Proverbo 4
4
No mapia vahes do komita so kasolivan
1Inio a kamanganakan ko, adngeyen nio o vatahen dinio no ama nio as kapiahen nio sa ya onotan tapian maypangay o kapia no pinangtoktoan nio. 2Mapia o inanawo ko dinio as dawa fermi nio sa ya naknakmen. 3Do kadekey ko pa a voyvoh a anak no inyapoan ko sa, 4am ninanawo ako no ama ko as vinata na, “Kanakmen mo sa o vatahen ko dimo as kawayakan mo sava ya onotan, ta nia sa o mismo a tomoroh dimo so viay. 5Pachinanawan mo o vatahen ko saya dimo as kawayakan mo sava ya. Chitahen mo o karapa mo dia o kasolivan kano mapia a pinangtoktoan mo. 6Tadichokoran moava o somnivog a kasolivan, ta nia o tomoroh dimo so proteksion. Baloran mo ya ta nia o machonong dimo. 7No importánte dana dimo am no kachita mo sia paypangayen o kasolivan mo. Pawyoren mo ya chitahen kano katodahen. 8Baloran mo o kasolivan, ta nia o tomoroh dimo so onor kano anib no kadwan. 9No kasolivan o tomoroh so kompleto a pakamian mo.”
10Adngeyen mo yaken, imo a manganak ko. Kapiahen mo a iktokto o vatahen ko saya dimo, ta nia o tomoroh dimo so manaro a viay. 11Pinaynananawo koymo as kapawnot ko dimo do mapia a kaparin no viay. 12Dawa masaloval ava o plano mo sa an mian o somnivog a kasolivan mo. Madodog kava anti a aran do kapayalisto mo do viay mo. 13Fermi mo a naknakmen o nahap mo a nanawo, ta nawri o tomoroh dimo so viay. 14Mangay kava do angayan da no makagatogatosen a tawo as kano machitaha kava do mararahet sa a parinyen da. 15Machivawa ka do atavo a parinyen kano aktoktohen a marahet as kavidin mo a omparin so mayanong. 16Makapakaycheh sava ya an abo o marahet a pinarin da. Maydamnay sava an abo o pinakasiasi da a kadwan do araw aw. 17Akma day kanen kano inomen o kapamarin da so marahet.
18No panahanan no tawo a manamonamo so viay am akmay sehdang do kamalatiat a tod a mayparial do kapaypamaraw na, 19asna no panahanan da no makagatogatosen am akma so kasari no ahep a di pakavoyan an ango ichadodog da.
20Manganak, adngeyen mo o vatahen ko dimo so kapiahen. 21Kawayakan mo sava ya asna onongan mo sa ya do tawol mo, 22ta nia o tomoroh so viay kano mapia inaynawan do omonot dia. 23Makapatak ka do iktokto mo, ta an ango iktokto mo am nawri o ompawnot so viay mo. 24Maydaday kava kano manerbi kava so chirin a mapaychawaw. 25Makagsal ka a somalap so viay a abo so pakayapoan no kasnek mo. 26Makapatak ka do panahanan mo tapian masigorado mo o kapayanong no kaparin no viay mo. 27Maniwasiwal kava as kafermi mo a machivawa do marahet.
Currently Selected:
Proverbo 4: VTSP
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
