Salmo 104
104
No kadaday so Dios a nangamaog
1Dadayen ko o Dios so pasivogen ko do tawol ko. Imo o oyod a mato a Dios ko as Apohen ko. Oyod ka mato so onor kano ipakapamarin. 2Sehdang o akmay onayen mo as no tohos aya am pinarin mo a akmay tolda mo. 3No danom do tohos aya o katnekan no vahay mo. No kademdeman kano salawsaw o sakayan mo. 4Pachirawatan mo sa o angheles as matovoy a matatarek so kaparin a akma so apoy kano salawsaw.
5Pinatetnek mo so mahni o tana aya as magliglit ava anti ya. 6No taaw aya am pinakakma moy mavolay a lamit do ato no tana aya as aran no katokotokonan am natenep. 7As do chirin mo am nayadis o taaw aya do nakadngey na so mando mo dia. 8Minoyog ya a yapo do katokotokonan a mangwan do karatayan na as kangay na do niprepara mo a yanan na. 9Tinodin mo o pamandan no taaw aya tapian di dana mirwa matenep o tana aya.
10Pinarin mo sa o atboran do ratay sa as kawyog no danom do ahsong sa do paytaywawan da no tokotokon. 11Tomoroh sa ya so danom do atavo a vinyay do takey. Diaya o paboan da sia no volaw a kabayo o kawaw da. 12Do kakayoan sa do omdivon am makakanta sa o manomanok as kapamarin da daw so otioyan da.
13Pagtinen mo do katokotokonan o timoy a yapo do kademdeman as kapanalasal mo so bendision mo do tana aya. 14Patovohen mo o dibobot tapian mian o kanen da no baka. Patovohen mo o mohamoha sa tapian mian o yanien no tawo a kanen na. 15Parinyen mo o kasi no obas kano olivo a hapan so vino kano haneng a tomoroh so kayayakan. Aran no tinapay a tomoroh diamen so ayet am yapo pa dimo, O Dios.
16Diligan sa no Dios no timoy o nimoha na sa kayo. No kayo saya a sedro do Lebanon am nimoha na sa, 17as dawri do kakayoan saya o pamarinyan da so otioyan da no manomanok. 18No makakarang sa a tokon am vahay da no volaw a kaddin. No kabatoan sa am vahay da no koneho.
19Pinarin mo o vohan do tohos a tayongkad no tiempo. Pinarin mo o araw a makapanmo so kasdep na do makoyab. 20Pinarin mo o mahep as do kasarisarian no ahep am mayvidividi sa o volaw a vinyay. 21Mangyaw sa o leon do kachita da so kanen da a nia so yapo do Dios. 22An maysehsehdang dana am mayvidi sa do achip da a makaycheh. 23Mangay a maytrabaho o tawo do maraw a manda do kapaysarisari narana.
24Apo, tayto oyod a aro o pinarin mo as ay so karakoh no kasolivan mo do nakaparin mo so atavo! Mapno o tana aya no inamaog mo sa a imo so taydira sia atavo. 25Pinarin mo o mawvong aya a taaw a yanan da no dia vidangi a rarakoh kano dedekey a inamaog mo. 26Maybiahe sa dia o bapor. Dia pa o payayayaman ni Leviathan a asa ka oyod a rakoh a inamaog.
27Atavo sa o inamaog moaya am machidepende sa dimo do itoroh mo a kanen da a kararaw. 28Itoroh mo o kanen da a iyangay da ahapen as kaoyod da makamia. 29An kanonolayan mo sa am mamo sa ta an hapen mo o kaynawa da am mayvidi sa do tana a pinakayapoan da. 30Do nakatovoy mo so Espirito mo am inamaog sa as imo o omyavayo so viay do ato no tana aya.
31Kavidinay na diabdibdis no ipakapamarin no Dios a abo so pandan! Kasoyotay nia no Dios o atavo a pinarin na! 32Omlayin o tana aya do katod na tiban dia no Dios as mayahob sa o tokotokon do katodo na sira.
33Mintras maviay ako am makakanta ako so idaday ko so Dios. Mintras maviay ako pa am makakanta ako so idaday ko so Dios koaya. 34Ichahoho ko an ipakamia na o kanakenakem ko sia do kanta ko takwan no kasoyosoyotan koaya am yapo sia. 35Pabohen sa anti o atavo a makagatogatosen do ato no tana aya. Mabo sa anti o atavo a makagatogatosen.
Dadayen no tawol ko o Dios!
Dadayen o Dios!
Currently Selected:
Salmo 104: VTSP
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
