Proverbo 18
18
1No tawo a nawri so onotan o ichakey na am makapachisondo ava do kadwan. Fermi na sobnahen o anohdan no kaaroan no tawo.
2Do abo so pinangtoktoan am arava o sinmo no aran ango a kasolivan asna nawri o ichakey na o kavahey na no kayan no mapanmo na.
3Fermi a mayrayay o kapakagatos kano pakasnekan as an mabo o anib no tawo dimo am no katek nimo o mahap mo.
4No vahevahey no asa ka tawo am maparin a asa ka atboran no kasolivan. Marahem a akmay taaw as manamonamo a akma so danom no atbod.
5Mayanong ava o katagom do nakagatos as kabo no hostisia do abo so sinadan.
6No vahevahey no abo so mapia a pinangtoktoan am pakayapoan no kapaysosobna kano kapaydidiman. 7No vahevahey na nia o mismo a omrarayaw so karakohan na.
8Oyod a makakeakey a adngeyen o kapaychirichirin so marahet do kadwan. Akmay masdep ya kanen.
9No matalakak am kakteh no makeakeyen a mayrarayaw.
10Oyod a mahni a pasarayan o Dios. Sira o manamonamo so viay am machipel sa sia.
11Ichasaray da no may-inakem o kaynakman da a omlibri sira a akma so kaproteksion dia no makarang a gadagada o asa ka kavahayan.
12Arava o pamanpandan no kahambog an dia do kararayawan. No mapamahbo am makarawat so onor.
13Dekey o pinangtoktoan no dia manngey as manmanma tombay.
14Makangdet ka ta nia o tomoroh so ayet do kaganit mo. An abo ya am nabo dana o akey mo a maviay.
15Fermi na chitahen no rakoh so kasolivan o karapa na pa do napanmo na.
16Oyod a masonong o kasinchad da dimo no mato a tawo an torohan mo sa so regalo.
17Maparin a panganohdan o asa ka testigo katadkan na an mian o machitarek a testigo a omproyba do daday na.
18An mian sa o maysobna a dia makapaysondo am mapia an maysoswerte sa ya.
19Sidongen mo o kakteh mo as pasolien moava ta akma so kasadit no kasdep do nitahtahan a ayeran o kasadisadit no kapaysondo nio a mirwa.
20Arava o kadwan a makarawat so resolta no vinatavata mo an dia voken a imo. 21No rida am maparin a tomoroh so viay anmana kararayawan. Dawa makapatak ka do atavo a vatahen mo.
22Mapalak o mahakay a nakavoya so kakovoten na. Ta no kakovot naya am bendision sia no Dios.
23An mangahes o makasiasi am machisiasi, pero no maynakem am oyod a malotod a tombay.
24Mian sa o toman a kayvan as mian sa o somnivog a kayvan a akma mo nay kakteh.
Currently Selected:
Proverbo 18: VTSP
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
