Maakaꞌ 8

Jiisuu'ke Nantoong Karenaumo Kokorei' Divu' Bau'uru'na'

(Mat 15:32-39)

1Pankaroompuaruko nantoong karika' porora naro'ariru'. Ee'noko taamang naiaapeu'ning otoaruio' Jiisuu'ke bakaning barevare-nupoong tee-anko bokuvurira aa'puru', 2“Nkaang domang aa'na' piaamoing aing-koo nantoong-koo. Aing teing ni'ninka beenang doong o'norining ee'noko kapoo' nai-koong oto'evoroa'. 3Ee'noko ninge peeravoroi otoroko osi-aape botoaranko dei taunga peerai tavuripeu', ai' nariong aing-koo isipo'nupoong.” 4Ee'noko bakaning barevare-nupoonge Jiisuu' tana'aama aa'pau', “Teka anke mee'bora' sirakamaa'koo taamang naninge are'ka daa'ura aing bau'uria'naang?” 5Ee'noko Jiisuu'ke nia'urima aa'puru', “Teka arekee'ning berete' oto'deruring?” Ee'noko aa'pau', “˜Keura-taa.”

6Ee'noko Jiisuu'ke botovuru' teing nantoong karinga kansi'koo ba'namparia'naang. Ee'noko ˜keura-taa berete' nkavura tampa' tampura pisi'uma bakaning barevare-nupoong avuriko teinge nantoong miatara avaariko'. 7Ee'noko napo' nii'ning tavi'ning oki'nareka' oto'evuru'ning-koo biraankevura bakaning botovuru' teing napo' tankaampaaria'naang. 8Ee'noko ookara taamanaara poovorou'. Ee'noko Jiisuu' bakaning barevare-nupoonge peku' ˜keveku'ka-taa kakita'ke maanto'au'. 9Naro'ka donkaang deerunoo' karenaumo kokorei' pina' teke otorou'. Ee'noko Jiisuu'ke teing nantoong tenkeng-koo botovuru'. 10Ee'noko namu'ke tee bakaasi-nareng-koo bakaning barevare-nupoong ninka aa'eariru', ee'noko Dalamanuta-nameng-aape berou'.

Boto Keperuu'navitue Jiisuu' Tana'au'na' Taa'ni'anta Nauvurii'naang

(Mat 16:1-4)

11Nii'ning Boto Keperuu'navitu Jiisuu'anko porou' bakaang kara paara-koo. Tutumpaama teinge tana'au' taa'ni'anta nkoevurii'naang Kumponinge botovuu'na'koo. 12Jiisuu'ke ee'maraanura aa'puru', “Aming-koo dii' avarang taa'ni'anta-koo tana'kirimang? Masikung naurampimang, Kumponinge dii' enanavarang taa'ni'anta nau-koo kasivua' otong.” 13Tee'purira sipuru' teka, ee'noko bakaasi-koo aa'earara nuaru' pako' tutumpuu' amenka'koo bee'naang.

Jiisuu'ke Bakaning Koono-antavuru'na' Nii'ning Biikaang Tositosi-koo

(Mat 16:5-12)

14Jiisuu' bakaning barevare-nupoong ampa'orou' taamang nka-koo. Ee'noko nau masiku berete' oto'evuru' teke bakaasi-koo. 15Ee'noko Jiisuu'ke siingoravurima aa'puru', “Bakei tarerariai tee-koo iisi Boto Keperuu'navitue ee'noko Eeroti'nupoonge biikaang taamang ninka bere'aamaung-koo.” 16Ee'noko tee'puio' tasi'paavarura kareaama aa'peeko', “Aunge pa nii' taamang oto'memuriaruio' tee' minkuvuing.” 17Ee'noko Jiisuu'ke minkuaako noru'ura aa'puru', “Aming-koo dii'ka minkurarimang taamang nkaveriarura? Koonto' ee mme' dii'ke tasi'meria' ning? Ai' diikaang domang kapanukai? 18Duta otori, teka ee ookiria'? Punkang otori, teka ee taaraveria'? Aming-koo noru'eria'? 19Tenang berete' pa'noko'nuri ninge nantoong pa'noko' kokorei' bau'aransio' arekee'ning peku' kakita'ke oosierira maanto'eru'?” Ee'noko aa'pau', “Kivora-ita keveku'ka.” 20Jiisuu'ke napo' aa'puru', “Ee'noko tenang ˜keura-taa berete' nantoong karenaumo kokorei'ke naiaio' arekee'ning peku' kakita'ke maanto'erieeng?” Ee'noko aa'pau', “˜Keveku'ka-taa.” 21Ee'noko aa'puru', “Teka ee dii'ke mme' tasi'peria'?”

Jiisuu'ke Bakaning Barevare-nupoong Nau-antavuru'na'

(8:22–10:52)

Jiisuu'ke Naning Duta Kaputu' Bantang-antavuu'na'

22Jiisuu' bakaning ninka Besaida duparirio' narionge naning duta kaputu' tavo'au' tee-anko birenge kompua'naang eentavarima. 23Ee'noko Jiisuu'ke naning kaputu' bireng-koo kompura osi-eta dama'du tenkeng-antavuu'. Ee'noko duta-koo tutupaa'ura bakaang bireng tee-koo pante'uu', ee'noko aa'puu', “Kapoo' ee oovemaang?” 24Ee'noko duta bantora aa'puu', “Nantoong aa' koi'pina' nanaako ooaramang.” 25Ee'noko Jiisuu'ke napo' bireng patu'uu' duta-koo, ee'noko tenang duta bantora naapu narung ookuma tamparu'kuu'. Ookara kapoo' siraka'paru'. 26Ee'noko Jiisuu'ke koonto' bakanoo'aape botovuma aa'puu', “Amono-nupoong-koo bera naueriauka'!”

Piitai Jiisuu' Tee Pako'pari'nii' Tasi'pura Sira'puu'na'

(Mat 16:13-20; Luk 9:18-21)

27Nii'na'mung Jiisuu' bakaning barevare-nupoong ninka Sisaria' Pilipai navuntu'aape taunge nanaama bakaning barevare-nupoong tana'urima aa'puru', “Nantoonge ning baa tammaamaung?” 28Ee'noko teinge aa'pau', “Nii'ninge Jooni Minkinara tantaamaung. Ee'noko narionge Eliasi poaing-koong tantaamaunge. Ee'noko nii'ninge urikupoong nakaro-nupoong-koo narung, boo'keta daa'aru'nung.” 29Ee'noko napo' Jiisuu'ke teing tana'urima aa'puru', “Ee'noko dii'ke napo' ning baa tammerimaung?” Ee'noko Piitai bari'uma aa'puu', “Da' aa' tee Kumponinge teroita Pako'pari'nii' nantoong domamperira tareveriainoo'koo.” 30Ee'noko Jiisuu'ke potevurima aa'puru', “Naning-koo sira'meriauka'.”

Piitai Jiisuu' Booaing Tamparako Orokovuu'na'

(Mat 16:21-23; Luk 9:22)

31Ee'noko Jiisuu'ke bakaning nau tutumpuru' boo'paravaina', aa'purima, “ning Tee Naning-naumpo' Paning-etaing teing amutemurii' arikananka tora'pampaing, ee'noko aing aa'ninge tompimaavaing: pankenukai, piristi'koong ovontunukai ee'noko boto naunukai, ee'noko tee dupisi'maavaing. Teketa beenang doong tankinuko napo' domamarara daa'maravaing.” 32Siraka'pui tampa' nauvurio' Piitai taapo' be'antavura potevuu' temurii' kara minkuvuaroo'naang. 33Ee'noko Jiisuu' bakaning barevare-nupoong-aape bere'arama Piita turampuma aa'puu', “Tokoi beai da' Sietani', ning-ankoita. Dake tee Kumponing bakaang noru' noru'ea', nantoong biikaang noru' narung noru'ei otong.”

Karistoo' Siong-koo Amariaina'

(Mat 16:24-28; Luk 9:23-27)

34Ee'noko Jiisuu'ke nantoong miatara bakaning barevare-nupoong ninka naro' bokuvurira aa'puru', “Naning ning siomui poo'naang piavora deeko', baka bakaang pia iro' doonko tompimparavaing ee'noko bakaang aa'barata' poru'ui ning siomumaatoaing.#8:34 Miru'noo' ee': Jiisuu' bakaning teing Jiisuu'pina' Kumponing bakaang pia narung nko-koo dai'ariri otoromaing baike kune'koo taura'pariri. 35Ee'koo, baa tee naning bakaang domaang ning-koo orokovuma baka tare-koo piavoaing tee paa'aravaing, teka baa tee naning ning-koo ee'noko nkaang doorenang tampara-koo bakaang domaang aroo'ari dua'uaing tee domamparavaing. 36Naninge kapoo' ookara kansi'kooning barampui okovura bakaang domaang darove'uko teinge arekee' pakuaapeu'? 37Ee'noko naning aming avupeu' tee bakaang domaang paa'aru'nung napo' moo'koo? 38Aing avarang oreng otorong nampeesi orarinuka, ee'noko naning teing-koo meu'ke otoi nkaang miring sira'koo ee'noko nkaang kara-koo maia'omaung dama'ke ning Tee Naning-naumpo' Paning-etaing tee-koo maia'moaing mora teing ninka koosinung˜ meekupoong ee'noko Mma' bakaang meenasi ninka.”

Currently Selected:

Maakaꞌ 8: nasNTpo

Highlight

Copy