi jü téhuekapo Diosta réy nésauri juka jábeta jita jinnü bénna. Ïri türi perlam jariaka am jíjinnu. 46Huanäi juka perlata ujyolisi musäla machik téaka, sika sïmeta ä jípurëu nénkaka, ä jínnuk.
Jume jítërim
47’Ínëli kétchi jü téhuekapo Diosta réy nésauri jítërim bénna. Ímëri bahuéu jímmahuakätek, kúchum kaa nánälaim nunüye, tuttürim entok kaa tuttürim. 48Huanäi senu huëpo tápunakätek, mayoau bícham yeu huíhuikhua. Huämïrim joteka jume türim yeu püaka, huaripom am öore; jume kaa türim éntokim päkun yeu guöguötia. 49Ilë bénanake jü ánia lüteme: jume ángelesim yeu kannake; huanärim jume kaa tühuata joame näikimtenake, jume yúmalasi Diosta nésahui joame násuku. 50Huanärim horno béetëu guötiana; ímïrim emo tam kumeka buannake.
Tómi béj‑reme jauhuey huéri entok bemela
51Jesús ínel ámeu jiaahua:
—¿Jachem sïmekut jüniaka taahua?
Huanäi bempo ä yómmiak, ínel jíaka:
—Jeehui, Señor.
52Áapo ínel ámeu jiaahua:
—Huäri béchïbo jü escriiba jü téhuekapo Diosta réy nésauri bétana tüisi áu majtialame, senu áchayhuariapo famiiliata bénna. Tómi béj‑remta áttiaka, bebëmelak entok kaa bebëmelak áma yeu huíike.
Jesús Nazaretpo aane
(Mr. 6:1-6; Lc. 4:16-30)
53Ínëli huëpo chúkula, Jesús ejemplom am majtiasuka, áma yeu siika. 54Huanäi ä pueblo Nazareu notteka, am majtiay bem sinagogampo. Huanärim áa bétana buére éiyay, ínel jíaka:
—¿Jáksu ïri ä nüka ä jípure, juka jita täyahuamta? Entok, ¿juka obiachik kara johuamta ä joähui? 55¿Jachu kaa ïri ájäria, jü carpinterota üusi? ¿Jachu kaa María ti téhuak, ä áyehua; entok ä sailam, Jacobo, José, Simmom entok Judas? 56¿Jachu kaa jume sïme ä huayim ímï itomak aane? ¿Jákübosu júntuk ïri íkäi sïmeta jípure?
57Ä nokähuim kaa béj jóaka éiyay. Íäri béchïbo Jesús ínel ámeu jiaahua:
—Sïme profeeta yörihua; të ä buiärapo entok ä jóapo, ëe.
58Huämïri kaa yún ä yáuhuak, juka obiachisi kara johuamta ä joaïhui, bempörim kaa ä súale béchïbo.
Currently Selected:
San Mateo 13: mfy
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved
