LUKAS 5

Bakéh Yésus éh bu'un-bu'un tenebai Néh

(Mat. 4:18-22, Mrk. 1:16-20)

1La'ah jah koléé' Yésus nekedéng tong dirin baa' Banget Genesaret, tuai kelunan pinaa' nyikeu' Éh ke' réh juk menéng ha' tebaraa' Allah éh benara' Néh. 2Tong dirin baa' inah pu'un duah alut. Kelunan jin alut inah lepah tai mohéé' jala'. 3Yésus taket lem alut Simon ngan iah nyohoo' Simon memesai tai juu' si'ik jin dirin baa'. Menyun Éh lem alut nah, ke' Néh nebaraa' kelunan pinaa' nah.

4La'o Néh nebaraa' réh boh Éh pané ngan Simon, ka' ha' Néh, Jian ke' memesai tai lepok baa', sinah ke' ngaléng jala' ko', boh ke' omok alaa' seluang pinaa', ha' Néh.

5Ha' Simon mipa éh, O Guru, putung merem améé' ngejala' avéé' mé' lekasan mu'un, bang jah usah péh seluang bé' éh pu'un nalaa' mé'. Na' péh kenat uban Ko' nyohoo' ku' tai kepéh, tai ke' ku' dat, ha' néh. 6Tai réh ngaléng jala' réh, pinaa' mu'un seluang lem jala' réh, avéé' jala' réh juk pejéé'. 7Pelapah irah ngawet bakéh réh éh lem jah alut nah, tebai réh tuai nya'ap réh. La'ah duah alut inah penoo' mu'un neu' seluang danii' éh juk kaham. 8Hun Simon Péterus na'at éh kenat, iah ngejekuu' lep néh tong jumen Yésus, ha' néh, O Tuhan, piso ke' jin akeu' uban akeu' kelunan penyala' awah, ha' néh.

9Iah pané kenat uban néh béé kenin na'at kekat seluang éh nalaa' réh iri', kenat péh kekat irah éh jah tong alut inah béé kenin réh. 10Kenat péh bakéh Simon nah, Yakub rawah Yohanes éh anak Sabedeus, rawah péh béé kenin. Ha' Yésus ngan Simon, Mai ke' medai, jin la'o iteu' Akeu' juk maneu' ka'au' jam pitah kelunan kepéh, ha' Néh.

11La'ah pu'un réh menat alut réh tong tapak tana', ngan modoo' kekat kereja' éh kemalai réh, ke' réh kivu Yésus.

Yésus peka'o kelunan kapéé'

(Mat. 8:1-4, Mrk. 1:40-45)

12Jah koléé' kepéh Yésus pu'un tong jah leboo'. Sinah éh temeu' ngan jah kelunan éh kapéé'. Hun néh na'at Yésus, tukep éh tong jumen Néh ke' néh menyat pika, ha' néh, O lakei' ja'au, hun Ko' keloo' adang Ko' omok peka'o ku', ha' néh.

13Pelapah Yésus mapai ojoo' Néh tong lakei' inah, ha' Néh, Keloo' Ku' ke' ma'o, jian ke' ma'o jin kesakit ko' inah, ha' Néh. Tioo pega' kesakit kapéé' nah. 14#Ima. 14:1-32 La'ah Yésus meta' éh, ka' ha' Néh, Mai ke' bara' tong Akeu' éh peka'o ke' nah ngan séé'-séé' péh, bang jian ke' pelapah tai tavin imam tong sebayang Yahudi ke' néh na'at usah ko' pu'un ma'o. La'o inah ko' mena' pengena' ko' ngan néh barei' sohoo' Tuhan ngan Musa tong kelunan éh barei' kesakit ko' nah, dokoo' kekat kelunan omok jam ka'au' pu'un ma'o jin kesakit ko' nah, ha' Yésus.

15Bang rengah tong Yésus peka'o éh nah avéé' tai juu' kepéh. La'ah pinaa' mu'un kelunan tuai menéng ha' tebaraa' Néh ngan ke' Néh omok peka'o réh jin kesakit réh. 16Bang Yésus tai mokoo' tong tana' linek ke' néh sebayang.

Yésus peka'o kelunan éh matai keluhat

(Mat. 9:1-8, Mrk. 2:1-12)

17Jah koléé' tovoo' Yésus nebaraa' kelunan, pu'un irah kelunan éh kivu adet Parisi ngan irah guru éh nebaraa' tong sohoo' lem Surat Musa, mokoo' ngan réh. Irah inah éh kivu adet Parisi ngan irah guru nah pu'un réh jin siget-siget leboo' tong tana' Galilia ngan Yudea, kenat péh jin leboo' Yérusalem. Penyukat Tuhan pu'un tong Yésus ke' néh omok peka'o kelunan sakit. 18Tuai kelunan mihin jah lakei' éh matai keluhat jalan bisan. Pu'un réh pitah jalan ke' réh mihin éh tai tong lamin inah dokoo' réh pei' éh tong jumen Yésus. 19Bang neu' kelunan pinaa' nah bé' réh omok mihin éh tai kenat. Boh réh mihin éh tai beluvung lamin ke' réh meka sapau ngan petuhun éh kera' belah kekat kelunan pinaa' nah tong jumen Yésus. 20Hun Yésus jam irah ngelan Iah omok peka'o kelunan inah, boh Éh pané ngan kelunan éh matai keluhat nah, ha' Néh, O padéé' penyala' ko' lepah pega', ha' Néh.

21Boh irah guru nah ngan kelunan Parisi ngedalem Éh. Kelem réh, séé' péh kelunan iteu' éh pané ka' pesalut Allah? Bé' pu'un kelunan tong tana' éh omok mega' penyala' kelunan, Allah awah éh omok maneu' kenat, kelem réh.

22Kejam Yésus tong kekat kenin réh kenat, inah Iah bara' ngan réh, ha' Néh, Uban ineu' keh seruh éh kenat? 23Kineu' éh seneruh keh? Tekep ku' bara', Penyala' ko' lepah pega', ha' nah? Kineu', ha' ké' éh bara', Betéé' ke' lakau, ha' nah? Éh mah éh lumang kunah ka'ah? 24Bang Akeu' juk pekelenaa' éh ngan ka'ah adang Anak Kelunan pu'un penyukat tong tana' omok mega' penyala' kelunan, ha' Néh. Boh Éh pané ngan kelunan éh matai keluhat nah, ka' ha' Néh, Akeu' nyohoo' ke', ko' melen mak ko' nah, moléé' ke', ha' Néh.

25Pelapah kelunan inah melen mak néh ke' néh moléé' ngan mejing Allah. 26Béé kenin kekat kelunan, medai réh, pu'un réh mejing Allah. Ha' réh, Éh ta'an lu' dau iteu' nah, pelapah jian mu'un éh, ha' réh.

Yésus tebai Lewi bakéh Néh kepéh

(Mat. 9:9-13, Mrk. 2:13-17)

27La'o inah Yésus lakau kepéh, Iah na'at jah kelunan éh alaa' sukai, ngaran néh Lewi, iah mokoo' tong lamin éh jalan réh mena' sukai. Ha' Yésus ngan néh, Jian ke' kivu Akeu', ha' Néh. 28La'ah Lewi modoo' kekat kereja' éh kemalai néh, ke' néh kivu Yésus.

29La'o inah Lewi maneu' ka'an ja'au ke' néh ngajung Yésus. Pinaa' kelunan tong lamin néh éh kereja' alaa' sukai, irah inah ngan kelunan éh jah kepéh menyun kuman ngan Yésus. 30#Luk. 15:1-2 Kelunan Parisi ngan irah guru éh nebaraa' tong Surat Musa, leko réh na'at éh kenat, boh réh pané ngan irah bakéh Yésus nah. Ha' réh, Uban ineu' ka'ah pelelong ngan kelunan éh alaa' sukai ngan kelunan penyala', ha' réh.

31Ha' Yésus mipa réh, Kelunan éh bé' sakit, bé' éh tai tavin kelunan éh nawan, bang kelunan éh sakit éh tai. 32Bé' Akeu' tuai tong tana' iteu' Ké' tebai kelunan éh seruh iah kelunan éh jian, bang Akeu' tuai ke' Ké' tebai kelunan penyala' dokoo' réh omok piso jin penyala' réh, ha' Néh.

Ha' tebaraa' tong kelaset

(Mat. 9:14-17, Mrk. 2:18-22)

33La'ah pu'un kelunan éh bara' ngan Yésus, ka' ha' réh, Irah éh kivu Yohanes Batis, pinaa' koléé' réh kelaset awah ngan sebayang, kenat péh irah éh kivu adet Parisi, bang irah bakéh Ko' bé' réh kelaset, ha' réh.

34La'ah ha' Yésus mipa réh, Hun pu'un lakei' éh juk kawin, kineu', omok keh nyohoo' bakéh néh kelaset awah hun lakei' inah to de' ke' ngan réh kei? Bé' réh keloo' kelaset awah. 35Bang pu'un dau temurei' kepéh hun kelunan alaa' lakei' inah jin belah réh, boh réh pu'un kelaset, ha' Néh.

36La'ah Yésus bara' jah ha' tapan ngan réh. Ka' ha' Néh, Bé' pu'un kelunan éh mejéé' kerayung éh maréng ke' néh pék éh tong kerayung éh mupuk. Hun néh maneu' éh kenat adang kerayung éh maréng inah pisei kepéh, ngan jéé' kerayung éh maréng inah, bé' éh pekua' layan kerayung éh mupuk nah, ha' Néh. 37Jah ha' tapan Yésus kepéh, ka' ha' Néh, Bé' pu'un kelunan éh modoo' baa' agun éh maréng lem telokoo' kulit ka'an éh lepah lebéé'. Hun néh maneu' éh kenat baa' agun éh maréng inah ngeletaa' kulit ka'an éh lepah lebéé' nah, pelapah baa' agun nah pega' ngan telokoo' kulit ka'an inah tasa'. 38Baa' agun éh maréng adang tekep modoo' éh lem telokoo' kulit ka'an éh maréng. 39La'ah kelunan éh malai kon baa' agun éh lebéé', bé' éh magat juk kon baa' agun éh maréng, uban néh bara' éh lebéé' nah éh méé mu'un, ha' Néh.

Currently Selected:

LUKAS 5: PNT

Highlight

Copy