Proverbo 8

No kapamato so mapía a kasolivan

1Manngey kamo! Ta no kasolivan am tomawatawag. No mapía rason am tayto na katalamaren o kadngey sia. 2Maytetnek ya do makarang a logar do payis kano paykorokorosan no rarahan. 3Do ayeran as kano asdepan sa no kavahayan am tomawatawag sia. 4Vatahen na, “Tayto koynio a tawatawagan atavo, inio atavo a mian do ato no tana aya. 5Mametdeh ka paro pa? Machinanawo ka tapian mian o kapanmoan mo sia. Kolang ka paro so prinsipio do viay mo? Machinanawo ka a mian so mapía a prinsipio do viay mo. 6Adngeyen mo sa o mapipia saya a pavatahen ko, ta mahosto kano mayanong atavo o vatahen ko. 7Voyvoh o kakawyoran a pavatahen ko, ta oyod ko a ipsok o daday. 8Oyod atavo o vatahen ko as arava o daday anmana vatahen ko a mapaychawaw. 9Do marahem so kapanmoan so atavo am masehdang o atavo. Do rakoh so nahap a nanawo am maklaro o atavo. 10Pidien mo o nanawo asna no polak ava. Pidien mo o kayan no mapanmo asna no vohawan ava.

11“Yaken o mapía a prinsipio. Mapipia ako kano briliante. 12Yakan o mapía a prinsipio. Marahem o kapanmoan ko so atavo as kahosto no kasinchad ko do mapía kano marahet. 13No kasinchad do Apo taya am no kasoli no marahet. Ipsok ko o kaoyod a mato kano mahambog, marahet a kaparin kano daday. 14Mayplano ako as kapatongtong ko sira ya. Mian o mapia a pangtoktoan ko as mian o ayet ko. 15Sidongen ko sa o patol a manyokoyokod as kapawnot ko sira a mamarin so onoonotan sa. 16No atavo a manyokoyokod do tana aya am makapanyokoyokod do sidong ko, aran sira o matatarek a ofisiales kano mian so anongen. 17Ichaddaw ko sa o maddaw niaken. Mavoya da yaken no atavo a komitachita diaken. 18Tomoroh ako so kaynakman, onor as kano mapía viay. 19No mahap nio diaken am mapipia kano máynyen dana no vohawan kano polak. 20Mayam ako do panahanan no kanamonamoan as kawnot ko do rarahan no hostisia. 21Tomoroh ako so kaynakman do maddaw niaken as kapno ko so vahay da no rakoh so balor a kaynakman.

22“Yaken o nanoma a amawgen no Apo taya. Yaken o nanoma do natrabaho na kaychowa. 23Inamaog na yaken do sitnanan na do kabo pa no mondo aya. 24Mian ako na do kabo pa no taaw kano atboran sa no danom. 25Nanmanma ako pa kanira no katokotokonan. Nanma ako pa kano nakaparin da. 26Mian ako na a manam so nakamaog sia no Dios o tana aya anmana manam so kayan no aran asa ka kemkem a tana. 27Mian ako na do nakamaog na so kademdeman as kaakma nay minvolay sia ya do ato no taaw. 28Mian ako na do nakapangay na so demdem do tohos as kaywang na do atbod sa do taaw. 29As niyokoyokod na o taaw a di manghavas kano tinongdo na a pamandan na. Mian ako na do nakapatnek na so paywayaman no tana aya. 30Machitangked ako sia a akmay asa ka arkitekto. Yaken o pakayapoan no kasoyosoyotan na as mian ako a masoyot do presensia na 31a makamia no mondo aya as kano inamaog a tawo.

32“Dawa inio a makahenakan a mahahakay am adngeyen nio yaken. Parinyen nio o vatahen ko sa dinio tapian mian o soyot nio. 33Adngeyen nio o inanawo dinio. Kanonolay nio sava ya asna makasolib kamo. 34Masoyot o tawo a domngey diaken, aran no tawo a akmay fermi do pantaw no vahay ko a kararaw a ompanaya so kasdep na do vahay ko. 35No tawo a makapamondan diaken am makapamondan do viay as oyod anti sia ipakamia no Apo taya. 36No tawo a di makapamondan diaken am no pakasisian na o kapamondan na. An sino o omkontra diaken am ichaddaw na o kadimanan.”

Currently Selected:

Proverbo 8: VTSP

Highlight

Copy