Luukeꞌ 16

Kavo-tanata Tosiro'koong Mirumiru'

1Nii'na'mung Jiisuu'ke bakaning barevare-nupoong nau-antavurima aa'puru'nung, “Naning narung kavo mmau' po'nung otoko'nung. Teie nii'nung bakaning kavonanka avutevu' tare-koo sipuu'. Ee'noko nii'ninge tuumpiau'nung oraka' tare tampaama. 2Ee'noko teie okonarai bokuvura aa'puu' tee, ‘Tee aming-koo da' minkuraako taaravansing? Kavo tarevemana' daariera ameaing. Da' tee bake-antarama'naang.’ 3Ee'noko teie tare-nkoi baka karoma aa'puu', ‘Nkaang pankainge enang tonta'muu'naang tanatamaramanoo'keta. Ninge enang aming nkoama'naang? Ai' ning tee kansi' nenke'koo makotumpa'. Ning baka-eenta-koo maia'momang. 4Ee', enang noru'ansing. Nantoong pakuarampaing biikanairu-koo bokumaavaina' tanatamaramanoo'keta bata'muko.’

5“Tee tee teie naruna' naruna' bokuvuru'nung teing bakaang ovoring-koo komaaru˜ oto'evorou'ning. Tutuna'nung aa'puu', ‘Da' nkaang ovoring-koo arekee'ning komaaru oto'derung?’ 6Teie aa'puu', ‘Narung daaku' daramu duuni-po'nanka.’ Ee'noko teie aa'puu' tee, ‘Aung ane' komaaru-koonane' tero daarieu'nane' nkavera iri'narung ba'nanira pari'ema nii'nane'koo naruaape daarieai.’

7“Napo' nii'nung aa'puu', ‘Da' arekee'ning komaaru oto'derung?’ Teie aa'puu', ‘Narung daaku' daramu uite'koonanka˜.’ Teie aa'puu' tee, ‘Aung ane' komaaru-koonane' daarieu'nane' nkavera pari'ema nii'nane'koo naruaape-ita beenaumo kivora daarieai.’

8“Ee'noko tee tarenara bakaang ovoringe taaravura aa'puu', ‘Tee aung tarenara aa', bane koonto' deeaunge, teka bakei tampa' uro'ke noru'umaung!’”

Ee'noko Jiisuu'ke minkunaavarama aa'puu', “Nantoong aung kansi'nupoong kansi'koo mintoona' tero uro'ka matauaarimaung dii' araka-koo-nupoong divu'daari paninung mintoonuka tantarimaing. 9A'noo' kansi'nupoonge tamung apupo' uro'ke noru'aama kavokavoro kompaamaung bii'ka dotu-anta-koo, Kumponing deea'. Teka ninge ee' botorampimang dii' araka-koo-nupoong, kavokavoro tampa' komperiaing nii'ning nantoong paku-koo, Kumponinge tampa' oorurira onkeonke'duriaina' paning-koo, te' tampa' otoi otorimaatoainoo'.

10“Baa tee naning kake'iinung oki'ning-koo napo' tee'ke kake'iinung mmau'koo. Ee'noko baa tee naning oki'ning kompui kavuruaramaung teie mmau' tampa' tanatavuarupeu'. 11Tee tee tee'koo dii' naurampirina'koo kake'iirariarura deeko' aung kansi'koong kavokavoro-nanka-koo, baie noru'duria' kapoo' masikung oko-antaruripeu'? 12Ee'noko teing kapoo' Kumponinge oki'noo' kong-koo taura'durining-koo kake'iirariaruko deeko' baie dii'ka dii' okoruriaining arurii'naang? 13Narung bautarai kenaanka ovontura siompurearupeu', ai' teie tee narung munte'uma nii'nung piaavumatopeu', nii'noo' narung siompuma nii'nung siompuarupeu'. Tee'koo dii'ke Kumponing ee'noko kavokavoro ookeng deto deeng-antaveriarupeu'.”

Kara Mirumiru' Aa'ning-koong Naning Maneenung Ee'noko Tee Sitovuru'

14Teinge Boto Keperuu'navitue mooni' piaavaako'ninge aing ee' oro' taaravaara Jiisuu' benkempau', teka teie aa'puru' teing, 15“Dii' aing dii'ka koonto'nuka-pina' nkorarimaung nantoonge daangantaarii'naang, teka Kumponinge noru'ui otong diikaning domang oreng, ai' aming tee kapoo' nantoonge daangampaamaung tee maremaare Kumponing-koo duta-koo. 16Temu'keta tee Jooni Minkinara mme' poaruko Moosesi-nung boto ee'noko Kumponing-etaing nakaro-nupoong biikaang dariraari oto'deruriko'nung dii'ke siong-koo, teka Joonie tampara doorenang Kumponing bakaang muu' poaing-koong tasi'antaruru'noo'keta karika' aa'na' itoveema taatoiarimang tung-koo dii' tamung doororariri otoko. 17Nka Moosesi bakaang boto-koo oki'nanaare daanaare deemparavauka', bane paning ee'noko kansi' tankinureko. 18Ee'pina', dii' ookara dii'ankaampi bata'erererima oovuning namperererimaing dii'ke tee nampeesi orarierimaung. Ee'noko dii' donkaang maniku' bii'unkaampie bata'aarimaing namperereerimaing tee'ke, nampeesi orarinukai Moosesi bakaang boto toto'peri.”#16:18 Ooveai Mat 5:31-31; 19:9; Mak 10:11-12.

19“Narung aunge, dii'maiko', mmau' kavopo'nung atang-pina' oro'ninge tampenge mononopa'ke nopa'arako'nung, doong kante paroro narunge mavomavo'po'ninge bau'arako'. 20Ee'noko bakanoo'ke karanaang-koo naning narung ata'oi' bempari otoko' miring Lasarusi, pentai maanto'. 21Mukunge bau'arako' tee ovo'ma'nung taamang banto'doma-ita dua'arako'ninge. Aa'noko'nung, mosi'ke poroma penta nempi'aako'. 22Teketa' tee ata'oi' boo'pario' koosinunankai nkavaara Eebaraami'koo bireng-koo kuung sipau'. “Tee kavo mmau'po'nung tee' nari' boo'pario' dako'au'.

23Ee'noko boo'nuka biikanoo'ke sisikeeravoi duta bere'arara ookuko' Eebaraami'koo isipo' otoko Lasarusi ninka nari'. 24Ee'noko tee bokuvuu'nung aa'puma, ‘Mma', Eebaraami', piaamera Lasarusi botoveko pora pankiri' ntong-koo duu'parara meneng komura boimuai, ai' ning tee sisikeerai puru'antamuing aung-koo urung-koo meu'ka.’ 25Teka Eebaraami'ke aa'puu', ‘Nnuring ee, noru'eaing da' tee kansi'koo otoi kapoo' tampeng nkasiiko'nung ee'noko Lasarusie tenang oreng nkavuko', teka enang aung anke boiravui domang kuaa'oi otong ee'noko da' sisikeerai puru'antarui otong. 26Napo' nii'nung kapoo' nii'koo meu'ke keeva' bakatemota otong nantoong anketa tanking-koo piavoropeu'ning beroarupeu', ee'noko teketa dakanameng-eta aa' nii'anko naning tankinuarupeu'.’

27“Ee'noko tee kavo mmau'ke Eebaraami' maku'uma aa'puu'nung, ‘Mma' ee, nuu'damaang dake Lasarusi botoeaing mma' bakanamono-koo, ai' ninge pa'noko' ntara'mainkaang otorong. 28Bera siingoravuriaing aa' oroo' sisikeera-po'noo' poro'neenga.’ 29Teka Eebaraami'ke aa'puu', ‘Tee aa' Moosesi ee'noko teing Kumponing-etaing nakaro-nupoong biikaang dariraari otong. Teing deeruaavaing.’

30“Ee'noko teie kavo mmau'ke maku'uma aa'puu', ‘A, mma' Eebaraami', naning boo'keta bei dei teing-anko teing bere'aripeu'.’ 31Ee'noko teie maku'uma aa'puu' tee, ‘Tee aa' tee Moosesi ee'noko teing nakaro-nupoong taaravaariauka'nung deeko' tee tee' nari' masika'antavaavarupeu', bane naninge boo'keta daa'arapeu'nunge nauvuriko.’”

Currently Selected:

Luukeꞌ 16: nasNTpo

Highlight

Copy