Marcos 6

Si Jesus Diyà te Neserit

(Marcos 6:1-6; Mateo 13:53-58; Lucas 4:16-30)

1Ne mid-awà si Jesus dutun te inged ne mid-ulì diyà te inged din, diyà te Neserit. Ne nemenduma kandin is menge sumusundan din. 2,3Ne zutun te andew he Sebadu he iyan mahal he Andew te Kedhimeley, mibpenurù ni Jesus is menge etew ziyà te seled te simbahan te menge Hudiyu. Mezakel he menge etew is nengetig̵um dutun, ne utew zan nengeinuinu is ebpememineg ki Jesus. Ke sikandan te, “Iyan sikandin sikan is pandey. Is iney zin, ne si Maria ne menge suled din ensi Santiago, si Jose, si Hudas, wey si Simon. Is menge etevey zin, ne kayi zà daan te inged tew. Maan is metau sikandin? Hendei zin buwa mekuwa is ketau zin? Maan is ebpekehimu sikandin te menge egkein-inuwan?” Ne zutun, wazè dan dewata is ibpenurù ni Jesus. 4Ne zutun, migkag̵i si Jesus diyà te kandan te, “Is ebpeneuven te Megbevayà, kenà sikandin edtehuzen te menge kezuzumahi zin wey te menge zuma he etew zuen te keugelingen din he inged, iyan, diyà te zuma he menge inged edtehuzen mulà sikandin,” ke sikandin. 5Umba, wazà egkein-inuwan he ingkepaahà ni Jesus dutun he inged. Pira zà dutun he egkengezeruwan is midepenetan din te velad din ne nengeulian sikandan. 6Ne utew neinuinu si Jesus su wazà medtuu kandin is menge etew zutun he inged.

Ne zutun midtukid ni Jesus te ebpenurù is menge siringan he inged dutun.

Is Telaan ni Jesus te Menge Sumusundan Din

(Marcos 6:7-13; Mateo 10:5-15; Lucas 9:1-6)

7Ne midtig̵um din sikan is sepulù wey zezuwa he menge sumusundan din su ibpehipanew zin. Mibpemahinbahin din sikandan te tigduwazuwa. Ne mibpemeg̵ayan din daan sikandan te g̵ehem te kebpeguwà te mezaat he mulin-ulin. 8Ne midteleenan din sikandan he ke edhipanew zan, iyan dan dà uwita is tuked dan ne kenè dan med-uwit te keenen, kemuyut, wey minsan selapì. 9Idtug̵ut kandan is kedsesepatus, iyan, kenè dan med-uwit te ed-ilisan dan he ugelingen. 10Ne ke si Jesus diyà te kandan te, “Emun ebpekeuma kew ziyà te sengeinged kinahanglan he is egkepemenehikan niw he valey ne zutun kew zà uliulì taman te ked-awè niw zutun. 11Ne ke zuen inged he kenè kew zuen igalewg̵alew wey kenè dan ebpemineg̵en is ibpesavut niw, ne tektaka niw is eliyavuk diyà te menge paa niw he iyan lag̵uy he edsilutan sikandan te Megbevayà.” 12Ne zutun, nenhipanew haazà is menge sumusundan ni Jesus ne impesavut dan he kinahanglan he iniyug̵i te menge etew is memezaat he ulaula. 13Ne mezakel is menge mezaat he mulin-ulin he ebpenlalung te menge etew he impemaawè dan ne mezakel zaan is egkengezeruwan he mibpenheplasan dan te lana ne nengeulian.

Is Kebpatey ni Juan Megbebewtismu

(Marcos 6:14-29; Mateo 14:1-12)

14Ne nezineg ni Hadì Hirudis is tudtul kayi te mid-ulaula eni Jesus su nevantug en si Jesus diyà te minsan hendei zutun. Ne zuen menge etew he migkag̵i te, “Heini si Jesus, ne iyan si Juan Megbebewtismu he nevanhew umba zuen din gehem wey zin meveeli is menge iring kayi he singyal.” 15Ne migkag̵i is duma te, “Iyan si Jesus sikan is ebpeneuven dengan he si Elias.” Ne migkag̵i is duma pa te, “Ebpeneuven iyan si Jesus he iring te menge tipehuna he ebpeneuven dengan te Megbevayà,” edhenduen dan.

16Iyan, hein nezineg ni Hadì Hirudis haazà is egkeg̵iyen dan, kunaan din ke nevanhew si Juan, ne ke sikandin te, “Heini si Jesus, ne iyan ded si Juan Megbebewtismu he mibpepungelan ku te ulu ne nevanhew sikandin.” 17,18Ne heini si Hadì Hirudis, iyan hinungdan he ingkepehimetayan din si Juan su migkeg̵iyan sikandin ni Juan he supak te kesug̵uan is ked-eg̵awa zin te esawa te suled din su si Hadì Hirudis, mid-esawa zin is ipag din he si Hirudyas he esawa te suled din he si Felipe. Ne tenged dutun te migkag̵i ni Juan, impezakep sikandin ni Hirudis ne mibpirisu zin. 19Ne si Hirudyas, nepeukan din si Juan, ne ebpehimetayan din pezem, iyan, wazà itug̵ut ni Hadì Hirudis. 20Ne si Hadì Hirudis, egkehandek sikandin ki Juan su netuenan din he metazeng he etew si Juan he ed-ulinan te Megbevayà. Umba wazè din itug̵ut he mehimetayi. Egkesuatan ni Hirudis te ebpemineg is kebpenurù ni Juan, iyan, ingkeliveg din haazà is penurù.

21Asal neuma is kedsilibra te andew te ked-enaka ki Hirudis. Ne zutun naahà human ni Hirudyas is paag̵i wey zin ikepehimetayi si Juan. Midtukud ni Hadì Hirudis is dekelà he keemuran ne mibpemesug̵uan din is menge punuan wey is menge egalen te menge sundaru wey is menge sepian diyà te prubinsya he Geliliya. 22Ne sikan is anak he vahi ni Hirudyas, midseled dutun te keemuran ne midsayew ne utew ingkelangan ni Hadì Hirudis wey sikan is ebpemengaan duma kandin. Ne tenged dutun migkeg̵iyan sikandin ni Hadì Hirudis te, “Buyù ka kedì te minsan hengkey ne ibeg̵ey ku kenikew.” 23Ne utew mezesen is pesarig ni Hadì Hirudis dutun te midsayew su ke sikandin te, “Minsan hengkey is ebuyuen nu kedì, minsan ke liwazè pa kayi te ginhedian ku ne ibeg̵ey ku.” 24Ne zutun miguwà haazà is rag̵a ne midhendiyà te iney zin ne mid-insà ke hengkey is meupiya he ebuyuen din. Ne midtavak haazà is iney zin te, “Iyan nu vuyua is ulu ni Juan Megbebewtismu.” 25Ne zutun migaanggaan en maan medseled haazà is rag̵a ne migkeg̵iyan din si Hadì Hirudis te, “Iyan ebuyuen ku g̵untaan dà is iveg̵ey nu kediey is ulu ni Juan Megbebewtismu he id-ahuk diyà te pinggan.” 26Ne zutun utew neseeng si Hirudis, iyan, tenged te utew mezesen is pesarig din he nezineg daan haazà is pesarig din dutun te menge etew he nemenelavuk dutun te keemuran, ne ingkevensahi zin ke kenè din edtumanen haazà is pesarig din. 27Ne midsug̵ù din dutun is sundaru he ipehendiyà te pirisuwan su ibpepungelan din si Juan Megbebewtismu. Ne midhendiyà haazà is sundaru ne mibpungelan din te ulu si Juan Megbebewtismu. 28Ne is ulu ni Juan, in-ahuk te pinggan ne mid-uwit dutun te sundaru ne imbeg̵ey zin dutun te rag̵a. Ne haazà is rag̵a, imbeg̵ey zin haazà is ulu ziyà te iney zin. 29Ne hein netuenan heini te menge sumusundan ni Juan, midhendutun dan te pirisuwan. Ne migkuwa zan is lawa ni Juan ne inleveng dan.

Is Kebpekeena te Lelima he Libu he Menge Etew

(Marcos 6:30-44; Mateo 14:13-21; Lucas 9:10-17; Juan 6:1-13)

30Ne is menge epustul ni Jesus, nekelikù dan diyà te kandin, ne midtudtul zan diyà te kandin is langun he mid-ulaula zan wey impemenurù dan. 31Ne migkeg̵iyan ni Jesus sikandan te, “Edhendiyè kiw zè pa te tanà he wazà duen etew su wey kiw mekehimeley,” ke sikandin. Umba migkag̵i ni Jesus heini su mezakel utew he menge etew is ebpemekedtetelevukè dà diyà te kandin. Ne wazà timpu zan minsan te kegkaan. 32Ne zutun mid-untud dan te avang su edhendiyè dan te tanà he wazà duen menge etew.

33Ne hein egenat dan en naahà sikandan te mezakel he menge etew ne netuenan dutun te menge etew he iyan haazà ensi Jesus. Ne zutun, haazà is menge etew, nemelelag̵uy zan he ebpuun te langun he menge inged dutun, ne nemeyvey zan he edhuna ziyà te egketendangan dutun te avang he mid-untuzan eni Jesus. 34Ne hein migaun si Jesus puun dutun te avang ne neehè din he nengeamur-amur zutun is utew mezakel he menge etew. Ne nehizuwan din sikandan su henduen be sikandan te menge ayam he kerehidu he wazà ed-elima kandan. Utew zan mekehizuhizu. Umba, mezakel is impenurù din kandan dutun. 35Ne hein mahapun en dutun mid-uvayan sikandin te menge sumusundan din ne ke sikandan te, “Mahapun en utew ne wazà menge inged kayi te uvey tew. 36Ipeg̵enat nu en is menge etew wey zan mekehendiyà te menge inged wey menge unayan wey zan mekepemasa te egkekaan dan.” 37Iyan, migkag̵i si Jesus te, “Iyan kew mebeg̵ey te egkekaan dan.” “Es!” ke sikandan, “minsan pa ke utew zekelà is selapì tew, minsan dezuwa he g̵atus he vuuk he selapì he dinaryu ne kenè pa ereg he ibpemasa te egkekaan kayi te utew mezakel he menge etew.” 38Ne migkag̵i zutun si Jesus te, “Susiya niw ke sengemenu is naazen tew he egkekaan.” Ne hein nesusi zan en, ke sikandan diyà te ki Jesus te, “Lelima zà he vuuk he supas wey zezuwa he vuuk he pait.”

39Ne zutun impepundukpunduk ni Jesus is menge etew he impemepinuu zin dutun te perekpek. 40Ne nememinuu zan ne tignenggatus wey kelimahan he etew is kada punduk. 41Ne migkuwa zutun ni Jesus haazà is lelima he supas wey haazà is dezuwa he pait ne midlingahà diyà te langit ne mibpeselematan din te Megbevayà. Ne mibpenevìtevì din is lelima he supas, ne minsan pa zutun kenà egkeamin haazà is edtevien din. Ne imbeg̵ey zin diyà te menge sumusundan din haazà is nengetevì wey zan ikepemeg̵ey zutun te menge etew. Ne iring ded daan haazà is kebpenebtevia zin dutun te zezuwa he pait. 42Ne mibpemengaan dan dutun ne pudu zan nengehantey. 43Ne haazà is egkeenen, nesemaan pa te sepulù wey zezuwa he vinevey is nehimes te menge sumusundan din he menge tevì te supas wey pait. 44Ne lelima he libu is kezakel zutun te menge maama zà he nemekekaan te menge supas ne wazà iragkes te ebilang is menge vahi wey menge vatà.

Is kedhipanew ni Jesus Duen te Ranew

(Marcos 6:45-52; Mateo 14:22-33; Juan 6:16-21)

45Ne impemeuntud ni Jesus te avang is menge sumusundan din wey zan mekehuna mekelayun pehendiyà te zehipag dutun te ranew pehendiyà te inged he Bitsayda su ibpemeulì din pa haazà is mezakel he menge etew. 46Ne hein nekehipanew en haazà is menge etew, midtekezeg si Jesus diyà te vuvungan su mid-ampù. 47Ne hein mezukilem en dutun, haazà is nemen-untud te avang, meziyù dan en su ziyè dan en te lawed dutun te ranew, ne si Jesus, kemulu pa sikandin dutun te vuvungan te sebsevaha zin. 48Ne netuenan ni Jesus he utew edlised haazà is menge sumusundan din he ebpemegsey su egkesinug̵ung dan is mevendes he keramag. Ne hein meg̵aan egkepawà, midtelukun si Jesus kandan is edhipanew ziyà te wahig. Henduen be te edhuna sikandin kandan, iyan, 49hein naahà sikandin dutun te menge sumusundan din is edhipanew ziyà te wahig, nekehuyab is gehinawa zan su kunaan dan ke g̵imukud sikandin. Ne nemen-eerang sikandan 50su pudu zan is nemekeahà kandin, utew nengehandek. Ne zutun migkag̵i ziyà te kandan si Jesus te, “Sarig kew; kenè kew mahandek su iyan a heini,” ke sikandin. 51Ne midruran sikandin dutun te avang dan ne mid-engked haazà is keramag. Ne utew zan si Jesus ingkeinuinu. 52Su minsan neehè dan haazà is egkein-inuwan he mibeelan ni Jesus dutun te supas wey pait, wazè dan pa mesavut ke hentei sikandin su mezesen is isip dan.

Is Kebewii te Menge Etew Ziyà te Giniserit

(Marcos 6:53-56; Mateo 14:34-36)

53Ne hein nekeuma zan diyà layun dutun te ranew nekezunggù dan diyà te inged he Giniserit. 54Ne migaun dan puun dutun te avang ne zutun nekilala si Jesus te menge meg̵inged dutun. 55Ne migègeenan dan ipemetukew is egkengezeruwan diyà te menge siringan he inged. Ne minsan hendei zan egkezineg he zutun si Jesus, ne ebintingen dan is duen din daru su ed-uwiten dan diyà te kandin. 56Ne minsan hendei sikandin ebpevayà, ke ziyè be te menge inged wey menge unayan be, ne zutun gihapun egkeuma zin is egkengezeruwan he ed-uwiten diyà te kandin. Idsavuk dan is egkengezeruwan diyà te lugar he ebelegyaan ne edhengyuan dan si Jesus he minsan bà dà mekeg̵awed haazà is egkengezeruwan te minsan sidsid dà te kumbalè din. Ne minsan hentei he nekeg̵awed te kumbalà ni Jesus dutun, ne neulian.

Currently Selected:

Marcos 6: mbbNT

Highlight

Copy