Genesis 11

Din Nankinalasian Di Kalin Di Ipogaw

(11:1-9)

1Idi siya di, es-esa di kalin di am-in ay ipogaw isnan daga. 2Idi manbiyahi da pay ay emey sin kad-an di belaan di agew, waday dinatngan da ay annawa ay tanap ed Sinar#11:2 Di esa abe ay ngadan din ili ay nay et Babilonia. et nan-ili das di.

3Idi namingsan, nanngangalat da yan kanan da, “En tako mandamilis linang ta way amagen tako si beey tako.” Et say inyat da di. Inset da ay nangioto sin linang ta komenteg, et aspalto abe di inpakpak da. 4Asi da kanan, “Man-amag tako et si siyodad ay way beey ay omdas ed daya ta say madayaw tako ya adi tako mansisian sin labaw di daga.”

5Osdongan pay Diyos din siyodad ya din nakayang ay beey ay am-amagen da, 6kanana, “Mo say iyat da sa ed wani tan es-esay nemnem ya kali da, maga di adi da kabaelan sin tapin di agew. 7En tako ngarud isdi ta pankinalasien tako di kali da ta say adi da mankinaawatan.” 8Et say inamag Diyos di, et pag mansisian din kaipoipogaw sin labaw di daga yan adi da intoloy ay nangamag sin siyodad ay doy. 9Say begew ay nginadanan da din ili ay doy si Babel#11:9 Mais-o di kadngean di Babel sin kalin di Hebreo ay din olog na et “nankinalasi.” ono Babilonia, tan say nangipankinalasian Diyos sin kalin di ipogaw. Et nanlogi isdi, enggay naiwarawaras da sin intiro ay lobong.

Naey di listaan di polin Sem ay anak Noe. Si Sem et say aman Arfaxad ay aman aben Sela. Si Sela yan aman Eber ay aman aben Peleg. Si Peleg et say aman Reu ay aman aben Serug. Si Serug di aman Nahor, yan si Nahor di aman Tera. (11:10-26)

Din Listaan Di Polin Sem Ay Ap-on Abram

(11:27-32)

27Si Tera et say aman da Abram en Nahor ya si Haran. Si Haran pay di aman Lot. 28Asi et natey si Haran sin ili na ay Ur ay sakop di Babilonia idi deda pay laeng si ama na. 29Nakiasawa abes da Abram en Nahor. Din asawan Nahor et si Milca ay pangpangoan Isca ay anak Haran, yan din asawan Abram et si Sarai. 30Asi et maga di anak da Abram, tan basig din asawa na.

31Idi namingsan, inayagan Tera din anak na ay si Abram ya din apo na ay si Lot ay anak en Haran ya din innapo na ay si Sarai ay asawan Abram, et kinmaan da ed Ur ay sakop di Babilonia ta emey da koma ed Canaan. Ngem idi sinmawang da ed Haran, nan-ili das di. 32Et say ili ay nateyan Tera idi nantawen si 205.

Currently Selected:

Genesis 11: KD

Highlight

Copy