Maatiuꞌ 6

Avuavu'koonaare

1“Tanatarariaing dii'. Dootuu'koong aarumo tampara nkoverima nantoong-koo dutakanoo'ke nkoveriauka' teinge ooraarii'naang. Tee' nkoveriaing deeko' tee, teie Diumai paning-koonge moo' aruriauka'nung. 2Aa'nomaatoai tenang teing ata'oinku averererima deeko' tee-koo tuuviri puumperia' otoai teinge ampirinunukai nkoaamana' pava dootuu'nanka-koo ee'noko napo' taung sionairu-koo maroita nantoonge pankaing-antavaarii'naang. Ninge masika' naurampimang, teinge tee biikaang moo' ookara teka nkavaamaung. 3Teka tenang dii'ke teing ata'oinku averererima baku'eri nkoveriai kapoo' tampanaange nkovuaing mare'anaange noru'uauka'; 4Ee'noko teie Diumai kapoo' baku'nii' oovumaunge sirapo'ke moo'duriai dii' tee-koo.”

Kunsi-koonaare

(Luk 11:2-4)

5“Tenang kunsirarima teing-pina' ampirinunuka-pina' nkoraria' otoai. Pava dootuu'nairu-koo ee'noko taung sionairue donkonai kunsi-koo aa'na' piavoromaing-pina' nantoonge ooaarii'naang. Ninge masika' naurampimang, teinge tee biikaang moo' ookara teka nkavaamaung. 6Tenang dii' kunsirarima diikanavaro-koo avo'nii'navaro-koo tuntarima karanaang da'perima kunsirarimatoai tee-koo Diuma-koo naninge oo-paa'koo, ee'noko teie Diumai kapoo' baku'nii' oovumaunge sirapo'ke moo'duriai dii' tee-koo. 7Ee'noko tenang kunsirarima kara putu'eria' otoai teinge mutaanang-koo-nupoonge nkoaamana' aa'paama, ‘Mmau' kara-koo taaramuriaina'.’ 8Koonto' teing-pina' nkorariauka', ai' teie Diumai tee noru'umaung teing kapoo' dii' apuka'darimaing tutung eentaveriaruko tee.

9“Kunsirarima ee' kunsirarimatoai, ‘Niuma paning-koo otomaung, dakaang miring meeka'antavari otoaing. 10Dakaang muu' po'antaveai. Dakaang pia nkoaravaing anke kansi'koo paning-koo nkoaramana' nari'. 11E'mung-koo makosina' ameriai tee taamang doong kante amerimaung. 12Tonta'antameriai niikaning orarananka nii' oraka' nkomaarimaing tonta'antaevorompimana'. 13Ee'noko parapaara-koo si'meriauka', teka tonta'antameriai teieta naning orara bakaang purinto'keta; ai' da' tee ookara-koo okorui tarenumpo', purinto'po'nung, ee'noko meena'doi otomaung ookara doong-koo. Tee' ee'na'.’

14“Ai' dii'ke nantoong tonta'antavereriko teing dii' oraka' nkoraarimaing teie Diumai paning-koonge dii' tee' nari' tonta'antaruriainge. 15Teka dii'ke tonta'antavereriaruko nantoong teing biikaning oraka' nkonanka-koo teie Diumai tee tonta'antaruriauka'nung diikaning orarananka-koo.”

Unkumonaare

16“Tenang dii' unkumorarima munte'dorining-pina' oro'daria' otoai teing ampirinunuka nkoarimana', ai' teing teing oing oraka' oro'antavarimaing maroita unkumoaririning taa'ni'antavarima. Ninge masika' naurampimang, teinge tee biikaang moo' ookara teka nkavaamaung. 17Teka tenang dii' unkumorarima oing duu'darimatoai bore' duunie sisi'darima nantoong-koo dii' unkumoraririning-pina' oro'dariauka'na'; 18Teka tee narung-koo Diuma-koo naninge oo-paa'koo deeko' sira'dariri otoriai ee'noko teie Diumai kapoo' baku'nii' oovumaunge sirapo'ke moo'duriai dii' tee-koo.”

Kapoo' Tampeng Paning-koo Oosi-koonaare

(Luk 11:34-36; 12:21-34; 16:13)

19“A' kansi'koo kapoo' tampeng kavonanka oosieria' otoai te' pumpu' dovange ee'noko takarau' aa'ninge orariaamanoo', napo' bakisipunankai pesi'aama bakiaa'aamanoo'ke. 20Teka paning-koo moo' tampeng oosierimaatoai te' ee'noo' pumpu' dovange ee'noko takarau'ke orariaavarupeu', napo' bakisipunankai pesi'aama bakiaa'aava'noo'ke. 21Ai' te' tokoo naning bakaang muuninava˜ otoainoo' bakaang pankaruntoonge noru' tee te' otoaing.

22“Domang tee duta pina', tee diikaang mono bakaang puu. Tenang diikaang duta tampara deempari otoko diikaang mono ootukunairu arakai maanto'ui otopeu'. 23Teka duta tampara deeaung deempari otoko diikaang mono mutaanange maanto'ui otopeu'. Tee'koo tee diikaang domang mutaanang-nameng-koo otoko deeko' bakei aa'na' masika' mutaanantoriaining.

24Narunge kenaanka ovontura siompurearupeu', ai' teie tee narung munte'uma nii'nung piaavumatopeu', nii'noo' narung siompuma nii'nung siompuarupeu'. Tee'koo dii'ke Kumponing ee'noko kavokavoro ookeng deto deeng-antaveriarupeu'.

25“Tee'koo ninge naurampimang dii', noru' manki'doria' otoai aa'ning-koo taamang tovang ntong domanturiaining ee'noko mononopa'nanka. Aming-koo, nna', domaang tee taamang-koo bi'ari otoa' ee'noko mono tee baarong-koo io'arava'. 26Oovereriai teing barennanka auvi'au-kooning. Teing teing kapoo' keeng noru'aava', kavaama oosi noru'aava', kore' noru'aava' pava-koo, teka teing teing Diumai paning-koonge bau'urimaing. Enang arekee', dii' ee teing-koo dau basinanka deea' bakaang norunoru'koo? 27Ee'noko dii'koo baie noru' manki'oma doong naraanga'noo' deto be'nu'antavura te'koo domampari otopeu'? Otoa'. 28Ee'noko aming-koo napo' dii' baarong tovang-koo noru' manki'dorikoo'? Oovereriai teing iioo'nanka tamung dupurimana', baarong tua'koo pore'oroainge. 29Teka ninge ee' naurampimang, aa'na' tampa' nerampurimaung nantoong biikaang meenasi puru'uitaa', bane dauraronanka Solomoni'pina'. 30Teka Kumponinge baa'nanka tee' nerampurimaung deeko', teing aa'nomaing na'mung doong-koo domamparara dauna'mung mara'oko tai-antavaakoo', tee tee tee' nari' tasi'periaing dii'ke, masika'anta oki'naa oto'derurininge, ai' dii' teing deto basinoo' noru'duri duaanaruriaining.

31Tee'koo enang tee noru' manki'doria' otoaing aa'perima, ‘Aming naiampii'naang?’ ee'noko ‘Arenaa' kurumarii'naang?’ 32Aing ee' oro' kapoo' mutaanang-nupoonge kariaamaing, teka dii' tee' deea', ai' dii' Diumai Paning-etaing noru'ui otong aing ookara kapoo' dii' apuka'darimaing. 33Tee'koo ainkato noru'eria' Kumponing bakaang muu' deto pankaruntoonge noru'erimatoai tee ninka bakaang aarumo koompari oto' ninka nari' ee'noko teing aing kapoo' apuka'darimaing nari' aruriainge. 34Tee'koo tane'nung doong-koo noru' manki'doriauka'. Tane' te'mung baka noru'aravaina'mung. Ai' ookara manki'nanka na'mung doong-koo makosina' bire'ari otong.”

Currently Selected:

Maatiuꞌ 6: nasNTpo

Highlight

Copy