Luukeꞌ 15

Sipisipi'nu Ee'noko Mooni'nu Paa'aretu'na'koong Mirumiru'

(Mat 18:12-14)

1Enang tee taakisi nkanuka ee'noko nii'ning orananka nari' tee-anko due' porou'nung. 2Ee'noko teinge Boto Keperuu'navitue ee'noko boto naunukai minkuminku nkoau' aa'paama, “Aunge naninge orananka poraporaivurimaung teing ninka nari' taamanaama.” 3Tee'koo Jiisuu'ke aung dikito' nauvuru'nung, aa'puu'nung,

4“Baa naning dii'koong narung, narung daaku' sipisipi' oto'evupeu', teketa teing-koo nau pooari dei dake ee teing nii'ning mmau' tamung siperira teu nau pooaru'nu besi'koo naniarupeu' bera daa'eainoo'ke basi? 5Ee'noko tenang daa'era dake teu poru'epeu' ukaamau'ke doturotu ninka. 6Ee'noko tenang osi pora dake da'marang bokueripeu' ee'noko da'maikori' aa'perima, ‘Ni'ninka nari' dotumariaing ninge nkaang sipisipi' paa'aru'nung daa'ansing-koo.’ 7Tee' nari' bakei paning-koo doturotu pankaing otomaunge naning narung orara bere'arako tee doturotu teing nantoong karika' koonto'nuka otoromaing-koong doturotu puru'ui otong, aa'ning bii'ka bere'koo makosiaavaing tamparikoo'.

8“Napo' nani manikuma mooni' kivoranuri oto'evupeu'nani ee, nau paa'antavura puu paro'ura keperuu'ari siimuvuma tee pava besi'uarupeu' bera daa'upeu'noo'ke basi? 9Ee'noko tenang tenie daa'ura teu, tenie ba'marang ee'noko ba'maikori' bokuvuripeu' aa'puma, ‘Ni'ninka nari' dotumariai ninge au mooni'nu daa'ansing-koo, paa'antavantu'nu.’ 10Tee' nari' bakei Kumponing bakaning koosinunanka dotuarimaung narung orara bere'aramaung-koo.”

Bauring Pooaru'na'koong Mirumiru'

11Ee'noko napo' Jiisuu'ke aa'puu', “Naning narung otoko'nung baurinketa kenaankara. 12Ee'noko baara'ma'nunge tenaanka-koo aa'puu' tee bauma, ‘Mma' ee, nkanamanto barenku-koo enang ameai.’ Ee'noko baumai tankaampuu' kapoo' okovuining tenaanka-koo. 13Teketa mmau' doong tankinuaruko baara'ma'nunge bakaning nkavura tenkenuu' tokoonamenge isipo'ke, ee'noko teke nainai dovang-koo ee'noko moru, naviuraa'eema tamung dua'uu' boturopa. 14Ee'noko tenang ookutunung kapoo' dua'uko pankaing peera tavo'kuu' temeng-koo, ee'noko ata' tutumparu'. 15Tee' nkoarara osikaiaang-koong narung-koo bi'antavaru' temeng-koo. Ee'noko teie bakanavora'koo botovuu' pooro'nanka bau'koo. 16Ee'noko bakei aa'na' peeravoi teing dopa' nai-koo piavoko' pooro' avuriko'ning-koo. Naninge kapoo' nau' avua'.

17“Teka baka norunoru'arara teie aa'puu', ‘Baka'e, teing mintoong-nupoong mma'ke moo'urimaing karika' otorong taamang makosining oto'evorong ee'noko kore'arikoo', teka ning aung peerai anka dupisi'mumang. 18Ning enang i'amarara nanampaing mma'anko, ee'noko aa'pampai tee, “Mma' ee, ning oraka' nkomaru'nung Kumponing-koo ee'noko da'koo. 19Ning enang dauring tang-koo makotumpa'. Aing dakaning mintoong-nupoong-koong narung-pina' nkomeaing.” ’ 20Ee'noko teketa' i'amparara bauma-anko nanuu'. Teka mme' isipo' otoko baumai oovura bakaang domang piaae aa'na' maanto'ura tee-koo bauring-koo, ee'noko teketa kua'parara boko'ura nuunuvuu'. 21Ee'noko bauringe aa'puu' tee bauma, ‘Mma', ning oraka' nkomaru'nung Kumponing-koo ee'noko da'koo. Ning dauring tang-koo makotumparuing.’

22“Teka baumai bakaning botovotonaa'nuka aa'puru', ‘Mononopa' tampara masikung iri'narung nkaveri porira kurumperiai aung-koo, ee'noko riing pankiri'koo kurumperiai ee'noko boonamante˜ kau'koo. 23-24Ee'noko boromaka'nu kampianu bau'naanu bi'erira taveriai, ee'noko maa'ampiai dotumarima, ai' aung nnuring tee boo'paru'nung-pina' noru' enang napo' domamparing; tee pooaru'nung enang napo' toroaring.’ Ee'noko teinge tenang kovi tutumpau'.

25“Enang tee tutuna'nung bataata pora'ke otoko, ee'noko teketa poma pava due' basiarama teie neekavarima koviariko taaravuu'. 26Ee'noko botovotonaa'nuka-koo narung nia'uma aa'puu', ‘Aming-koo koviarimang?’ 27Ee'noko teie aa'puu' tee, ‘Daara'ma'nung poing, ee'noko daumai teu kampianu bau'naanu tavuing tee bauring tampa' otoko kune'ura onkeonke'uma.’

28“Teka tee iiravora kuung po'koo piavoaruu'. Teketa baumai dama'du siarara kevi'uu' tee. 29Teka teie bari'uma bauma aa'puu', ‘Ee mma' ooveko, aing mmau' mare' ning da'koo dai'mari pakurama o'noretu'ning. Dakaang kara siompamaung taarapiikamarava', teka dake ning sie'nu bi'memua' ning mmaikori' ninka nari' kovimaripeu'nu. 30Teka tee aung dauring poio' dakaang kokononang tamung kera'puu'nung manii' bakisipunanka moo'urima dake tamung teu kampianu bau'naanu tavevuing.’

31“Ee'noko baumai aa'puu' tee, ‘Nnuring ee, da' ni'ninka ookara batei-koo nari' o'noremaung, ee'noko ookara kapoo' ning nkaning teinge dakaning. 32Tee tee makosi doturotumarima kovimariaing, ai' aung daara'ma'nung tee boo'paru'nung-pina' noru' enang napo' domamparing; tee pooaru'nung enang napo' toroaring.’”

Currently Selected:

Luukeꞌ 15: nasNTpo

Highlight

Copy