Amarkɩ 12

Nẽrba n bɩsrɩ va'am makrɛ

(Amatie 21:33-46, Aluki 20:9-19)

1Bɛla poorʋm, Azezi daan magsrɩ la magsa tɔgra bɔ'ɔra ba yetɩ: «Bʋraa ayɩla n daan kɔ a va'am sele tɩɩsɩ yʋ'ʋrɛ n de viinye, mẽ lalga kaagɛ ẽ, dee tũ boko tɩ ba wẽkra viinye la biɛ, dee mẽ de-woko tɩ ba zɔnna bɩsra a va'am na, yãŋa dɩkɛ va'am na bɔ nẽrba tɩ ba bɩsra, dee sẽŋɛ sore. 2Tɩ viinye la biɛ go'osgo wakatɛ paagɛ, tɩ a tõm a tõntõnna tɩ a sẽŋɛ sɛba n bɩsrɩ va'am na zẽ'am ka to'oge a pʋrɛ wa'am wa bɔ ẽ. 3Tɩ ba yõkɛ tõntõnna la wẽ, botɩ a lebe kule zãŋa. 4Tɩ va'am na dãana le tõm nẽra ayɩla ba zẽ'am, tɩ ba wẽ a zuugo ãagɛ, dee yaalɛ ẽ. 5Tɩ a le malɩn tõm nẽra ayɩla, tɩ ba kʋ ẽ. Tɩ a tõm nẽrba zozo'e, tɩ ba wẽ basɛba, dee kʋ basɛba.

6La nẽra ayɩla mã'a n daan deege tɩ a tãna wʋn tõm, la de la a bi-nõŋrɛ. Tɩ a daan tõm ẽ sɛba n bɩsrɩ va'am na zẽ'am, dee tẽ'esra yetɩ: ‹Ẽna n de mam dayʋa la, ba wʋn nan ẽ.› 7Tɩ sɛba n bɩsrɩ va'am na yele taaba yetɩ: ‹Ẽna n wʋn wa sɔɔgɛ sɔna a sɔ bõntarsõm na, basɛ-ya tɩ tɩ kʋ ẽ, tɩ bõntarsõm na lebge tõma bõnɔ.› 8Tɩ ba yõkɛ ẽ kʋ, tarɩ ẽ yese va'am na kẽnkɛrŋa ka basɛ.

9Bɛla, va'am na dãana yãŋa wʋn ẽŋɛ la wãne? A wʋn wa'am wa kʋ sɛba n bɩsrɩ va'am na mɛ, dee to'oge va'am na bɔ basɛba. 10Yãma põn karẽŋɛ Nawẽnnɛ gõŋɔ zẽ'e-sɛka n gʋlsɛ yetɩ:

‹Kug-sɛka tɩ tõnmẽtba zagsɛ la

n lebge kugre n botɩ deego la tara pãŋa.

11La de la Zuudãana Nawẽnnɛ n ẽŋɛ bõn-ẽna,

tɩ la dɛna yel-di'iŋa bɔ tõma.› »

12Tɩ Zifdõma nẽŋadõma la daan ɛɛra tɩ ba yõkɛ Azezi, se'ere n soe la, ba mi tɩ la de la bãma ĩyã tɩ a makɛ makrɛ ẽŋa, la ba daan zotɩ la nẽrba la, tɩ ba basɛ ẽ dee fõrgɛ.

Ba soke Azezi lampo yʋa yelle

(Amatie 22:15-22, Aluki 20:20-26)

13Tɩ ba tõm Farisi dõma basɛba, la naba A'erɔdɩ nẽrba basɛba, tɩ ba sẽŋɛ ka soke Azezi sokre tɩ a tɔgɛ tuuge tɩ ba yẽ sore yõkɛ ẽ. 14Tɩ ba wa'am wa yele ẽ yetɩ: «Karẽnsãama, tõma mi tɩ fõn de la sɩra dãana, dee ka fabla nẽrba n tɔgrɩ fõn yelle se'em na, fõn ka tũ'usri nẽrba, la fõn zãsnɩ nẽrba Nawẽnnɛ sore yɛla la sɩra. Tõma yetɩ tɩ soke bɩsɛ, sore boe tɩ tɩ yɔ lampo bɔ Rom na-keko bɩɩ, sore ka boe? Tɩ yɔ bɩɩ tɩ da yɔ?» 15Tɩ Azezi bãŋɛ tɩ ba boorɩ tɩ ba bẽrɛ ẽŋa mɛ, soke ba yetɩ: «Bẽm tɩ ya bẽta ma? Tarɩ-ya lagfɔ wa'am tɩ m bɩsɛ.» 16Tɩ ba tarɩ lagfɔ la wa'am wa bɔ ẽ. Tɩ Azezi soke ba yetɩ: «Ãne yinyisŋa, la ãne yʋ'ʋrɛ n gʋlsɛ a zuo?» Tɩ ba lerge yetɩ: «La de la Rom na-keko la.» 17Tɩ Azezi yele ba yetɩ: «Bɔ-ya na-keko la ẽŋa n soe bõn-sɛka, dee bɔ Nawẽnnɛ ẽn soe bõn-sɛka.» Tɩ Azezi yetɔga la di'ige ba.

Ba soke Azezi kũm vo'ore yelle

(Amatie 22:23-33, Aluki 20:27-40)

18Saduse dõma n yetɩ nẽra sãn ki a kãn vo'oge la, bãma nẽrba basɛba n wa'am Azezi zẽ'am wa soke ẽ yetɩ: 19«Karẽnsãama, Amoyisi yʋʋn gʋlsɛ bɔ tõma yetɩ: ‹Nẽra sɔbia sãn ki deege a pɔga dee ka tara bia, a di pɔkõorɛ la dɔgɛ kɔma bɔ sɛka n ki la.› 20La bʋraasɩ bayopɔɩ n daan boe dɛna sɔbiisi. Tɩ pɔspɔsɩ dãana la di pɔga, ki dee ka dɔgɛ bia. 21Tɩ bʋyi dãana la di pɔkõorɛ la, mẽ ki dee ka dɔgɛ bia. Tɩ bʋtã dãana la mẽ ẽŋɛ bɛla. 22La bãma bayopɔɩ la wuu lagɩm di pɔka la mɛ, ki dee ka dɔgɛ bia. Bɛla poorʋm tɩ pɔka la mẽ ki. 23Bãma bayopɔɩ wuu n lagɩm di pɔka la dee ki la, ba sãn wa vo'oge kũm vo'ore daarɛ, ãne n wʋn sɔna pɔka la?»

24Tɩ Azezi yele ba yetɩ: «Ya tuuge mɛ, yãma n ka mi Nawẽnnɛ gõŋɔ n yele se'em, la Nawẽnnɛ pãŋa n ãn se'em na ĩyã. 25Kũm vo'ore daarɛ, bʋraasɩ ka diti pɔgba, la pɔgsɩ mẽ ka ellɩ sɩrba, ba wuu wʋn ãna wʋ malɛkadõma n boe Nawẽnnɛ yire la. 26La sãn dɛna kũm vo'ore yelle, yãma nãn ka karẽŋɛ Amoyisi gõŋɔ la pʋam Nawẽnnɛ n yʋʋn ze'ele tũntuugo la pʋam tɔgɛ la ẽ se'em na? A yʋʋn yele yetɩ: ‹Mam de la Abraham, la A'izakɩ, la Azakɔbɩ Nawẽnnɛ.› 27La pa'alɛ tɩ bãma wuu vɔa mɛ Nawẽnnɛ zẽ'am, se'ere n soe la, Nawẽnnɛ dagɩ sɛba n ki Nawẽnnɛ, a de la sɛba n vɔa Nawẽnnɛ. Ya tuuge mɛ zozo'e.»

Nawẽnnɛ n bɔ nõorɛ tɩ ba ɩta se'em na, bõn-kãna n gãnnɩ?

(Amatie 22:34-40, Aluki 10:25-28)

28Tɩ lɔɔ karẽnsãandõma nẽra ayɩla wõm ban tɔgrɩ la taaba, dee bãŋɛ tɩ Azezi lerge Saduse dõma la sõŋa, tɩ a lɛm ẽ, soke ẽ yetɩ: «Nawẽnnɛ n bɔ nõorɛ tɩ ba ɩta se'em na wuu pʋam, bõn-kãna n gãnnɩ?» 29Tɩ Azezi lerge ẽ yetɩ: «Sɛka n gãnnɩ wuu n wãna: ‹Ɩsrayɛlɩ dõma, selse-ya. Zuudãana n de tɩ Nawẽnnɛ na, de la Zuudãana ayɩla. 30Nõŋɛ Nawẽnnɛ n de fʋ Zuudãana la fʋ sũure wuu, la fʋ sɩa wuu, la fʋ yɛm wuu, la fʋ pãŋa wuu.› 31La bʋyi dãana n wãna: ‹Nõŋɛ fʋ tadãana wʋ fõn nõŋɛ fʋ mẽŋa se'em na.› Nõorɛ ayẽma ka boe n gãnnɩ bãna.» 32Tɩ lɔɔ karẽnsãama la yele ẽ yetɩ: «Karẽnsãama, fõn yele se'em na ãn sõŋa, la de la sɩra, Nawẽnnɛ de la ayɩla, ayẽma ka boe sãn dagna ẽŋa mã'a. 33Fʋ nõŋɛ Nawẽnnɛ la fʋ sũure wuu, la fʋ yɛm wuu, la fʋ pãŋa wuu, la fʋ nõŋɛ fʋ tadãana wʋ fõn nõŋɛ fʋ mẽŋa se'em na, ãn sõŋa mɛ gãnna kãabgɔ buuri wuu.»

34Tɩ Azezi yẽ ẽn lerge la yɛm na, tɩ a yele ẽ yetɩ: «Fʋ ka zãagɛ la Nawẽnnɛ so'olʋm.» Tɩ nẽra nẽra ka le saagɛ soke ẽ sokre.

Krisi de la naba Adavidi Zuudãana

(Amatie 22:41-46, Aluki 20:41-44)

35Azezi n daan zãsnɩ nẽrba Wẽnde-kãtʋm na, a soke ba yetɩ: «Wãne tɩ lɔɔ karẽnsãandõma yetɩ Krisi de la naba Adavidi yɩɩŋa? 36Dee tɩ Nawẽnnɛ Sɩa yʋʋn botɩ Adavidi mẽŋa tɔgɛ yetɩ:

‹Zuudãana Nawẽnnɛ yele mam Zuudãana yetɩ,

zĩ'ire m zʋʋgɔ bɔba halɩ tɩ m wa ẽŋɛ fʋ bɛ'ɛba la tɩ ba bɔna fʋ nãma tẽŋa.›

37Adavidi mẽŋa sãn wi ẽ yetɩ: ‹Zuudãana›, la wʋn ẽŋɛ la wãne tɩ a dɛna Adavidi yɩɩŋa?» Tɩ nẽr-kʋʋŋɔ la sɛlsra a yetɔga la sũ-yẽlʋm.

Azezi yele nẽrba tɩ ba da ãna wʋ lɔɔ karẽnsãandõma

(Amatie 23:1-36, Aluki 20:45-47)

38Azezi n zãsnɩ nẽrba la, a yele ba yetɩ: «Guuse ya mẽŋa la lɔɔ karẽnsãandõma n eerɩ kaara la fu-wogro bɔɔra tɩ nẽrba pʋ'ʋsra nã'asra ba da'asʋm, 39dee bɔɔra nã'asgɔ zẽ'esɩ wẽndeto pʋam, la dia zẽ'esʋm tɩ ba zẽa la. 40Ba to'osrɩ la pɔkõpa n tarɩ sɛla la wuu, dee pʋ'ʋsra Nawẽnnɛ pʋ'ʋs-wogro tɩ nẽrba bɩsra ba. Ba wʋn yẽ sɩbgrɛ gãnna wuu.»

Pɔkõorɛ bɔ'a yelle

(Aluki 21:1-4)

41Azezi daan zĩ la Wẽnde-kãtʋm ligri daka la zẽ'am dee bɩsra nẽr-kʋʋŋɔ la n sẽnnɩ ɩta ligri daka la pʋam. Tɩ bõntatba zozo'e ɩta ligri pãɩ. 42Tɩ pɔkõorɛ n de nasa wa'am wa dɩkɛ lig-kõb-pɩgsɩ bayi mã'a ẽŋɛ mĩ. 43Tɩ Azezi wi a karẽnbiisi la, yele ba yetɩ: «Mam yetɩ ya la asɩra, tɩ pɔkõorɛ ẽna n de nasa la ẽŋɛ ligri daka la pʋam zo'oge gãnna ba wuu mɛ. 44Se'ere n soe la, bãma wuu looge la bãma n tarɩ sɛla pãɩ la pʋam wa ẽŋɛ mĩ. La ẽŋa n de nasa la, dɩkɛ la a dia ligri wuu wa ẽŋɛ mĩ.»

Currently Selected:

Amarkɩ 12: gurDBL

Highlight

Copy