LUKAS 13

Tebaraa' tong pekoléé' kenin

1Sioo' inah pu'un kelunan bara' ngan Yésus tong Pilatus mematai kelunan jin Galilia tovoo' réh mena' ka'an éh penatai réh ngan Allah. 2Ka' ha' Yésus mipa réh, Kineu' éh seneruh keh tong kelunan éh penatai réh nah. Pu'un keh seruh kelunan éh matai nah sa'at jin kekat kelunan tong tana' Galilia kei. 3Bé' éh kenat. Bang Akeu' bara' ngan keh, hun keh bé' piso jin penyala' keh, ka'ah péh matai béé pekua' irah inah ri'. 4Kineu' kenin keh seruh tong irah éh jah poloo' ayah usah éh matai teda lamin éh bau tong baa' Silo'am tong Yérusalem rai. Kineu' éh kunah ka'ah, uban irah inah pelapah sa'at jin irah éh jah éh mokoo' tong Yérusalem nah éh ke' réh matai teda lamin kenat. 5Bé' éh kenat. Bang Akeu' bara' ngan keh kepéh, hun keh bé' piso jin penyala' keh, adang ka'ah péh matai béé pekua' irah inah ri', ha' néh.

Ha' tapan tong kayeu' ara éh bé' pu'un buaa'

6La'ah Yésus bara' jah ha' tapan ngan réh, ka' ha' néh, Pu'un jah kelunan éh mulah kayeu' ara tong pulah agun néh. Jah koléé' inah éh tai juk alaa' buaa' ara nah, bang bé' pu'un buaa' néh. 7Boh éh bara' ngan kelunan éh kereja' tong pulah inah ka', Teleu' ta'un tenéh kelebéé' ara iteu' murip siteu', iteu' néh ku' tuai juk alaa' buaa' néh, bang bé' éh pu'un. Ko' tebeng éh, bé' pu'un gunah néh murip siteu', ha' néh. 8Bang ka' ha' lakei' éh kereja' tong pulah néh inah mipa éh, O lakei' ja'au, mai ke' tebeng éh jak, turut ke' éh murip tong jah ta'un iteu', avéé' ké' pu'un nyakun tana' tutuh néh ngan mena' baja' tong néh. 9Avéé' tong ta'un buaa' kepéh hun néh ngebuaa' da', jian éh, hun néh bé' ngebuaa' da', boh ke' tebeng éh lah, ha' néh ngan lakei' ja'au nah, ha'néh.

Yésus mega' balei' jin jah redo tong Dau Posot

10La'ah tong jah Dau Posot Yésus pu'un nebaraa' réh tong lamin sebayang Yahudi. 11Tong lamin sebayang inah pu'un jah redo éh nasek balei', naneu' balei' inah pu'un éh sakit jah poloo' ayah ta'un kelebéé' néh tenéh, nerekung sohot néh, bé' éh omok nekedéng pejek. 12Hun Yésus na'at éh boh éh bara' ka' ngan néh, O redo, ma'o ke' jin kekat kesakit ko' inah, ha' Néh. 13Boh Yésus mapai ojoo' Néh tong redo inah, boh redo inah omok tioo nekedéng pejek ngan pu'un éh mejing Allah.

14 # Kel. 20:9-10, Ula. 5:13-14 La'ah pengeja'au tong lamin sebayang Yahudi nah merek ngan Yésus uban néh peka'o redo inah tong dau Posot nah. Boh lakei' ja'au nah pané ngan kelunan pinaa' nah, ka' ha' néh, Nem dau awah éh tekep lu' kereja', dalem kekat dau inah omok keh tuai dokoo' keh pitah jalan keh ma'o jin kesakit keh, bang mai keh tuai tong Dau Posot nah, ha' néh ngan réh.

15Ka' ha' Yésus mipa éh, O ka'ah éh ngelayoo' awah maneu' jian, tong dau Posot péh adang ka'ah pu'un ngelepu sapé' ngan keledai keh jin pagin néh dokoo' keh mihin éh tai baa'. 16Bang redo inah éh pohoo' Abraham mu'un, pu'un éh lem kejeret Sitan jah poloo' ayah ta'un kelebéé' néh tenéh. Kineu', bé' tekep ku' ngelepu éh sioo' dau Posot nah kei, ha' Yésus ngan réh. 17Neu' ha' Yésus pané kenat, menyaa' kekat irah éh juk maneu' Yésus nah, bang irah pinaa' murung kenin na'at kekat penganeu' Yésus éh jian mu'un-mu'un.

Ha' tapan tong tulin sesawi

(Mat. 13:31-32, Mrk. 4:30-32)

18La'ah ka' ha' Yésus, Ineu' Ké' bara' tong Allah éh Pengeja'au dokoo' keh omok nesen éh. 19Barei' ineu' éh, ineu' Ké' tapan tong néh da'? Ka' éh, barei' tulin buaa' kayeu' sesawi, tulin buaa' inah si'ik mu'un éh. Pu'un jah kelunan alaa' tulin buaa' inah ke' néh mulah éh tong térék néh, bé' lebéé' nyekaa' tulin inah ngan nginan, pinaa' juhit maneu' sala néh tong paka' néh, ha' Néh.

Ha' tapan tong tawan-pekevat

(Mat. 13:33)

20Ka' ha' Yésus kepéh, Ineu' Ké' tapan kepéh tong Allah éh Pengeja'au, dokoo' keh omok nesen éh. 21Ka' éh, Barei' tawan pekevat éh nalaa' jah redo ke' néh pekulup éh ngan jah gateng tepong, tawan inah maneu' tepong inah tai vat ngan ja'au, ha' Néh.

Tong usit tapé éh si'ik

(Mat. 7:13-14,21-23)

22Hun Yésus lakau tai leboo' Yérusalem, Iah nebaraa' kelunan tong siget lamin ngan siget leboo' éh kelapah Néh belah sinah. 23La'ah pu'un kelunan neteng éh ka', O Tuhan, Kineu', kerat awah kelunan éh omok alaa' urip maréng, ha' néh.

Ha' Yésus mipa éh, 24#Mat. 7:13-14 Jian keh mekat pitah jalan masek jin usit tapé éh si'ik, uban Akeu' bara' mu'un ngan keh, pinaa' kelunan juk pitah jalan ke' réh masek, bang bé' réh omok. 25Pu'un pengeja'au lamin betéé' mitep usit tapé, hun keh pu'un nekedéng sinah nyohoo' éh mukap boh éh mipa ha' keh ka', Bé' akeu' jam jin semah ka'ah inah, ha' néh. 26Boh keh juk bara' ngan néh kepéh ka', Améé' néh éh kuman pemung ngan ko' rai ne', pu'un ke' lepah nebaraa' mé' tong leboo' mé' rai, ha' keh. 27#Msm. 6:8 Boh éh bara' ka' ngan keh kepéh, Bé' akeu' jam ka'ah, kelap keh jin akeu', ka'ah kelunan éh sa'at awah, ha' néh. 28#Mat. 22:13, 25:30 Tovoo' keh na'at Abraham ngan Ishak ngan Yakub ngan kekat irah éh nabi Tuhan tong retek Allah pu'un Pengeja'au, adang keh pu'un mangaa' mu'un ngan segitep ja'an besau uban keh bé' omok masek pemung ngan réh. 29#Mat. 8:11-12 La'ah pu'un kelunan tuai jin tana' saa' usit maten dau, kenat péh jin tana' saa' oléé' maten dau ngan kenat péh jin tana' saa' kabéng ngan jin tana' saa' na'au' usit maten dau kepéh, pu'un réh tuai ke' réh tai pemung kuman ngan Allah tong retek Néh pu'un Pengeja'au. 30#Mat. 19:30, 20:16, Mrk. 10:31 Kelunan éh jin murin hun iteu', tovoo' inah iah tai saa' tenah, ngan kelunan éh saa' tenah hun iteu', tovoo' inah tai saa' murin kepéh, ha' néh.

Yésus pika irah tong Yérusalem

(Mat. 23:37-39)

31Tovoo' inah tuai kelunan Parisi ke' néh nyohoo' Yésus piso jin sinah, ka' ha' réh, Kelap Ke' jin siteu', uban Herodis pitah jalan ke' néh juk mematai Ke', ha' réh.

32La'ah ka' ha' Yésus ngan réh, Kelunan inah barei' bekuleu' awah, jian keh bara' kekat ha' Ké' iteu' ngan néh, Tong dau iteu' Akeu' mega' balei' ngan peka'o kelunan sakit, kenat péh sagam, ngan tong keteleu' dau ma'o lah Ku', ha' Ké' keh bara' ngan néh, ha' néh. 33Ha' néh kepéh, Tekep Akeu' lakau dau iteu' ngan dau sagam pah avéé' dau rema inah, uban bé' tekep réh mematai nabi Tuhan tong leboo' éh tengéé' jin Yérusalem, ha' Néh.

34La'ah ha' Yésus, Aroi Yérusalem, aroi Yérusalem, pu'un keh mematai irah nabi, kenat péh pu'un keh memateu' irah lawah Tuhan rai, kuraa' koléé' Ku' juk alaa' ka'ah barei' iap alaa' anak néh ra' pawit néh, bang bé' ka'ah keloo' laa' ké'. 35#Msm. 118:26 Uban keh bé' keloo' laa' Ké' kenat, hun iteu' nebet Ké' Umaa' Allah iteu'. Akeu' bara' ngan ka'ah, bé' ka'ah omok na'at Akeu' kepéh la', pah avéé' dau Ké' tuai kepéh hun keh pu'un bara' ka', Mejing ngaran Tuhan, jian mu'un iah éh tuai dalem ngaran Tuhan, kenat ha' keh da', ha' Yésus ngan réh.

Currently Selected:

LUKAS 13: PNT

Highlight

Copy