Amarkɩ 3

Bʋraa nu'ugo n ki, tɩ Azezi botɩ a yẽ ĩmã'asʋm

(Amatie 12:9-14, Aluki 6:6-11)

1Bɛla poorʋm, Azezi le kẽ la Zifdõma wẽndeem. Tɩ bʋraa bɔna mĩ tɩ a nu'ugo ki. 2Tɩ ba bɩsra Azezi wʋn botɩ bʋraa la yẽ ĩmã'asʋm vo'osgo daarɛ bɩɩ, a kãn botɩ a yẽ ĩmã'asʋm. Ba daan eerɩ la ba doose bilam dõrɛ ẽ. 3Tɩ Azezi yele bʋraa la nu'ugo n ki la yetɩ: «Isge ze'ele tẽŋasʋka.» 4Dee soke sɛba n bɩsrɩ ẽ na yetɩ: «Sore boe tɩ nẽra ẽŋɛ sõŋa vo'osgo daarɛ bɩɩ, a ẽŋɛ be'em? Sore boe tɩ a fãagɛ nẽra vo'osgo daarɛ bɩɩ, a kʋ ẽ?» Tɩ ba sĩna. 5Tɩ Azezi sũure yĩige, tɩ a bɩsɛ nẽrba la kaagɛ, tɩ a sũure sã'am, ba sũure n kɛ la ĩyã. La a yele bʋraa la yetɩ: «Tẽegɛ fʋ nu'ugo la.» Tɩ a tẽegɛ, tɩ nu'ugo la yãŋa tẽegɛ ãna sõŋa. 6Tɩ Farisi dõma yese tɔtɔ ka bãm la naba A'erɔdɩ nẽrba bãma n wʋn ẽŋɛ se'em kʋ Azezi.

Nẽrba zozo'e n lagsɛ Azezi zẽ'am Galile mõgrʋm

7Azezi la a karẽnbiisi la yese sẽŋɛ la Galile mõgrʋm bɔba. Tɩ nẽrba zozo'e ze'ele Galile, la Zude, 8la Zerizalɛm, la Idume, la Zʋrdẽ kʋlaa doone, la tẽn-sɛba n lɛm Tiiri la Sidõ doose ẽ. Nẽr-kʋʋŋɔ la daan wõm na ẽn ẽŋɛ se'em na wuu, tɩ ba sẽŋɛ a zẽ'am. 9Tɩ Azezi yele a karẽnbiisi la yetɩ, ba vuta õorŋɔ lɛm na tɩ nẽrba la da wa mike ẽ. 10A daan botɩ bã'adõma zozo'e n yẽ ĩmã'asʋm, bɛla tɩ bã'adõma wuu daan mikra taaba bɔɔra tɩ ba paagɛ kalʋm ẽ. 11La kʋlkã'arsɩ n dolɩ nẽr-sɛba la sãn ẽn yẽ ẽ, ba luti la a nẽŋam kaasra tagursi yɛta tɩ: «Fõn de la Nawẽnnɛ Dayʋa.» 12Tɩ Azezi daan zɛbɛ kʋlkã'arsɩ la yetɩ, ba da botɩ nẽra bãŋɛ ẽŋa n de nẽr-sɛka.

Azezi looge a karẽnbiisi pia la ayi

(Amatie 10:1-4, Aluki 6:12-16)

13La bɛla poorʋm Azezi daan sẽŋɛ ka zom na tãŋa zuo, dee wi nẽr-sɛba tɩ a boorɩ la tɩ ba wa'am a zẽ'am. 14Tɩ a looge nẽrba pia la ayi tɩ ba bɔna la ẽ, tɩ a tõnna ba tɩ ba sẽnna mõola Nawẽnnɛ kõ-yẽlga, 15dee bɔ ba pãŋa tɩ ba digra kʋlkã'arsɩ tɩ ba yɛsra. 16Sɛba tɩ a looge la daan de la Asimõ tɩ Azezi sɩ a yʋ'ʋrɛ tɩ Apɩyɛɛrɩ, 17la Azebede dayɔɔsɩ Azakɩ la a yɩbga Azã, tɩ a sɩ ba yʋ'ʋrɛ tɩ Bʋanɛrgɛsɩ. A võorɛ de la nẽrba n ãn wʋ sa-dãmŋɔ. 18La A'ãndre, la Afilipi, la Abatelemi, la Amatie, la Atoma, la Alfe dayʋa Azakɩ, la Atade, la Asimõ sɛka n de Zelɔtɩ nẽra ayɩla la, 19la Azudaasɩ Iskariyo, sɛka n wʋn pa'alɛ tɩ ba yõkɛ Azezi la.

Azezi pãŋa gãnnɩ Asũtãana

(Amatie 12:22-32, Aluki 11:14-23;12:10)

20La Azezi daan kule la yire, tɩ nẽrba le lagsɛ zozo'e. Tɩ Azezi la a karẽnbiisi la ka yẽ folle wʋn di. 21Tɩ ba daan yetɩ Azezi yirsri mɛ, tɩ a yir-dõma wõm bɛla sẽŋɛ tɩ ba ka yõkɛ ẽ.

22Tɩ lɔɔ karẽnsãandõma n ze'ele Zerizalɛm wa'am wa yetɩ: «Abelzebuli n dolɩ ẽ, la de la ẽŋa n de kʋlkã'arsɩ naba la pãŋa tɩ a tarɩ digra kʋlkã'arsɩ tɩ ba yɛsra.» 23Tɩ Azezi wi ba, makɛ makrɛ bɔ ba yetɩ: «Asũtãana wʋn ẽŋɛ la wãne dige Asũtãana? 24So'olʋm ayɩla nẽrba sãn welge zɛbra taaba, so'olʋm ẽŋa wʋn wõrgɛ mɛ. 25La yire ayɩla dõma sãn welge zɛbra taaba, yi-ẽŋa wʋn wõrgɛ mɛ. 26La Asũtãana sãn isge zɛbɛ la a mẽŋa welge, a pãŋa la ba'asɛ mɛ, a kãn tã'agɛ ze'ele.

27La nẽra ka tã wʋn kẽ pãŋa dãana yire ka vaagɛ a lɔgrɔ, sãn dagna tɩ a dẽŋɛ lʋ pãŋa dãana la mɛ, dee vaagɛ a lɔgrɔ la.

28Mam yetɩ ya la sɩra, tɩ Nawẽnnɛ tã wʋn basɛ nẽrsaalba tõon-be'ero la wuu tɩ ba ɩtɩ la, la ba pɔ'ɔrɛ yetɔga la wuu taalɛ. 29La nẽra sãn pɔ'ɔgɛ Nawẽnnɛ Sɩa, Nawẽnnɛ kãn malɩn basɛ ẽ taalɛ. Tõon-be'e-ẽna taalɛ boe la a dãana zuo wakatɛ wuu.» 30Ban yetɩ kʋlkã'arga n dolɩ ẽ na ĩyã, tɩ a yele bɛla.

Azezi ma, la a yɩbsɩ

(Amatie 12:46-50, Aluki 8:19-21)

31Tɩ Azezi ma, la a yɩbsɩ wa'am wa zɛ yẽŋa dee tõm yetɩ, ba wi ẽ tɩ a wa'am. 32La nẽr-kʋʋŋɔ n daan zĩ kaagɛ ẽ, tɩ ba yele ẽ yetɩ: «Fʋ ma, la fʋ yɩbsɩ n wãna n boe yẽŋa ɛɛra fɔ.» 33Tɩ Azezi yele ba yetɩ: «Ãne n de mam ma, la ãndõma n de mam yɩbsɩ?» 34Dee bɩsɛ nẽr-sɛba n zĩ kaagɛ ẽ na, yetɩ: «Mam ma, la mam yɩbsɩ n wãna. 35Se'ere n soe la, nẽr-sɛka woo n ɩtɩ Nawẽnnɛ n boorɩ se'em na n de mam yɩbga, la mam tã, la mam ma.»

Currently Selected:

Amarkɩ 3: gurDBL

Highlight

Copy