Genesis 19

Id Sodoma

19:1-29

1Idi inmey san dowa ay anghel id Sodoma issan nasdem ay deey et itotokdon Lot isnan soban. Idi inilana daida danat omey sab-aten daida 2et kanana, “Gagayyem, pangaasiyo ta entako isnan baeymi ta siya nan omapaanyo ta mawakgat esakayopay itoloy ay omey is ayanyo.” Dadat kanan, “Adi. Olay maseyep kami isnan naay sag-en di soban.” 3Ngem inpapatina isonga nakkeyda ken siya danat pakanen daida ay gawis.

4Idi egay pay laeng naseyep san deeyda ay sangaili dat likoben nan iSodoma ay lalalaki nan baey da Lot. Owen, am-in ay bababallo ya aamam-a issan ili ay deey et wadada isdi 5ay mangibogbogaw ken Lot en, “Into san inmali isnan baeyyo ay omapa? Pabalaem daida isna!” Siya di nan kinwanida tay laydenda ay edamen daida ay kaneg nan ikkan nan bakla. 6Dat bomala si Lot et embana nan eneb 7danapay kanan ken daida, “Gagayyem, pangaasiyo ta adiyo ikkan nan ngawi ay nemnemnemenyo! 8Awni kayo pod. Wada pay nan doway an-akko ay babassang ay egay naed-edam. Daida laengen nan pabalaek ta ikkanyo nan laydenyo ay ikkan ken daida. Ngem pangaasiyo ta maid koma ik-ikkanyo isnan lalalaki tay sangailik daida et masapol ay bantayak daida.” 9Ngem kinwanida kayet, “Bay-am dakami. Inmalika ay aped nakiili ken dakami dat sik-a nan aped mangibagbaga is ikkanmi? Komaanka issa! No adi et am-amed nan ikkanmi ken sik-a no daida!” Dadat goyoden si Lot et engewenda koma nan eneb 10ngem dat goyoden san dowa ay lalalaki si Lot ay mangipasgep dadat idakig nan eneb 11dadat kollawen am-in san wada issan deya tasiyay adida makaila isnan segpan.

12Kinwanin san dowa ay lalalaki ken Lot, “No waday an-akmo, inapom ya ag-im is mentetee isnan ili ay naay dakat ayagan daida ta komaan kayo 13tay engewenmi nan ili ay naay tay dinngen nan apo nan ngawi ay ik-ikkan nan ipogaw isna isonga inbaana dakami ay mang-engew.” 14Isonga dat omey si Lot isnan lalalaki ay inapona et kanana, “Ikamoyo ay komaan isna tay engewen Apo Dios nan ili ay naay!” Ngem kananda en aped ang-angawen Lot daida isonga adyanda ay komaan.

15Idi mawakgat dat pakamkamowen san aanghel si Lot ay mangwani en, “Ikamom ta ayagam si asawam ya nan doway an-akmo ta komaan kayo isna tasiyay adi kayo matey.” 16Dapay mennenneney kayet si Lot ngem dat padangen san aanghel siya, si asawana ya san doway an-akna et ikaanda daida isdi tay sineg-angan nan apo daida. 17Dat kanan san anghel, “Ikamoyo ay lomayaw ta adi kayo katey! Ngem masapol ay adi kayo menligligos ay mang-ila isnan nagapowanyo ya adi kayo somalsaldeng engganay omdan kayo isnan bilbilig tasiyay adi kayo katey!” 18Ngem dat kanan Lot, “apo pangaasim 19ta adi masapol ay nan bilig nan omayanmi. Gawigawis nan inkanyo ken sak-en tay insalakanyo nan biyagko ngem addaaddawi nan bilbilig et waay adiyak omdan isdi dakpay matey. 20No ngay nan teeteen ay ili ay deey tay as-asag-en no nan bilbilig. Ipalobosmo ta isdi nan omayanmi ta adiyak katey.” 21Dat teben san anghel, “Ala, owen. Olay adiyak engewen nan teeteen ay ili ay deey. 22Ngem masapol ay ikamoyo tay adiyak makaikkan isnan ikkak engganay omdan kayo isdi!” (Gapo tay kinwanin Lot en teeteen isonga nangadnan san ili ay deey is Zoar tay siya di nan kananda isnan teeteen.)

23Bomalbala nan agew issan inomdanan da Lot id Zoar 24dat ipalayog Apo Dios nan menbidbidang ay asopli ay kaneg niket isnan ili ay Sodoma ya Gomorra 25et mapoowanda ya nan tap-in di il-ili ay naisasag-en isdi. Napoowan nan am-in ay wada isdi ay ipogaw, animalis ya am-in ay tomotobo isnan lota. 26Ngem san asawan Lot ay naod-odi et ninligos ay nang-ila isnan ilida ay mapop-oowan isonga dat menbalin is asin tay egayna tinongpal san inbagan san anghel.

27Kawakgatana pay dat masapasapa si Abraham ay omey issan nakikalkaliyana isnan apo. 28Inosdongana id Sodoma, id Gomorra ya nan il-ili ay sag-enda ngem asok et kedeng nan maiila. 29Ngem issan nang-engewan nan apo issan ili ay deeyda et ninenemnemna si Abraham isonga insalakana nan kaanakan Abraham ay si Lot.

Currently Selected:

Genesis 19: xnn

Highlight

Copy