Proverbo 2
2
No mapia resolta no kasolivan
1Manganak, onotan mo o nanawan ko dimo as kadi mo makawayakan do yokoyokoran ko saya nimo. 2Adngeyen mo o mapia a konseho as kapakapia mo sia intindien. 3Pasivogen mo o kachita mo so kasolivan kano mapia a kapakaintindi. 4Pawyoren mo ya a chitahen a akma so kapawyod mo sia a chitahen o polak anmana no natayo a kaynakman. 5Ta an nia o parinyen mo am mapanmo mo o inmonmoan no kasinchad do Apo taya as kapaypangay no kapanmo mo so komwan do Dios. 6Ta no Apo ta Dios o tomoroh so kasolivan, as yapo pa sia o atavo a kapakaintindi kano kapanmoan so mayanong. 7No Apo taya o tomoroh so sidong kano proteksion do atavo a manamonamo so viay. 8Pachonongan na sa o mapia so kawnot sia as kanira pa no mapia so dadakay do kadwan.
9An onotan mo sia am mian o kasolivan mo a ompidi so mayanong a nawri dana so parinyen mo do kapayengay mo a tawo. 10An mian o kasolivan mo am nia o tomoroh dimo so kayayakan mo. 11No kapakaintindi kano kapanmoan mo so mayanong am tomoroh dimo so proteksion, 12as kapavawa na dimo do marahet sa a pariparinyen kano tawo a maychirin so ipaydidiman, 13a sira so tayto dana tomnadichokod do manamonamo a kaparin no viay a omonot dana do viay do kasarisarian no gatos, 14a sira pa so makonswelo no kapamarin so marahet kano todango a di mayanong a parinyen. 15Maparin sava ya ichasaray kano panganohdan.
16No mapia aya a kasolivan o ompavawa pa dimo do malalapos a mavakes a manentasion no vatavatahen da. 17Nia sa mavavakes am karoan da sa o kakovot da as katadichokod da pa dia o pinaypromisan da do kapaychakovot da. 18Akma ka nay mangwan do kadimanan mo an mangwan ka do yanan da as makavolaw ka pava. 19Makapayvidi pa sava o mangay dira ta iyawaw da o rarahan aya no viay.
20Dawa onotan mo o viay da no mapipia a tawo as kachita mo sia o kapakanamonamo mo so viay. 21Ta sira o manamonamo kano abo so kaparoparoan do viay da am rawaten da o kasoyosoyotan do tana aya. 22Pero sira o marahet so kaparin a viay am rarayawen sa no Dios a akma so kabotbot so tamek a ipoha.
Currently Selected:
Proverbo 2: VTSP
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
