Marcos 1

Din Nankaskasabaan Juan ay Mamonbonyag

(Mat. 3:1-12; Luc. 3:1-18; Jn. 1:19-28)

1Siya na di panlogian di siged ay damag ay maipanggep en Jesu Cristo ay Anak Diyos. 2Waday inbagan Diyos sin Anak na ed nabaon ay inpaisolat na en Isaias ay esa ay mamadto. Kanana,

“Dengngem, waday ibaak ay mangon-ona mo sik-a ay mangisagana sin danem. 3Manbogaw sin lugar ay magay omili ay mangmangwani, ‘Isagana yo din danen di Apo ay omali ta say siged di danan ay pandanana.’”#1:3 Isaias 40:3.

4Et natongpal di, tan nanpailas Juan ay Mamonbonyag sin lugar ay magay omili, et nangaskasaba sin en nandengdenge. Kanana, “Ibabawi yo din basbasol yo yan manpabonyag kayo ta say pakawanen Diyos din basbasol yo.” 5Em-emey en sisya di omili ed Jerusalem ya din man-ili sin am-in ay ili ed Judea. Inpodpodno dan basbasol da et pag bonyagan Juan si daida sin ginawang ay Jordan.

6Din badon Juan et owat inabel ay book di kamel ya kopkop di animal di bilko na. Din kankanena abe et dodon ya danom di iyokan. 7Inbagbaga na sin kaipoipogaw, “Wada di nangatngato mo sak-en ay omonod. Et begew din nay kinangato na, adiak maikari ay olay mangobad sin galot di sapatos na.#1:7 Din esa ay obla ay naidawat sin kababaan ay baa ono bag-en ed idi et kaanena din sapatos di among na mo somaa et senggep sin beey. Isonga din layden Juan ay kalien et adi na ibilang din awak na ay maikari ay mansilbi ay olay owat bag-en en Jesus. 8Danom anggoy di ibonyag ko en dakayo, ngem mo sisya pay et bonyaganas dakayo si Ispirito Santo.”

Din Nabonyagan Jesus

(Mat. 3:13-17; Luc. 3:21-22)

9Sin timpo ay doy ay nanbonbonyagan Juan, dinmateng et si Jesus ay napo ed Nazaret ay esa ay ili sin probinsiya ay Galilea, et binonyagan Juan sisya sin ginawang ay Jordan. 10Sin kinmaanan Jesus sin danom, pag na et ilaen ed langit ay mabokbokatan ya din Ispirito Santo ay kaman kalapati ay bomabbaba enggana ay pinmatong en sisya. 11Pag wada di kali ay napod langit ay kanana en, “Sik-a di laydelaydek ay anak ko. Sik-a di kakapnekak.”

Din Namadasan Satanas Ay Nanolisog En Jesus

(Mat. 4:1-11; Luc. 4:1-13)

12Pag et iturong din Ispirito Santo si Jesus sin lugar ay magay omili. 13Nantetees di si opatapolo ay agew dowan aben pinadapadas Satanas ay manolisog en sisya. Wada abey mankaaangat ay animal sin kad-ana, ngem laton ay wada di aanghel ay namadbadang en sisya.

Din Nanlogian Jesus Ay Nan-itdo

(Mat. 4:12-17; Luc. 4:14-15)

14Idi nakdeng ay naibalod si Juan, nantaoli si Jesus ed Galilea ay mangikasaba sin siged ay damag ay napo en Diyos. 15Kanana, “Dinmateng din timpo ay inkeddeng Diyos. Dandani di panturayana. Ibabawi yo ngarud din basbasol yo yan mamati kayo sin siged ay damag.”

Din Nangayagan Jesus Sin Damo Ay Papasolot Na

(Mat. 4:18-22; Luc. 5:1-11)

16Sin namingsan ay mandad-an si Jesus sin benget di annawa ay lebeng ay Galilea, inila nas da Simon en Andrew ay sin-iyogtan ay manabtabokol, tan say obla da. 17Kanana en daida, “Enggana ed wani, manabtabokol kayos nigay. Manbalin kayo et si pasolot ko#1:17 Din kanana sin Griego et: Omonod kayo… Di laydena ay kalien et makiey da en Jesus ay pasolot na. ta itdoak dakayo ay mangawis si ipogaw.”#1:17 Din kanana sin Griego et: …ta itdoak dakayo ay manabokol si ipogaw. 18Kaipayag da sin tabokol da yan nakiey da en sisya. 19Mandad-an da pay sin benget di lebeng, inilan Jesus di dowa pay ay sin-iyogtan ay da Santiago en Juan. Nanlologan da sin bangka da ay mangisagsagana sin tabokol da. 20Kaayag si Jesus en daida, et tinaynan da si ama da ya din lallalaki ay laglagboana sin bangka, et nakiey da abe en Jesus.

Din Nangipakaanan Jesus Si Anito

(Luc. 4:31-37)

21Inmey da Jesus ed Capernaum. Sin agew ay pan-ibbayan, sinenggep da sin sinagoga, et inlogin Jesus ay man-itdo. 22Nasdaaw din kaipoipogaw sin inyat na ay nan-itdo, tan sin nan-it-itdoana, maila da ay waday turay na, ay baken say in-inyat di mamaestron di linteg. 23Wada et sidi di lalaki ay kinapet di anito. 24Kaibogaw ay nangwani, “Inayan! Jesus ay taga-Nazaret, apay nga disdistolboem dakami? Ay inmali ka aya ta dosaem dakami? Am-ammok dedan sik-a. Sik-a din nasantoan ay Anak Diyos.”

25Pag bilinen Jesus din anito ay nangwani, “Igiginek mo! Taynam sisya.” 26Asi et inpakedas din anito din lalaki ay sana dowanan pakilaladen, et pag nan taynan.

27Natekeng din matan di wadas di yan nan-asibaga da en, “Wey! Anna pay dis baro ay mait-itdo! Olay aanito yan wada iman di turay na ay mamilin en daida yan komaan da.” 28Siya di, naganno ay nandinamag di maipanggep en Jesus sin amin ay soli ed Galilea.

Din Nangagasan Jesus Sin Ad-ado Ay Mansakit

(Mat. 8:14-17; Luc. 4:38-41)

29Idi binmala da Jesus sin sinagoga, nandagas da sin beey da Simon en Andrew. Nakiey abe da Santiago en Juan. 30Kambaw et din katogangan Simon ay babai et binmabaktad, tan manpodpodot. Inbaga da ay dagos en Jesus. 31Pag somag-en si Jesus en sisya, yan intakkayana ta badangana ay bomangon. Pag et makaan din podot na, et pinakanas daida. 32Madipos pay din agew, in-ey din omili en Jesus din am-in ay kinapet di anito ya mansaksakit. 33Nasinop abe din am-in ay omili sin bel-ayan di beey ay kad-ana. 34Et inagasana din ad-ado ay mansakit si nakalakalasi ay sakit. Pinakaana abe din ad-ado ay anito dowanan paginken daida, tan ammo da mo sinos sisya.

Din Nan-it-itdoan Jesus Sin Kasinasinagoga

(Luc. 4:42-44)

35Sin gabis, binmangon si Jesus et inmey sin naidodolin ay lugar ta say en mankararag sidi. 36Bomangon pay da Simon, en da inanaanap. 37Idi dinatngan da, kanan da en sisya, “Din kaipoipogaw et an-anapen das sik-a.” 38Ngem kanana, “En tako pay dedan sin nandinmang ay il-ili ta say enak mangasaba abes di, tan say panggep ko ay inmalis na.” 39Asi da pay manlikliked sin inil-ili ed Galilea ay mangaskasaba sin kasinasinagoga da.

Din Nangagasan Jesus Sin Mansakit Si Kaeegyat Ay Sakit Di Kodil

(Mat. 8:1-4; Luc. 5:12-16)

40Sin namingsan, inmey en Jesus di lalaki ay mansakit si kaeegyat ay sakit di kodil. Nandokmog en sisya ay manpakpakaasi, “Ammok ay kabaelam ay mangaan sin sakit ko mo laydem.”

41Naseg-angan si Jesus et inoyad na din takkay na ta ikapay na sin lalaki ay sana. Pag nan kanan, “Laydek, madalosan ka.” 42Et nakaan ay dagos din sakit na. 43Asi pinakaan Jesus sisya et dadlonan binilin ay nangwani, 44“Adi ka idaddad-at na si olay sino ay ipogaw mo adi et emey ka ay en manpaila sin padi ta ilaena ay nakaan sakit mo. Asi ka idawat en sisya din inbilin Moses ay idaton yo en Diyos ta say pangammoan din kaipoipogaw ay tet-ewa ay sinmiged ka.”#1:44 Levitico 14:1-8. 45Ngem adi na pinati, mo adi et ena dinad-adad-at din naamag en sisya. Di nantongpalana et adi makaeey si Jesus sin il-ili tan mo et abten di nabeweg ay ipogaw, mo adi et nantetee sin naidodolin ay luglugar ay magay omili. Ngem olay mo siya di, em-emey pay dedan di kaipoipogaw sin kad-ana ay napo sin am-in ay soli.

Currently Selected:

Marcos 1: KD

Highlight

Copy