LUKAS 1

Nebu'un ha'

1O Tiopilus, barei' éh kejam ko' pu'un kelunan nyurat tong kekat éh pu'un belah lu' rai. 2Uban jin bu'un inah pu'un kelunan éh na'at Éh palaa' maten néh mu'un, ngan pu'un réh bara' éh ngan lu' kepéh. 3Tong éh ta'an réh inah, inah éh senurat réh nah. Akeu' seruh kepéh jian usah ké' nyurat kekat rengah inah ngan ko' kepéh, pekua' barei' éh pu'un nah, uban akeu' lepah pekalai ngan mekat seruh tong néh jin irah éh jam éh mu'un bu'un tenéh. 4Pu'un ku' nyurat kekat inah dokoo' ko' omok jam tong kekat éh benara' réh ngan ko' pu'un éh kenat mu'un.

Meliket bara' tong lohoo' Yohanes Batis

5 # 1 Taw. 24:10 Ka' éh rai, Sioo' Herodis raja' tong tana' Yudea, pu'un jah imam éh kereja' tong Umaa' Allah, ngaran néh Zakharia. Iah inah lua' imam Abia, redo néh lua' Harun, duah betah kelunan inah, inah awah éh omok kereja' tong Umaa' Allah, ngaran redo inah Elisabet. 6Jian barék roh tong ta'an Allah, pu'un roh kivu kekat sohoo' ngan pengeloo' kenin Tuhan. 7Rawah bé' pu'un anak uban Elisabet nyalun ngan rawah péh lepah mukun mu'un.

8Jah dau tovoo' irah éh pemung tulat ngan Zakharia kereja' tong Umaa' Allah, Sakaria pu'un maneu' kereja' néh tong Umaa' Allah. 9La'ah barei' jalan éh kemalai irah Yahudi éh kereja' tong Umaa' Allah, iah éh teneng kevéléé' réh ke' néh tai tong Umaa' Allah motong kemenyan tong uban réh motong kemenyan ngan Allah. Kenat péh éh tai tong Umaa' Allah. 10Kelebéé' néh motong kemenyan nah, kelunan pinaa' nekedéng tong usit Umaa' Allah ngan sebayang. 11Inah jah meliket Tuhan poléng tong néh, meliket inah nekedéng saa' na'au' retek néh motong kemenyan nah. 12Hun Zakharia na'at éh kenat, besau kenin néh, medai mu'un éh. 13Bang ha' meliket nah ngan néh, Mai ke' medai Zakharia, pu'un Allah menéng kekat ha' sebayang ko', ngan do ko' Elisabet juk nganak jah anak lakei'. Hun anak inah pu'un, jian ke' maneu' ngaran néh Yohanes. 14Hun iah pu'un adang ko' murung mu'un, kenat péh kelunan pinaa' kepéh. 15#Bil. 6:3 Inah kepéh anak inah iah éh ja'au ngaran tong ta'an Tuhan. La'ah mai éh mesep baa' agun ngan ineu' ineu' éh maneu' kelunan mavuk. Jin lohoo' néh Iah pu'un penoo' neu' Sahéé' Ni'ai. 16Iah juk mihin kelunan Yahudi moléé' tavin Tuhan Allah kepéh, ke' réh ngelan tong Iah awah. 17#Mal. 4:5-6 Iah juk lawah Tuhan, gahang éh neu' penyukat Sahéé' Ni'ai barei' Elia éh nabi Tuhan sahau. Iah juk pepemung irah tamen ngan anak réh. Ngan kelunan éh bé' kivu sohoo' Tuhan, iah juk mihin réh seruh kepéh tong kekat éh teneng. Neu' kereja' néh kenat, inah éh maneu' kenin kelunan éh kevéléé' Tuhan omok petenup kenin ngan Tuhan, ha' meliket inah ngan Zakharia.

18Ha' Zakharia ngan meliket inah, Kineu' jalan ké' omok jam éh kenat da'? Uban amo iteu' lepah mukun tenéh, ha' néh ngan meliket.

19 # Dan. 8:16, 9:21 Ha' meliket nah kepéh, Akeu' iteu' Gabriel, akeu' pu'un nekedéng tong jumen Allah, Iah nyohoo' ku' tuai bara' rengah jian iteu' ngan ko'. 20Bé' ka'au ngelan éh benara' ké', na' péh ke' bé' ngelan éh, adang néh pu'un kenat mu'un dat. Uban ko' bé' ngelan ha' ké' kenat, inah ka'au' juk mameng pah avéé' tong dau éh benara' ké' inah pu'un. Pu'un éh kenat mu'un dat, ha' néh.

21Kelebéé' néh kenat kelunan pinaa' mena Zakharia musit. Irah seruh uban ineu' éh kenat kelebéé' tong Umaa' Allah. 22La'o néh musit bé' éh omok pané ngan réh. Inah irah jam pu'un Tuhan peta'an éh hun néh tong Umaa' Allah. Uban Zakharia mameng palaa' ojoo' néh awah éh bara' ngan réh.

23La'o inah hun néh sukup kelebéé' kereja' tong Umaa' Allah, moléé' éh tai lamin néh. 24Bé' lebéé' la'o inah Elisabet pu'un nemaléé'. La'ah Elisabet nah mokoo' tong lamin néh awah avéé' lemah laséh kelebéé' néh. 25Ha' néh, Hun iteu' Tuhan pu'un nolong akeu'. Iah pu'un mega' kemenyaa' ké' neu' ha' irah éh pesala' ku' uban ké' nyalun rai, ha' néh.

Meliket bara' tong lohoo' Yésus

26Tong kenem laséh éh tong temaléé' Elisabet, Allah nyohoo' meliket Gabriel nah tai leboo' Nasaret éh tong tana' Galilia, 27ke' néh tavin jah redo lemanai éh petunang ngan jah lakei', ngaran lakei' inah Yusup, éh jin pohoo' raja' Daud, ngaran redo inah Meriam. 28Inah meliket nah tai tavin éh, ha' néh, Jian ke' murung kenin, Tuhan pu'un ngan ko' ngan pu'un éh ngevéléé' ke', ha' néh.

29Bang tusah kenin Meriam menéng ha' néh kenat nah. Kelem Meriam, Kineu' éh kenat ha' ngan ké', kelem néh. 30Boh meliket inah bara' ngan néh kepéh, ha' néh, Meriam, mai ke' medai, uban Allah pu'un ngevéléé' ke'. 31Ka'au' juk nemaléé' ngan juk nganak jah anak lakei', jian ke' maneu' ngaran Néh Yésus. 32Iah pu'un kenajung, ngaran Néh Anak Allah éh bau béé-béé. Tuhan Allah juk maneu' Yésus Raja' barei' Daud éh tepun néh sahau, 33ngan iah omok Pengeja'au pelinguh tong kekat irah éh jin betah Yakub. Kekat-kekat éh pu'un lem nihau Néh, bé' pu'un ga' néh, pu'un éh pelinguh, ha' meliket nah.

34La'ah ha' Meriam ngan meliket nah, Kineu' éh pu'un kenat uban bé' jak akeu' pu'un pemung ngan lakei', ha' néh.

35Ha' meliket mipa éh, Sahéé' Ni'ai juk tuhun tong ke' ngan penyukat Tuhan Allah pu'un tong ke', kenat péh Anak ko' iteu' nateng réh Anak éh ni'ai, ngan éh nateng réh Anak Allah. 36Padéé' pata ko' Elisabet rai, na' péh réh bara' éh nyalun kenat péh usah néh mukun tenéh, bang hun iteu' pu'un éh nemaléé', iteu' néh kenem laséh néh. 37Uban Allah pu'un penyukat maneu' ineu'-ineu' péh, bé' pu'un éh bé' omok naneu' Tuhan Allah, ha' néh.

38Ha' Meriam kepéh, Akeu' iteu' ripen Tuhan, jian éh pu'un kenat tong akeu' pekua' éh benara' ko' nah ha' néh. La'o inah meliket nah piso jin Meriam.

Meriam tai nepah Elisabet

39Bé' lebéé' la'o inah, tioo Meriam lakau ke' néh tai jah leboo' éh tong tokong tong tana' Yudea. 40Avéé' sitai iah tai tong lamin Zakharia ke' néh tai tabi' Elisabet. 41Hun Elisabet menéng ha' ané Meriam, anak lem boré néh gusii', Elisabet tioo penoo' neu' Sahéé' Ni'ai, 42boh iah tioo pané ngan ja'au ha', Murung Kenin ko' jin belah kekat redo, Murung Kenin anak éh juk kenanak ko' inah! 43Béé kenin ké' seruh uban akeu' éh ra' mu'un pu'un kenajung ke' ka'au' éh tinen Tuhan, Tuhan éh Pengeja'au ké', ka'au' pu'un tuai nepah akeu'. 44Uban tovoo' ko' tebai ku' ri, anak éh lem boré ké' gusii' mu'un éh uban néh murung kenin. 45Murung kenin ko' uban kekat ha' éh benara' Tuhan ngan ko', pu'un ke' ngelan éh juk kenat mu'un, ha' Elisabet ngan Meriam.

Meriam mejing Tuhan Allah

46Boh Meriam mejing Tuhan Allah, ka' ha' néh,

Mejing ngaran Tuhan.

47Murung mu'un-mu'un kenin ké' uban Allah éh purip ku'.

48 # 1 Sam. 1:11 Na' péh ku' ra' mu'un, pu'un éh pika akeu' éh anah nah.

La'o iteu' kekat arong kelunan bara' akeu' pu'un alaa' kemurung éh ja'au mu'un.

49Uban Allah éh matek ja'au penyukat, ja'au mu'un penganeu' Néh ngan ké'.

Ngaran Néh matek Ni'ai mu'un.

50Pu'un éh pika kekat kelunan éh ngajung Éh,

avéé' kelebéé'-lebéé' néh.

51Palaa' ojoo' Néh éh pu'un penyukat,

Iah pepurat kekat kelunan éh bau kenin,

ngan kebéé kekat pengeloo' kenin réh.

52 # Ayb. 5:11, 12:19 Iah petuhun raja' jin pakat néh

ngan metéé' irah éh ra' kepéh.

53Kelunan éh la'au' lem kenin ngan pitah Tuhan pu'un Tuhan mena' kuraa'-kuraa' arong penguman ngan réh.

Bang kelunan kaya' éh bé' nesen éh pu'un pengekurang, Tuhan nyohoo' réh moléé' usan awah.

54Pu'un Tuhan kivu jajii' Néh éh pejajii' Néh ngan tepun lu' sahau.

Pu'un Éh tuai nolong Israel éh kivu sohoo' Néh.

55 # 1 Sam. 2:1-10 #Kej. 17:7 Pu'un Éh pepoléng penika Néh ngan Abraham

ngan kekat anak-ayam néh avéé' pelinguh, ha' néh.

56Teleu' laséh kelebéé' Meriam mokoo' ngan Elisabet, la'o inah boh éh moléé'.

Tong lohoo' Yohanes Batis

57Hun sukup jaka' Elisabet pu'un nganak, iah nganak jah anak lakei'. Irah béé pu'un Murung Kenin. 58Kekat panak ngan lua' Elisabet jam Tuhan pika iah mu'un-mu'un. Murung kenin irah béé.

59 # Ima. 12:3 Ayah dau la'o lohoo' anak inah, tuai réh juk maneu' ngaran néh Zakharia, pekua' ngaran tamen néh. 60Bang ha' tinen néh, Mai keh maneu' ngaran néh kenat, Yohanes ngaran néh da', ha' tinen néh.

61Ha' irah kepéh, Bé' pu'un séé' éh kenat ngaran jin pohoo' ko' sahau, ha' réh. 62Boh irah neteng tamen néh palaa' ojoo' réh, Kineu' éh keneloo' ko' tong ngaran anak ko', ha' réh.

63Boh Zakharia nyohoo' réh mena' jah jalan éh ke' néh omok nyurat tong néh, éh senurat néh, Yohanes ngaran néh. Béé kenin kekat réh. 64Tioo omok Zakharia pané, pelapah éh mejing Allah. 65Medai mu'un kekat panak néh. La'ah kekat rengah inah purat tong tana' Yudea. 66Kekat kelunan éh menéng rengah inah pu'un réh mihau éh lem kenin réh. Ha' réh, Ineu' éh juk neu' anak inah kepéh da', ha' réh. Pu'un réh pané kenat uban réh jam penyukat Tuhan pu'un tong anak inah.

Zakharia bara' tong éh benara' Sahéé' Ni'ai tong anak néh

67La'ah tamen néh Zakharia pu'un penoo' neu' Sahéé' Ni'ai, ngan neu' penyukat Sahéé' pu'un éh bara' tong anak néh. Ka' ha' néh,

68Mejing Tuhan Allah

éh kenelan kelunan Yahudi,

uban Néh pika irah éh kevéléé' Néh

ngan ngelepu réh.

69Iah mena' jah kelunan éh ja'au penyukat éh omok ngelepu lu'.

Pu'un éh tuai jin puku' Daud, éh kelunan sohoo' Tuhan.

70La'ah hun sahau jin irah nabi éh kevéléé' Néh,

71Tuhan lepah pejajii' juk ngelepu lu' jin kekat ayau lu',

ngan jin kamit irah éh ngeleko lu'.

72Pu'un Éh pika tepun lu' barei' éh pejajii' Néh ngan réh.

Bé' Éh ngelepan jajii' Néh.

73Pu'un Éh bara' mu'un ngan tepun lu' Abraham,

74adang Néh juk ngelepu lu' jin kekat ayau lu'

ngan maneu' lu' omok melapuh jin kekat éh ngedai lu',

kelu' omok seva' Tuhan ngan kivu Éh kepéh

75dokoo' uleu' pu'un Ni'ai ngan ngepayoo' kenin néh

putung-putung urip lu'.

76 # Mal. 3:1 La'ah tong Ka'au' nak, pinaa' kelunan juk bara' ke' jah

nabi Allah éh bau kekat ineu'-ineu' péh.

Ka'au' éh tai tenah Tuhan dat ngan petenup kekat jalan Néh,

77dokoo' ko' omok bara' ngan kelunan éh kevéléé' Tuhan,

Tuhan omok purip réh hun penyala' réh lepah pega'.

78Uban Allah lu' pu'un Penika ngan kemurung.

Iah éh perema tong uleu' ke' Néh purip lu'

barei' ada maten dau tong langit

79 # Yes. 9:2 Iah juk tuai ke' Néh perema bau kekat kelunan

éh murip dalem merem ngan éh mapah matai.

Iah majak lu' tong kekat jalan

éh mihin lu' murip jian ngan pawah, ha' néh.

80La'ah anak si'ik inah vat-vat ngan gahang usah ngan reken kenin neu' Sahéé'. Iah mokoo' tengéé' tong ahang tana' avéé' tong jaka' néh tai ngan kelunan Yahudi kepéh.

Currently Selected:

LUKAS 1: PNT

Highlight

Copy