Maakaꞌ 4

Sinang Tankanara Bakaang Minkunaa

(Mat 13:1-9; Luk 8:4-8)

1Nii'na'mung Jiisuu'ke kara nau tutumpuru' Kaaleli'naru'koo due'ka. Ee'noko nantoong karika' Jiisuu'anko naro'aririo' Jiisuu' bakaasi-koo ba'namparu' nuaru'koo daue otoko ee'noko nantoong tapiru-nairu-koo donkonau'. 2Ee'noko Jiisuu'ke minkunaananka mirumiru'keta nau tutumpurima aa'puru', 3“Taaraveriai. Naning narung mintoong-koo sinang tanka-koo nanura aa'nou': 4Nii'ning sinang taung-koo dau dua'ariru' ee'noko barennankai porora teka tunturavau'. 5Ee'noko nii'ning sinang dakurakung-koo dau dua'ariru' kapang-koo dau otomaung-koo, ee'noko da'deng narung dupuu', te' kansi' baru' aaveta'noo' deemparako. 6Ee'noko batei doonkenang bakaang-koo tee keenkeeng mara'ou' teke, baru' biira doonko nanuaung deemparara kansi' baru' makotua'noo'ke. 7Ee'noko nii'ning sinang napo' too'murintaa' otoroinoo' meu' dua'ariru' ee'noko nari' dupurira too'murintaa'ke iinkenevuu' tee keenkeeng. 8Ee'noko nii'ning kansi' pankauanoo' dua'ariru' ee'noko teke dupurira sinang aa'na' bi'uru' beenaumo kivora-pina' ee'noko nii'ning ˜narung-taa kivora-pina' ee'noko nii'ning daaku'pina'.” 9Ee'noko aa'puru', “Dii' punkang-po'nupoong deeko' enang taaraveriai!”

Kuunoo' Mirumiru'koo

(Mat 13:10-17; Luk 8:9-10)

10Ee'noko Jiisuu' baka otoko nii'ninge taaravaara porou' teing ninka bakaning Nanai'keta Kenaankara ninka, ee'noko tana'au' kara dipi'ua'naang. 11Tana'aako bari'uru', “Kumponinge dii' bakaang kara pinka'erimaing taura'duru'nung makensi'nung-koo miru'noo' noru'erii'naang tee-koo bakaang muu'koo nkoaramana', ee'noko dama'du otoromainge kara mirumiru' narung taaravaavaing. 12Tee' Daari Meekunge minkuvuma aa'puu'na',

‘Bane ooaama teka papaaravarimatoai. Bane taaravaama teka tasi'paria' otoroai, Kumponing-koo bere'ariko orara aarumo tonta'evuri'neeng-koo.’” (Aisaia' 6:9-10)

13Ee'noko Jiisuu'ke aa'puru', “Aung mirumiru' ee miru'noo' dii'ke bakei noru'eria'? Arekee' noru'eriainge ookara-koong miru'noo'? 14Aung Kumponing bakaang kara tankanarai sinang pina' tankavuu'nu. 15Sinang taung-koo dua'ariru'ning miru'noo' ee' oro': Nantoonge kara taaravaako Sietani'ke namu'ke poma pari'urikoo'. 16Ee'noko sinang dakurakung-koo dua'ariru'ning miru'noo' ee' oro': Nii'ninge kara taaravaama doturotu-eta kompaamaung. 17Ee'noko tee kara tampa' ari'avuaruma ee'noko turanturang poko tee-koo kara-koo biikaang baito namu'ke orariarakoo'. 18-19Ee'noko tee sinang too'murintaa'koo meu' dua'ariru'ning-koo ee' miru'noo': Narionge baru' pankaruntoonge noru'aakoo' kavonanka piaavaama ee'noko amutemurii' kapoo' karaa'aakoo', ee'noko teinge booni'ukoo' tee karakara ee'noko sinang bi'uarukoo'. 20Ee'noko sinang kansi' pankauang-koo dua'ariru'ning miru'noo' ee' oro': Nii'ning nantoonge tee kara tarii'oroi taaravaako bi'umaung nii'ning-koo beenaumo kivora-pina', nii'ning-koo ˜narung-taa kivora-pina' ee'noko nii'ning-koo narung daaku'pina'.”

Puu Antona'koo Boong Si'na' Deea'na'

(Luk 8:16-18)

21Jiisuu'ke aa'puru', “Naning dii'koonge bakaang araka paro'ura antona'koo boong nii'noo' batanang-koo boong ee sipupeu'? Ai' dau batanang-koo sipupeu'? 22Kapoo' enang makempari otoing dama' sira'anta-koong. Ee'noko kapoo' enang da'pari otoing dama'ke daate'numpo'. 23Dii' nantoong punkang-po'nupoong deeko' enang taaraveriai!”

24Ee'noko napo' ee' minkuvuru', “Kara taaraverira siomperiai. Dama'ke nkoveriainoo' basinoo' napo' nkaveriaing, ee'noko Kumponinge napo' dau basinoo' aruriai. 25Naning avuavu' aa'na' kompumaung dama'ke deto basinoo' kompuaing, ee'noko naning avuavu'koo nuaku oto'evuining dama' pari'numpo'.”

Mirumiru' Sinang Dupumana'koong

26Jiisuu'ke aa'puru', “Kumponing bakaang muu' naninge bakaang mintoong-koo sinang tankavupeu'na'pina' oro'. 27Ee'noko muunga aatuma doonga avitoitoi nanuko sinang baka peki'kura dupupeu' teie noru'uaruko. 28Baka kansi'ke du'antavuko panka'parama sinang bi'umaung. Tutuna' dupuma panka'parama bi'ukoo'. 29Ee'noko sinang petaa'uma meura'uko naninge tenang kavupeu'.”

Mirumiru' Sinang Masitara'koong

(Mat 13:31-32,34-35; Luk 13:18-19)

30“Teka nii'ke aminge miru'ampipeu' Kumponing bakaang muu'? Ee'noko aminge mimpama siraka'antavampeu'? 31Tee aa' sinanu oki'nu-pina' oro'nu masitara'koonu. 32Bane temurii' mukusiri' ookara sinang kansi'koo keempaamaing-eta, teka tenang naninge kansi'koo keempuko dupura panka'parama taamang mintoong-kooning divu'ura kaumpe'nanka tampa' tovoro'arapeu' ee'noko amutemurii' barenge bito kaniaama teke ueemparipeu'.” 33Jiisuu'ke tee' oro'ning mirumiru' amutemurii'ke kara nauvuriko' teinge aroo'aako'ninge nainge noru' nka-koo makosina' mantompuritaa'. 34Ee'noko kapoo' nauvuria' mirumiru'po'nung deeaung. Ee'noko bakaning barevare-nupoong ninka deeko' bii'ka otoroitaa' miru'noo' sira'puko'.

Jiisuu'ke Nuaru' Taroro'antavuu'na'

(Mat 8:23-27; Luk 8:22-25)

35Te'mung doong muung-aapevuio' Jiisuu'ke bakaning barevare-nupoong aa'puru', “Enang nuaru'ka amenka'koo pako'mariai.” 36Ee'noko nantoong karika' teka sipaarira Jiisuu' ninka bakaasi-koo aa'earira tenkenau'. Nii'ning bakaasie nari' berou'. 37Nanai otoroko piong pankaing basiaru' ee'noko bakaasi boo'ai dapi' minkivuko', Jiisuu' bore' patu'ari aatuio' bakaasi-koo dama'due. 38Ee'noko bakaninge tanteaama aa'pau', “Nau-anta, da' ee tara'doa' ke'nuru'marimaang?” 39Ee'noko tee tantearara piong ee'noko tee eemaru' ntong-koong aka'puma aa'puu', “Bakerari dooroontaravai.” Ee'noko piong bakearako nuaru' tenang aa'na' taarorovuu'. 40Teketa teie maku'urima aa'puu', “Dii' aming-koo arorerining? Dii' ee baitoropanuka?” 41Ee'noko ta'nimparira tana'eema aa'peeko', “Aung naning baa piong tovange ee'noko ntong taaravaakoo'?”

Currently Selected:

Maakaꞌ 4: nasNTpo

Highlight

Copy