Marcos 3

Din Lalaki Ay Nakingking Di Esay Takkay Na

(Mat. 12:9-14; Luc. 6:6-11)

1Inmey kasin si Jesus sin sinagoga et sinenggep. Wada et sidi di lalaki ay nakingking di takkay na. 2Wada abe di mangisisin-eng en Jesus mo agasana din lalaki ay doy sin agew ay pan-ibbayan, tan an-anapen day ipabasol da en sisya ta way pangidaruman da. 3Kanan Jesus sin sana ay nakingking di takkay na, “Omali ka sin sangoanan mi.” 4Asi pag kanan Jesus en daida, “Sinoy ipalobos di linteg tako ay amagen tako sin agew ay pan-ibbayan? Ay amagen din siged ono din lawa? Ay isalakan di ib-a ono peslen?” Ngem ginmiginek da. 5Manbonget si Jesus sin nangisisin-engana en daida. Mansakit abe di nemnem na begew sin makenteg ay nemnem da. Pag na et kanan sin nakingking di takkay na, “Oyadem san takkay mo.” Inoyad na et dadlon nailatonan. 6Siya di, kinmaan din Fariseo et en da nakitolag sin papasolot Ari Herod mo intoy iyat da ay mamse en Jesus.

Din Inmeyan Di Kaipoipogaw Sin Benget Di Lebeng

7Asi et kinmaan da Jesus ya din papasolot na isdi et inmey da sin benget di lebeng. Nabeweg di ipogaw ay inmonod en daida ay napod Galilea. Ad-ado abe di napo ed Judea, 8Jerusalem, sakop di Idumea, demang di ginawang ay Jordan, ya napo ed Tiro ya Sidon ya din linak-am da. Inmey da en Jesus, tan dindinnge da din am-in ay inam-amag na. 9Begew sin kaad-adon di ipogaw, inbaga na sin papasolot na ay en da man-as bangka ay tomokdoana tan into et mo ipiten di kaipoipogaw sisya. 10Tan ad-ado di inagasana, isonga din deday sakit na et inalibongbongan das sisya ta say giwiten da koma. 11Din iipogaw abe ay kinapet di aanito, sin nangil-ilaan da en Jesus, nanyakyakog-ong da ay mandokmog sin sangoanana dowan aben pakilkilaladen di aanito ay nangwani, “Sik-a di Anak Diyos!” 12Ngem dadlon inbilbilin Jesus en daida ay adi da ibagbaga di maipanggep en sisya.

Din Namilian Jesus Sin Sinpo Ya Dowa Ay Aapostol

(Mat. 10:1-4; Luc. 6:12-16)

13Pag mantikid si Jesus sin kadondontogan. Inayagana din ipogaw ay laydena, et inonod das sisya. 14Somawang da pay, yan pag nan dotokan di sinpo ya dowa.#3:14 Din naitapi sin odom ay manuskrito sin Griego et: sinpo ya dowa ay nginadanana si aapostol. Kanana en daida, “Pinilik dakayo ta makitee kayo en sak-en ya ta ibaak dakayo ay mangaskasaba. 15Iyaak abes dakayo si kalebbengan ay mangipakaan si aanito.” 16Naey di ngadngadan din dinotokana: si Simon (ay bindayan Jesus si Pedro), 17din dowa ay anak Zebedeo ay da Santiago en Juan (ay bindayan Jesus si Boanerges, laydena ay kalien, kaman kido), 18si Andrew, si Felipe, si Bartolome, si Mateo, si Tomas, si Santiago ay anak Alfeus, si Taddeus, si Simon ay makwani en Patriota tan insakit na din ili da, 19ya si Judas Iscariot ay nanglipot en sisya.

Si Jesus Ya Si Beelzebul

(Mat. 12:22-31; Luc. 11:14-23)

20Pag dan somaa. Asi et nasinop kasin di kaipoipogaw et magay wayan da Jesus ay mangan. 21Idi nadamag din aag-i na, nanlobwat da ta en da ton-oden, tan wada da di mangmangwani en naboge sisya. 22Wada abe di mamaestron di linteg ay napod Jerusalem ay nangnangwani, “Kinapet Beelzebul sisya. Din doy ap-apon di aanito di nangidawat en sisya si panakabalina ay mangipakpakaan si aanito.” 23Siya di, inayagan Jesus daida yan kanana ay nangiarig, “Intoy iyat Satanas ay mangipakaan sin awak na? 24Mo man-asigobat din kaipoipogaw sin esa ay ili, madadael din ili ay doy. 25Siya abe sin pamilya, mo man-iibaw da, mansisian da. 26Iso na abe en Satanas. Mo pakpakaanena din iib-a na ay anito, laydena ay kalien ay ib-ibawenas daida, et awni et maga di panturayana. 27Maiarig si Satanas si mabikas ay ipogaw, tan magay makasgep sin beey na ta akewena din bonag na mo adi na baloden omonas sisya. Asi mabalin ay itagtag na din bonag na.

28“Tet-ewa nan ibagak en dakayo ay mabalin ay mapakawan di olay sino ay basol di ipogaw ya olay sino di ibaga na ay mangipalawlawas odom. 29Ngem din mangipalawlawa pay sin Ispirito Santo et adi polos mapakawan basol na, tan say basol na di ay eng-enggana.” 30Say kanan Jesus di, tan inbagbaga da ay kinapet di anitos sisya.

Si Inan Jesus Ya Din Aag-i Na

(Mat. 12:46-50; Luc. 8:19-21)

31Pag somawang si ina na ya din aag-i na sin beey ay kad-ana et inpaayag da. 32Isonga din kaipoipogaw ay tinmotokdo ay nanglilikob en sisya et kanan da, “Si inam ya din aag-im et wada da sin bel-ayan ay ipaay-ayag daka.”

33Kanan Jesus, “Aw pay dedan, ngem wada pay di odom ay ibilang ko ay inak ya aag-ik.” 34Il-ilaena pay din tinmokdotokdo ay doy, kanana, “Da naey si inak ya aag-ik, 35tan din mangamag sin layden Diyos et daida di maibilang ay inak ya aag-ik.”

Currently Selected:

Marcos 3: KD

Highlight

Copy