LUKAS 22

Kelunan ja'au pitah jalan ke' réh omok mematai Tuhan Yésus

(Mat. 26:1-5, Mrk. 14:1-2, Yoh. 11:45-53)

1 # Kel. 12:1-27 La'ah lepah danii' tong Dau Ja'au Roti éh bé' pu'un tawan pekevat, éh nateng Paska. 2Tovoo' inah irah pengeja'au imam ngan irah guru éh nebaraa' tong Surat Musa, pitah jalan juk mematai Yésus, kelebéé' kelunan pinaa' nah bé' jam éh jak uban medai réh tong kelunan pinaa' nah.

Yudas pitah jalan ke' néh omok memalo Yésus

(Mat. 26:14-16, Mrk. 14:10-11)

3Boh Sitan tai masek lem kenin Yudas Iskariot. Yudas nah jah usah jin bakéh Yésus éh jah poloo' duah usah nah. 4Tai Yudas tavin irah pengeja'au imam ngan pengeja'au irah seradu éh mavaa' Umaa' Allah, ke' néh pakat ngan réh tong jalan néh omok mena' Yésus ngan réh. 5Jian kenin réh menéng ha' néh kenat, ngan irah jajii' hun Yudas mena' Yésus ngan réh kenat, omok réh mena' rigit ngan néh. 6Yudas péh pu'un pekua' kenin néh ngan réh, iah pitah jalan hun mah-mah péh éh omok mena' Yésus ngan réh, kelebéé' kelunan pinaa' nah bé' jam éh.

Yésus nyohoo' bakéh Néh petenup ka'an kinan réh tong Dau Ja'au

(Mat. 26:17-25, Mrk. 14:12-21, Yoh. 13:21-30)

7Avéé' tong Dau Ja'au Roti éh bé' pu'un tawan pekevat, inah éh tong dau réh mematai domba, ka'an éh kinan réh tovoo' réh maneu' Dau Ja'au Paska. 8La'ah ka' ha' Yésus ngan Péterus rawah Yohanes, Jian kawah tai petenup ka'an kinan tam tong Dau Ja'au Paska, ha' Néh.

9Ka' ha' rawah ngan Néh, Semah mo petenup éh da', ha' roh.

10Ha' Néh ngan roh kepéh, Menéng koh, hun koh tai tong leboo' pu'un jah lakei' sinah nyelalang koh, lakei' inah da' pu'un éh nyu'un jah tajau jalan baa'. Jian koh kivu éh taket tong lamin 11ngan bara' ngan kelunan éh pu'un lamin inah, Ha' Guru neteng, Semah lamin éh jalan ké' omok kuman ka'an éh penatai tam sioo' tam maneu' Dau Ja'au Paska, éh dokoo' Ké' omok pemung kuman éh ngan irah bakéh Ké', kenat ha' keh ngan néh. 12Boh lakei' ja'au inah bara' jah lamin ngan koh, lamin inah lamin ja'au ngan petevan, ngan kekat éh juk penakai koh petenup Dau Ja'au inah, pu'un éh tong lamin inah. Sinah koh tai petenup éh, ha' Yésus ngan roh.

13Boh roh tai, pu'un rawah na'at pekua' mu'un barei' éh benara' Yésus ngan roh ri', boh roh petenup Dau Ja'au inah sinah.

Tong penguman sohoo' Tuhan

(Mat. 26:26-30, Mrk. 14:22-26, 1 Kor. 11:23-25)

14Tovoo' réh juk kuman tong Dau Ja'au Paska, Yésus menyun pemung ngan irah lawah Néh. 15Ka' ha' Néh ngan réh, Jin sahau rai Akeu' gahang kenin juk na'at dau iteu' pu'un, jalan Ké' omok kuman penguman paska iteu' ngan keteleu' teka Ké' keta ngan matai. 16Uban Akeu' bara' ngan keh, bé' Akeu' kuman penguman paska iteu' la'o iteu' kepéh, pah avéé' réh jam sin néh mu'un hun Allah pu'un pengeja'au.

17La'o inah boh Yésus alaa' sawan baa' ngan bara' jian kenin ngan Allah. Ka' ha' Néh ngan réh, Jian keteleu' alaa' baa' iteu' ngan petulat éh belah ka'ah ke', 18uban Akeu' bara' ngan keh, jian la'o iteu' bé' Akeu' mesep baa' agun kepéh pah savéé' jaka' Allah Pengeja'au, ha' Néh.

19La'o inah Iah alaa' roti ngan bara' jian kenin ngan Allah ngan Iah memutui éh ke' Néh mena' éh ngan réh, ka' ha' Néh, Iteu' néh seleket usah Ké' éh nena' Ké' ngeliwah ka'ah, jian keh kuman éh jalan keh petesen kenin keh tong Akeu', ha' Néh. 20#Yer. 31:31-34 Kenat péh la'o réh kuman, inah Iah mena' baa' ngan réh, Ka' ha' néh ngan réh, Baa' iteu', inah éh seleket dahaa' Ké' éh juk nena' Ké' ngeliwah ka'ah, éh dahaa' Ké' éh maneu' jajii' maréng neu' Tuhan ngan kekat kelunan.

21 # Msm. 41:10 Jian keh menéng ha' Ké', kelunan éh juk memalo Akeu' pu'un éh mokoo' ngan Ké' siteu'. 22Adang Anak Kelunan matai pekua' barei' pengeloo' Tuhan, bang tusah mu'un-mu'un ngan kelunan éh memalo Ku' nah, ha' Néh ngan réh.

23Boh irah pané belah irah ke' seruh, séé' éh juk memalo éh kenat.

Irah bakéh Yésus paneu' tong séé' éh ja'au ngaran belah réh

24 # Mat. 18:1, Mrk. 9:34, Luk. 9:46 La'ah irah bakéh Yésus paneu' seruh séé' éh omok ja'au ngaran jin belah réh. 25Ka' ha' Yésus ngan réh, Kekat raja' tong tana' pu'un penyukat néh bau kelunan éh lem nihau néh, ngan kekat pengeja'au peritah pu'un pesebila ngan kelunan pinaa' ngan balang lem kenin réh. 26#Mat. 10:42, 20:25-27 #Mat. 23:11, Mrk. 9:35 Bang bé' éh kenat tong ka'ah iteu'. Bang kelunan éh ja'au urip jin belah ka'ah, jian éh seruh usah néh barei'-okoo' éh si'ik, ngan iah éh pengeja'au keh, jian éh pekua' barei' kelunan sohoo' awah. 27Séé' éh kelunan ja'au, kineu', iah éh menyun kuman. Kineu', kelunan sohoo' éh petubo éh. Kelunan éh menyun kuman nah, adang iah éh ja'au. Bang Akeu' iteu' pu'un Ku' belah ka'ah pekua' barei' kelunan sohoo' awah.

28Pu'un ka'ah pemung ngan Ké' dalem kekat penusah Ké' rai, bé' keh bet Akeu', 29ngan hun iteu' barei' Tamen ké' mena' penyukat ngan Ké' jalan Ké' omok pengeja'au kekat kelunan, kenat péh Akeu' mena' penyukat Ké' ngan keh kepéh. 30#Mat. 19:28 Adang ka'ah pu'un kuman pemung ngan Ké' tovoo' Ké' tuai Pengeja'au ngan mihau kekat kelunan béé, inah kepéh ka'ah omok alaa' penyukat dokoo' keh omok petuneng jah poloo' duah betah pohoo' Israel, ha' Néh.

Yésus bara' Péterus juk ngaken bara' bé' iah jam Yésus

(Mat. 26:31,35, Mrk. 14:27-31, Yoh. 13:36-38)

31Ka' ha' Yésus kepéh, O Simon, menéng ke' jian-jian, Sitan juk tupat kenin keteleu' béé ke' néh juk mega' keh jin pengelan keh, kua' barei' ipaa' ngan upih parai éh palit hun réh napan éh. Kenat péh Sitan juk mega' pengelan keh. 32Na' péh éh tupat keteleu' kenat, Akeu' pu'un bara' keh lem sebayang Ké' Simon, jalan pengelan ko' pu'un reken, ha' Néh. Tovoo' ko' pekoléé' kenin, tekep ke' ngereken irah padéé' ko'.

33Ka' ha' Péterus kepéh, O Tuhan, hun ké' pemung ngan Ko' Tuhan, na' péh réh na' ku' lem lamin tutup, ngan na' péh réh mematai ku' mu'un, keloo' akeu' kenat hun néh ketem ka'au', ha' néh.

34Ka' ha' Yésus kepéh, O Péterus, bé' éh kenat, lem dau iteu' bé' jak iap sakui ngelangéé', neu' kenin ko' medai, pu'un ke' ngaken teleu' koléé' bara', Bé' akeu' jam Iah, ha' Yésus ngan néh.

Tong tebaraa' Yésus tong gaweng ngan po'é

35 # Mat. 10:9-10, Mrk. 6:8-9, Luk. 9:3, 10:4 La'ah Yésus neteng irah éh bakéh Néh, ha' Néh, Kineu' keteleu', hun Ké' nyohoo' keh lakau sahau rai hun Ké' meta' keh mihin gaweng ngan rigit ngan kasut ngan bék keh rai kineu', pu'un ineu'-ineu' éh bé' sukup ngan keh, ha' Néh. Ha' irah bakéh Néh,

Bé', hun irai kekat néh béé pu'un éh sukup, ha' réh.

36Ka' ha' Néh kepéh, Bang hun iteu' tengéé' mu'un éh jin sahau rai, séé'-séé' éh pu'un rigit ngan pu'un gaweng, jian éh mihin éh. Hun kerayung néh pu'un, jian éh melih éh dokoo' néh omok melih po'é palaa' rigit tong kerayung inah. 37#Yes. 53:12 Hun iteu' Akeu' bara' kenat ngan ka'ah uban kekat ha' lem surat Allah éh bara', Pu'un irah maneu' éh pekua' irah éh pu'un penyala' mu'un, kekat ha' inah pu'un éh teneng tong Akeu' mu'un. Uban kekat éh lepah senurat réh tong Akeu', adang néh pu'un avéé' tong Akeu' pekua' éh senurat réh kenat, ha' Yésus ngan réh.

38Ha' irah bakéh Néh kepéh, O Tuhan, pu'un po'é duah siteu' ne', ha' réh. Ha' Yésus kepéh, Ma'o lah, ha' Néh.

Tuhan Yésus sebayang

(Mat. 26:36-46, Mrk. 14:32-42)

39La'o inah Yésus musit jin lamin éh jalan Néh kuman Dau Ja'au nah, ke' Néh tai tokong Saitun barei' kemalai Néh, ngan irah bakéh Néh pu'un kivu Éh. 40Hun réh avéé' sitai Iah bara' ka' ngan réh, Jian keh mekat sebayang dai keh teneng tong tenupat Sitan, ha' Néh ngan réh.

41Boh éh piso jin irah kejuu' jah neput nah kejuu', boh éh ngejekuu' lep Néh ngan sebayang. 42Ka' ha' sebayang Néh, O Tamen, hun néh lem pengeloo' Ko' mai ke' buhaa' pengeketa iteu' teneng tong Akeu' bang jian éh kivu pengeloo' Ko' awah, ha' sebayang Néh.

43Boh jah meliket tuai jin seruga ke' néh ngegahang usah Yésus. 44Jaa'-jaa' néh Yésus sebayang dalem kebesau Néh éh ja'au mu'un, pah avéé' usah Néh ripoo' neu' sana Néh ngan sana Néh tétéé' tong tana' barei' tétéé' dahaa' rai.

45La'o Néh sebayang kenat, Iah moléé' tai irah bakéh Néh kepéh. Iah na'at irah pegen awah uban réh mutau. 46Boh Éh pané ngan réh, ka' ha' Néh, Kineu' keh pegen kenat. To'ot keh ngan sebayang dai keh teneng tong tenupat Sitan, ha' Néh.

Tong réh ngamit Yésus

(Mat. 26:47-56, Mrk. 14:43-50, Yoh. 18:3-11)

47Lem Yésus to pané ngan irah éh bakéh Néh, inah savéé' kekat kelunan pinaa' éh juk ngamit Éh. La'ah Yudas, éh jah usah jin belah irah bakéh Néh éh jah poloo' duah usah nah, iah éh mihin kelunan pinaa' nah tavin Yésus. Tuai éh juk marek Yésus. 48Boh Yésus pané ngan Néh, ka' ha' Néh, O Yudas, ka'au' juk marek Anak Kelunan kenat, seleket ko' bara', padéé', éh mu'un néh dokoo' ko' memalo Akeu' awah, ha' Néh.

49Hun irah bakéh Yésus na'at kelunan pinaa' nah juk ngamit Iah, boh réh pané, ka' ha' réh, Tuhan kejeraa' mé' meta réh palaa' po'é mé' teu', ha' réh. 50Pu'un jah usah ngan Yésus sinah, éh tioo menat po'é néh ke' néh mesap kelingen saa' na'au' jah kelunan éh ripen Imam éh pengeja'au kekat imam.

51Boh Yésus bara' ka' ngan Néh, Mai ke' maneu' kenat, ha' Néh. Boh Yésus ngamit suhat kelingen lakei' inah ke' Néh peka'o éh.

52Boh Yésus pané ngan irah pengeja'au imam, ngan irah seradu éh mavaa' Umaa' Allah, ngan irah pengeja'au kelunan Yahudi éh pu'un tai sinah ke' réh ngamit Yésus nah. Ka' ha' néh ngan réh, Kineu' ka'ah tuai siteu' ketem po'é ngan pipok barei' juk ngamit jah kelunan éh pu'un maneu' sa'at mu'un. 53Siget dau pu'un Akeu' ngan keh tong Umaa' Allah, bang bé' keh tuai sinah ngamit Akeu'. Bang hun iteu' Allah kejeraa' keh maneu' Akeu', uban sioo' kesa'at jin merem, pu'un penyukat.

Péterus ngaken bara' bé' iah jam Yésus

(Mat. 26:57-58,69-75, Mrk. 14:53-54,66-72, Yoh. 18:12-18,25-27)

54La'ah irah ngamit Yésus ngan mihin Éh tai lamin Imam éh pengeja'au kekat imam. Pu'un Péterus kivu Éh bang bé' éh makang tai tepih tong Yésus. 55Pu'un jah luten éh kenahang réh tong lamin, sinah Péterus tai mokoo' ngan irah éh ngereu' sinah. 56Pu'un jah redo lemanai, redo inah kelunan sohoo', iah na'at Péterus menyun déhéé' luten, inah iah kepuh Péterus, boh éh bara' ka', Iteu' jah kelunan éh pu'un ngan lakei' inah rai de', ha' néh.

57Boh Péterus ngaken, ka' ha' néh, bé' akeu' jam iah, ha' néh.

58Bé' makat lebéé' la'o inah, boh jah lakei' kepéh na'at éh. Ha' lakei' inah ngan néh, ka'au' iteu' néh jah jin irah inah rai de', ha' néh.

Boh Péterus mipa éh, ka' ha' néh, bé' éh akeu' dat, ha' néh.

59La'o inah kepéh, tipet mesak jah na'o kelebéé', pu'un jah lakei' éh jah kepéh bara' tong Péterus. Ha' lakei' inah, Adang lakei' inah pebakéh mu'un ngan kelunan inah rai de', uban iah péh kelunan jin Galilia, ha' néh.

60Ha' Péterus, Bé' akeu' jam éh kunah ko' inah, bé' mu'un akeu' jam kelunan inah, ha' néh.

Tovoo' Péterus pané kenat pu'un iap ngelangéé'. 61Boh Tuhan pupah kepuh Péterus, tioo tesen Péterus tong ha' Tuhan hun Néh bara' ka' ngan néh ri', Bé' jak iap sakui ngelangéé' adang pu'un ka'au' ngaken akeu' teleu' koléé', ha' ri'. 62Boh Péterus musit ngan mangaa' mu'un-mu'un besau kenin.

Tong réh peja' Yésus ngan mipok Éh

(Mat. 26:67-68, Mrk. 14:65)

63Kekat kelunan éh ngamit Yésus nah pu'un réh peja' Éh, ban ngan mipok Éh ngan maneu' Éh mu'un-mu'un. 64Boh irah ngejeret maten Néh, ngan mala' maneu' Éh. Ka' ha' réh neteng Éh, séé' éh mipok ke' ri, ko' bara' ngaran néh, ha' réh. 65Ngan pinaa' arong ha' réh maneu' Éh ngan pekenyaa' Éh.

Yésus saa' jumen Komiti sebayang Yahudi

(Mat. 26:59-66, Mrk. 14:55-64, Yoh. 18:19-24)

66Hun dau rema kekat irah pengeja'au kelunan Yahudi ngan irah pengeja'au imam, ngan irah guru éh nebaraa' tong Surat Musa, pu'un réh petipun. Boh réh mihin Yésus tong jumen Komiti sebayang Yahudi. 67Ka' ha' réh ngan Néh, Jian ke' bara' ngan améé', kineu' ke', ka'au' Kristus éh pejajii' Allah, ha' réh.

Ka' ha' Yésus mipa réh, Na' péh Akeu' bara' ngan keh, bé' keh ngelan ha' ké'. 68Na' péh Ku' neteng keh tong ineu'-ineu' péh, bé' keh keloo' mipa ha' ké'. 69Jin la'o iteu' Anak Kelunan pu'un mokoo' saa' na'au' Allah éh matek bau, ha' Néh.

70Ka' ha' réh ngan Néh kepéh, Hun néh kenat kineu' ke', ka'au' éh Anak Tuhan Allah? Ha' réh.

Ha' Yésus ngan réh, Kenat éh ha' ka'ah bara' Akeu', ha' Néh.

71Boh réh bara' ka' kepéh, Hun iteu' bé' makat uleu' juk pitah kelunan éh jah éh omok bara' tong Iah, uban uleu' tengéé' lepah menéng atek ha' usah néh mu'un bara' iah Anak Allah, ha' réh.

Currently Selected:

LUKAS 22: PNT

Highlight

Copy