ÉH POLÉNG 11

Tong duah kelunan Sohoo'

1 # Yeh. 40:3, Sak. 2:1-2 Boh iah mena' ngan ké' jah kayeu' éh palaa' ké' nguwa' Iah nyohoo' ku' tai nguwa' umaa' Allah ngan jalan réh motong kemenyan. Ngan purung kekat irah éh petipun seva' Allah lem umaa' Allah. 2#Luk. 21:2-4 Bang mai ke' nguwa' belasek éh saa' usit nah, uban kekat inah nena' néh ngan irah éh bé' ngelan. Adang irah lakau nejat leboo' ni'ai inah avéé' pat poloo' duah laséh kelebéé'. 3Akeu' juk nyohoo' duah kelunan sohoo' éh pakai roh talun, tai bara' tong kekat éh benara' Allah ngan roh dalem jah ibu duah ato nem poloo' dau inah da', ha' néh.

4 # Sak. 4:3,11-14 Rawah éh sohoo' ké' nah inah éh duah inan kayeu' situn ngan duah jalan tekedéng pelita' éh nekedéng tong jumen Tuhan éh pu'un tana' ngan langit. 5Hun séé'-séé' tupat peketa roh, pu'un luten musit jin ujun roh éh kebéé ayau roh, kenat péh séé'-séé' éh tupat peketa roh, usah irah tengéé' pu'un matai. 6#1 Raj. 17:1, Kel. 7:17-19, 1 Sam. 4:8 Rawah pu'un penyukat omok maneu' langit bé' pu'un taa' kelebéé' roh bara' ha' tebaraa' Allah. La'ah rawah pu'un penyukat tong siget usit baa' dokoo' néh paléu dahaa', rawah pu'un penyukat kepéh maneu' kuraa'-kuraa' arong penusah tong tana' ngan maneu' éh kuraa'-kuraa' koléé' kivu pengeloo' kenin roh.

7 # Dan. 7:7,21, Pol. 13:5-7, 17:8 Hun rawah lepah ma'o bara' tong kekat ha' tebaraa' éh juk benara' roh, boh ka'an jin luvang tana' éh dilem juk ngelawan roh. Pu'un éh nyopéé' roh ngan mematai roh, 8#Yes. 1:9-10 ngan patai roh pu'un éh tong jalan totoo' tong leboo' ja'au, éh jalan Tuhan éh Raja' roh pu'un penaku' réh tong kayeu' salib sahau rai. Tapan ngaran leboo' inah barei' leboo' Sodom ngan tana' Mesir. 9Kelunan jin kekat leboo' puku', arong ha' ngan bengesa' pu'un na'at patai roh teleu' dau memutui kelebéé', bé' réh buha' kelunan nanem patai roh. 10Kelunan tong tana' murung kenin réh uban rawah lepah matai. Pu'un réh maneu' ramai ngan mena' pengena' ngan siget usah réh, uban rawah nabi Tuhan inah rai pu'un roh petusah kenin réh bang hun iteu' rawah lepah matai. 11#Yeh. 37:10 La'o teleu' dau memutui jah dau kepéh nah, pu'un laset jin Allah éh omok purip, masek lem roh, boh rawah nekedéng kepéh. La'ah kekat kelunan éh na'at roh medai mu'un. 12#2 Raj. 2:11 Boh rawah menéng ha' ja'au jin seruga pané ngan roh, Tuai kebau keteu' koh! ha' néh. La'ah jin ta'an ayau roh na'at roh, rawah nabi inah petéé' lem avun tai seruga. 13#Pol. 6:12, 16:18 Tovoo' inah péh pu'un tegen tana' ja'au mu'un, jah tulat jin jah poloo' tulat leboo' inah pu'un tasa' ngan tujuu' ibu kekat kelunan matai neu' tegen tana' inah. Irah éh murip keto medai mu'un réh seruh tong penyukat Tuhan, pu'un réh ngerera' kenin réh ngan seva' Allah éh tong seruga.

14La'ah penusah éh keruwah nah lepah ma'o, bang na'at ke', penusah éh keteleu' nah juk avéé' kepéh.

Serupit éh Ketujuu'

15 # Kel. 15:18, Dan. 2:44, 7:14,27 Boh meliket éh ketujuu' nah nyelevuu serupit néh, pu'un kuraa'-kuraa' ha' ja'au tong seruga, éh bara' ka', Kekat penyukat pu'un éh ngan Allah Tuhan mé' ngan pu'un éh ngan Kristus éh kevéléé' Néh ke' Néh omok Raja', Iah omok Raja' pah tipo tana', pu'un éh Raja' ngan mihau réh pah avéé' pelinguh, ha' réh. 16Boh irah pengeja'au nah éh duah poloo' pat usah éh menyun tong jumen Allah, ngejekuu' lep ke' réh seva' Allah, 17Ka' ha' réh,

O Tuhan Allah éh pelapah ja'au penyukat jin ineu'-ineu' péh,

éh pu'un hun iteu' ngan éh pu'un tenéh.

Améé' bara' jian kenin ngan Ko' uban penyukat Ko' ja'au

ngan Ka'au' péh Raja'.

18 # Msm. 2:5, 110:5, 115:13 La'ah kekat pohoo' kelunan éh bé' ngelan tong Ka'au' merek mu'un réh,

bang kemerek Ko' lepah avéé' tenéh,

ngan sukup jaka' Ko' petuneng kelunan éh lepah matai,

ngan mena' oléé' ngan irah éh sohoo' Ko', inah éh ngan irah nabi Ko' sahau.

Ngan sukup jaka' Ko' mena' oléé' ngan kekat kelunan éh anah Ko', irah éh ja'au ngan irah éh si'ik péh,

inah éh ngan kekat irah éh seva' Ka'au', ngan éh leko maneu' sa'at.

Sukup jaka' Ko' kebéé irah éh pu'un kebéé tana', ha' réh.

19 # Pol. 8:5, 16:18, 21 Boh Umaa' Allah éh tong seruga pu'un pukap, ngan ta'an ké' lem Umaa' Allah nah pati' jalan surat éh bara' tong jalan jajii' Tuhan. La'ah pu'un kela'ap, ngan ha' ja'au, ngan ha' lengedo, ngan tegen tana' ngan taa' bateu'.

Currently Selected:

ÉH POLÉNG 11: PNT

Highlight

Copy