Amatie 17

Azezi nẽŋa teere

(Amarkɩ 9:2-13, Aluki 9:28-36)

1Dabsa ayoobɩ n daan tole, tɩ Azezi botɩ Apɩyɛɛrɩ, la Azakɩ, la a yɩbga Azã doose ẽ sẽŋɛ kẽnkɛrŋa ka zom tãn-kãtɛ zuo. 2Tɩ a nẽŋa teege ba nẽŋam, yẽgra wʋ wʋntɛɛŋa la. Tɩ a futo pelge halɩ wʋ peelem na. 3Tɩ Amoyisi la A'eli puke ba zẽ'am tɔgra la Azezi. 4Tɩ Apɩyɛɛrɩ yele Azezi yetɩ: «M Zuudãana, tõma n boe kalam wã, la ãn sõŋa mɛ. Fʋ sãn bɔɔra, mam wʋn tĩ põnsɩ batã, bɔ fõn ayɩla, bɔ Amoyisi ayɩla, bɔ A'eli ayɩla.» 5La ẽn nãn ken bɔna mĩ tɔgra la, tɩ sawatɛ n yẽgrɩ wa'am wa lile ba. Tɩ kõa ze'ele sawatɛ la pʋam yetɩ: «Ẽna de la mam Dayʋa tɩ mam nõŋɛ la m sũure wuu, a paagɛ la mam yɛm. Selse-ya a yetɔga.» 6La a karẽnbiisi la n wõm bɛla la, tɩ dabeem yõkɛ ba zozo'e, tɩ ba lui dɩkɛ nẽnsɩ võglɛ tẽŋa.

7Tɩ Azezi lɛm kalʋm ba yetɩ: «Isge-ya, da zoe-ya dabeem.» 8Tɩ ba gorge bɩsɛ, ka le yẽ nẽra, sãn dagna Azezi mã'a.

9La ban daan ze'ele tãŋa la zuo sigra la, Azezi kã'an ba yetɩ: «Da yele-ya nẽra sɛla tɩ ya yẽ wã, sãn dagna tɩ Nẽrsaala Dayʋa la wa ki mɛ dee vo'oge.» 10Tɩ a karẽnbiisi la soke ẽ yetɩ: «Wãne tɩ lɔɔ karẽnsãandõma yetɩ, dẽnɩ tɩ A'eli wʋn dẽŋɛ Krisi wa'am?»

11Tɩ Azezi lerge ba yetɩ: «La de la sɩra tɩ A'eli n wʋn dẽŋɛ wa'am wa le malgɛ sɛla woo. 12La mam yetɩ ya mɛ tɩ A'eli põn wa'am mɛ, tɩ ba ka bãŋɛ ẽ, dee ẽŋɛ ẽ ban boorɩ se'em. Ba mẽ wʋn nãmsɛ Nẽrsaala Dayʋa la bɛla.» 13Tɩ a karẽnbiisi la yãŋa bãŋɛ tɩ la de la Azã n daan misri nẽrba ko'om pʋam na yelle tɩ a tɔgɛ.

Kinki'ire n tarɩ bia, tɩ Azezi botɩ a yẽ ĩmã'asʋm

(Amarkɩ 9:14-29, Aluki 9:37-43)

14Ban daan lebe ka paara nẽr-kʋʋŋɔ la zẽ'am na, tɩ bʋraa wa'am wa yigle Azezi nẽŋam, 15yele ẽ yetɩ: «M Zuudãana, zoe m dayʋa ninbãalga, a luti la kinki'ire tɩ la nãmsra ẽ zozo'e. La sãn ẽn girge ẽ, a luti la bugum pʋam, bɩɩ ko'om pʋam. 16Bɛla tɩ mam tarɩ ẽ wa'am fʋ karẽnbiisi la zẽ'am, la ba ka yãŋɛ botɩ a yẽ ĩmã'asʋm.» 17Tɩ Azezi yele ba yetɩ: «Zamãan-ẽna nẽrba, ya ka bɔ'ɔrɩ mam sɩra, la ya ka ɩtɩ sõŋa. Mam wʋn bɔna la yãma, mã'agɛ m mẽŋa halɩ ka paagɛ la wakat-kãna? Tarɩ-ya bia la wa'am.» 18La Azezi daan tãsɛ kʋlkã'arga la mɛ, tɩ a yese dee basɛ bia la, tɩ a yẽ ĩmã'asʋm bilam mẽŋa.

19Tɩ karẽnbiisi la sẽŋɛ Azezi zẽ'am bãma mã'a, ka soke ẽ yetɩ: «Bẽm tɩ tõma ka yãŋɛ dige kʋlkã'arga la tɩ a yese?» 20Tɩ a lerge ba yetɩ: «Yan ka bɔ sɩra zo'oge la ĩyã. Mam yetɩ ya la sɩra sɩra, tɩ yãma n bɔ mam sɩra la, sãn ãna baa pɩka wʋ sɔ'ɔrɔ biire la, ya tã wʋn yele tãn-ẽna yetɩ: ‹Vurge sẽŋɛ ke›, la a wʋn ẽŋɛ la bɛla. La sɛla ka boe tɩ ya kãn tã'agɛ ẽŋɛ. [ 21La de la pʋ'ʋsgɔ, la nõorlʋa mã'a tɩ ya wʋn yãŋɛ dige kʋlkã'ar-ẽŋa buuri.]»

Azezi le tɔgɛ a kũm, la a vo'ore yelle

(Amarkɩ 9:30-32, Aluki 9:43-45)

22Daarɛ ayɩla tɩ Azezi la a karẽnbiisi la lagɩm bɔna Galile, tɩ a yele ba yetɩ: «Ba wʋn dɩkɛ Nẽrsaala Dayʋa la ẽŋɛ la nẽrba nu'usum, 23tɩ ba kʋ ẽ. La dabsa atã daarɛ a wʋn vo'oge mɛ.» Ẽn yele bɛla la, tɩ ba sũure sã'am zozo'e.

Wẽnde-kãtɛ lampo yʋa yelle

24Azezi la a karẽnbiisi la daan paagɛ la Kapɛrnaʋm tẽŋa, tɩ Wẽnde-kãtɛ la lampo-tɔ'ɔsrɩba sẽŋɛ ka soke Apɩyɛɛrɩ yetɩ: «Ya karẽnsãama la yɔɔrɩ Wẽnde-kãtɛ la lampo mɛ bɩɩ?» 25Tɩ a lerge yetɩ: «Ẽe, a yɔɔra.» Tɩ Apɩyɛɛrɩ kule yire, tɩ Azezi dẽŋɛ soke ẽ yetɩ: «Asimõ, fõn tẽ'esrɩ tɩ dũnia wã na'adõma to'osrɩ ba lampo la ãndõma zẽ'am? Tẽŋa dõma zẽ'am bɩɩ, sɛba n de sãama la zẽ'am?» 26Tɩ Apɩyɛɛrɩ yetɩ: «Sãama zẽ'am.» Tɩ Azezi yele ẽ yetɩ: «Bɛla, tẽŋa la dõma nẽŋa ka boe mĩ. 27La tõma n ka boorɩ tɩ tɩ sã'am ba sũure la ĩyã, sẽŋɛ ka lobge zũmbãŋa mõgrɛ pʋam, fõn yõkɛ zũn-sɛka yiɛn na, fʋ ya'agɛ a nõorɛ, tɩ fʋ wʋn yẽ lag-kõbrɛ, dɩkɛ sẽŋɛ ka yɔ mam, la fõn ĩyã.»

Currently Selected:

Amatie 17: gurDBL

Highlight

Copy