Salmo 96
96
No Dios a iya so makakniknin a Patol
1Makanta kamo so vayo a kanta do Dios! Pakantay no atavo do mondo aya do Dios! 2Makanta kamo do Dios as kadaday nio sia! Ipayvahevahey nio a kararaw o balita aya do nakalibri na diaten. 3Ipayvahevahey nio o pakaknikninan na do atavo a nasion. Ipayvahevahey nio pa do atavo a tawo o makakniknin sa a pinarin na.
4Oyod a mato o Dios dawa pamatohen ta sia a dadayen. Torohan ta sia so onor a iya so mamanito kano atavo a anianiven. 5Ta sira o diosdiosan sa no kadwan a nasion am idolo a abo so ipakapamarin pero no Dios o minamaog so tohos. 6Mian sia do panghovokan no onor kano sehdang. Mapno no avid kano ipakapamarin o templo na.
7Dadayen o Dios, inio atavo a tawotawo do tana aya. Dadayen ta sia do ipakapamarin kano pakaknikninan na. 8Dadayen o mato aya a ngaran na. Manangay kamo so itoroh nio sia do templo na. 9Komheb kamo a omdaday so Dios. Omlayin kamo atavo do salapan na.
10Vatahen nio do atavo a nasiones, “No Dios o Patol! Pinaytetnek na so mahni o tana aya a dia magliglit as maypatol anti sia so mahosto do atavo a tawotawo.” 11Maytavo a masoyot! No tana, no tohos, no taaw as kano atavo sa a inamaog dia, 12no katakyan kano atavo a mian daw! No kakayoan am mangyaw no soyot, 13do kawara anti no Dios a maypatol do tana aya. Ta maypatol anti sia a mahosto as abo so kapangatatarek do atavo a tawotawo.
Currently Selected:
Salmo 96: VTSP
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
