Luukeꞌ 13

Bere'aravaruma Boo'na'

1Tenang nii'ning nantoong Jiisuu'anko porora nauaama aa'pau', “Pailati'ke piatooronuka˜ botovurio' nii'ning Kaaleli'nupoong boontunang nkoari otoko dupisi'aario' ereng biikaning boontunang-kooning ereng ninka pitu-antavaaring.”

2Ee'noko Jiisuu'ke aa'puru', “Dii'ke ee' noru'eriauka': teing tee' boorou'ning kapoo' orara makensi'ning dii' oto'deruiaing-pina' oro' otoko Kumponinge Rooma'nupoong taura'puru' teing Kaaleli'nupoong dupisi'koo. 3Otoa', tee' deea'. Teka dii' tee' nari' paa'dariaininge bere'dariauka'ning deeko'. 4Ai' ee' noru'erimang teing nanai'keta ˜beenaumo-taa [18] pava deto isikava dau dua'arara tavuru'ning bakei oreng masikeng nii'ning Jerusalema'nupoong divu'aari otong? 5A, otoa', tee' naurampimang. Dii' tee' nari' paa'dariaininge bere'dariauka'ning deeko'.”

6Ee'noko teie aung dikito' nauvuru', “Narung naninge koi' piiki' keempuu'nung bakanoo' uaininau-koo, ee'noko nii'na'mung sinang kavu'koo pou'nung tevari-koo, teka oovua'. 7Ee'noko teie uaininau tanata nauvuma aa'puu', ‘Aung ee, aing beenaumo mare'koo ning sinang kavu'koo momaung avari-koo piiki'navari-koo, teka sinang ooampaung ninge. Nokieaing tevari tamung kansi' orarivumato'neenga.’ 8Ee'noko teie maku'uma aa'puu', ‘Ovoroo' ee, sipeio' amare' iro' otoai napo' bera okora' nenke'amira kansi' pankauang sipampaing. 9Daunamare'koo sinang bi'uaing deeko' tampa' masika', teka bi'uaruko deeko' nokieaing.’”

Jiisuu'ke Nani Manikuma Kopini Kai'nii' Koong-antavuu'na'

10Teketa nii'na'mung Doong Uaana'mung, nau-antavarako'nung pava dootuu'nanka-koo nii'nava-koo. 11Teke nani ma'naange siipa-antavuko'nani otoko' mare' kivora-ita ˜beemare'pi-taa-koo [18], kai'aritaa' baka deto koompari donkong-koo makotuaruko'. 12Ee'noko tenang Jiisuu'ke oovura teni, teie bokuvuko uro'ke poko aa'puu', “Ani ee, da' unaaroinani dakaang siipa-ita.” 13Ee'noko teie bakaang bireng pante'uu' teni-koo dau ee'noko tenang namu'ke teni koomparu'. Ee'noko tenie Kumponing daangampuu'.

14Teka Jiisuu'ke Doong Uaana'mung-koo taare-anta nkovuu'nung-koo teie pava dootuu'nava tanatavuko'nunge iiravoma ee' minkuvuru' teing nantoong, “˜Na'mung-taa doong otong nko-nko nko-kooning. Teing-koo doonko porira taare-anta nkaveriaing, Doong Uaana'mung-koo deea'.” 15Teketa Ovoringe maku'uma aa'puu' tee, “Da' ampirinung˜, dii'koo ee narunge te'mung Doong Uaana'mung bakaang boromaka' nii'na' doonkii' dapa'uma bi'ari otomanoo'keta barampui beaung ntong nai-anta-koo? 16Ee'noko tee' makosi deeko', aming-koo ani manikuma Eebaraami' baurang makosi deea' Doong Uaana'mung-koo unaa-anta-koo, Sietani'ke dai'uu'nani booni'antavuma teing-koo mare' kivora-ita ˜beemare'pi-taa-koo?”

17Tee' minkuvura teing bakaning too'de-nupoong maia'antavuru' ee'noko ookara nantoong dotuariru' ookara kapoo' nepu'na' nkovuu'ning-koo teie.

Kumponing Bakaang Muu' Pankaimparavaina' Teing-pina' Sinang Ee'noko Iisi

(Mat 13:31-33; Mak 4:30-32)

18Napo' nii'na' Jiisuu'ke ee' minkuvuu', “Kumponing bakaang muu' aming-pina' oro'? Aminge pa paara-antavampeu' tee? 19Tee aa' sinanu oki'nu-pina' oro' masitara'koonu naninge nkavura mintoong-koo keempuu'nu, ee'noko dupura koi' pankavari deemparu', ee'noko barennankai bitonanka kaniau' kaumpe'nanka-koo.”

20Ee'noko napo' aa'puu', “Kumponing bakaang muu' aminge pa paara-antavampeu' tee? 21Tee aa' tee teu-pina' parauanu naako'nii'nu iisi-po'nu-pina' naninge manikumai nkavura paraua diisi beerentu'koo maanto'ura naro'ka bere'uko bera teue ookara pangapangavopeu'.”

Karanaang Oki'navarong Kumponing Bakaang Muu' Tung-koong

(Mat 7:13-14,21-23)

22Teketa tee tenkenura Jiisuu' nanuu'nung Jerusalema'aape osi pankeng ee'noko oki'nareka' beero'ui nau-antavurima. 23Ee'noko nii'ninge aa'pau' tee, “Ovoring, teing ee moo'ariaining oki'ning?” Ee'noko teie aa'puru' teing, 24“Muu' paninung-koo tuntoma te' ito-navarong. Teke tevaronge aa'na' purintariri paararariaing tung-koo avutevu'daria', aming-koo, nna' teing karinga avitoitoi miru'arima paaravariaining makosiaavauka'nung. 25Tenang namu'ke pava okonarai i'amparara karanaang pinka'uko dii' tee dama'due donkoniri otoriaing kopikopi'erima te' karanaang, aa'perima, ‘Ovoring, daate'meriai.’ Ee'noko teie aa'duriaing dii', ‘Ninge dii' noru'dampia' areketa porininge.’ 26Tenang dii'ke aa'periaing, ‘Nii' aa' da' ninka nari' taamanampima tuaamariko'ning, ee'noko da' niikaning osinanka-koo nau-antararako'.’ 27Teka teie aa'duriaing, ‘Ninge naurampimang dii' noru'dampia', are'nupoonge. Tokoi beriaing ning-ankoita dii' oraka' nkorarimaing.’

28“Teke ee'noo'ke dama'du otoritaa' birontariai si'da' kakirinkurarima sisikeera-koo otori, aa'ning oovererima: Eebaraami', Aisake', Jeekopi' ee'noko teing ookara Kumponing bakaning nakaro-nupoong teka muu' Kumponing bakanoo'ka. 29Ee'noko nantoong aa'ning-eta poroaining teke muu' Kumponing bakanoo'ke nari' taamanaavaing: duaa' pomanoo', tumparamanoo', ee'doompeto ee'noko ee'depeto. 30Ee aing, nii'ning teing enang dama'duariri otoroining ureaavaining ee'noko napo' nii'ning enang ureai otoroining napo' dama'duariaing.”

Jiisuu' Jerusalema'koo Orarunsiaru'na'

(Mat 23:37-39)

31Ee'noko tenang tee-koo batei-koo nii'ning Boto Keperuu'navitu porora aa'pau'nung Jiisuu', “Tenkeniai anketa, Eeroti'ke da' dupisi'duu'naang piavomaang.” 32Ee'noko Jiisuu'ke aa'puru'nung teing, “Berira nauerima tee daang-koong daurarong aa'periaing, ‘Aung ee, Jiisuu'ke aa'puing, “Ninge aa'nomaang: ma'nari bata'aramang, taare-anta nkoamaang-e'mung, tane' tee'ke, ee'noko dauna'mung opama'naang nkaning nko-nko nkoama Kumponinge miru'muu'ning. 33Teka e'mung, tane', ee'noko dauna'mung nkoampaing teing nkaning nko-nko, bera Jerusalema'ke bakeampaing, ai' Kumponing bakaning nakaro-nupoong teing Jerusalema'koo taapo'ke booroaung.” ’

34“Oi baka' Jerusalema'nupoong, Jerusalema'nupoong, dupisi'erererimaing Kumponing bakaning nakaro-nupoong, ee'noko teing dii'koo botovurimaing kapange too'pererima dupisi'erererikoo', arekee'ning batei-koo ninge dii' naro'koo kariamaung kokoree'ke baurukaa' kupa'koo boong naro'urimana', teka dii' aroo'dariaung. 35Aing ee, Kumponinge diikanoo' osi si'during dii'ke dii'ka tare-koo. Ee'noko naurampimang, dii' teing ning napo' oomeriaroo'naang bera tenang batei aa'meriainang, ‘Biraankenung tee naning Ovoring bakaang miring-koo pomaatomaung.’”

Currently Selected:

Luukeꞌ 13: nasNTpo

Highlight

Copy