Matyu 23

Farisi nga mashi Moseshin sawendari ma nga mashi os li sawenda hom tiyanda ambu lir

(Mk 12:38-39; Lk 11:43,46; 20:45-46)

1Urik Jisas ma ol orok liri nga ol orin tiyandari ma nga ormu sawera, 2“Farisi nga mashi Moseshin sawendari ma nga Moseshi farniyik li sihi mashi Avui Wasilakahin ewesawenda mak nanda lir. 3Unda osik mashi os li ewesawewan ji tiyaka. Hako nombo os li yawa yawan ji tiyawa hala, wahau. Mberem ushiwak? Lir mbeek mashi os li sawenda hom tiyanda ambu lir. #Mal 2:7-8 4Lir men ma anandi nom mashi lihin li tiyakmbaha sawenda lir. Oso osmu nomorawu wasilaka ma ondon li hawak li kishawak lir mbeek kandakar mende li jelyanda ambu hom nanduwa. 5Mbele mbele ol li unda men ma li heyejehe unda lir. Kowe os li falenda kowe osohi kousumbun li owehe tlahapsinda lir.#23:5 Farisi ondo mashi os Kisim Bek 13:9,16, Lo 6:6, 11:8, Namba 15:37-41 orok li kayehendarin tiyandari lir. Hako mbele mbele ol kowe lihin li tlahapsindari ondon hombelaka mendek uri lir. Uhu paus ondon wasilaka mendek uri lir. Mberem ushirik? Lir li hishiri karem, mbele mbele ondo avak kormbak li mukunak ma amber heyekwa sir, lir Avui Wasilakahi ma indingo lir. Uhu paus os jekamba Avui Wasilakahin li wolonda oson wasilakak unda lir. Unak ma li heyehe li mba, “Ma tondo Avui Wasilakahi ma tolira.” #Kis 13:9; Nam 15:38-39; Lo 6:8; Mt 6:1 6Uhu li lotu unda wolo nga hiyawun li uhu li anda wolo nga kawu ol maifuk li lerenda kawu orokop li likwak hishinda lir. 7Uhu ma lirin nombok li heyehe li makshitakshihi “tisa” karem li mbakmbaha hishinda ola.

8Hako jirin amu sawenduwa, avak ma lar “tisa” karem ji ushawa hala, wahau. Tisa jihi namtar numbu ri. Jir amber hom mahasanje jir. 9Jir avak misambi torok fehe ma lar “Avui jihi” karem ji ushawa hala, wahau. Avui jihi namtar numbu or hevenik lindu. 10Jir avak misambi torok ma lar “Wasilaka” karem ji ushawa hala, wahau. Wasilaka jihi namtar numbu Krais oria. 11Misi, os jir lar malakamak or nakmbaha or hishi nahi, halanak orhinjik or hafakaha ma kandai men lerawun landa ma hom or naka. #Mt 20:26; Mk 9:35; Lk 22:26 12Hako os jihinjik ji yerkujihi ji mba, “An malakama anira.” Karem ji mba nahi, kumak avak Avui Wasilaka or unak hi jihi si rakanak humblarakwa jir. Hako os jihinjik ji hafakaha ji li nahi, kumak avak or unak hi jihi wasilakak nakwa sir.” #Jop 22:29; Snd 29:23; Lk 14:11; 18:14

Jisas Farisi nga mashi Moseshin sawenda ma nga Avui Wasilakahi mak li arndiri oson kormbak or saweri

(Mk 12:40; Lk 11:39-52; 20:47)

13-14Uhu mashi las nga Jisas ormu mbara, “Jir mashi Moseshin sawenda ma nga Farisi nga ji auheyeka, kumak avak kavak nakwa jir. Jir ma ol Avui Wasilakahi yanga orok ikwak hishiwa ma ondohi nombon arangonda jir. Jir orok ji ikwak hishinda ambu jir. Hako ma ol orok li ikwak hishiwa ma ondohi nombon os jimu arangonduwa.#23:13-14 Saveman lal karem hishinda lir, mashi anandi las nga karem li kayeri sir, “Jir mashi Moseshin sawenda ma nga Farisi nga jir ji auheyeka. Jir nokove ol mumblak wayanda lihi akak ji ihi mbele mbele lihin landa jir. Uhu Avui Wasilakan ji sawewa wolo ma li heyekwak sawenda jir.”

15Jir mashi Moseshin sawenda ma nga Farisi nga ji auheyeka, kumak avak kavak nakwa jir. Jir nombo homen ji ihi solwaran ji mbuhu lerawu havan ji lanak ma lar jirin tiyanda mak or naku. Karem hishinda jir. Am jirin tiyanda mak or na nahi, wa hik or ikwa nombo oso osmu orin nikishinduwa, os jir hik ji inda nombok ji sinda hom.

16Jir misokome tumunda jirin, jir mbeek man nombon mukundahik nanda ambu jir! Jir karem ewesawenda jir, os ma lar tempelin or mba, “Tempel heyewak mashi kason omek amu mbanduwa.” Erem or mbashihi os or mbawa oson or jintlewak ji mba, “Wa am nawa sir, or mbeek kavak nakwa ambu ri.” Karem ewesawenda jir. Hako os gol os tempel akan li tlahapsindan or ushaha orok or mba, “Gol os tempel akan li tlahapsihinda heyewak mashi kason omek amu mbanduwa.” Karem or mbaha nor tle nahi, kavak nakwa ri. Karem ewesawenda jir. #Mt 15:14 17Jir misokome tumuhu ambarambasinda ma jirin, jir mbeek mbele las heyenda ambu jir. Mbele kas wasilakak naha maifundu? Tempelin mo golin? Tempelina. Tempel aka oso si sihi si ushiwak gol oso osmu jivik nanduwa. 18Uhu hovok karem ewesawenda jir, os ma lar alta mbele mbele ofan li ewe suwunda oson or ushaha nor mba, “Alta heyewak mashi kason omek amu mbanduwa.” Erem or mbaha os or mbanda oson or jintlewak ji mba, “Wa, am nawa sir, or mbeek kavak nakwa ambu ri,” karem ewesawenda jir. Hako os ofa ol alta orok ewenda ondok or usha nor mba, “Ofa os altak li ewenda oso heyewak mashi kason omek amu mbanduwa,” karem or mbaha nor tle nahi, kavak nakwa ri. Karem ewesawenda jir. 19Jir misokome tumunda jirin, jir mbeek mbele las heyenda ambu jir. Mbele kas wasilakak naha maifundu? Altan mo ofa ol alta orok li ewendan? Altana. Alta oso mu uwak ofa ol orok li ewenda jivik olmu nanduwa. 20Karem uwosik ma or altan or usha nor mba, “Alta heyewak mashi kason amu mbanduwa,” Karem mbawa ma oto alta nga mbele mbele ol alta orok ofak li ewenda nga ormu mbawa sira. 21Uhu ma or tempelin or ushaha nor mba, “Tempel heyewak omek amu mbanduwa.” Karem mbawa ma oto tempel aka nga Avui Wasilaka or orok linda nga ormu mbawa sira. 22Uhu ma or hevenin or usha nor mba, “Heven heyewak mashi kason omek amu mbanduwa.” Karem mbawa ma oto hi Avui Wasilakahi nga or linda mishi nga ormu mbawa sira. #Ais 66:1; Mt 5:34

23Jir mashi Moseshin sawenda ma nga Farisi nga ji auheyeka, kumak avak kavak nakwa jir. Jir lo awarikanda nom ji tiyaha mbeek lo wasilaka ondon tiyanda ambu jir. Jir men ishavaka mbele mbele ondon ji laha 10-pelak ji humasihi namtas Avui Wasilakan handa jir. Hako jir mbeek man nombo wornak kotim unda ambu jir, man armek unda ambu jir. Uhu Avui Wasilaka mbele mbele ol ji ukmbaha or mbahandan unda ambu jir, men mbele mbele lo awarikanda ondo nom tiyanda jir. Hako an mbeek lo awarikandan ji halaha wasilaka nom ji tiyakmbaha na mbawa ambu nir, wahau. Evrembam ji tiyaka. #Wkp 27:30; Mai 6:8 24Jir misokome tumunda ma jirin, jir mbeek man nombon mukundahik nanda ambu jir. Jir men mbele mbele awarikanda nom heilaha mbanda jir. Os ji unda oso karem nanda sir. Jir uksembe os ji awan armek ji heyehe owe kanda ol orok wawan laha ermbenda jir. Hako kamel wasilaka os orok wawan heyenda ambu jir, wahau. Oson arngunyanda jir.

25Jir mashi Moseshin sawenda ma nga Farisi nga ji auheyeka, kumak avak kavak nakwa jir. Jir men hambiya kumbiya hikri yejen armek li yokonda hom nanda jir. Hako sunguwavu yeje jihi osmu kavak nanduwa. Mbele mbele mahin ji laha hi jihin jihinjik hauowenda jir. #Mk 7:4 26Jir misokome tumunda ma jirin ji misi, maifuk akome yejen ji yokoshinak avak hikri yeje nga jivik si naka.

27Jir mashi Moseshin sawenda ma nga Farisi nga ji auheyeka, kumak avak kavak nakwa jir. Jir mawa os hikri yejen armek li semenim uhu kolta avishak li ermbeshiwak jip si heyenda hom nanda jir. Hako mawa akome oso ma havarava mbundi olmu orok hojehe wandu. #Ap 23:3 28Ma jirin li heyehe li mba, “Ma rondo jivi mende.” Hako wahau, sunguwavu yeje jihi nombo os haimba handambaha kavakavan unda osmu wavu jihi orok hojenduwa. #Lk 16:15

29Jir mashi Moseshin sawenda ma nga Farisi nga ji auheyeka, kumak avak kavak nakwa jir. Neloko jihi profet ondo nga ma worna mak nandari nga li mandingormeri lir. Hako jir mawa lihin armek ji lamunyaha 30ji mba, “Nir os oro wolok ni lirikop mbeek ma ondon ni mandingormeri ambu nir.” 31Jir jihinjik ji mba, “Ma ol profet ondon mandingormeri ma ondo neloko nihi lira.” Ome sira, neloko indinga jihi lira. Unda osik os jimu nombo lihin tiyanduwa. #Ap 7:52 32Hako erem ji uka. Lerawu kava os li laharaha halanda sumbuyambun ji laka. 33Jir ma kava, hovo hom nanda jirin, Avui Wasilaka kumak avak man or heyembakwa wolo oson ji tuluku, karem jimu hishindu? Wahau. Mende indingo, mbeek ji tulundahi ambu. #Mt 3:7; 12:34; Lk 3:7

34Ji misi, avak profet lal nga, hishiyarinda ma lal nga, tisa lal nga, a mbashinak jihi nindik ikwa lir. Unak lal ji mandingormehe lal miandok ji tirihi lal haus lotu jihik ji wormblashihi lal ji jihi ji laha lesuwunak tulukwa lir. 35Os lirin ji jinak li fi ngoro nahi, kumak avak Avui Wasilaka wasan or unak fi ngorokwa jir. Ol Avui Wasilakahi ma worna ma ondon li mandingormerik fi ngoronda wasa oso avak jihik nakwa sir. Abelik sishi raha Sekaraia jikisi Berekiahik nahandan. Orin tempel aka alta nindik li mandingormeri ri. #Stt 4:8; 2 Sto 24:20-21 36Omendingak jirin amu sawenduwa, mbele mbele kava os neloko jihi uhundari hom ter os jimu unduwa. Karem uwosik Avui Wasilaka fi lihi ngorori wasan avak or jinak fi ngorokwa jir.”

Jisas ma ol Jerusalemik fehenjik or holori

(Lk 13:34-35)

37Uhu Jisas ormu mbara, “Jir Jerusalemik fehe ma jirin, jir profet ondo nga ma ol Avui Wasilaka mbashirik tari ma ondo nga ji sunjakom loho mandingormenda jir. Jirin armek a ukmbaha na hishiwa nir, os aptok nijava jikisi sihin shervle sihik si arangonda hom. Hako jir mbeek anin ji halashiwak erem a unda ambu nir. 38Misi, yanga jihi avak kavak nakwa sir. #1 Kin 9:7-8; Jer 22:5 39Jirin amu sawenduwa, jir avak anin indik heyekwa ambu jir. Er ji lihi nikishifuhu ji mba, “Halanak Avui Wasilaka ma or hi orhik tawan armek or uka.” Karem ji mbana wolokop anin indik heyekwa jir.” #Sng 118:26

Currently Selected:

Matyu 23: sim

Highlight

Copy