मत्ती 16
16
फरिसीतिवी देवाच्येनकी त लङ्गुप
(मर्कूस ८:११-१३; लूका १२:५४-५६)
1ती ज्युक्ला फरिसीतिवा ताङ सदुकीतिवा येशूला खोक्पा ल्हापला खोकी चाला वानी, “दोजो ख्युरुङ कोन्छ्योक नेमा वावु यिन्सिन ङ्यिराङला त च्यिक छ्या तेन।” सिनी सिक्यासुङ। 2तमा येशूकी तिवाला सुङ्सुङ, “गोसेला ‘नाम मर्वु गलुप थोङ्सिमा सला याङ नाम सेङ्गिवी।’ सिनी ख्यिरा सिवी। 3तमा टोपला ‘नाम मर्वु गलुप ताङ र्हिमार खुरुप थोङ्सिमा हारिङ याङ लुङ छ्यर्वा ग्यकिवी।’ सिनी ख्यिरा सिवी। ख्यिरा नामला ल्हानी नाम चुकै डिवी सिरुप ति हाक्को थुप्किवी, यिने दी तुजेला च्युङ्गुप ताम्ङेतिवा ति ख्यिरा हाक्को मुथुपी। 4दुक्टा ताङ शम्डेनकी गिपाकी त छोल्गिवी, यिने तिवाला योनाकी त मिसिन यम्बा त थोङ मुथुपी।” सिनी सुङ्सुङ। तोजोयी सुङ्सिमा येशू तिवाला ते राङ क्युर ज्याक्नी तेसुर फेप्सुङ।
फरिसी ताङ सदुकीतिवी खमीर
(मर्कूस ८:१४-२१)
5तमा येशू लोमातिवी मुला ग्येम्छो शानी फर्केन फेपुप पेला लोमातिवी शुब्ज्याङ खुरुप टोक ज्येनोक। 6तमा येशूकी तिवाला “ख्यिराङ फरिसी ताङ सदुकीतिवी खमीर नेसुर च्याङ्से देता।” सिनी सुङ्सुङ। 7खोकी तुक सुङ्सिमा लोमातिवी खोप्रे पर्ला “दाक्पी मुला शुब्ज्याङ खुर माङुवु तप्की खोकी तुक सुङ्गुप यिन्दे।” सिनी मुक्तम तेन्सुङ।
8यिने येशूकी ती ताम्ङे ति हाक्कोनी तिवाला सुङ्सुङ, “ओ तेपा अला मेतुप टेङ! ख्यिरा मुला शुब्ज्याङ मे सिनी च्यिला च्यिककी च्यिकला मुक्तम देन्गिवी? 9ख्यिराङला तरोङ साङ हाक्माको? मी तोङ्डा ङला शुब्ज्याङ ङ चोके स च्यितुप पेला तीकी पुर्मातिवा तोलुम चो रुवु ख्यिराङला टासा मे? 10तमा येलुङ मी तोङ्डा ज्यीकी पर्ला शुब्ज्याङ दिन चोके गोनी तेरुप पेला तीकी पुर्मातिवा तोलुम चो रुवु? 11ख्यिराङ च्यिला ङे सिक्यावु ति शुब्ज्याङकी कोर्ला मिन सिनी हाक्मोकोवी? ख्यिराङ फरिसी ताङ सदुकीतिवी खमीर ने च्याङ्से देता।” 12खोकी तुक सुङ्सिमा ती ताम्ङे ति शुब्ज्याङला लुकुप खमीरकी कोर्ला मिनोक, यिने फरिसी ताङ सदुकीतिवी येन्देन नेसुर च्याङ्से दे सिनी सुङ्गुप नोक सिरुप ति लोमातिवी हाक्कोसुङ।
येशू सु यिन सिनी पत्रुसकी सिक्यावु
(मर्कूस ८:२७-३०; लूका ९:१८-२१)
13तमा येशू कैसरिया फिलिप्पी लुङ्बाला फेप्सिमा लोमातिवाला “मीतिवी ङ मी पुज्युङला सु यिन सिनी सिनोक?” सिनी टि नाङ्सुङ। 14तमा लोमातिवी दुक सिक्यासुङ, “ललाइकी बप्तिस्मा तेरुप यूहन्ना यिन सिनोक, ललाइकी कोन्छ्योककी लुङ्तेम्बा एलिया यिन सिनोक, तमा ललाइकी कोन्छ्योककी लुङ्तेम्बा यर्मिया याङ्ना कोन्छ्योककी लुङ्तेम्बातिवी पर्ला मिरा च्यिक यिन सिनी सिनोक।” 15तमा खोकी तिवाला “तुकै यिन्सिन ख्यिराङ ति ङला सु यिन सिनी सिवी?” सिनी टि नाङ्सुङ। 16तमा सिमोन पत्रुसकी “गेकेन याङ ङोसु वोतुप कोन्छ्योककी सेवु ख्रीष्ट यिन।” सिनी सिक्यासुङ। 17तमा येशूकी तीला सुङ्सुङ, “योनाकी पुज्युङ सिमोन, ख्युरुङला मोलाम थोपुप यिनो। दी ताम्ङे ख्युरुङला हाक्को च्यितुप ति मीकी क्यावु मिन, यिने देवाच्येनला ज्यु वोतुप ङे पपी क्यावु यिन। 18त ङ ख्युरुङला सिरिन, ख्युरुङ पत्रुस यिन। तीकी तेन्दोक ति दो यिन। ङ ती दोकी खला ङे चर्च जोयिनो, तमा शैतानला वोतुप शेप ओङकी तीला ग्येल मुथुप्तो। 19ङ ख्युरुङला देवाच्येनकी ग्येल्खापकी लिमीतिवा तेरिन। दोजो ख्योरो जम्बुलिङला काङ कि मिज्यिवे, देवाच्येनला साङ कि मिज्यिवी। ख्योरो जम्बुलिङला काङ कि ज्यिकिवे, देवाच्येनला साङ कि ज्यिकिवी।” सिनी सुङ्सुङ। 20तुक सुङ्सिमा खोकी लोमातिवाला “ङ ख्रीष्ट यिन सिरुप ताम्ङे ति सुला साङ मालापा।” सिनी क छ्येम्बु नाङ्सुङ।
येशूकी खोरुङ टुङ्गुप कोर्ला नम्दर शेतुप
(मर्कूस ८:३१-३३; लूका ९:२२)
21ती पेला नेज्युनी येशूकी लोमातिवाला “ङ वुतुङ के यरूशलेमला डो गोकिवी, तमा यहूदी गोमा कितुपतिवा ताङ कोङ्यार छ्येतिवा ताङ यहूदी छ्योकी गेकेनतिवी ङला छेटाङ बङी बिन्नी सेकिवी, तमा शेप ङ्यिमा सुमला कोन्छ्योककी ङला सेन्बु लोङ्गिवी।” सिनी सुङ्गुप छाल्सुङ। 22ती थोसिमा पत्रुसकी येशूला फेचेक दासाला टि गल्नी, “मेवी, चोवो। दुका ताम्ङे याङ चोवोकी खला नाम्साङ ख्येलुप मेङ्गिवी।” सिनी वुर्तम क्यानी सिक्यासुङ। 23यिने येशू पत्रुसकी थाकाला ग्युर्नी तीला “ओ शैतान, ख्युरुङ ङे चा नेवा ग्युक! ख्युरुङ ङे कि गोवु कोन्छ्योककी लाका कि मिज्यिवु छोल्गिनोक। ख्युरुङ कोन्छ्योककी ताम्ङेला मिन, यिने मी ताम्ङेला तिराङ नासाम तोङ्गिनोक।” सिनी सुङ्सुङ।
येशूला तिङ्योकुप तेन्दोक
(मर्कूस ८:३४–९:१; लूका ९:२३-२७)
24ती ज्युक्ला येलुङ येशूकी लोमातिवाला सुङ्सुङ, “सु ङे तिङ्ला तिङ्योकुप नो किवे, तीकी खोरो नोवातिवा क्युर ज्याक्नी खोरो ग्यङ्शिङ खुर्नी ङे तिङ्ला तिङ्योक गोकिवी। 25सी खोरो मिजी र्होकुप नो किवे, ती ति तोर्नी डिवी। तमा सी ङे थोक्ला खोरो मिजी तोर ज्यिकिवे, तीला नाम्साङ मिशिवु मिजी थोप्किवी। 26मीला जम्बुलिङ तेरी ङ्येनी साङ नाम्साङ मिशिवु मिजी माङ्येसुङ सिसिन तीला काङ ख्येप्साङ वे रो? मीकी खोरो तोरुप मिजी येलुङ ङ्येतुपला काङ तेर थुप्किवी रो? 27ङ मी पुज्युङ ङे पपी मोवा थोप्नी देवाच्येनकी लेन क्योलुप थुतिवी मुला लोक्नी वुङ्गिवी, ती पेला तेरी मीतिवा रे रेकी काङ क्यावे, तीकी क्यावु दोके राङ ङ छ्यक्तक तेर्किवी। 28वुतुङ के ङ ख्यिराङला सिरिन, दे लानी वोतुपतिवी पर्ला ललाइकी ङ मी पुज्युङ खोरो ग्येल्खापला ग्येला कितुपला वुङ्गुप माथोङ्वा सेक्ला मिशिवी।”
Currently Selected:
मत्ती 16: xsrNT
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
