Amarkɩ 4

Kaara n lobge a bõnbuuri makrɛ

(Amatie 13:1-9, Aluki 8:4-8)

1Azezi le bɔna la mõgrɛ la nõorʋm zãsna nẽrba. Tɩ nẽr-kʋʋŋɔ zozo'e lagsɛ a zẽ'am. Bɛla tɩ a kẽ õorŋɔ la n boe mõgrɛ la pʋam na zĩ'ire, dee tɩ nẽr-kʋʋŋɔ la wuu bɔna mõgrɛ la nõorʋm. 2Tɩ a makɛ magsa zãsʋm ba yɛla zozo'e. A zãsŋɔ la pʋam a yele ba yetɩ: 3«Selse-ya, kaara n daan yese tɩ a lobge a bõnbuuri. 4La ẽn sẽŋɛ ka lɔbgra bõnbuuri la, basɛba lui la sore zuo, tɩ niinto wa'am wa di ba. 5Tɩ basɛba lui zẽ'a n de tãmpĩisi tɩ tẽntõnnɔ ka zo'oge mĩ. Tẽntõnnɔ n ka zo'oge mĩ na ĩyã, tɩ ba bule tɔtɔ yese, 6tɩ wʋntɛɛŋa yẽkɛ wẽ ba tɩ ba ki, ba yẽga n ka kẽ tẽŋa la ĩyã. 7Tɩ bõnbuuri basɛba lui gõ'osɩ zẽ'a. Tɩ gõ'osɩ la yese fʋrɛ ba, tɩ ba ka wɔm biɛ. 8Tɩ bõnbuuri basɛba lui zẽ'e-sõŋɔ pʋam bule yese, bɩ wɔm biɛ. Basɛba wɔm na biɛ pitã-tã, tɩ basɛba wɔm pisyoob-yoobɩ, tɩ basɛba wɔm kɔbga kɔbga.» 9A yele bɛla dee yetɩ: «Sɛka n wõm yetɔga wã, a selse sõŋa sõŋa.»

Azezi pa'alɛ magsa võorɛ

(Amatie 13:10-23, Aluki 8:9-15)

10La Azezi yese la kẽnkɛrŋa tɩ sɛba n kaagɛ ẽ na, la a karẽnbiisi pia la ayi la soke ẽ magsa la võorɛ. 11Tɩ a yele ba yetɩ: «Nawẽnnɛ botɩ yãma bãŋɛ a so'olʋm yelle n sʋgɛ la mɛ. La sɛba n ka boe tõma pʋam na, yɛla wuu de la magsa bɔ ba.

12‹Bɛla tɩ ba wʋn bɩsɛ yẽ dee kãn bãŋɛ.

Ba wʋn wõm dee kãn bãŋɛ a võorɛ.

Sãn dagɩ nɩ bɛla, ba wʋn leme wa'am Nawẽnnɛ zẽ'am,

tɩ a basɛ ba tõon-be'ero taalɛ.› »

13La Azezi le yele ba yetɩ: «Yãma sãn ka bãŋɛ makrɛ ẽna wã võorɛ, yãma wʋn ẽŋɛ la wãne bãŋɛ magsa la wuu võorɛ? 14Bõnbuuri la tɩ kaara la lobge la, de la Nawẽnnɛ yetɔga. 15Sore la zuo tɩ bõnbuuri sɛba lui la, ãn wʋ nẽr-sɛba n wõm yetɔga la, tɩ Asũtãana wa'am tɔtɔ wa yese yetɔga la ba sũure pʋam. 16La tãmpĩa la zuo tɩ bõnbuuri sɛba lui la, ãn wʋ nẽr-sɛba n wõm yetɔga la dee sakɛ to'oge ba tɔtɔ la sũ-yẽlga. 17La yetɔga la n ka kẽ ba sũure pʋam na ĩyã, ba sakɛ la wakatɛ fẽe, la toogo bɩɩ nãmsgɔ sãn paagɛ ba yetɔga la ĩyã, ba basrɩ mɛ tɔtɔ. 18La gõ'osɩ la zẽ'a tɩ bõnbuuri sɛba lui la, ãn wʋ nẽr-sɛba n wõm yetɔga la, 19tɩ ba yɛm yɔɔra la dũnia wã yɛla, tɩ bõntarsõm yɛla pã'asra ba, tɩ yɛla basɛba yɛmleego tara ba, botɩ yetɔga la ka tãna wʋn wɔm biɛ ba sũure pʋam. 20La zẽ'e-sõŋɔ la tɩ bõnbuuri sɛba lui la, ãn wʋ nẽr-sɛba n wõnnɩ kõ-yẽlga la sakra, wɔm biɛ. Tɩ basɛba wɔm pitã-tã, tɩ basɛba pisyoob-yoobɩ, tɩ basɛba kɔbga kɔbga.»

Fɩtla makrɛ

(Aluki 8:16-18)

21Azezi le yele ba yetɩ: «Ba yõ'orɩ fɩtla dɩkɛ pɩ'ɩgɔ vuge ẽ, bɩɩ ba dɩkɛ ẽ ze'ele gɔrgɔ tilum? Ayɛɩ, ba wʋn dɩkɛ ẽ zoole la sɛla zuo. 22Bɛla, bõn-sɛka n sʋgɛ, dẽnɩ tɩ a puke. La bõn-sɛka wuu n lile wʋn lilge. 23Nẽr-sɛka n wõm yetɔga wã, a selse sõŋa sõŋa.»

24A le yele ba yetɩ: «Mõrgɛ-ya wõm yãma n selsrɩ se'em na võorɛ. Bõn-sɛka tɩ ya dɩkɛ makɛ bɔ nẽrba la, Nawẽnnɛ wʋn makɛ la bɛla lebse ya, le makɛ pa'asɛ. 25Se'ere n soe la, sɛka n tarɩ, a wʋn bɔ ẽ pa'asɛ. La sɛka n ka tarɩ, bõn-sɛka tɩ a tarɩ la, a wʋn to'oge ẽ.»

Bõnbuuri bɩa makrɛ

26Azezi le yele ba yetɩ: «Nawẽnnɛ so'olʋm ãn wʋ nẽra n bʋrɛ a bõnbuuri va'am pʋam. 27A sãn gĩsra mɛ bɩɩ a sãn piga mɛ, wʋntɛɛŋa la yʋ'ʋŋɔ, bõnbuuri la bulli mɛ yɛsra bɩta, tɩ a ka mina lan ɩtɩ se'em. 28Tẽntõnnɔ n botɩ bõnbuuri la yɛsra ba mẽŋa, dẽŋɛ puse võorɔ, yãŋa yõgɛ pʋa, wɔm biɛ, tɩ ba bɩ. 29La biɛ la sãn bɩ, kaara la sɛ'ɛrɩ ba mɛ, se'ere n soe la, bõnkɔɔla lagsgɔ paagɛ mɛ.»

Sɔ'ɔrɔ biire makrɛ

(Amatie 13:31-34, Aluki 13:18-19)

30Azezi le yele ba yetɩ: «Tɩ wʋn dɩkɛ la bẽm makɛ la Nawẽnnɛ so'olʋm, bɩɩ tɩ wʋn yetɩ a wõn na bẽm? 31A ãn wʋ sɔ'ɔrɔ biire n ãn pɩka pɩka gãnna bõnbuuri wuu n boe dũnia zuo. 32La ba sãn bʋrɛ ẽ, a bɩtɩ mɛ puse wil-kãra gãnna zẽvõorɔ buuri wuu. Tɩ niinto tãna wʋn tɛ ba tʋgrɔ a zuo a mã'asʋm pʋam.»

33Azezi daan dɩkɛ la magsa zozo'e n ãn wʋ bãna tɔgɛ bɔ ba, masɛ wʋ ban wʋn tã'agɛ wõm se'em na. 34A ka tɔgɛ bɔ ba tɩ la sãn dagna magsa. La a sãn yese la a karẽnbiisi la mã'a kẽnkɛrŋa, tɩ a pa'alɩ ba yɛla la wuu võorɛ.

Azezi botɩ kʋsebgo yõkɛ

(Amatie 8:23-27, Aluki 8:22-25)

35Daar-ẽŋa mẽŋa zaanõorɛ, tɩ Azezi yele a karẽnbiisi la yetɩ: «Tɩ dooge-ya mõgrɛ la ke bɔba.» 36Tɩ a karẽnbiisi la basɛ nẽr-kʋʋŋɔ la, dee sẽŋɛ ka kẽ õorŋɔ la tɩ Azezi boe mĩ na pʋam, dɩkɛ ẽ tɩ ba wɛ'ɛsa. La õornɔ basɛba n daan mẽ boe ba zẽ'am. 37Tɩ kʋseb-kãtɛ wa vugra ke'enke'em, tɩ ko-mĩ'isi wẽ'era kẽ'era õorŋɔ la pʋam deege la ba pɩrɛ ẽ. 38La Azezi gã la õorŋɔ la poorʋm kʋkɛ dafeere gĩsra. Tɩ a karẽnbiisi la nẽegɛ ẽ, soke ẽ yetɩ: «Karẽnsãama, tõma n yetɩ ki wã, la ka pakɛ fõn?» 39Tɩ a isge tãsɛ kʋsebgo la, dee yele ko-mĩ'isi la yetɩ: «Go'oge-ya, ãna-ya sĩm.» Tɩ kʋsebgo, la ko-mĩ'isi la go'oge ãna sĩm. 40Tɩ a soke ba yetɩ: «Bẽm tɩ ya zɔta dabeem bɛla? Bẽm tɩ ya ka bɔ Nawẽnnɛ sɩra?» 41Tɩ dabeem ba kẽ ba. Tɩ ba sɔkra taaba yetɩ: «Ãne n de ẽna tɩ kʋsebgo la ko'om sakra a nõorɛ?»

Currently Selected:

Amarkɩ 4: gurDBL

Highlight

Copy